¹ Kɔn rɛ́ tɛ̀bɛ́ Amɔɔsɛ byǐ Ezəyi nɔ Zhəda ǹdə́ Zhərəzalɛm shò kwã nɛ́, Zhəda pyǎ Ozhaasɛ ǹdə́ Yɔtam ǹdə́ Akaazɛ e súlí Ezəcaasɛ yi ní mú. ² Dɛ̃̌-yi, cili! Cɛ, pyèrhè ǹ zhɛ̃̌ ń cili! Nyǐ wɔ́ Cinu ń nə́ ń zɔ̀mà: À kɔ̀n byǎ, a súlí a ce bə byì, sə bə̀myɛ́ mɔ́ j'a zɛ̃̀ bə cẽ à nyí ni. ³ Nɔ̃ yě ò cə́bal párá, bə̀na myɛ yě vwàmá kùlkṍ w párá, è cə́bal mɔ́ sõ: Esərayɛl yə̀l yé, à dwí rí bə rə̀ kùr nyɛ̌ yé. È dǎl námpɔ́lɛ́ sə Esərayɛl yə̀ ǹdə Sɔdɔm ta ⁴ Bə̀kɔ́n ná-dwí lwɛlɛ rə̀ la mɔ́ zal! Ǹmyɛ́ tənà kɛ̀bɛ́ ǹ já ǹ nə́ ǹ wɛ̀rhɛ́ yə̀-bəlwàálɛ mɔ́, dwí rí tɛ̀bɛ́ lwɛlɛ ywẽ̀ j'a zhĩ mú mú, lwɛlɛ wǎrhna dwí, byǎ byɛ̀bɛ́ bə̀ cɔ̀ kókó mó. Bə̀ yẽ̌ Cinu ni. Bə̀ fulsi Esərayɛl Yi rí tɛ̀bɛ́ rə̀ bə dõ zhe mó, bə̀ dùr bə yẽ̌ re. ⁵ Wɔ́ á yẽ̀ à m'a búl a k'a mà nɛ́, ámyɛ̌ byɛ̀bɛ́ á j'á gwẽ̌ zhe yó-kùùlí tũ̌ mú ni mú? Yó w gakó j'â wɔ́ nyəla dúdú, shíshùrhú w gakó j'a lyɛ̀ɛ̀ kókó. ⁶ Kɔn zhì nə̀-pyìlə̀ né e m'e vò yó w ne mó, kɔn tɛ̀nɛ́ rə̀ j'â wɔ́ rə̀ yó ga yé: cɔ̀mɔ̀ ǹdə́ nɔr ǹdə́ nyəla nándùlə̀ nyə́, nə̀ yə̀ shɛ̀rh yé, nə̀ yə̀ bɛ yé, nə̀ yə̀ tútǔ ǹdə́ nwə̃̌ mùnì ga nə swẽ́ myɛ yé. ⁷ Á tənà y wɔ wu-zhùlù wẽ́, á cɛmɛ nɛ́ jú myǐn, zhələ j'â n'ê cɔ̀ á cɛ y á yírh wə: è wɔ́ wu-zhùlù jàà, e súlí è nyɛ̌ ǹdə zù-bal mɔ́ cɔ̀ y n gùlí dwã ta. ⁸ Səyɔ̃, bə̀kɔ́ mɔ́, mà n dàl ǹdə kòrhó, də̀vɛ̃́-cèmé cɛ w ta, ǹdə shòò jàà, kɔ̃kɔ̃́mbrɛa cɛ w ta, ǹdə cɔ kɔ̀bɔ́ ò tɛnɛ ò zhǐ ò la bú o zwẽ ò cìn ta. ⁹ Lũ gakó Cinu mú gə yà ń yə̀ lyì màngɛlɛ́ nɛ yẽ̌ bə lú nə́ sõ, nǝ́ y'ǎ b'ǎ yə̀ ǹdǝ Sɔdɔm ta, nə́ y'ǎ m'ǎ nyɛrhɛ dwã ǹdǝ Gɔmɔɔrɛ ta. Cángá tũ̀twĩ̀ĩ̀ gə tɛ̀nɛ́ Yi còrhó tɛ̀nɛ́ yé ¹⁰ Cili-nə Cinu nyí rí, Sɔdɔm lyì-fwààlɛ, pyèrhè-nə á zhã̌ á cili, nə́ Yi rí cúcú mú, Gɔmɔɔrɛ lyì. ¹¹ Cinu nə́ ń bwə̀rh ń zhe: Bə̀kɔ́n á vwə̃̀ né nánjə̀jóló w n'ô wɛ̀rhɛ́ nɛ? À j'a búl a sú pyì-byərh vwə̃̀ námpúmə́ cɛ̃́ɛ̃́ nɛ́ ǹdə́ nũ̌-bwə̀lsé nwǐsí. À j'â k'â bə nə̀-byesé ǹdə́ pyì-bwǎlsɛ́ e súlí bə̀-cǐlsí jal mɔ́ tum zhe yé. ¹² Á gə́ n'á twí á zhì à yé né mó, mɔ̌ ń nə́ ń lwə̀l ába b'ǎ ji nà à kwǎndɛ́ wun ní wẽ́? ¹³ K'á bə̀ pansɛ́ shɛ̀bɛ́ sə̀ bə kùr zhe mó zə á m'á bə̀ yé: nyɛ̀ɛ̀sɛ́ j'â búl sə̀ wɔ́ pwarha kɔn à yilə! Càn-dùlí címsí ǹdə́ shìrhə́ dɛ̃ rɛ́ e súlí kúl-fwàlsɛ byõ̌ mó... à j'â k'â wàr lwɛlɛ ǹdə́ címsi ga dwã yó yò w yé. ¹⁴ Á càn-dǔlsí címsí ǹd'á címsí nánfwàlsɛ́, à j'â súl se, sə̀ wɔ́ zhĩĩ à yilə, à lyɛ̀ɛ̀ ǹdə́ sə̀ zhĩĩ rí zhũ mú. ¹⁵ Á gə tú á cèlè á jɛ̀sɛ́ yi ní, à n'â círhí à yírhə́ né, má á n'á wɛ̀rhɛ́ yi-cər twər yó ná-yil myɛ, à t'â cili yé: á jɛ̀sɛ́ j'â wɔ́ jal dúdú. ¹⁶ Shɛ̌rh-na á cìnə̀, vǔr-nə á jìmdí. Ce-nə á tùm-bəlwǎlsɛ́ jé tɛ̃́ àmyɛ́ yírh wə, yẽ̌-nə lwɛlɛ rɛ́ wɔ̀rhɔ́ mɔ́ nɛ. ¹⁷ Cèrhè-nə cɛ̀nɛ̀ wɔ̀rhɔ́, pyǎ-na cángá tũ̀twĩ̀ĩ̀ rí, cĩ́-nə lò mó mɔ̀bɔ́ ń nə́ ń nwɛ̀nɛ̀ lyì bí mú sɔ́má yó, wɛ̀rhɛ́-na kɔn rɛ́ tɛ̀bɛ́ rə̀ mə̌ mɔ́ bə̀tɛ̀lɛ́ nɛ, ce-nə nyí ejə̃̀-kɛ̃ mɔ́ kwã nɛ́. ¹⁸ Cinu wə̀lə̀: Bà-na nə́ zɔ̀m nə́ ce dwã yó. Á yə̀-bəlwàálɛ́ gə wɔ́ nánshɛ̀n gwɛ̃́gwɛ̃́ myɛ, rə̀ m'a jǐrh námpwẽ̀ pwɛ̃́pwɛ̃́. Rə̀ gə wɔ́ nánshɛ̀n mùrùtùtù myɛ, rə̀ m'a jǐrh námpwẽ̀ ǹdə pyì-kur ta. ¹⁹ Á gə m'ǎ shɛ̀nɛ́ á cili, á m'ǎ jí tənà y wə̀-ènyɔ̀ɔ̀lɛ́. ²⁰ Sə á gə cẽ, á gə wɛ̀rhɛ́ yó-kùùli, wɔ́ búlə́ shù w ò m'a gu ába. Wɔ́ Cinu nyí rí rə̀ wə̀lə̀. Zhərəzalɛm jǐrh wárhgáá ²¹ Etər kɔn tó né, o m'o jǐrh kə-nə̀fòló, cɔ w kɔ̀bɔ́ ò y'à j'â zhǐ ò nà y yó mó, ò y'à sú ǹdə́ cángá tũ̀twĩ̀ĩ̀ mú, ò y'à wɔ́ kɔn rɛ́ tɛ̀bɛ́ rə̀ j'â mə̌ jàà... Etər kɔn tó né o m'o jǐrh lyì-gurnə jàà èlǎsɛ̃́? ²² Ǹ sə̀byì-kùlì y jǐrh pùnú, nɛ̃̌ gùlí ǹ də̀vɛ̃́ y kɛ̀bɛ́ è nyɛ̀ du è dwã bɛ́ mɔ́ nɛ. ²³ Ǹ yó-cìnə́ bé wɔ́ yó-kùùlì cìnə́, bə̀ n'ê ce nyí ŋwɔ̀là bɛ́ kwã. Bə̀ gakó j'â só pansɛ́, bə̀ j'â n'ê pyà sə bə wɛ̀rhɛ́ bɛ cɛ̀nɛ̀. Bə̀ t'â kɛ́ bə̀tɛ̀lɛ́ y bùrsí bə̀ pɛ y bùrì yé, ejə̃̀-kɛ̃ mɔ́ yò w t'â yí bə̀ sõ yé. ²⁴ Nyǐ lũ gakó Cinu Yi, Esərayɛl Yi rí Lòlò-bə-rə̀-jàn-rɛ́-yàlà-zhe mó, nyí rí: Rə̀myɛ́ yilə, zwini zhe be! À m'a búl a jí bɛlɛ à búl-dwã bɛ́ yó, à m'a cĩ́ à jim à zwə̀ bé yó. ²⁵ À m'a zhẽ̌ jɛ̃̀ ǹ yó: à m'a zə nə̀kwə̃̌ a m'a ce ǹ pùnú w jé, a ce ǹ jìmdí gakó jé. ²⁶ À m'a ce ǹ bù-kárna bɛ́ k'a yə̀ ǹdə shãã ga mɔ́ ta, ǹ cícírnə bé myɛ k'a yə̀ ǹdə shãã shãã mɔ́ ta, rə̀myɛ́ kwã nɛ́, bə̀ m'a zɛ̃̀ bə byẽ̀ mó bə̀ Cángá-Cɔ, Cɔ kɔ̀bɔ́ ò j'â zhǐ ò nà y yó mó. ²⁷ Cángá tũ̀twĩ̀ĩ̀ rí rə̀ m'a zwẽ wə, sə wɔ́ tɛ̀bɛ́ rə̀ mə̌ mɔ́ wɔ̀rhɔ́ mɔ́ rə̀ m'a zwẽ ò lyì bí byɛ̀bɛ́ bə̀ nɔ wu-pyùrhú mú. ²⁸ Yó-kùùlì cìnə́ ǹdə́ yə̀-bəlwàálɛ cìnə́ yò m'a tó dwã o cɔ̀, lyì bí byɛ̀bɛ́ bə̀ n'ê yẽ̌ Cinu ni mú m'a jé tɛ̃́. Cèmé né nyɛ̀bɛ́ bə̀ n'ê zwə́l vwə̃̀ nə̀ kùr w mú ²⁹ Á wun m'a j'a zhìlì tərəbɛ̃́tɛbá byɛ̀bɛ́ á j'á só dɛ̃́dɛ̃́ mɔ́ shò kwã nɛ́, cìzhìl m'a zə ába báárɛ́ tɛ̀bɛ́ á cír mú shò kwã nɛ́, ³⁰ bə̀ rə̀myɛ́ yi ní á m'ǎ jǐrh ǹdə tərəbɛ̃́tɛ kɛ̀bɛ́ è vɔr rɛ́ shìl ta, ǹdə bɔ́ɔ́ kɔ̀bɔ́ nɛ̃̌ k'ê tə̀ ò wẽ́ mó ta. ³¹ Nǝ̀jàl mɔ́ jǐrh tə́tɔ̃̌, ń tum rí zɛ̃̀ rə̀ wɔ́ myìn-pwéné yə́, Nǝ̀jàl mɔ́ ǹdə́ ń tum rí ga m'a tó dwã rə jí myǐn, sə lòlò tá ń la nɔ n cì mu yé.