¹ Kɔn rɛ́ tɛ̀bɛ́ bə̀ m'a bwə̀l bə byili Babyəlɔnɛ shò kwã nɛ́ mɔ́. Kɔn tɛ̀bɛ́ Amɔɔsɛ byǐ Ezəyi nɔ mɔ́. ² Cìì-nə myɔrhɔ tɛ̃́ o zhì dɛ̃̌, pyɔ̀ nánsà yó, mǎ-na búbwéése, yə́yá-na á jɛ̀rh, mùnì ga bə bə̀ lyì-fwààlɛ́ bwə̀rsé ne. ³ Àmyɛ́, à byẽ̀ lyì bí byɛ̀bɛ́ bə̀ kwè bə pɛ̃ mɔ́, à byẽ̀ à shə̀dɛ́ɛ́sɛ́ shɛ̀bɛ́ sə̀ m'a byili b'à lyim zɛ̃̀ rə̀ n'ê yì mú, shɛ̀bɛ́ à yó-dɛ̃̌-zhõ̌ mó n'ê pɛ bɛ wu-nyɔ̃̀ mɔ́. ⁴ Cili-nə dweme ré rə̀ n'ê dom pyàr rɛ́ w mɔ́: è nyɛ̌ ǹdə wɔ́ lyì-zhǎ ta. Cili-nə pyə̀-tənèsé ǹdə́ dwə́ né nə̀ tú dwã yó mó sɔ̀ nánfɔ̀lɔ̀ wá: Lũ gakó Cinu mú nə́ ń byɛ́lɛ́ shə̀dɛ́ɛ́sɛ́ shɛ̀bɛ́ sə̀ la vò sə bú búlə́ né mó. ⁵ Sə̀ shí tənà kɛ̀bɛ́ è nyɛ wẽ́, dɛ̃̌-yi rí cə-yala gakó kùr wə, Cinu ǹdə́ ń lyim rí byilu wẽ̀ ré, sə̀ bàn tənà y nyí rí púlə́púlə́ cɔ̌ lyə́m lyə́m. ⁶ Búbwéé-nə wu-zhùlù búbwéése! Cinu dɛ̃ rɛ́ bwəlse; rə̀ n'ê shí Cɔ̀rna mɔ́ sõ, ǹdə cɔ̌ mɔ́ ta. ⁷ Wɔ́ rə̀myɛ́ rə̀ ce, vwɛ̀mɛ̀ nɛ́ gakó j'a ló, lò gakó wu j'a lo. ⁸ Wu-zɛ̃̀ɛ̃́ nánfɔ̀lɔ̀ n'ê gwi bi, dudu ǹdə́ yin tu bə̀ yó, bə zɛ̃̀ bə̀ n'ê pyìrhí tɛ̃́ ǹdə kɛ̃ mɔ̀bɔ́ ń pwǐ zɛ̃̀ mɔ ta. Bə̀ mə̀dù gakó nə́ ń nyǐ ń dõ mó ǹdə wɔ́ kɔn rə̀ jàr mɔ dɛ̃́dɛ̃́ ta, bə̀ yésé kwɛ̃́ myǐn mə̀ zhe. ⁹ Nyǐ Cinu dɛ̃ rɛ́ bànà, rə̀ də̀ nɔ̀nɔ̀-dǔr dɛ̃ yé, rə̀ wɔ́ lyim-cəcɔ̌ kɔ̀bɔ́ ò m'a lyɛ̃ ò swɛ̃́, ò m'a ce tənà y jǐrh wu-zhùlù jàà, o súlí o ce yə̀-bəlwàálɛ́ cìnə́ bé jé tɛ̃́ lyə́m lyə́m mó dɛ̃. ¹⁰ Dɛ̃̌-yi rí cã̀mə́sɔ̌sɛ́ ǹdə́ shɛ̀bɛ́ sə̀ wɔ dwã yó kùkùl kùkùl mú pwẽ̀ ré k'ê t'â la yə̌r yé. Nə̀nyɔ́nɔ́ w m'a yə̀ námbyṹ ò púrh mú yi ní ga, sə cànà y pwẽ̀ ré k'ê t'â la yə̌r yé. ¹¹ À m'a pə còrhò-tum lũ w ni ò wu-bárhɛ́ y yilə, a pə còrhò-tum lyì-bəlwǎlsɛ́ nɛ sə̀ lwɛlɛ rɛ́ yilə. À m'a ce cìn-byilu cìnə́ bé cìn-dɛ̃̌-zhõ̌ mó zhɛ̀, a ce wu-bárhɛ́ cìnə́ bé cìn-byilu mú tu. ¹² À m'a ce bə pyà numbyínsí bə lyɛ̃̀ du sánə́má mɔ̀bɔ́ mə̀ càn mɔ́, bə pyà sɛ bə lyɛ̃̀ du Ofyííri sánə́má mɔ́. ¹³ Zhə̀n ga, à m'a ce dɛ̃̌-yi rí zhízhǐ, sə cɛ y m'a dom è kùr rí gə́ cĩ́ tɛ̃́ mə̀gã̌ mɔ́, lũ gakó Cinu lyim nánfɔ̀lɔ̀ w yilə, dɛ̃ rɛ́ tɛ̀bɛ́ ń lyim rí m'a j'a zɛ̃̀ rə̀ n'ê yì dɛ̃́dɛ̃́ mɔ́. ¹⁴ Rə̀myɛ́ yó, lò gakó mà n zɛ̃̀ ń nə́ ń dùrə̀, n zǎ ń dwí rí, lò gakó, ń tənà yá, ǹdə nɛ̀mɛ̀ kɛ̀bɛ́ bə̀ n'ê jì ta, ǹdə vwàmá nyɛ̀bɛ́ lòlò tá ń pɛ́ ń cĩ́ dwã yó mó ta. ¹⁵ Bə̀ m'a zò lyì bí byɛ̀bɛ́ gakó bə̀ la nɔ mɔ́, bə̀ m'a gu lyì bí byɛ̀bɛ́ bə̀ la jɛ̃̀ bə̀ yó cṹ mú ǹdə́ búlə́ shù. ¹⁶ Bə̀ m'a nɔ̀ bə̀ nɛ̀mɛ́ nɛ́ tɛ̃́ bə bɔbwɛlɛ bə̀ yírh wə, bə pwà bə̀ jìsí wẽ̀ ré, bə nyɛ́ɛ́ bə̀ kana bɛ́ bə zù ǹdə́ bɛ. ¹⁷ À m'a cìrh Mədi lyì bí bə̀ bə sə̀byǐ só, e ja sánə́má myɛ wàr mə̀ m'a ce bə̀ wun yə̀ nyàn mɔ́ a ce né bə bú ǹdə́ bɛ. ¹⁸ Bə̀ m'a zə bə̀ twesé bə gu bala-byǎ bɛ́, bə̀ j'â t'â la bə̀ lùlì y ni yõ̌ yé, bə̀ j'â t'â la bə̀sɔ́ná bɛ́ bə̀ yírhə́ la bə̀ yó jǒm mó nɔ̀nɔ̀ dǔr yé. ¹⁹ Babyəlɔnɛ cɔ wá, pyə̀-tənèsé dɔ̀mɛ̀ náàcɛ̀nɛ́ yá, Kalədɛ lyì bí bɔ́bwár kɔn rɛ́ tɛ̀bɛ́ rə̀ n'ê zhẽ̌ bə̀ yó dɛ̃̌ mɔ́, m'a yə̀ ǹdə Sɔdɔm ǹdə́ Gɔmɔɔrɛ ta, Yi m'a byirh w rə ji tɛ̃́. ²⁰ Lyì j'â k'ê t'â la ò wẽ́ jǒm gaga yé, ò m'à j'â pyě nánfò byin byin gakó. Jə́rh lò mó cìcì mú myɛ tá ń la ń kòrhó w gàà pú yé, vwã̌-ènɔ̀nà bɛ́ myɛ t'â la gàà zhǔ yé. ²¹ Gɔ-bwə̌lsé m'a zhì gàà, Èkwə̀l-byín rí m'a bə̀ rə sú jìsí, pyɔ̌-cə́lne m'a bə̀ nə yə̀ gàà, sə nə̀cílsía m'a bə̀ sə̀ n'ê sɛ gàà. ²² Yǔlné m'a sú ò jì-fwàlsɛ́ wẽ́, gɔ-kǔlse sú ò wu-nyɔ̃̀ pyǎ jì-ècǎnsɛ́. Ò yi rí yú rə zhɛ̀, ò dwã nɛ́ k'ê t'â la súlú yé.