¹ Zwini m'a zǝ lyì byɛ̀bɛ́ bə̀ n'ê kwè nyə́ námməlwǎlsɛ, sə bə̀ gə tú bə̀ n'ê kɛ̃ nɛ yi ní mú, bə̀ n'ê kɛ̃ zúzúnú bə̀ cĩ́ tɛ̃́: ² bə̀ n'ê cə̀r nə̀mwà bɛ́ bə̀ t'â yí bùrsí bǔr jàà y w yé, bə̀ n'ê vòm à dwí rí nə̀mwà bɛ́ nɛ kɔn rɛ́ tɛ̀bɛ́ bə̀ mə̌ ǹdə́ rɛ mɔ́, bə̀ n'ê ce ejə̀nə̀ bé jǐrh bə̀ nyí-kɔn bə̀ n'ê zala, bə̀ n'ê kɔkɔlɛ bə̀tǎlsɛ́. ³ Sə è nə wɔ́ bə̀kɔ́n á la wɔ̀rhɔ́ còrhò-tum rí pɔ mɔ́ dɛ̃ rɛ́ yù wə, zho w nánfɔ̀lɔ̀ w gə́ m'a shí pyépyé o bə̀ yi ní mú? Mɔ̌ sõ á m'ǎ dùr á vò né, mùnì ga á nə sɛ̃ɛ̃́? Yẽ̀ á m'ǎ cĩ́ á nə̀cɛ̀ndɛ́ nɛ́? ⁴ È m'a yə̀ tɛ̃́ kó lyì bí byɛ̀bɛ́ bə̀ zɔ búlə́ né wẽ́ mó cəcəl w ǹdə́ tɛ̃́ tu cùùrí cəcəl w dúdú rə̀ la dǎl. E jà ǹdə́ rə̀myɛ́ ga, ń lyim rí j'â yə̀ pɛ́ rə vò kwã yé, ń jɛ̃̀ y myɛ y'à j'â gwẽ̌ zhẽ̌ dɛ̃̌ e cèlè è zhǐ. Màbyóó m'a zə Ashəri ⁵ Zwini m'a zə Ashəri tənà yá, à lyim rí màngwə̌ yə́; də̀-dɔ̀lɔ̀ w kɔ̀bɔ́ ò wɔ è jɔ̃̀ w mɔ́, wɔ́ à lyi-yùr rí. ⁶ À twĩ̀ y b'è zhəl e bú ǹdə́ tənà námməlwɛ̀lɛ́, à ce è la làlà e vò e bú ǹdə́ dwí rí tɛ̀bɛ́ rə̀ ce à lyim zɛ̃̀ rə̀ n'ê yì kɔn lyɛ̃ cɛ nɛ mɔ́, mùnì ga e pwà rə̀ wẽ̀ ré búlə́ né kwã, s'e súlí e ce bə bubu ri, mùnì ga e cèè re tɛ̃́ ǹdə sɔ́msɛ́ bɔ̀bɔ̀rɔ̀ w ta. ⁷ Sə èmyɛ́, bə rə̀ kùr nyɛ̌ èta yé, è yə̀ rɛ tɛ́rɛ́ èta è wu w wẽ́ yé, b'è bùlə̀ né wẽ́ mó wɔ́ e ce kɔn gakó j'a jé tɛ̃́ lyə́m lyə́m, e ce tənə̀rh nánzhəzhɔ̌ jé tɛ̃́. ⁸ Nyǐ è gə́ wə̀l né: À shə̀dɛ́ɛ́sɛ́ yó-cìnə́ bé yó w ga nə də̀ pyǎ yó nà? ⁹ Kalənɛ cɔ w nə yə̀ jǐrh ǹdə Kərəkəmyiishi ta nà? ráá Amaatɛ nə yə̀ jǐrh ǹdə Arəpaadɛ ta nà? ráá Samarɛ nə yə̀ jǐrh ǹdə Damaasɛ ta nà? ¹⁰ À jɛ̃̀ y nə gə́ ŋwɛ̀nɛ́ e cĩ́ pyə̀-tənèsé, yə ŋwɛ́nɛ́ sə̀ wẽ́ mó yó, sə̀ yə nə̀ zùrhì mú j'à y'à búl nə̀ já du Zhərəzalɛm ǹdə́ Samarɛ nyə̀ná nɛ́ mɔ́, ¹¹ à nə t'â la Zhərəzalɛm cɔ w ǹd'ô sə̀sã̌yùúlí ni wɔ̀rhɔ́ kɔn rɛ́ tɛ̀bɛ́ à wɛ̀rhɛ́ Samarɛ cɔ w ǹd'ô yə né ne nà? ¹² Cinu wə̀l bə̀ ń gə tú ń twĩ̀ ń tum rí gakó Səyɔ̃ pyɔ̀ w yó ǹdə́ Zhərəzalɛm nɛ́ ń zhɛ̀, ń mà n pə còrhò-tum Ashəri pyɔ̌ mɔ́ nɛ, ń cìn-byilu mú gə́ ce ń nə́ ń cĩ́ ń cìn mə̀gã̌ mɔ́, ǹdə́ ń fwɛ̀lɛ̀ nyìnyìí rí yilə, ¹³ bə̀ ń wə̀l ń cìn ni: ‹Wɔ́ à jɛ̃̀ y jàn rɛ́ à m'a twĩ̀ e súlí ǹd'â lárma mɔ́; b'à búl à zhe surhə. À ce dwə́ né swã́ nɛ́ jé tɛ̃́, a vwǎrh nə̀ wẽ̀ ré tɛ̀bɛ́ nə̀ y'à pyà nə cĩ́ dɛ̃̌ mɔ́. Ǹdə kàndɔ ta, à ce byɛ̀bɛ́ bə̀ y'à jě pyɛ̀lɛ̀ də̀gwə́rh yó mó só tɛ̃́ sə̀ yó. ¹⁴ À cĩ̀ à jɛ̃̀ y dwə́ né nə̀cɛ̀ndɛ́ yó ǹdə wɔ́ jǎl yó ta. Ǹdə bə̀ gə́ y'a pwà càlà nɛ́ nyɛ̀bɛ́ bə̀ t'â cili nə̀ sõ mó ta, àmyɛ́ pwà lũ w púlə́púlə́, sə lòlò myɛ yə̀ nɛ n mà ń vɔ̃̀, ráá n púr ń nyí ráá n cəcɛ̃ myɛ yé.» ¹⁵ Dòló nə wɔ̌ ò m'a cèrhé ò cìn, lò mó mɔ̀bɔ́ ń zə w ń mə́ ń shar wẽ̀ mó jàà wa? Shǐ y ǹd'ê yə́lə́ né nə wɔ̌ è m'a zhẽ̌ è cìn dɛ̃̌ lò mó mɔ̀bɔ́ ń zə y ń mə́ ń twĩ̀ mú jàà wa? Ǹdə wɔ́ gwə̌ è ce lò mó mɔ̀bɔ́ ń nə́ ń zhẽ̌ y dɛ̃̌ mɔ́ nə́ ń twĩ̀, ráá ǹdə wɔ́ də̀-dɔ̀lɔ̀ w ò n'ô zhẽ̌ lò mó mɔ̀bɔ́ ń də̀ dɔ̌-kɔn mɔ́ dɛ̃̌ ta!» ¹⁶ Wɔ́ rə̀myɛ́ è ce lũ gakó Cinu Yi rí, mà n ce kɔ̀rɔ̀ címí zə è lyì-ekwəəré, sə myǐn m'a tó tɛ̃́ mə zɛ̃̀ è còrhó w kùr w ǹdə myǐn gə́ y'a zɛ̃̀ mə kwɛ̃́ mə̀ zhe né. ¹⁷ Esərayɛl pwẽ̀ ré m'a jǐrh myǐn, sə è Yi rí rə̀ bə dõ zhe mó m'a yə̀ myìn-zhù, kɔ̀bɔ́ ò m'à j'â zhe, ò m'a súlí o jí è bàasɔ̌brɛ́ ǹd'ê sə́sɔ́ndɛ́ ga dɛ̃ rə̀dù. ¹⁸ ò m'a jí è tú w ǹd'ê cèmé né cɛ y ǹdə́ rə̀ cɛ̀nɛ̀ rɛ́ ga, ò m'a jí rə̀ námpúm, è m'a yə̀ ǹdə wɔ́ nə̀bwɛ̃̀ mɔ̀bɔ́ ń nə́ ń kwɛ̀rɛ̀ mɔ́ ta. ¹⁹ È tú w cèmé né kùr ré rə̀ la dǎl mɔ́ yó w m'a yə̀ námpɔ́lɛ́ dɛ̃́dɛ̃́, rə̀myɛ́ ce bə̀sɔ́bwɛ̀lɛ́ cìcì m'a ŋwɛ̀nɛ́ e gə̀ rɛ. Esərayɛl lyì bí kùr ré rə̀ dàl mɔ́ ²⁰ Dɛ̃ rɛ́ rə̀myɛ́ mɔ́ yù wə, Esərayɛl lyì bí kùr ré rə̀ dàl mɔ́ ǹdə́ Zhakɔɔbɛ kɛ̀lɛ́ lyì bí byɛ̀bɛ́ bə̀ lú mú, j'â k'ê t'â la mɔ̀bɔ́ ń nə́ ń mà bɛ mɔ́ nɛ zhú yé: bə̀ m'a zhí Cinu ni zhə̀n zhə̀nà, Esərayɛl Yi rí rə̀ bə dõ zhe mó ne. ²¹ Lyì bí kùr ré tɛ̀bɛ́ rə̀ dàl mɔ́ m'a kwɛ̃̀ rə bà, Zhakɔɔbɛ lyì bí kùr ré, Yi-rí-tɛ̀bɛ́-rə̀-zhe-jàn mɔ́ sõ. ²² Má ǹ dwí rí lyì bí y'à j'â wɔ́ ǹdə nə̀-fɔ̀lɔ̀ w nyɔ̀rhɔ́ w ta myɛ, Esərayɛl, wɔ́ bə̀ màngɛlɛ́ sásá bə̀ m'a kwɛ̃̀ bə bà: cɔ̌ mɔ́ nyí rí kwè, sə rə̀ m'a ce cángá tũ̀twĩ̀ĩ̀ búl rə yə̀ nɛ́, ²³ s'e ce kɔn gakó jé tɛ̃́ lyə́m lyə́m nyí rí gə́ kɔ́ mɔ́ ce, lũ gakó Cinu Yi rí, mà n pyìrh ri tənà y púlə́púlə́ wẽ́. Ashəri còrhò-tum rí shò kwã kə́dò ²⁴ Wɔ́ rə̀myɛ́ è ce nyǐ lũ gakó Cinu Yi rí nyí rí: À dwí rə̀ jě Səyɔ̃ nɛ́ mɔ́, bə̀k'á dùr Ashəri tənà y è n'ê mà mɔ́ ǹdə́ gwə̌ e j'a zhẽ̌ è də̀-dɔ̀lɔ̀ w ǹ yó w ǹdə Ezhibti gə́ wɛ̀rhɛ́ nɛ́ mɔ́ ywẽ yé, ²⁵ bə̀ kɔn dǎl námpɔ́lɛ́, kɔn j'â dǎl námpɔ́lɛ́ dɛ̃́dɛ̃́, sə à lyi-yùr rí tu, à lyim rí m'a jǐrh bə̀ yò zhùlù kɔna. ²⁶ Lũ gakó Cinu mú mà n zhẽ̌ ywàlá y è yó wə, ǹdə ń gə́ mà Majã, Orɛɛbɛ Nə́kul-fɔ̀lɔ̀ w nyí ni ní, ń mà n súlí n zhẽ̌ ń də̀-dɔ̀lɔ̀ w nə̀-fɔ̀lɔ̀ w yó wə, ǹdə ń gə́ yà ń wɛ̀rhɛ́ nɛ́ Ezhibti ní mú. ²⁷ Dɛ̃ rɛ́ rə̀myɛ́ mɔ́ yù wə, ń zhĩĩ rí m'a swàr ǹ pyə́pyɛla nɛ́ wa, zhĩĩ rí m'a swàr ǹ byə-dǎl rɛ́ yó, zhĩĩ rí m'a ká, wẽ̀ ré tɛ̀bɛ́ rə̀ j'â búl rə̀ la tɛ̃́ sú mú kùr wə. Tənà y w zú mú m'a yə̀ ǹdə wɔ́ dwà è lyə́lyɔ̌ ta ²⁸ N yí Ayaatɛ, n byɛrhɛ Myəgərɔ̃, n ce ń kwã-lyì bí ǹdə́ bə̀ zhĩĩ rí mɛ̃ Myəkəmaasɛ nɛ́, ²⁹ bə tó pyàr rɛ́ cəcəl w sɔ́má námmyɛ̀rhɛ́ y bə lyɛ̃: «Nə́ m'ǎ zɔ̃̀ Gəba nɛ́!» Arama kəkə, Jəbəya, Səyuli cɔ w dùr ò la m'o zwẽ ò cìnə̀. ³⁰ Baatɛ-Gəlyim, mǎ búbwéése! Ləyishə, cili! ³¹ Anatɔɔtɛ, ǹmyɛ́ mɔ̀bɔ́ wu-zhùlù zhe mó! Madəməna cɔ w n'ô dùrə̀. Gəbyim lyì bí zɛ̃̀ bə̀ n'ê dùrə̀, ³² sə dɛ̃ rɛ́ rə̀myɛ́ mɔ́ cìcì yù wə, zù-bal mɔ́ gə́ tú n zhì Nɔɔbɛ nɛ́ yi ní, ń lyəlyɔ jɛ̃̀ Səyɔ bə̀kɔ́ mɔ́ pyɔ̀ wá, Zhərəzalɛm pyɛ̀lɛ́ y jɛ̃̀, n mə n bú yə. Tɛ̃́ shíshùrú mú ³³ Nyǐ lũ gakó Cinu Yi rí ju cǒ jɛ̃̀ y tɛ̃́ ǹdə́ jɔ́ɔ́rɛ: bə̀ kà cèmé nándə̀dwààlɛ́ bə ló tɛ̃́, bə̀ kà nyɛ̀bɛ́ nə̀ ywẽ́ y'à wɔ dɛ̃̌dɛ̃̌ du nə̀ dwã bɛ́ mɔ́ bə ló tɛ̃́. ³⁴ Tú w swààlɛ́ n'ê lwé tɛ̃́ dòló w kùr wə, Lyəbã ǹd'ê jɛ́nɛ́ rɛ́ ga n'ê shíshìrí tɛ̃́.