¹ Cinu mà n dùr Zhakɔɔbɛ nɔ̀nɔ̀, ń mà n ká n cír Esərayɛl kə́dò. Ń mà n ce bə jòm bə̀ cɛ y wẽ́. Zhələ bé m'a vò bə súlí bi, sə bə̀ m'a mù bi dwã nɛ ǹdə́ Zhakɔɔbɛ dwí rí. ² Dwə́ dwã m'a zwẽ be, nə ce bə vò bə̀ da-dǒ. Sə bə̀ gə yú Cinu cɛ y yó, Esərayɛl kɛ̀lɛ́ y m'a tə̀ bɛ è cìn ni ǹdə yómə́ ta, bala ǹdə́ kana ga; è m'a ce lyì bí byɛ̀bɛ́ bə̀ y'à ce e yə̀ yóm mó myɛ yə̀ yómə́, sə è m'a zə ŋwɔ̀nɔ́ nánfɔ̀lɔ̀ lyì bí byɛ̀bɛ́ bə̀ y'à n'ê nwɛ̀nɛ̀ y mɔ́ yó. Babyəlɔnɛ pyɔ̌ mɔ́: wu-bárhɛ́ cə́bal mɔ́ gə́ gu yó né ³ Dɛ̃ rɛ́ tɛ̀bɛ́ Cinu gə tú ń pɔ mɔ́ shìrhə́, ǹ lyààrɛ́ ǹdə́ ǹ zúzúnú nánfɔ̀lɔ̀ w e súlí yómdé tũ̀-kùlə̀ né nyɛ̀bɛ́ ǹ yà ǹ wɔ nə̀ wẽ́ mó kwã mɔ́, ⁴ ǹ m'ǎ ji nwə̃́ y kɛ̀bɛ́ Babyəlɔnɛ pyɔ̌ mɔ́ shò kwã ń wɔ̀: Etər wu-bárhɛ́ cə́bal gu yó né? Etər ń cìn-byilu mú gu yó né? ⁵ Cinu kɔ́ lwɛlɛ cìnə́ bé də̀-dɔ̀lɔ̀ wá, ń kɔ́ jàn cìnə́ bé gwə̌ y ⁶ è y'à n'ê mà dwə́ né ǹdə́ lyi-shùùri mú, gwə̌ y è y'à n'ê mà è t'â zhì è shǐrh mú, è m'ê zal dwə́ né ǹdə́ jàn nánfɔ̀lɔ̀ è lyim rí gə́ y'à n'ê yì yi ní, è m'ê nwɛ̀nɛ̀ bɛ e j'â yə̀l bə̀ nɔ̀nɔ̀ dǔr mú. ⁷ Èlǎsɛ̃́ myɛ̌, tənà y gakó j'â zhe yə̀-zùlə́. Bə̀ n'ê búbwéé wu-nyɔ̃̀ búbwéése. ⁸ Səpərɛ́ɛ́sɛbá cìcì mú myɛ n'ê fùù ǹdə́ wu-nyɔ̃̀ ǹmyɛ́ shò kwã nɛ́, sə kɔn zhí ǹ gə́ tu ń cèlè ǹ pyě yi ní ga, Lyəbã sɛ́ɛ́dərɛbá j'â zhe: «Mɔ̀bɔ́ ń yà ń nə́ ń twí ń kà nə́ba ń lwé tɛ̃́ mɔ́ kə́ ń tá ń la jíl n bə̀ yé.» ⁹ Cúlú w n'ô domə ǹmyɛ́ yilə, bə̀ gə́ bwə̀l bə byili bə̀ ǹ bàn yi ní. Ò n'ô zhɛ̀rh lyì bí byɛ̀bɛ́ bə̀ cù mú, ǹmyɛ́ yilə, lũ w lyì-fwààlɛ́ gakó, ò n'ô zhɛ̀rh tənèsé pyǎ bɛ́ bə̀ pyɛ̀lɛ̀ də̀gwésé yó. ¹⁰ Bə̀ gakó j'a zɛ̃̀ bə̀ n'ê zɔ̀mà, bə̀ n'ê wə̀l mó: «Nyǐ mú, ǹmyɛ já ǹ kə́ ǹ bə jàn zhe yé, ǹdə nə́myɛ ta, ǹ jǐrh ǹdə nə́ ta. ¹¹ Ǹ zùwə́ y nánfɔ̀lɔ̀ w gə è só cúlú ní ǹdə́ ǹ lyííribá y'à n'ê dwí nə̀ m'ê zhìì yə. Nə̀zɔ̀ɔ́rɛ́ pyònò wẽ́ ǹ pyě né, zə̀zɔ̀mɛ́ zɛ̃̀ nə̀ wɔ́ ǹ gàmə̀lyɔ̀nɔ̀ wá.» ¹² Etər kɔn tó né, ń mə́ shí dɛ̃̌-yi w ń tu tɛ̃́, Cã̀mə́sɔ̀wá kɛ̀bɛ́ è n'ê jə́jɛ̀mɛ́, Nəkɔkɔ́lɛ́ shãã shãã Byǐ? Etər kɔn tó né, bə m'e yìrh mú bə ji tɛ̃́, ǹmyɛ́ mɔ̀bɔ́ ǹ yà ǹ nə́ ǹ jí bɛlɛ tənèsé yó mó, ¹³ ǹmyɛ́ mɔ̀bɔ́ ǹ yà ǹ nə́ ǹ wə̀lə̀: «À m'a jì dɛ̃̌-yi wə, à m'a cĩ́ à pyɛ̀lɛ̀ də̀gwã́ y dɛ̃̌, Yi cã̀mə́sɔ̌sɛ́ yə́-pɛ̀lɛ́ wa, à m'a jòm Yi lyì bí kúlí y pyɔ̀ w yó, jə̀-gwã̀ yó-gurə́ sõ. ¹⁴ à m'a jì a vò ébàn rɛ́ yə́-pɛ̀lɛ́ wa, à m'a yə̀ ǹdə Dɛ̃̌-Cə́bal mɔ́ ta.» ¹⁵ Sə bə̀ ce ń só cúlú ní, Gɔ́rɔ́ w nánlyilyùmú w kùr w tɛ̃́tɛ̃́. ¹⁶ Lyì bí byɛ̀bɛ́ bə̀ nə mɔ́ mɔ́, yírhə́ j'a pyǎ ǹ yó, bə j'â n'ê kwɛrhɛ bə̀ nyǐ ǹ yé-zwã̌ w bə̀ m'ê bwə̀rh bə̀ zhe: «È nə wɔ́ bal mɔ́ mɔ̀bɔ́ ń yà ń nə́ ń ce cɛ y zhízhǐ mú? È nə wɔ́ ńmyɛ̌ ń yà ń nə́ ń ce pyə̀-tənèsé zhízhǐ sə̀ lwé tɛ̃́ mɔ́? ¹⁷ Ńmyɛ̌ ń yà ń nə́ ń ce lũ w jǐrh gɔ-elũ èpòlò mó, ń yà ń nə́ ń ce cɛmɛ nɛ́ jé tɛ̃́, n zɛ̃̀ ń tá ń yẽ̌ lyì bí byɛ̀bɛ́ bə̀ zɔ búlə́ jàà w mɔ́ nɛ bə̀ kwɛ̃̀ bə̀ zhə̀l bə̀ dǒ-sõ mó ǹdə́ mɔ̀bɔ́?» ¹⁸ Tənèsé pyǎ bɛ́ gakó, bə̀ púlə́púlə́, mə̀dù ga twə́r yə̀ vùr yé, pyě ǹdə́ còrhó, bə̀ mə̀dù gakó ń lú-bɔ̀l mɔ́ wa. ¹⁹ S'e gə wɔ́ ǹmyɛ́, bə̀ j'a búl bə dul mú pyépyé, ń zə nyan ǹdə́ ǹ bɔ̀l mɔ́, ǹdǝ byì-shɛ̀mɛ́ kɛ̀bɛ́ bǝ̀ lùl ǹd'ê j'â gwẽ̌ yǝ̀ yí cùù ta, lyì byɛ̀bɛ́ bə̀ gu, bə zò be ǹdə́ búlə́ shù bə̀ ló gɔ́rɔ́ w nə́kulə né yó mó cùùrí kùr wə, ǹdə cùù kɔ̀bɔ́ bə̀ cèè cèè tɛ̃́ nə̀rh kùr w ta. ²⁰ Ǹ tá ǹ la bə̀ yó co bɔ̀l mə̀dù wẽ́ yé, bə̀ ǹ cɔ̀ ǹ tənà yá, ǹ gu ǹ dwí rí: bə̀ j'â k'ê t'â la lyì-bəlwǎlsɛ́ dwí rí yil byõ̌ yé. ²¹ Tɛnɛ-na byǎ bɛ́ gurhu mú, bə̀ dabá lwɛlɛ rɛ́ yilə, mùnì ga bə̀ bə̀k'a zɛ̃̀ bə zwẽ cɛ y yé, bə̀ bə̀k'a lù cɛmɛ bə sú lũ w yé. ²² À m'a bú ǹdə́ bɛ, wɔ́ lũ gakó Cinu mú nyí rí, à m'a ce Babyəlɔnɛ yil ré ǹdə́ kɔn rɛ́ tɛ̀bɛ́ rə̀ m'a ce bə lyǐrh ò yò mó, ǹd'ô byǎ bɛ́ ǹd'ô dwí rí jé tɛ̃́, wɔ́ Cinu nyí rí. ²³ À m'a ce o jǐrh vɔlɔ, lúbə̀sɔrh jàà, à m'a zwàr Babyəlɔnɛ ǹdə́ zàr tɛ̀bɛ́ rə̀ n'ê ce kɔn gakó jé tɛ̃́ mɔ́, wɔ́ lũ gakó Cinu mú nyí rí. À m'a cɔ̀ Ashəri jàn rɛ́ ²⁴ Lũ gakó Cinu mú bwəl nyí n wɔ̀: «Tɛ̀bɛ́ à gu à wẽ́ à la wɔ̀rhɔ́ mɔ́ m'a wɛ̀rhɛ́, tɛ̀bɛ́ à gu à wẽ́ à la wɔ̀rhɔ́ mɔ́ m'a pyìrh. ²⁵ À m'a cɔ̀ Ashəri jàn rɛ́ à tənà y wa, à m'a cèè y tɛ̃́ à nə̀rh kùr w à pyàr rɛ́ yó. Bə̀ m'a swàr è zhĩĩ rí, lyì bí byɛ̀bɛ́ bə̀ y'à n'ê zhĩ rí mú yó wə, bə̀ m'a swàr è zhĩĩ rí bə̀ pyə́pyɛla nɛ́ yó.» ²⁶ Wɔ́ nyí rí rə̀myɛ́ rə̀ kwè lũ w púlə́púlə́ shò kwã nɛ́ mɔ́, wɔ́ èmyɛ́ è wɔ́ jɛ̃̀ y è cèlè è la m'e bú ǹdə́ tənèsé gakó mó. ²⁷ Lũ gakó Cinu mú gə gu ń wẽ́ ń la kɔn wɔ̀rhɔ́, mɔ̌ ń nə wɔ̌ ń mà n kwàrh rɛ? Ń gə cèlè ń jɛ̃̀ yá, mɔ̌ ń nə wɔ̌ ń mà n ce n kwɛ̃̀ ya? Shilisəti, bə̀k'á fùù yé ²⁸ Pyɔ̌ Akaazɛ cu mú byin rí, bə̀ bwə̀l bə byili bə wɔ̀: ²⁹ Shilisəti nyí rí púlə́púlə́, bə̀k'á fùù, gwə̌ y kɛ̀bɛ́ è y'à n'ê mà mɔ́ mɔ́ gə́ kɔ́ mɔ́ yil yé, bə̀ kùwə̀ m'a shí dɔm mɔ́ mə̀ cù mú wẽ́ e du, dɔm nánjǝ́gɔ́rɔ́ kɔ̀bɔ́ ò n'ô zɛ̃̀ vɔ̀mɛ̀ myɛ zɛ̃̀ o shí kùwə̀ y w o du. ³⁰ Lyì bí byɛ̀bɛ́ bə̀ n'ê nwɛ̀nɛ̀ du bə̀ dwã bɛ́ mɔ́ m'a zə gɔ-dɔ́m-jàà, nə̀mwà bɛ́ m'a jòm yə̀-zùlə́ wẽ́, sə à m'a ce nɔrh gu ǹ dwí rí kùr ré, bə̀ m'a gu ǹ lyì bí byɛ̀bɛ́ bə̀ la dǎl mɔ́. ³¹ Bwə̀rə̀, kúrh zúzúnú cǐl! Cɔ, búbwéé búbwéése! Shilisəti y púlə́púlə́ j'â n'ê shíshìrí tɛ̃́: bə̀ nyɛ̀rh shí jə̀-gwã̀ sõ sə̀ bànà, sə lò mə̀dù ga myɛ yə̀ pɔr bə̀ shə̀dɛ́ɛ́sɛ́ kùkùlə̀ né wẽ́ ń nə́ ń zhə̀l ń dúdú yé. ³² È nə wɔ́ bə̀kɔ́n bə̀ m'a lyár tənà y èmyɛ́ mɔ́ lyì bí bə̀ twĩ̀ mú ni? Wɔ́ Cinu ń cĩ́ Səyɔ̃ kùr ré tɛ̃́, sə ń dwí rí lyì bí byɛ̀bɛ́ bə̀ wɔ́ cìn-lwəl cìnə́ mó jě ò wẽ́ ǹdə́ yə̀-zùlə́.