¹ Bə̀kɔ́n ná-dwí lwɛlɛ! Tənà y è bǔ-bwələ zhe kàmə̀jɛ̃̀-vɔ̀mɛ̀ nə̀lyè nə̀lyè, nə̀ tùrhì dwã nɛ nə twèlé Ecopyi bù-fwàlsɛ́ vɔ̀mɛ̀ nɛ́ nɛ mɔ́, ² ǹmyɛ́ mɔ̀bɔ́ ǹ nə́ ǹ twĩ̀ tùntúmə́ bə̀ tó nə̀-fɔ̀lɔ̀ w wa, pəpyəruusi bǔ-bwələ wẽ́ nàná bɛ́ yə́-pɛ̀lɛ́ w mɔ́. Zhəl-nə, tùntúmə́ bé bə̀ nà lum tɛ̃́ mɔ́, lyì-èdwààlɛ́ e j'à bə̀ yala tɔ̀nɔ̀ w n'ô jə́jɛ̀mɛ́ mɔ́ dwí rí sõ, dwí rí tɛ̀bɛ́ bə̀ n'ê dùr rə̀ ywẽ, má rə̀ tənà y swã́ nɛ́ kwã nɛ́ cìcì mú, dwí rí tɛ̀bɛ́ rə̀ nyí gwẽ̌ yə̀l zɔ̀mà, e jà rə̀ n'ê cèè tɛ̃́ rə̀ nə̀rh kùr w mú, rə̀ bù-fwàlsɛ́ myɛ n'ê pwà cɛ y sə̀ m'ê lyɛ̃ mɔ́. ³ Ámyɛ̌ lũ w lyì bí gakó, á wɔ cɛ y yó mó, bə̀ gə tú bə̀ cìì búlə́ né bú myɔrhɔ ku w tɛ̃́ pyàr rɛ́ yó ò zhǐ dɛ̃̌, sə á kwẽ̌ á nyǐ! búlə́ né pɔ́lá y cəl ré gə tú rə̀ dom, sə á cili! ⁴ Bə̀ Cinu zɔ̀m ǹdə́ nɛ n wɔ̀: À m'a j'a zhì shɛ́ɛ́, à m'a zhì jàà y kɛ̀bɛ́ à ŋwɛ́nɛ́ nɛ́ mɔ́ w à m'â nyǐ, ǹdə lumi rí tɛ̀bɛ́ rə̀ n'ê jə́jɛ̀mɛ́ rə̀ wɔ pwẽ̀ yə́-pɛ̀lɛ́ w mɔ́ ta, ǹdə myɔ̀nɔ̀ ébɔ̃ w wə̀-jə̀ə́ré cə-lumu w yi ní ta. ⁵ Də̀vɛ̃́ cǒ w gə tú ò co ò pùnə́ né ò zhɛ̀, pùní rí gə tú rə̀ jǐrh dəvɛ̃́ cǒ byǎ porho ò n'ô byìlə̀, bə̀ n'ê gòm ò jɛ̀sɛ́ sə̀ bə tum zhe mó ǹdə́ dàmə̀kɔ̀lɔ̀ bə zɛ̃̀ bə gõ̀ ò twə̀ə́ré, bə súlí bə shar sɛ, éfòró bə pɔ̌r ò byǎ bɛ́. ⁶ Bə̀ n'ê yẽ̌ rə̀myɛ́ mɔ́ gakó ne bə pə pyàr rɛ́ zúmə́ né ne ǹdə́ gɔ-wẽ̀ ré ne. zúmə́ né m'a bə̀ nə yə̀ gàà cə-lumu w yi rí wə, sə gɔ-wẽ̀ ré gakó m'a bə̀ rə yə̀ gàà wàr rɛ́ yi rí wə. ⁷ Yi rí rə̀myɛ́ mɔ́ wa, lyì-èdwààlɛ́ e j'à bə̀ yala tɔ̀nɔ̀ w n'ô jə́jɛ̀mɛ́ mɔ́ dwí rí m'a zə pɛnɛ́ rə b'e pə lũ gakó Cinu mú ni, dwí rí tɛ̀bɛ́ bə̀ j'â n'ê dùr rə̀ ywẽ, má rə̀ tənà y swã́ nɛ́ kwã nɛ́ cìcì mú, dwí rí tɛ̀bɛ́ rə̀ nyí gwẽ̌ yə̀l zɔ̀mà è jà rə̀ n'ê cèè tɛ̃́ rə̀ nə̀rh kùr w mú, rə̀ bù-fwàlsɛ́ myɛ n'ê pwà cɛ y sə̀ m'ê lyɛ̃ mɔ́, rə̀ m'a zə pɛnɛ́ rə m'e bə̀ jàà y kɛ̀bɛ́ lũ gakó Cinu mú yil ré ŋwɛ́nɛ́ è wẽ́ mó wə, Səyɔ̃ pyɔ̀ w yó.