¹ Zhə̀n ga, lũ gakó Cinu Yi, mà n zə sɛ̃ɛ̃́ dwí gakó n mə n shə́r Zhərəzalɛm ǹdə́ Zhəda né, búrú ǹdə́ nɛ̃̌ ga, ² búlə́ kàndɔ w ǹdə́ shə̀də́-fò w ga, bù-kárna ǹdə́ nyì-zwennə mó ga, jə̀-pɛ́rɛ́ cə́bal ǹdə́ náncɛ y ga, ³ shə̀dɛ́ɛ́sɛ́ yó-cə́bal mɔ́ ǹdə́ lyì-fɔ̀lɔ̀ w ga, cícírnə mó ǹdə́ lò mɔ̀bɔ́ ń já ń yě jə̀-myaarhɛ tumə tũ̌ páá mɔ́ ga, e súlí lò mó mɔ̀bɔ́ ń já ń yě jə̀jǐrh-ywẽ̀ tumə tũ̌ páá mɔ́ ga. ⁴ À m'a ce bə̀sɔ́nsɛ yə̀ bə̀ yó-cìnə́, sə sə̀ m'a cìní bi ǹdə sə̀ gə́ n'ê yǎl nɛ́. ⁵ Lyì bí m'a nwɛ̀nɛ̀ dwã, lò gakó, ń dõ mó. Bə̀sɔ́bwɛ̀lɛ́ m'a zɛ̃̀ è n'ê bwí ǹdə́ bə-ezhɛ̀nɛ́, lò mó mɔ̀bɔ́ ń bə kùr zhe mó mà n zɛ̃̀ ń nə́ ń bwí ǹdə́ lyì-fɔ̀lɔ̀. ⁶ Lò mà n zɛ̃̀ n pyɛ́l ń da-byǐ, bə̀ da sõ kɛ̀lɛ́ w n wɔ̀ mɔ: «Ǹ zhe gɔ̀nɔ̀, ǹ m'ǎ yə̀ nə́ yó-cə́bal mɔ́, Cìní jì-bwə̀r ré tɛ̀bɛ́.» ⁷ Sə ń dõ mó mà n búbwéé n wɔ̀: « À də̀ nə̀bwànà-shilnə yé, e súlí myɛ búrú ráá gɔ̀nɔ̀ tə̀ à sõ jù w yé: á wàr á m'ǎ ce a yə̀ dwí rí yó-cə́bal yé.» ⁸ Zhərəzalɛm n'ê tutwi, Zhəda n'ê twi tɛ̃́. Sə̀ zɔ̀mà nɛ́ ǹdə́ sə̀ tũ̀twə̃̀ə̃̀ né Cinu shò kwã mɔ́ j'â wɔ́ nyí-ni-cõ zɔ̀mà dúdú, ń còrhó w yé né. ⁹ Bə̀ yé-zwěsé gə́ nyɛ̌ nɛ́ ma cìcì mú j'â n'ê cĩ́ yò bə̀ yó wə, bə̀ n'ê bwə̀l bə̀ yə̀-bəlɔ̀lɔ́ w bə̀ byili ǹdə Sɔdɔm gə́ wɛ̀rhɛ́ nɛ́, bə̀ t'â shèè w yé. Zwini zhe be, bə̀myɛ́ cìcì mú bə̀ pyà lwɛlɛ rɛ́ bə pə bə̀ cìn ni. ¹⁰ Wál-na: Wu-cángá cə́bal wɔ́ wu-nyɔ̃̀ cə́bal, bə̀ ń tumə né nyɔ̀ɔ̀rhɛ́ m'a ce ń wu zə nyàn. ¹¹ Lyì-bəlwɛ̀lɛ́ y wɔ́ nɔ̀nɔ̀ cə́bal, zwini m'a zə ya, bə̀ bə̀ m'a zə y kɔn tó dwã ǹdə è tũ̀twə̃̀ə̃̀ né gə́ wɔ́ nɛ́ mɔ́. ¹² À dwí, è wɔ́ bə̀sɔ́bwɛ̀lɛ́ námpɔ́lɛ́ è j'â n'ê nwɛ̀nɛ̀ à dwí rí, e zɛ̃ è wɔ́ kana bə̀ wɔ́ yó-cìnə́. À dwí, lyì bí byɛ̀bɛ́ bə̀ n'ê kál mɔ́ mɔ́ n'ê dwĩ̀ mú, bə̀ súlí bə ce ǹ sɔ́má y k'a kwɛ̃̀ e zǎ è kwã nɛ́. Yé né cìnə́ bé bùrsí bǔr mú ¹³ Cinu zɛ̃̀ ń zhǐ dɛ̃̌ ń la bùrsí bǔr, ń zɛ̃̀ ń zhǐ dɛ̃̌ ń la dwə́ né bùrsí bǔr. ¹⁴ Cinu byẽ̀ ń dwí rí náncɛsɛ́ ǹdə́ rə̀ yó-cìnə́ bé bùrsi jàà wa: Wɔ́ ámyɛ̌ á cɔ̀ də̀vɛ̃́-cèmé né cɛ yá, nə̀mwà bɛ́ wẽ̀ ré á vwǎrh mɔ́ sú á jìsí. ¹⁵ È nə wɔ́ byè yil á j'á n'á cèè à dwí rí tɛ̃́, e jà á súlí á n'á fuuli nə̀mwà bɛ́ èta? Wɔ́ lũ gakó Cinu Yi nyí rí. Bwẽ́ námməlyãlyɔ̃ɔ̃́ w shò kwã nɛ́ ¹⁶ Cinu wòwə̀: Səyɔ̃ bə̀kwá bɛ́ gə́ wɔ́ cìn-byilu cìnə́, bə súlí bə̀ n'ê dwə̌r bə̀ byerh bə̀ m'ê zhə̀lə̀, bə̀ m'ê vwɛ̃ lyì bí ǹdə́ bə̀ nyìnyìí rí, e súlí bə̀ gə́ n'ê zhə̀l màmà màmà, bə̀ m'ê ce bə̀ nə̀rh cìbyǔr rí ce dweme mó ce, ¹⁷ Cinu mà n ce cɔ̀rɔ́ zə Səyɔ̃ bə̀kwá bɛ́ ywẽ́ né, n súlí n ce bə̀ cílə́ né mɔ̌r. ¹⁸ Dɛ̃ rɛ́ rə̀myɛ́ mɔ́ yù wə, Cinu mà n vùr bə̀ bwẽ́ wẽ̀ ré: nə̀rh cìbyǔr ǹdə́ ywẽ́ dɔ̀msɛ ǹdə́ cìbyǔr rə̀ nyɛ̌ ǹdə cànà y ta; ¹⁹ ǹdə́ byã-dɔ̀msɛ ǹdə́ jɛ̃̀-cìbyǔr ǹdə́ yó kàmə̀-jɛ̀rh, ²⁰ ǹdə́ yó-baárɛ ǹdə́ nyáná námpɔ́lsɛ ǹdə́ cã̌-lyẽẽ́se ǹdə́ wẽ̀ ré tɛ̀bɛ́ rə̀ n'ê vwɛ̃ yó-nyɔ̀, ǹdə́ cìn-yùlù wẽ̀, ²¹ ǹdə́ jə̀fɔ́lsɛ cìbyǐrh ǹdə́ myə̀lə́ cìbyǐrh, ²² ǹdə́ címsi gàndɛ ǹdə́ yó-də́kùr, ǹdə́ byã-kàmə̀-jɛ̀rh ǹdə́ lɔ̀bsɛ shɛ̀bɛ́ bə̀ n'ê zal jɔ̃̀ wa, ²³ ǹdə́ kàmə̀zù-fwàlsɛ ǹdə́ lɛ̃̌ kàmə̀zǔrh ǹdə́ kàmə̀-jɛ̀rh e súlí yó kàmə̀-jɛ̀rh shɛ̀bɛ́ sə̀ n'ê yí vɔ̀-pàálɛ́ yó mó. ²⁴ Kɔ̀-bədɔ̀rhɔ̀ lwẽ́ m'a zwẽ nwə̃̌ lwẽ́ nã́nyə̀nyɛ̀lɛ́ y jàà, nyíní m'a yə̀ cã̌-tɔ̀nɔ̀, Yó ò pǎr m'a zwẽ yó ò sɔ̃̀ ǹdə́ yala nɛ zhùlù mú jàà, yóló-gɔ̀nɔ̀ m'a zwẽ gɔ̀nɔ̀ kɔ̀bɔ́ ò càn jàà, cìzhìl myɔrhɔ m'a zwẽ bwẽ́ myɔrhɔ jàà. Zhərəzalɛm ejə̀nə̀ bé ²⁵ Búlə́ shù m'a gu ǹ bala bɛ́, ǹ kàndar rɛ́ m'a cì búlə́ jàà wa. ²⁶ Ǹ bwə̀rsé m'a kúrh, sə̀ m'a wɔ́wɛ́lɛ́, sə ǹ m'ǎ zhǐr ǹ jě tɛ̃́ cɛ y yó, nə̀mɔ̀ɔ̀rɛ nánfɔ̀lɔ̀ wẽ́.