¹ Kɔn rɛ́ tɛ̀bɛ́ bə̀ m'a bwə̀l bə byili Ezhibti tənà y shò kwã nɛ́ mɔ́: Nyǐ Cinu ń jě ébɔ̃ kɔ̀bɔ́ ò zhe ywə́l mó yó: ń bàn Ezhibti. Ezhibti yə né j'â n'ê kəkə ń yé né, Ezhibti tənà y wu w j'a gə è wẽ́. ² À m'a ce Ezhibti lyì bí zɛ̃̀ dwã nɛ, bə̀ m'a bú dwã, lò gakó ǹdə́ ń da-byǐ, lò gakó ǹdə́ ń dõ, cɔ ǹd'ô dõ cɔ, pyə̀-tənà ǹd'ê dõ pyə̀-tənà. ³ Ezhibti tənà y wu m'a lo, sə à m'a cɔ̀ è zhə̀zhèèlé surhə né. Bə̀ m'a pyà bə̀ ywẽ̀ né kùr sú yə né ǹdə́ lyì bí byɛ̀bɛ́ bə̀ n'ê twĩ̀ jə̀jǐrh-ywẽ̀ tumə né e súlí ǹdə́ lyì bí byɛ̀bɛ́ bə̀ n'ê pár jə̀-pársɛ́ mɔ́ sõ. ⁴ À m'a ce Ezhibti lyì bí yó-cìnə́ nánkùlə̀ jɔ̃̀ wa, pyɔ̌ náncɔ̀lɔ̀ mà n cìní bi, wɔ́ lũ gakó Cinu Yi nyí rí. ⁵ Nə̀-fɔ̀lɔ̀ w nàná bɛ́ m'a jé, Bù-fwɛ̀lɛ̀ y m'a wĩ, e súlí e kù, ⁶ nɛ̃̌ gwáárɛ́ m'a dɛ̀rhɛ̀, Ezhibti Niili jɛ̀sɛ́ nàná bɛ́ m'a kwər, sə̀ m'a súlí sə wĩ, pəpyəruusi y ǹdə́ vwal-gɔ w m'a pyɛ̀nɛ̀. ⁷ Vwal-gɔ w ò j'a twèlé Niili y vɔ̃̀ nɛ mɔ́ ǹdə́ kɔ̀bɔ́ ò wɔ è gə́ n'ê jəl nə̀-fɔ̀lɔ̀ w mə̀gã̌ mɔ́, kɔn rɛ́ tɛ̀bɛ́ gakó rə̀ n'ê lyĩ Bù-fwɛ̀lɛ́ y vɔ̃̀ nɛ mɔ́, m'a kù, bə̀ m'a zə rɛ bə m'e lyɛ̃: kaka k'ê t'â la gàà yál yé. ⁸ Gwànna bɛ́ m'a wɔ́wɛ́lɛ́, byɛ̀bɛ́ gakó bə̀ n'ê ji zɛlɛ́ Niili y w mú m'a kúrh, byɛ̀bɛ́ bə̀ n'ê dul gùndwǐ nɛ̃̌ mɔ́ yó w mó yò m'a zhìlì. ⁹ Lyì bí byɛ̀bɛ́ bə̀ n'ê twĩ̀ lɛ̃̌ y tum rí mú wun m'a zhìlì, kana bɛ́ byɛ̀bɛ́ bə̀ n'ê pɔr y dwã nɛ bə súlí bə kwɛrhɛ y mɔ́ ǹdə́ bala bɛ́ byɛ̀bɛ́ bə̀ n'ê swɛ̃̀ y mɔ́ yésé m'a zhìlì kɔn lyɛ̃ cɛ nɛ, ¹⁰ lyì bí byɛ̀bɛ́ bə̀ n'ê tɛnɛ kɔ̀-nyɔ̀ɔ̀mà gakó wun m'a cɔ̀ dɛ̃́dɛ̃́, lyì bí byɛ̀bɛ́ bə̀ n'ê wɛ̀rhɛ́ byɛ́ɛ́rɛ y mɔ́ wun m'a lo. ¹¹ Səwan yó-cìnə́ bé j'â búl bə̀ bə surhə zhe yé, Faraɔ̃ cícírnə bé bə̀ lɔ́ mɔ́ j'â wɔ́ lyì-bəyuuri kùkùl. Etər á nə m'ǎ wɔ̀ Faraɔ̃ nɛ: «À wɔ́ lárma cə́-bal, shãã shãã pyǎ bɛ́ kwã-lò» né? ¹² Yẽ̀ ǹ lárma cìnə́ bé ŋwɛ́nɛ́? Bə̀ byili mú sə lyì bí myɛ lwar kɔn rɛ́ tɛ̀bɛ́ lũ gakó Cinu mú gu ń wẽ́ ń la wɔ̀rhɔ́ Ezhibti shò kwã mɔ́. ¹³ Səwan yó-cìnə́ bé j'â búl bə̀ k'ê bə surhə zhe yé, Mənfyiisi yó-cìnə́ bé j'â n'ê jə́jɛ̀rɛ́ bə̀ cìnə̀, bə̀ ce Ezhibti n'ê shìì bə̀myɛ́ byɛ̀bɛ́ bə̀ wɔ́ è kwálsɛ́ jàn rɛ́ nǝ́kulu w mú. ¹⁴ Cinu co yé-éjílə́ éshìrhə́ bə̀ cəcəl wə, bə zɛ̃̀ bə ce Ezhibti n'ê shìì kɔn tɛ̀bɛ́ gakó è n'ê wɛ̀rhɛ́ mɔ́ wẽ́, ǹdə sə̀-nyɔ̀rɔ́ gə́ y'a n'ô shìì ò m'ô tɔlɛ nɛ́. ¹⁵ Lòlò já ń kə́ ń tá ń la kaka wɔ̀rhɔ́ Ezhibti ní yé, má yó w myɛ ǹdə́ nə̀byíl ré cìcì mú myɛ ga, má kwã̌ jɛ̃̀ y myɛ ǹdə́ vwal-gɔ w cìcì mú myɛ ga. ¹⁶ Dɛ̃ rɛ́ rə̀myɛ́ mɔ́ yù wə, Ezhibti tənà y m'a yə̀ ǹdə kana bɛ́ ta, wu-zɛ̃̀ɛ̃́ nánfɔ̀lɔ̀ m'a zə ya, e zɛ̃̀ è n'ê kəkə, è gə́ m'a nə lũ gakó Cinu mú jɛ̃̀ y ń la dɛ̃̌ zhõ̌ n mə n pɛ y còrhò-túm è n'ê yárh dɛ̃̌ mɔ́ yi ní. ¹⁷ Zhəda tənà y m'a yə̀ wu-zɛ̃̀ɛ̃́ nánfɔ̀lɔ̀ kɔn Ezhibti yilə. Bə̀ gə j'â tú bə̀ la Zhəda zɔ̀mà zɔ̌m è yé né yi ní gakó, è m'a j'a kəkə kɔn rɛ́ tɛ̀bɛ́ lũ gakó Cinu mú gu ń wẽ́ ń la y wɔ̀rhɔ́ mɔ́ yilə. ¹⁸ Dɛ̃ rɛ́ rə̀myɛ́ mɔ́ yù wə, Ezhibti tənà y cɛmɛ nə̀nu m'a zɔ̀m Kanaã tənà y zɔ̀mà nɛ́, sə nə̀ m'a dwĩ̀ nyí nə m'e zə dɔbrɛ ǹdə́ lũ gakó Cinu mú. Bə̀ m'a byẽ̀ nə̀myɛ́ òdù bə̀ Yiir-Ayɛrɛɛsɛa, cɔ̌ mɔ́ Cɔ wá. ¹⁹ Dɛ̃ rɛ́ rə̀myɛ́ mɔ́ yù wə, Cinu vwĩ̀-jùlú m'a yə̀ Ezhibti tənà y cəcəl ré wə, sə Cinu nə́kulu m'a cìì tɛ̃́ è swɛ̃́ rɛ́ səta. ²⁰ È m'a yə̀ myɔrhɔ ǹdə́ zhə̀n pɔ kɔn lũ gakó Cinu mú yilə, Ezhibti tənà y wa: bə̀ gə tú bə̀ n'ê búbwéé bə̀ ce Cinu ni lyì bí byɛ̀bɛ́ bə̀ n'ê nwɛ̀nɛ̀ bɛ mɔ́ yil yi ní, ń mà n twĩ̀ zwennə n bə̀ n zwẽ bə̀ nyí ni, n súlí n vwǎrh bɛ. ²¹ Cinu mà n ce Ezhibti lyì bí lwar ń párá, sə Ezhibti lyì bí m'a lwar Cinu párá, dɛ̃ rɛ́ rə̀myɛ́ mɔ́ yù wə. Bə̀ m'a zwə́l vwə̃̀ bə súlí bə pɔ̃ pansɛ bə m'e cèrhé mo, bə̀ m'a dwĩ̀ nyə́ Cinu ni, sə bə̀ m'a pyìrh ne. ²² Rə̀myɛ́ ce, Cinu gə yà ń mà Ezhibti lyì bí dɛ̃́dɛ̃́ myɛ, ń mà n ká n wárh bɛ: bə̀ m'a kwɛ̃̀ bə bə̀ Cinu sõ, sə ń mà n zwẽ bə̀ lwə̌l mó, n wárh bɛ. ²³ Dɛ̃ rɛ́ rə̀myɛ́ mɔ́ yù wə, sɔ́má m'a zhì Ezhibti e vò Ashəri. Ashəri lyì bí m'a bə̀ Ezhibti, sə Ezhibti lyì bí myɛ m'a vò Ashəri. Ezhibti lyì bí ǹdə́ Ashəri lyì bí m'a tó dwã bə cèrhé Yi. ²⁴ Dɛ̃ rɛ́ rə̀myɛ́ mɔ́ yù wə, Esərayɛl m'a yə̀ tənə̀rh sə̀tɔ̀ nyǎ yá, è la b'e súlí Ezhibti ǹdə́ Ashəri ni. Tənà y wẽ́, wɔ́ rə̀myɛ́ rə̀ m'a yə̀ bwəl náàcɛ̀nɛ́ tɛ̀bɛ́, ²⁵ lũ gakó Cinu mú la bwəl mó: «Ezhibti, à dwí rí nə bwəl, Ashəri, kɔn rɛ́ tɛ̀bɛ́ à jɛ̀sɛ́ wɛ̀rhɛ́ mɔ́ nə bwəl, sə Esərayɛl, à cəl-tənà y nə bwəl.»