¹ Zhǐ-nə Səla nɛ́ á ce tənà y yó-cə́bal mɔ́ pyì-bwɛ̀lɛ́ y tó gɔ-elũ èpòlò w wə, e vò Səyɔ̃ bə̀kɔ́ mɔ́ pyɔ̀ w yó. ² Arənɔ̃ nə̀-gɔ̀lɔ̀ w byaársɛ́ yó, Mɔwaabɛ bə̀kwá bɛ́ m'a yə̀ ǹdə kúmsí shɛ̀bɛ́ bə̀ zhàrh sə̀ jàlá wẽ́ sə zɛ̃̀ sə̀ la ta: ³ bə̀ n'ê wə̀lə̀: «Zhərh-nə ǹdə́ dwã, sə á kwè nyí á wɔ̀: ‹Ce ǹ ywə́l mó yə̀ ǹdə cəcɛ̃ ta, nyə̀nyɛ́nɛ́ ecəl wə, shèè lyì bí byɛ̀bɛ́ bə̀ jì mú, bə̀ bə̀k'a nə lyì bí byɛ̀bɛ́ bə̀ n'ê dùr mùnì ga bə lú mú yé! ⁴ Bə̀ lyì bí byɛ̀bɛ́ bə̀ dùr bə shí Mɔwaabɛ mɔ́ ŋwɛ̀nɛ́ bə jòm ǹ sõ! Yál shòò jàà bə̀ yilə, cɔ̀rna mɔ́ yé né. Nɔ̀nɔ̀ w gə tú ò zhɛ̀, màbyóó w myɛ zhɛ̀, wu-bárhɛ́ cə́bal mɔ́ gə tú ń jé tɛ̃́ tənà y w yi ní, ⁵ rə̀myɛ́ yi ní, sónó m'a ce pyɛ̀lɛ̀ də̀gwã́ y kwɛrhɛ e zhì kẽkẽ, sə bù-kárna mà n jòm è yó n bùr bùrsí zhə̀n wẽ́, Dəvyidi kòrhó w wə, kɔn rɛ́ tɛ̀bɛ́ rə̀ mə̌ mɔ́ yò w m'a zù mu, e jà ń mà n zə yə̀wǎl ǹdə́ tɛ̀bɛ́ rə̀ wɔ́ cángá tũ̀twĩ̀ĩ̀ tũ̌ mú.›» Zhərəzalɛm wàr kaka è la wɔ̀rhɔ́ Mɔwaabɛ yil yé ⁶ Nə́ nyɛ̀ɛ̀ Mɔwaabɛ tənà y cìn-dɛ̃̌-zhõ̌ námməlyãlyɔ̃ɔ̃́ w yò, ǹd'ê cìn-byilu mú, ǹd'ê cìn-dɛ̃̌-zhõ̌ mó, ǹd'ê cìn-còrhó w ò lyɛ̃ cɛ nɛ mɔ́ yò, ǹd'ê gə́ n'ê jə́jɛ̀nɛ́ è cìn è cĩ́ è cìn mə̀gã̌ mɔ́ yò. ⁷ Sə èlǎsɛ̃́ Mɔwaabɛ tənà y lyì bí n'ê kúrh bə̀ cìn ni, bə̀ gakó n'ê kúrhə́. Bə̀ n'ê wɔ́wɛ́lɛ́ Cər-Erɛɛsɛ də̀vɛ̃́-cǒ byǎ búúrí shò kwã nɛ́, bə̀ wun cɔ̀ kókó, bə̀ n'ê wɔ́wɛ́lɛ́. ⁸ Bə̀ Eshəbɔ̃ cɛsɛ́ n'ê cɔ̀, Səbəma də̀vɛ̃́-cèmé né cɛsɛ́, nə̀ də̀vɛ̃́ y y'à n'ê cĩ́ tənèsé pyǎ bɛ́ tɛ̃́ mɔ́: sə̀ y'à zhì gà mɔ́ sə yí Yazɛɛrɛ, sə lyɛ̃ sə zù gɔ-elũ èpòlò w wə, də̀vɛ̃́-cèmé né jɛ̀sɛ́ y'à lɛ̀lɛ̀ sə gar nə̀-fɔ̀lɔ̀ wá. ⁹ Sə èlǎsɛ̃́ à n'â tó Yazɛɛrɛ nɛ à kúrh Səbəma də̀vɛ̃́-cèmé né cɛsɛ́ nɛ. Eshəbɔ̃ ǹdə́ Elalɛ, à n'â lwé à yə́-nàná nɛ́ á yó, bə̀ wu-nyɔ̃̀ búbwéésé guwə, á də̀vɛ̃́-cèmé né byǎ bɛ́ pɔ̌r mɔ́ ǹd'á jíjí jòró w yi ní ga. ¹⁰ Wu-nyɔ̃̀ w ǹdə́ fùwə́ nánfɔ̀lɔ̀ w jé pyǎlsɛ́ nə̀báná nɛ́ nɛ wu-nyɔ̃̀ fùwə́ ǹdə́ wu-nyɔ̃̀ búbwéése jé tɛ̃́ á də̀vɛ̃́-cèmé né cɛsɛ́ wẽ́. Bə̀ k'ê t'â pyárh də̀vɛ̃́-cèmé byǎ bɛ́ də̀vɛ̃́ y bə̀ ce nə̀bwándɛ́ wẽ́ yé, wu-nyɔ̃̀ búbwéésé guwə. ¹¹ Kɔn n'ê shɛ̀ à wu w wẽ́ ǹdə zɔ̃̀ gə́ y'a dom né, Mɔwaabɛ shò kwã nɛ́, sə à wu myɛ zhìlì Cər-Erɛɛsɛ shò kwã nɛ́. ¹² Bə̀ m'a nə Mɔwaabɛ lyì bí bə̀ lyɛ̀ɛ̀ kókó bə̀ n'ê zhə̀l bə̀ la vwə̃̀ né zwə́l jààsɛ́ wẽ́, bə̀ la bə̀ yi rí jì y w bə vò bə lwə̀l re: rə̀ t'â la ŋwɔ̀nɔ́ rə wɛ̀rhɛ́ kɔn yé. ¹³ Wɔ́ zɔ̀mɛ̀ rɛ́ rə̀myɛ́ Cinu zɔ̀m Mɔwaabɛ shò kwã nɛ́ shãã shãã ga mɔ́. ¹⁴ Sə èlǎsɛ̃́, Cinu nə́ ń wə̀lə̀: «Nyɔ̀nɔ̀ ǹdə́ byinə nə̀tɔ̀, nə̀ m'a yə̀ ǹdə lò mɔ̀bɔ́ bə̀ kwè bə̀ n'ê kwɛ̃̌ mɔ́ byinə né ta, Mɔwaabɛ tənà y lyì-fwààlɛ́ ǹd'ê lyì nánjə̀jóló w gakó k'ê t'â la dùmì zal yé. Bə̀ m'a dàl lyì màngɛlɛ́ sásálaa, lyì màngɛlɛ́ kɛ̀bɛ́ è bə kùr zhe yé.»