¹ Kɔn rɛ́ tɛ̀bɛ́ bə̀ m'a bwə̀l bə byili gɔ-elũ èpòlò w nə̀-fɔ̀lɔ̀ w nyí ni shò kwã nɛ́ mɔ́. Ǹdə kùlmə̀ byɛ̀bɛ́ bə̀ n'ê tó Nəgɛɛvɛ bə̀ lyɛ̃ mɔ́ ta, ń shí gɔ-elũ èpòlò wə, tənà kɛ̀bɛ́ è n'ê zɛ̃̀ wu ni wẽ́, ń bànà, ² è wɔ́ kɔ̀-bəlwɛ̀lɛ́ bə̀ ce a na, myìnù cə́bal mɔ́ ń nə́ ń myìnì, cɔ̀rnà mɔ́ ń nə́ ń cɔ̀: «Zhəl ń vò ń bú búlə́ né, Elam! Pú cɔ wá, Mədi! À n'â ce wɔ́wɔ́lɔ́ dwí gakó zhɛ̀.» ³ Sə èlǎsɛ̃́ mɔ́, à cã̌ y j'a zɛ̃̀ è n'ê cəcɛnɛ, yala yin zɛ̃̀ nɛ ǹdə kɛ̃ mɔ́ mɔ̀bɔ́ ń nə́ ń lùl yala yin rí ta. Ywẽ̀ né gùlí dwã à yó w dɛ̃́dɛ̃́, ce à wàr à la nyɔ̀ɔ̀ yé, wu-zɛ̃̀ɛ̃́ nánfɔ̀lɔ̀ zhe ne, ce à wàr à la nɛ nɛ́ yé. ⁴ À surhə né n'ê jé, ywẽ nánfɔ̀lɔ̀ ce à n'â pə́pǎ. Də̀dɛ̀nɛ́ yi twɛ́nɛ́ rɛ́ à y'à j'â n'â yǎl mɔ́, k'a jǐrh wu-zɛ̃̀ɛ̃́ nánfɔ̀lɔ̀ rə pɛ̃. ⁵ Bə̀ n'ê tɛnɛ kùjú w bə̀ la tɛ̃́ cṹ, yìlnə bé n'ê zal bə̀ yírhə́, bə̀ n'ê jí, bə̀ n'ê nywɛ̀... Zɛ̃̀-na dɛ̃̌, shə̀dɛ́ɛ́sɛ yó-cìnə́, fwǎl-na á nə̀kwə̀r ré ǹdə́ nwə̃̌! ⁶ Nyǐ Cinu nyí rí ń pɔ nɛ n wɔ̀ mɔ́: «Zhəl, ce cɔ w yìlnə mó zhì jàà èdù wẽ́, sə n bwə̀l kɔn rɛ́ tɛ̀bɛ́ ń la nɔ mɔ́ n byili. ⁷ ń gə nɔ búlə́ eshə-vwə̃tu eshərh sə̀lyè n'ê vwɛ̃, ǹdə́ lò ń jě bə̀na, ǹdə́ lò ń jě yómó, sə n dɛ̃̀ ń cìn náàcɛ̀nɛ́, sə n kwɛrhɛ n dɛ̃̀ ń cìnə̀!» ⁸ Lò mó mɔ̀bɔ́ ń nə́ ń nyǐ mú búbwéé n wɔ̀: «À yó-cə́bal, à j'â wɔ à yùlù jàà y wa, dɛ̃ rɛ́ námpúm, à j'â n'â zhì dɛ̃̌ à nə̀-pyìlə̀ yó à yùlù jàà y wa, cəcɛ̃ y námpúm. ⁹ Sə nyǐ kɔn rɛ́ tɛ̀bɛ́ rə̀ bàn mɔ́: lò ń jě búlə́ eshə-vwə̃tu eshərh sə̀lyè n'ê vwɛ̃. N kwè nyí n wɔ̀: ‹Babyəlɔnɛ cɔ w tu tɛ̃́, ò tu tɛ̃́, ò yə né sə̀sã̌yùúlí gakó ló tɛ̃́, rə̀ bɔbwɛlɛ kókó›.» ¹⁰ Ǹmyɛ́ mɔ̀bɔ́ Cinu mà ǹdə jíjí rə̀ wɔ ń tuwə y w ta mɔ́, à nyɛ̀ɛ̀ rə̀myɛ́ mɔ́ lũ gakó Cinu mú, Esərayɛl Yi rí sõ, sə à cĩ́ mú ri. Edɔm shò kwã nɛ́ ¹¹ Kɔn rɛ́ tɛ̀bɛ́ bə̀ m'a bwə̀l bə byili Dumə shò kwã nɛ́ mɔ́. Bə̀ zhì Səyiiri ní bə̀ n'ê búbwéé bə̀ ce ne bə̀ zhe: «Yìlnə, yẽ̀ cəcɛ̃ y yú ní? Yìlnə, yẽ̀ cəcɛ̃ y yú ní?» ¹² Yìlnə mó lyár n wɔ̀: «Cɛ y la lɔ́, sə cɛ y m'a k'a yìì kə́dò. Á gə n'á yǎl á k'á bwə̀rh bwə̀rhə́ y kə́dò, sə á kwɛ̃̀ á bà.» Arəbyi shò kwã nɛ́ ¹³ Kɔn rɛ́ tɛ̀bɛ́ bə̀ m'a bwə̀l bə byili Arəbyi shò kwã nɛ́ mɔ́. Dədã sɔ́m-zhə̀lnə̀, á m'ǎ zɔ̃̀ Arəbyi tú w wə. ¹⁴ Zhəl-nə á vò á jəl lò mó mɔ̀bɔ́ nə̀-nyɛ̀lsɛ zhe mó, zə-na nɛ̃̌ á m'á vò, Təma tənà y lyì; zhəl-nə á vò á jəl mɔ̀bɔ́ ń nə́ ń dùr mùnì ga n lú mú ǹdə́ ń búrú wə́, ¹⁵ bə̀ bə̀ n'ê dùr búlə́ shìmì ní yé né, búlə́ shù w kɔ̀bɔ́ nyə̀nyààrɛ zɛ̃̀ w mɔ́ yé né, ǹdə́ twã y kɛ̀bɛ́ è pàm mɔ́ yé né e súlí ǹdə́ búlə́ né dùmì rí yé né. ¹⁶ Nyǐ nyí rí Cinu cĩ́ ni n wɔ̀ mɔ́: È dǎl byin rə̀dù, rə̀ m'a yə̀ ǹdə lò mɔ̀bɔ́ bə̀ kwè bə̀ n'ê kwɛ̃̌ mɔ́ byin rí ta, sə Kədaarɛ còrhó w púlə́púlə́ jé tɛ̃́, ¹⁷ sə Kədaarɛ shə̀dɛ́ɛ́sɛ́ twesé m'a dàl màngɛlɛ́ sásálaa. Wɔ́ Cinu, Esərayɛl Yi rí, ń wə̀l re.