¹ Kɔn rɛ́ tɛ̀bɛ́ bə̀ m'a bwə̀l bə byili nə̀-gɔ̀lɔ̀ w kɔ̀bɔ́, Yi ce bə nə kɔn ò wẽ́, shò kwã nɛ́ mɔ́. Byè yil ǹ lyì bí gakó púlə́púlə́ nə n'ê jìl lyarha nɛ́ wẽ́, ² ǹmyɛ́ cɔ w kɔ̀bɔ́ ò j'a sú ǹdə́ sɔ̀ nánfɔ̀lɔ̀ ǹdə́ búbwéése, cɔ w kɔ̀bɔ́ ò j'â n'ô fùù ǹdə́ wu-nyɔ̃̀ nánfɔ̀lɔ̀ mɔ́? È də̀ búlə́ shù ò gu ǹ lyì bí byɛ̀bɛ́ bə̀ cù mú yé, è də̀ búlə́ jàà w bə̀ gu bi ní yé. ³ Ǹ shə̀dɛ́ɛ́sɛ́ yó-cìnə́ bé gakó dùr, bə̀ zə twã bə zɛ̃̀ bə̀ wu ni, bə m'e yíní bi bə zə yómə́. Bə̀ zɔ lyì bí byɛ̀bɛ́ gakó bə̀ lwar bə̀ jàà shò mó yómə́, bə̀ y'à dùr bə vò pyépyé. ⁴ Èlǎsɛ̃́ à n'â wə̀lə̀: pyìrhí-nə á yé á ce kwã nɛ́ á yẽ̌ ne, à m'a kúrh dɛ̃́dɛ̃́; á bə̀k'á nyɛ́ɛ́ á la nɛ jə́jɔ̀rɔ́ à dwí rí bə̀kɔ́ mɔ́ bə̀ cɔ̀ mɔ́ shò kwã nɛ́ yé. ⁵ Bə̀ wɔ́ jǎr nánfɔ̀lɔ̀ ǹdə́ tɛ̃́-shíshùrú e súlí dɛ̃̌-zhuzhuru dɛ̃, rə̀ shí lũ gakó Cinu Yi sõ. Byílí shíshìrí tɛ̃́, nə̀-gɔ̀lɔ̀ w kɔ̀bɔ́ Yi ce bə nə kɔn ò wẽ́ mó w mó, sə búbwéése zɛ̃̀ sə zǎ pyɔ̀ wá. ⁶ Elam lyɛ̃̀ swã̀ ń wɔ búlə́ eshə-vwə̃tur rí eshərh n'ê vwɛ̃ mɔ́ wẽ́, lyì súlí bə̀ jě rə̀ wẽ́, Ciiri vùr nə̀kò n ce pwẽ̀ ne. ⁷ Ǹ jésé sə̀ càn du sə̀ dwã bɛ́ mɔ́ j'a sú ǹdə́ búlə́ eshə-vwə̃tur rí, eshə-jòmnə bé tɛnɛ bə̀ zhǐ bwə̀rsé ne, ⁸ bə̀ pàr Zhəda gàmə̀lyɔ̀nɔ̀ wá. Dɛ̃ rɛ́ rə̀myɛ́ mɔ́ yù w mú, á kwẽ̌ á nyǐ Tú w Jì y búlə́ wẽ̀ ré səta, ⁹ sə á púrí bə̀ Dəvyidi cɔ w bɔ̀là bɛ́ y'à já. Á co nɛ̃̌ tɛ̃́-sõ nɛ̃̌-gɔ́rɔ́ w wẽ́. ¹⁰ Á gàl Zhərəzalɛm jìsí yó wə́, Á wǔr jìsí mùnì ga bə̀ bə̀k'a ŋwɛ̀nɛ́ bə yí byíl-fwàlsɛ́ yala nɛ yé. ¹¹ Á kù póló byíl-fwàlsɛ́ sə̀lyè y cəcəl wə, nɛ̃̌ gɔ́rɔ́ nándṍ w nàná bɛ́ cə̌r yilə. Sə á yə̀ kwẽ̌ á nyǐ lò mó mɔ̀bɔ́ ń nə́ ń twĩ̀ rə̀myɛ́ mɔ́ gakó wẽ́ mó səta yé, á j'á yə̀ lò mó mɔ̀bɔ́ ń já ń nə́ ń twĩ̀ dwə́l ga mɔ́ nɛ yé. ¹² Dɛ̃ rɛ́ rə̀myɛ́ mɔ́ yù wə, lũ gakó Cinu Yi rí, yà ń nə́ ń lwə̀l ába b'ǎ kúrh sə á wɔ́wɛ́lɛ́, á fɔ̃̀ á ywẽ́ né, sə á ce ywə́ə́le á cə̌rh né, ¹³ sə è k'â wɔ́ fùwə́ ǹdə́ wu-nyɔ̃̀: bə̀ n'ê gwi nɛ̃, bə̀ n'ê zwə́l pyììsì, bə̀ n'ê dɔ̀m nàmá, bə̀ n'ê nywɛ̀ də̀vɛ̃́, bə̀ n'ê jí, bə̀ n'ê nywɛ̀...bə̀ nəkɔl dɛ̃ rɛ́, nə́ m'ǎ cì. ¹⁴ Lũ gakó Cinu mú ce a nyɛ̀ɛ̀ nyí rí n wɔ̀: Á t'á la á yə̀-bəlɔ̀lɔ́ w kɔ̀bɔ́ sǔbri nɔ gaga, è gə də̀ á cu kwã nɛ́. Lũ gakó Cinu Yi ń bwəl nyí rí rə̀myɛ́. Nyí Tùntùnnə nánfɔ̀lɔ̀ òdù shò kwã nɛ́ ¹⁵ Nyǐ lũ gakó Cinu Yi nyí rí: Zhəl ń vò ń nə nə̀cɛ̀ndɛ́ yìlnə, Shəbəna, pyɔ̌-kɛ̀lɛ́ y yó-cə́bal mɔ́, ń wɔ̀ mɔ: ¹⁶ Bə̀kɔ́n ǹ zhe nyɔ̀nɔ̀, dwí lyì byɛ̌ ǹ zhe nyɔ̀nɔ̀ ǹ mə́ ǹ kwì lú-bɔ̀l nyɔ̀nɔ̀ ǹ cìn yilə, ǹ mə́ ǹ kwì ǹ bɔ̀l mɔ́ pyɔ̀ yó, ǹ mə́ ǹ kwì jì nə́kulu w wə? ¹⁷ Rə̀myɛ́ ce, Cinu mà n dom mó, à lò, ń mà n já n pyípyílí mú ku wẽ́ n lyẽ, ¹⁸ n dul mú ń vò ń tu ń byíbyílí ǹdə ku nááyúlú ta, tənà kɛ̀bɛ́ è j'â wà dɛ̃́dɛ̃́ wẽ́. Sə wɔ́ gàà ǹ mǎ cì ní, gàà mɔ́, ǹdə́ búlə́ eshə-vwə̃tur rí rə̀ wɔ́ ǹ yó-dɛ̃̌-zhõ̌ kɔn rɛ́ e jà rə̀ n'ê ce cìzhìl ǹ yó-cə́bal mɔ́ kɛ̀lɛ́ y nɛ mɔ́. ¹⁹ À m'a jì mú ǹ tum rí wẽ́, a vùr mú ǹ jàà y wẽ́. ²⁰ Sə dɛ̃ rɛ́ rə̀myɛ́ mɔ́ yù wə, à m'a byẽ̀ à tùntùnnə Elyəcim, Yələca byǐ mú. ²¹ À m'a zù mu ǹ kàmǝ̀zù-èdɔ̀lɔ̀ wá, à m'a lyẽ ǹ cã̌-tɔ̀nɔ̀ w ń cã̌ nɛ mùnì ga n zhì kẽkẽ, à m'a ce ǹ pyɛ̀lɛ̀ rɛ́ ń jɔ̃̀ wa. Ń mà n yə̀ da Zhərəzalɛm lyì bí yilə, ǹdə́ Zhəda kɛ̀lɛ́ y yilə. ²² À m'a cĩ́ Dəvyidi kɛ̀lɛ́ y bwə̀l-byǐ y ń pyə́pyɛla wa, ń mà n pul, sə lòlò tá ń la pyu yé, ń mà n pyi, sə lòlò tá ń la pul yé. ²³ À m'a fwar mɔ tɛ̃́ n zù ǹdə lù ku ta jàà nánkùlì wẽ́, sə ń mà n yə̀ còrhó də̀gwã́ ń da kɛ̀lɛ́ y yilə. ²⁴ Ń da kɛ̀lɛ́ y còrhó w gakó m'a jele ò yó, jǎmsɛ́ nánfwàlsɛ́ ǹdə́ námpɔ́lsɛ́ ga, ǹdə́ nə̀zhì-bwǎlsɛ́ gakó, kɔn zhì kǎzɔ̀má bɛ́ e m'e ce zhěsé dwí gakó né. ²⁵ Dɛ̃ rɛ́ rə̀myɛ́ mɔ́ yù wə, nyǐ lũ gakó Cinu mú nyí rí, lù ku w bə̀ fwar tɛ̃́ o zù jàà nánkùlì wẽ́ mó, jàn rɛ́ m'a ga, ò m'a kə́ o tu tɛ̃́, sə dùmì rí tɛ̀bɛ́ ò y'à n'ô zhĩ mú m'a cɔ̀, bə̀ wɔ́ Cinu ń wə̀l re.