¹ Kɔn rɛ́ tɛ̀bɛ́ bə̀ m'a bwə̀l bə byili Tiiri tənà y shò kwã nɛ́ mɔ́. Wǔrh-nə, Tiiri bǔ-bwələ, cɔ̌ mɔ́ yilə: jì k'ê tɛ̀nɛ́ yé! Wɔ́ bə̀ gə́ tú bə yí Shipiri, cɔ w ò wɔ nɛ̃̌ mɔ́ cǝcǝl w mó yi ní bə̀ lwar rɛ nɛ́. ² Á bə̀k'á púr á nyí á zɔ̀m yé, ámyɛ̌ byɛ̀bɛ́ á jě nə̀-fɔ̀lɔ̀ w vɔ̃̀ w nɛ mɔ́, Sədɔ̃ dɔ̌lna, ámyɛ̌ á tùntúmə́ bé n'ê byɛrhɛ nə̀-fɔ̀lɔ̀ w mɔ́. ³ Sədɔ̃ tənà y nɛrɛ́ y y'à wɔ́ wẽ̀ ré tɛ̀bɛ́ bə̀ y'à n'ê dwì bə̀ twèlé Niili y ni mú, Nə̀-fɔ̀lɔ̀ w wə̀-jə̀ə́ré, nə̀-fwààlɛ́ bə̀ y'à n'ê byɛrhɛ mɔ́ wẽ́, è y'à wɔ́ tənèsé ya. ⁴ Bə̀kɔ́n ná-dwí cìzhìl Sədɔ̃, ǹmyɛ́ ǹ yà ǹ wɔ́ nə̀-fɔ̀lɔ̀ w cɔ w kɔ̀bɔ́ bə̀ lù byíl-fwàlsɛ bə̀ kə́kɛ́lɛ́ mɔ́! Nə̀-fɔ̀lɔ̀ w kwè nyí, o wɔ̀: «À pwǐ yə̀ yì yé, à yə̀ byǐ lùl yé, à yə̀ bala-byǎ kɔ̀n yé, à yə̀ kana-byǎ myɛ kɔ̀n yé.» ⁵ Ezhibti gə tú è nyɛ̀ɛ̀ rɛ, è gə nyɛ̀ɛ̀ ywẽ̀ né nyɛ̀bɛ́ nə̀ yú Tiiri è yala m'a cəcɛnɛ. ⁶ Byɛrhɛ-na á yí Tərəshiisi, wǔrh-nə, ámyɛ̌ byɛ̀bɛ́ á jě nǝ̀-fɔ̀lɔ̀ w vɔ̀mɛ̀ nɛ́ nɛ mɔ́! ⁷ È nə wɔ́ á cɔ w kɔ̀bɔ́ ò y'à sú ǹdə́ wu-nyɔ̃̀, ò ju kùr shãã shãã ga, yi rí tɛ̀bɛ́ rə̀ lyɛ̃ dwã nɛ́ wẽ́, e jà ò y'à n'ô zhə̀l pyépyé mùnì ga o cĩ́ kùr gàà mɔ́? ⁸ Mɔ̌ lò ń nə kwè nyí bə wɛ̀rhɛ́ rə̀myɛ́ mɔ́ Tiiri tənà y è y'à n'ê tə̀l pyɛ̀lɛ̀ yə́-púr rí mú ni? È dɔ̌lna bɛ́ y'à wɔ́ yó-cìnə́, è wə̀-yə̀rnə bé y'à wɔ́ lũ w lyì-fwààlɛ. ⁹ Wɔ́ lũ gakó Cinu mú, ń kwè nyí rí rə̀myɛ́ mɔ́ ń la mə n cɔ̀ kɔn rɛ́ tɛ̀bɛ́ gakó bə̀ n'ê cèrhé re mó cìn-dɛ̃̌-zhõ̌ mó, sə n ce bə̀ bə̀k'a nyǐ lũ w lyì-fwààlɛ́ gakó bə nə yé. ¹⁰ Tərəshiisi bə̀kɔ́, vwál ǹ cɛ yá, ǹdə kɔn gə́ twèlé Niili y vɔ̃̀ w nɛ nɛ́, bǔ-bwələ né k'ê bə zhǔ jàà zhe yé. ¹¹ Cinu cèlè ń jɛ̃̀ n mə n bú ǹdə́ nə̀-fɔ̀lɔ̀ wá, ń ce pyə̀-tənèsé kəkə. Ń pɔ nyí Kanaã tənà y nɛ, b'è ce è jààsɛ́ shɛ̀bɛ́ bə̀ lù byíl-fwàlsɛ bə m'e kə́kɛ́lɛ́ mɔ́ jé tɛ̃́. ¹² Ń wə̀lə̀: Ǹ kə́ ǹ wàr ǹ m'ǎ fùù ǹdə́ wu-nyɔ̃̀ yé, ǹmyɛ́ mɔ̀bɔ́ bə̀ nyɛ́ɛ́ mɔ́ bə zù ǹdə́ mɔ́ mɔ́, Səyɔ̃, bə̀kɔ́ ǹ yə̀l bal pár mɔ́. Zɛ̃̀ dɛ̃̌, byɛrhɛ ń vò Shipiri, gàà myɛ cìcì, ǹ tá ǹ la shìrhə́ nɔ yé. ¹³ Nyǐ Kalədɛ lyì bí tənà y ń nyì wé: dwí rí rə̀myɛ́ k'ê tɛ̀nɛ́ yé. Ashəri ce e jǐrh gɔ-bwə̌lsé jàà, bə̀ y'à lù jì-fwàlsɛ nánjíjínsi sə vò dɛ̃̌dɛ̃̌ bə̀ m'ê yìlì cɔ wá, bə lù jààsɛ sə̀ kə́kɛ́lɛ́ ǹdə́ byíl-fwàlsɛ, sə Ashəri ce e jǐrh jì-bwə̀r jàà. ¹⁴ Wǔrh-nə, Tərəshiisi bǔ-bwələ, b'ǎ shòò jàà y cɔ̀. ¹⁵ Dɛ̃ rɛ́ rə̀myɛ́ mɔ́ yù wə, bə̀ m'a swě Tiiri yò byinə shə́-shàlpyɛ̀, pyɔ̌ myə̌l dwɛ̀lɛ̀ byinə né yó wə́. Byinə shə́-shàlpyɛ̀ kwã nɛ́, kə-nə̀fòló w nwə̃́ y zɔ̀mà nɛ́ m'a pyìrh Tiiri yilə: ¹⁶ Kwě zɔ̃̀, kə́kɛ́lɛ́ cɔ w cã̌, kə-nə̀fòló w bə̀ swě ǹ yò mó. J'á búl dú náàcɛ̀nɛ́ ǹdə ǹ gə́ yě né mó gakó, nún ǹ nwísí ń k'á bwérhé, mùnì ga bə lyǐrh ǹ yò. ¹⁷ Byinə shə́-shàlpyɛ̀ kwã nɛ́, Cinu mà n wɛ̀rhɛ́ kɔn Tiiri tənà y wa, sə è m'a k'a kwɛ̃̀ e vò è n'ê pyà è nyɔ̀ɔ̀rhɛ́. È m'a fwə̌l ǹdə́ pyə̀-tənèsé shɛ̀bɛ́ gakó sə̀ wɔ cɛ yó mó, ¹⁸ sə bə̀ m'a pə è kwǎndɛ́ ǹd'ê nyɔ̀ɔ̀rhɛ́ Cinu ni, bə̀ t'â la rɛ dwã yó cṹ nánzhəzhɔ̌ e jà bə̀ t'â la rɛ dɛ̃̌ cṹ myɛ yé. Bə̀ m'a zə è kwǎndɛ́ bə m'e kɔ̃̀ byɛ̀bɛ́ bə̀ ŋwɛ́nɛ́ Cinu yé né mó, bə jí bə sú, bə súlí bə zə rɛ bə m'e pyà gɔ̀nɔ̀ kɔ̀bɔ́ ò n'ô dɛnɛ bə pə bɛ.