¹ Cǒ jɛ̃̀ m'a púrh Zhese cǒ w kùr rí yó, ò nèsé m'a tò tǒ. ² Cinu Eshirhə y m'a yə̀ ò yó: lárma ǹdə́ ywẽ̀ dwã w pɔr éshìrhə́, cúcú ǹdə́ wu-jɔ̀ éshìrhə́, lwar ǹdə́ Cinu nyɔ̀mɔ̀ éshìrhə́, ³ sə è m'a ce ò n'ô nyàm Cinu. Ò t'â la tɛ̀bɛ́ ò yírhə́ nə mɔ́ dɛnnɛ tó o bùr bùrsí yé, ò t'â la tɛ̀bɛ́ ò zhã̌ nyɛ̀ɛ̀ mɔ́ dɛnnɛ tó o kə́ yò yé. ⁴ Ò m'a bùr bə-jàn-zhe cìnə́ bé bùrsí ǹdə́ cángá tũ̀twĩ̀ĩ̀ rí gə́ n'ê yǎl nɛ́, ò m'a kə́ yò w ǹdə kɔn gə́ mə̌ nɛ́ tənà y nə̀mwà bɛ́ yilə. Ò m'a zə ò nyì-zɔ̀mɛ̀ rɛ́ o mà tənà y ǹdə də̀-dɔ̀lɔ̀ ta, ò m'a zə ò nyí-zho w o ce lyì-bəlwɛ̀lɛ́ y cì. ⁵ Cángá tũ̀twĩ̀ĩ̀ rí m'a yə̀ ò cã̌-tɔ̀nɔ̀ wá, zhə̀n rɛ́ m'a yə̀ ò cã̌-lyõṍ wə́. Wu-nyɔ̃̀ m'a k'a yə̀ nɛ́ ⁶ Gɔ-kùlí ǹdə́ pyì-bwɛ̀lɛ́ m'a yə̀ nɛ́ ǹdə́ dwã, jǝ̀l m'a pyẽ̀ bɔ̀-bwɛ̀lɛ́ yala nɛ. Bə̀ m'a kɔ̃̀ nũ̌-bwə̀lə̀ ǹdə́ bɔrɔ byǐ ga dwã yó, sə bal-byǐ námpɔ́lɛ́ m'a kál sɛ. ⁷ Nə̀-nyɔ̃̀ ǹdə́ gɔ-kùlí kùjú w m'a yə̀ òmyɛ́ òdù wə́, rə̀ byǎ bɛ́ pwə́l mó m'a yə̀ mə̀myɛ́ mə̀dù yə́. Bɔrɔ m'a dɔ̃̀ gɔ-cílə́ ǹdə nə̀-bya ta. ⁸ Byì-shɛ̀mɛ́ m'a dədal dùdùlú bɔ̀l yó. Bal-byǐ námpɔ́lɛ́ m'a cèlè è jɛ̃̀ e m'e pyi kùwə̀ bɔ̀l nyí ni. ⁹ Lwɛlɛ ǹdə́ cɔ̌ tũ̀twĩ̀ĩ̀ də́-byǐ ga t'â la tũ̌ àmyɛ́ Yi pyɔ̀ w gakó yó yé, bə̀ tənà y púlə́púlə́ m'a j'a sú ǹdə́ Cinu pár lwar mɔ́, ǹdə nàná bɛ́ gə́ y'a sú bù-fwɛ̀lɛ̀a y nɛ́. Kwã̀ɔ̃̀ nánfɔ̀lɔ̀ w myɔrhɔ wá ¹⁰ Dɛ̃ rɛ́ rə̀myɛ́ mɔ́ yù wə, bə̀ m'a zhẽ̌ Zhese cǒ nà y bə ce dɛ̃̌ e yə̀ myɔrhɔ dwə́ né yilə, tənèsé m'a pyà ya, sə còrhó w m'a yə̀ è zulə́ jàà. ¹¹ Dɛ̃ rɛ́ rə̀myɛ́ mɔ́ yù wə, Cinu mà n cèlè ń jɛ̃̀ yá, twər rə̀lyè nyǎn rɛ́, ń la mə n zwẽ ń dwí rí lyì bí kùr ré rə̀ dàl mɔ́, byɛ̀bɛ́ bə̀ la dǎl Ashəri ní ǹdə́ Tɛ̃́-sõ Ezhibti ní ǹdə́ Dɛ̃̌-sõ Ezhibti ní ǹdə́ Sudã nɛ́ ǹdə́ Elam nɛ́ ǹdə́ Babyəloni ní ǹdə́ Amaatɛ, Siri ní ǹdə́ cɛmɛ nɛ́ nyɛ̀bɛ́ nə̀ wɔ nə̀-fɔ̀lɔ̀ w cəcəl w mó. ¹² Ń mà n zhẽ̌ myɔrhɔ n ce dɛ̃̌ dwə́ né yilə, ń mà n cĩ́ Esərayɛl lyì bí byɛ̀bɛ́ bə̀ pwà bə m'e vò yómə́-jè mó dwã yó, ń mà n ce Zhəda lyì bí bə̀ y'à làà lũ w cə-yala gakó w mó shí lũ w yésé sə̀na y ga wẽ́, bə bə̀ dwã yó. ¹³ Efərəyim bwɛ̃̌-dǔr mó m'a zhɛ̀, bə̀ m'a ce Zhəda búl-dwã bɛ́ jé tɛ̃́ lyə́m lyə́m. Efərəyim k'ê t'â la Zhəda bwɛ̃̌ dǔr yé, Zhəda myɛ k'ê t'â la Efərəyim búl-dõ yál yé. ¹⁴ Bə̀ m'a zə dwã bə jòm Shilisəti lyì bí cã̌ wa, Yi-zùr sõ, bə zə dwã bə bubu Yi-púrhí sõ lyì bí: bə̀ m'a cĩ́ jɛ̃̀ Edɔm ǹdə́ Mɔwaabɛ yó, sə bə̀ m'a cìní Amɔ̃ byǎ bɛ́. ¹⁵ Cinu mà n ce Ezhibti nə̀-fɔ̀lɔ̀ w nà y è zù cɛsɛ́ wẽ́ mó wĩ, ń mà n yárh ń jɛ̃̀ y n mə n bú Efəraatɛ bù-fwɛ̀lɛ̀ yá, ń shíshìrhə́ né jàn rɛ́ m'a ce n ce e bɔ̀n dwã w bù-jɛ̀rh shàlpyɛ̀, sə ń mà n ce bə ŋwɛ̀nɛ́ bə tó è wẽ́ bə lyɛ̃ ǹdə́ nə̀cìlə̀ bə̀ nə̀rh né. ¹⁶ Sɔ́má m'a yə̀ nɛ́ ń dwí rí kùr ré rə̀ dàl mɔ́ yilə, byɛ̀bɛ́ bə̀ la dǎl bə mɛ̃ Ashəri ní mú yilə, ǹdə sɔ́má gə́ yàl nɛ́ Esərayɛl yilə, dɛ̃ rɛ́ tɛ̀bɛ́ è shə́r Ezhibti tənà y w mɔ́.