¹ Byìn rí tɛ̀bɛ́ shə̀dɛ́ɛ́sɛ́ yó-cìnə́ bé yó-cə́bal nánfɔ̀lɔ̀ w Ashəri pyɔ̌ Sarəgɔ̃ yà ń twĩ̀ mú, tú n bə̀ n bú ǹdə́ Ashədɔɔdɛ n zɛ̃̀ n zwẽ w n cìní mú... ² Yi rí rə̀myɛ́ mɔ́ wa, Cinu yà ń tó Amɔɔsɛ byǐ Ezəyi nyì-zwennə tum rí dɛnnɛ n zɔ̀m, ń yà ń wə̀l mó: «Zhəl, ń bwèlé yóló kàmə̀jɛ̃̀ y ǹ lyẽ ǹ cã̌ nɛ́ mɔ́, sə́ vùr nə̀cìlə̀ né nə̀ wɔ ǹ nə̀rh né mó»; sə ń wɛ̀rhɛ́ èta, n zɛ̃̀ ń nə́ ń zhə̀l tɛ̃́ nánlwè, nə̀cìl myɛ y'à tɛ̀nɛ́ ń nà nɛ́ yé. ³ Cinu wɔ̀: «À tùntùnnə Ezəyi zhə̀l tɛ̃́ nánlwè, nə̀cìl myɛ y'à tɛ̀nɛ́ ń nà nɛ́ yé, byinə nə̀tɔ̀, rə̀myɛ́ mɔ́ wɔ́ kɔn rɛ́ tɛ̀bɛ́ à la Ezhibti ǹdə́ Ecopyi ni wɔ̀rhɔ́ mɔ́ myɔrhɔ ǹdə́ tɛ̀bɛ́ rə̀ bàn mɔ́ swal kɔna. ⁴ Wɔ́ èta myɛ Ashəri pyɔ̌ mɔ́ mà n zə Ezhibti lyì bí bə̀ zɔ mɔ́, n súlí n pwà Ecopyi lyì bí n mə n vò ń sõ, ébwá ǹdə́ ezhə̃̌nsɛ ga, nánlwə̀rh, nə̀cìl myɛ tɛ̀nɛ́ bə̀ nà nɛ́ yé, bə̀ nə̀kùr-byǎ pyě pwẽ̀ ne, Ezhibti cə̀-lwè yə́. ⁵ Wu-zhùlù nánfɔ̀lɔ̀ ǹdə́ cìzhìl nánfɔ̀lɔ̀ m'a zə lyì bí Ecopyi y kɛ̀bɛ́ bə̀ y'à n'ê nyǐ è yó w mó shò kwã nɛ́ ǹdə́ Ezhibti kɛ̀bɛ́ bə̀ y'à m'ê cèrhé bə̀ cìn mú.» ⁶ Rə̀myɛ́ yi ní, tənèsé sə̀myɛ́ mɔ́ nyí rí lyì bí m'a zɛ̃̀ bə wɔ̀: «Nyǐ lyì bí byɛ̀bɛ́ nə́ y'à n'é nyǐ bə̀ yó wə, mùnì ga nə́ dùr nə́ vò nə́ shèè bə̀ sõ, nə́ nə sɛ̃ɛ̃́ bə̀ sõ nə́ m'é lú Ashəri pyɔ̌ mɔ́ jɔ̃̀ w mɔ́. Sə nə́myɛ̌, etər nə́ m'ǎ tó né nə́ m'é lú?»