¹ Kɔn rɛ́ tɛ̀bɛ́ Amɔɔsɛ byǐ Ezəyi nɔ Zhəda ǹdə́ Zhərəzalɛm shò kwã mɔ́. Dwə́ né púlə́púlə́ m'a pwà dwã nə bə̀ Zhərəzalɛm ² Dɛ̃ bànà, Cinu jì y pyɔ̀ w m'a yə̀ pyàr rɛ́ gakó yə́-pɛ̀lɛ́ wa, ò yó w m'a dwini pyǎlsɛ́. Dwə́ né gakó m'a pwà dwã nə bə̀ gàà. ³ Dwə́ nánzhəzhɔ̌ m'a zɛ̃̀ nə kwè sɔ́má nə̀ n'ê zhə̀lə̀, sə nə̀ m'a wɔ̀: «Bà-na nə́ jì nə́ vò Cinu pyɔ̀ w yó, Zhakɔɔbɛ Yi rí jì y wə. Rə̀ m'a byili nə́ba rə̀ sə-byǐsí, sə nə́ m'ǎ kwè rə̀ sɔ́msɛ́.» Zhə̀n ga, è wɔ́ Səyɔ̃ còrhò mó n'ê shí, Cinu zɔ̀mɛ̀ rɛ́ myɛ wɔ́ Zhərəzalɛm rə̀ n'ê shí. ⁴ Ń mà n yə̀ bù-kárna tənèsé ǹdə́ dwã cəcəl wə, ǹdə́ dwə́ nánzhəzhɔ̌ pɔrna. Nə̀ m'a zə nə̀ búlə́ shìmì ní nə m'e lù bə̀twə́rh, nə zɛ̃̀ nə zə nə̀ swə́ né nə m'e lù dàmə̀kààlɛ. Tənà k'ê t'â la búlə́ shù dɛ̃̌ zhõ̌ e bú ǹd'ê dõ yé, bə̀ k'ê t'â la búlə́ bú còrhò yé. ⁵ Zhakɔɔbɛ kɛ̀lɛ́ y lyì, bà-nà, zhəl-nə nə́ vò Cinu pwẽ̀ ré wə. Cinu dɛ̃ rɛ́ ⁶ Zhə̀nà, ǹ yǎrh ǹ dwí rí, Zhakɔɔbɛ kɛ̀lɛ́ y lyì bí tɛ̃́. Yi-púrhí sõ lyì bí j'a sú tɛ̃́ rə̀ sõ, jə̀-pársɛ́ cìnə́ ǹdə́ Shilisəti lyì bí yó w j'â wɔ́ òdù, zhələ bé bə̀sɔ́ná bɛ́ j'â já dɛ̃́dɛ̃́ kɔn lyɛ̃ cɛ nɛ. ⁷ Tənà y j'a sú ǹdə́ sə̀byǐ ǹdə́ sánə́má: è nə̀cɛ̀ndɛ́ j'â bə swɛ̃́ zhe yé. Tənà y j'a sú ǹdə́ shəshərh eshə-vwə̃tur rí bə yó zhe bə̀ la gál bə byili yé. ⁸ Tənà y j'a sú ǹdə́ yə: è lyì bí n'ê wùlì tɛ̃́ kɔn rɛ́ tɛ̀bɛ́ bə̀ jɛ̀sɛ́ wɛ̀rhɛ́ mɔ́ yé né, kɔn rɛ́ tɛ̀bɛ́ bə̀ jə̀fɔ́lá nɛ́ mɔ mɔ́ yé né. ⁹ Numbyínsí m'a j'a lwəl sə̀ cìn tɛ̃́, bǝ̀ m'a lwəl numbyíní yó tɛ̃́, ǹ wàr ǹ m'ǎ pə sɛ sǔbri yé. ¹⁰ Zhəl nə́kul-fwààlɛ́ wa, zú tɛ̃́ cɛ y w ń shèè, Cinu ywẽ nánfɔ̀lɔ̀ w ǹdə́ ń zùwə́ y nánfɔ̀lɔ̀ w yé né. ¹¹ Bə̀ m'a ce numbyínsí cìn-byilu nyìnyìí rí lwəl tɛ̃́, lyì bí byɛ̀bɛ́ bə̀ n'ê zhẽ̌ bə̀ cìn dɛ̃̌ mɔ́ m'a j'a lwəl bə̀ cìn tɛ̃́: sə dɛ̃ rɛ́ rə̀myɛ́ mɔ́ yù wə, Cinu dúdú yó bə̀ m'a zhẽ̌ dɛ̃̌. ¹² Bə̀ dɛ̃ ŋwɛ́nɛ́ rə̀ bànà, lũ gakó Cinu mú yilə, ń la n bú ǹdə́ kɔn dɛ̀bɛ́ gakó rə̀ n'ê zhẽ̌ rə̀ yó dɛ̃̌ mɔ́, ǹdə́ tɛ̀bɛ́ rə̀ zhe cìn-byilu e súlí ǹdə́ kɔn rɛ́ tɛ̀bɛ́ rə̀ zhe cìn-dɛ̃̌-zhõ̌, ń la rɛ tɛ̃́ lwəl mó: ¹³ ń la bú ǹdə́ Lyəbã sɛ́ɛ́dərɛbáa rə̀ wɔ́ nándə̀dwààlɛ e jà rə̀ ywẽ́ wɔ́ dɛ̃̌dɛ̃̌ mɔ́ gakó, ǹdə́ Bashã shɛ́ɛ́nɛbá gakó, ¹⁴ ǹdə́ pyàr rɛ́ rə̀ ywẽ́ né wɔ dɛ̃̌dɛ̃̌ mɔ́ gakó, ǹdə́ pyǎlsɛ́ sə̀ ywẽ́ né wɔ dɛ̃̌ mɔ́ gakó, ¹⁵ ǹdə́ jì-fwàlsɛ́ nánjíjínsí bə̀ m'ê yìlì cɛmɛ nɛ́ sə̀ ywẽ́ né wɔ dɛ̃̌dɛ̃̌ mɔ́ gakó, ǹdə́ byíl-fwàlsɛ́ bə̀ lù bə m'e kə́kɛ́lɛ́ cɛmɛ nɛ́, lò wàr ń jìl sə̀ yó mó gakó, ¹⁶ ǹdə́ Tərəshiisi bǔ-bwələ né gakó, ǹdə́ bǔ-bwələ né nyɛ̀bɛ́ nə̀ j'â càn dɛ̃́dɛ̃́ mɔ́ gakó. ¹⁷ Numbyínsí cìn-byilu mú m'a j'a só, bə̀ m'a lwəl lyì bí byɛ̀bɛ́ bə̀ n'ê zhẽ̌ bə̀ cìn dɛ̃̌ mɔ́ ywẽ́ tɛ̃́: sə dɛ̃ rɛ́ rə̀myɛ́ mɔ́ yù wə, Cinu dúdú yó bə̀ m'a zhẽ̌ dɛ̃̌, ¹⁸ sə yə né gakó m'a j'a tó dwã nə jé tɛ̃́. ¹⁹ Zú-nə nə́kul-fwààlɛ́ gógwə̀ə́lé wẽ́, ǹdə́ cɛ y pə́páárhɛ́ wẽ́, Cinu ywẽ nánfɔ̀lɔ̀ w ǹdə́ ń zùwə́ y nánfɔ̀lɔ̀ w yé né, ń gə́ mà n zɛ̃̀ ń la ce wu-zɛ̃̀ɛ̃́ nánfɔ̀lɔ̀ gu cɛ y yi ní mú. ²⁰ Dɛ̃ rɛ́ rə̀myɛ́ mɔ́ yù wə, numbyínsí m'a dul sə̀ yə né sə̀ zùrhì ǹdə́ sə̀byì-kùlì ǹdə́ nyɛ̀bɛ́ sə̀ zùrhì ǹdə́ sánə́má, nə̀ yé né wùlù mú yil tɛ̃́, sə pə yó-bədwə̀ə́le ǹdə́ bəzhɛ̃̀yàálɛ nɛ. ²¹ Sə̀ m'a vò sə zù nə́kul-fwààlɛ́ bɔ̀là bɛ́, ǹdə́ nə́kulə né gə́ lo lo má bɔ̀là bɛ́ wẽ́, Cinu ywẽ nánfɔ̀lɔ̀ w ǹdə́ ń zùwə́ y nánfɔ̀lɔ̀ w yé né, ń gə́ mà n zɛ̃̀ ń la n ce wu-zɛ̃̀ɛ̃́ nánfɔ̀lɔ̀ gu cɛ y yi ní mú. ²² Rə̀myɛ́ ce, yẽ̌-nə numbyíní y ni, b'è wɔ́ myə̀lə́-zho dúdú: rə̀myɛ́ yilə, bə̀kɔ́n è nə wɔ́?