¹ Kɔn rɛ́ tɛ̀bɛ́ bə̀ m'a bwə̀l bə byili Damaasɛ shò kwã nɛ́ mɔ́. Damaasɛ cɔ w k'ô t'â la cɔ yál yé, ò m'a jǐrh jì-bwə̀r púl. ² Bə̀ m'a shə́r bə yẽ̌ cɛmɛ nɛ́ nyɛ̀bɛ́ nə̀ wɔ ò yala nɛ mɔ́ nɛ, nə pyẽ̀ nánfò twéé twéé yilə. Nə̀ m'a yə̀ vwàmá jààsɛ, vwàmá nɛ́ m'a pyẽ̀ nə̀ wẽ́ nə shǐrh e jà lòlò myɛ tá ń la nə̀ wun ni zã̀ɔ̃̀ yé. ³ Byíl-fwàlsɛ k'ê t'â la Efərəyim ní yál yé, pyɛ̀lɛ̀ myɛ k'ê t'â la Damaasɛ nɛ́ yál yé, Siri lyì bí byɛ̀bɛ́ bə̀ la dǎl mɔ́ t'â la dùmì zal dwini Esərayɛl lyì byǎ bɛ́ yé, wɔ́ lũ gakó Cinu mú nyí rí. ⁴ Dɛ̃ rɛ́ rə̀myɛ́ mɔ́ yù wə, Zhakɔɔbɛ dùmì rí m'a bɔ̀, sə ń pù-kál rɛ́ m'a nyɔ̀. ⁵ Ǹdə bə̀ gə́ y'a pwà bə̀lɛ́ y è kɔrhɔ́ w yí ní, bə zɛ̃̀ bə lyẽ è ywẽ́ né cílə́ cílə́ mó ta, ǹdə bə̀ gə́ y'a pwà è ywẽ́ né bə ló dwã yó Erəfəyitəbá vɔlɔ w w nɛ́, ⁶ è m'a dàl wə̀-gǔndi dúdú, sə ǹdə olyivyé y kõ yi ní ta, è m'a dàl olyivyé byǎ bə̀lyè ráá bə̀tɔ̀ dɛ̃̌ dɛ̃̌, olyivyé y yə́-pɛ̀lɛ́ wa, ráá olyivyé byǎ bə̀na ráá bə̀nu è jǎmsɛ́, sə̀ n'ê ce byǎ yó, wɔ́ Cinu, Esərayɛl Yi rí nyí rí. ⁷ Dɛ̃ rɛ́ rə̀myɛ́ mɔ́ yù wə, numbyíní m'a kwẽ̌ e nyǐ lò mó mɔ̀bɔ́ ń wɛ̀rhɛ́ y mɔ́, sə è yírhə́ m'a nə Esərayɛl Yi rí rə̀ bə dõ zhe mó. ⁸ È k'ê t'â la vwĩ̀-jùúlí è jɛ̀sɛ́ wɛ̀rhɛ́ mɔ́ nyǔ yé, è k'ê t'â la kɔn tɛ̀bɛ́ è jə̀fɔ́lá nɛ́ wɛ̀rhɛ́ mɔ́ nɔ yé: Ashəra pálá nɛ́ ǹdə́ nə̀nyɔ́nɔ́ w myaarhɛ́. ⁹ Dɛ̃ rɛ́ rə̀myɛ́ mɔ́ yù wə, bə̀ m'a dùr bə yẽ̌ ǹ cɛmɛ nɛ́ nə̀ wɔ́ shòò jààsɛ́ mɔ́ nɛ, ǹdə bə̀ gə́ dùr bə yẽ̌ túr rí ǹdə́ pyàr rɛ́ yə́-pǎlsɛ́ nɛ, Esərayɛl lyì byǎ bɛ́ yé né né, sə è m'a yə̀ wu-zhùlù nánfɔ̀lɔ̀, ¹⁰ bə̀ ǹ swě Yi, ǹ Zwennǝ mó yò, ǹ yə̀ Pàtá yá, ǹ shòò jàà y yò lyǐrh yé, ǹ nə́ ǹ zhele cèmé nyɛ̀bɛ́ nə̀ n'ê pɛ wu-nyɔ̃̀, ń zɛ̃̀ ǹ nə́ ǹ dwì wẽ̀-byǎ bə̀ shí jàà dõ wə. ¹¹ Dɛ̃ rɛ́ tɛ̀bɛ́ ǹ nə́ ǹ zhele ne mó, ǹ já ǹ nə nə̀ gə́ n'ê byìl ní, nəkɔkɔ́lɛ́ nɛ, ǹ já ǹ nə dwí rí ǹ dù mú gə́ j'â n'ê tò né, sə kɔn gə tú è yú rə̀ jú mú yi rí, wə̀-jə̀ə́ré n'ê jé tɛ̃́, e jà yò w zɛ̃̀ ò bə cə́m zhe yé. Zwə̀ nánjə̀jóló wə́ ¹² Bə̀kɔ́n ná-dwí lwɛlɛ! Nyǐ wɔ́ dwə́ bə̀ wàr nə̀ yó w bə̀ la byilu mú dweme, sɔ̀ nánfɔ̀lɔ̀ ǹdə nə̀-fwààlɛ́ sɔ̀ w ta, dwə́ sɔ̀ nánfɔ̀lɔ̀ ǹdə nàná bɛ́ byɛ̀bɛ́ bə̀ n'ê wùl ǹdə́ jàn mɔ́ sɔ̀ w ta, ¹³ dwə́ sɔ̀ nánfɔ̀lɔ̀ ǹdə nə̀-zhɔ̌ sɔ̀ w ta. Ń nə́ ń bya nɛ, sə nə̀ n'ê dùr nə̀ zhə̀l pyépyé, ǹdə jíjí-púúlí pyàr rɛ́ zho n'ô kwè ta, ǹdə bàasɔ̌brɛ́ sɔr rɛ́ byǎ bɛ́ zho nánfɔ̀lɔ̀ n'ô pwà ta. ¹⁴ Də̀dɛ̀nɛ́ nɛ, è j'â wɔ́ wu-zɛ̃̀ɛ̃́ nánfɔ̀lɔ̀, sə cɛ y la m'e lə́ mɔ́ ǹdə́ kaka k'ê yə̀ dàl yé. Wɔ́ kɔn rɛ́ tɛ̀bɛ́ rə̀ m'a yə̀ lyì bí byɛ̀bɛ́ bə̀ n'ê vwǎrh nə́ jɛ̃̀-kɔn rɛ́ bə̀ yẽ̌ nə́ba mɔ́ cəl ré, kɔn rɛ́ tɛ̀bɛ́ rə̀ n'ê dɛ̃̀ lyì bí byɛ̀bɛ́ bə̀ n'ê bubu nə́ jɛ̃̀-kɔn rɛ́ bə̀ yẽ̌ nə́ba mɔ́.