koussoube-marc-lee_heb_text

Kǝ̀kàl-fwɛ̀lè 9

¹ Yi dɔbrɛ́ nã́yéé ré yi ní, rǝ̀ y'à pɔ nyǝ́ rǝ̀ còrhó yilǝ, sǝ bǝ̀ y'à wɛ̀rhɛ́ jàà èdù myɛ cɛ yó nyɔ̀nɔ̀ rǝ̀ yilǝ. ² Bǝ̀ y'à pú kòrhó òdù bǝ zǝ gɔ̀nɔ̀ bǝ gõ̀ w jì ǹdǝ́ è jìní. Bǝ̀ y'à n'ê byẽ̀ ò jì-ná y bǝ̀ «Jàà náàcɛ̀nɛ́». Bǝ wɛ̀rhɛ́ ku bǝ cĩ́ è wẽ́ bǝ̀ m'ê cĩ́ pàntámsɛ nɛ́. Bǝ wɛ̀rhɛ́ tabǝlɛ bǝ cĩ́ è wẽ́ bǝ̀ m'ê cĩ́ búrú ní bǝ̀ pɛ Yi ni. ³ Bǝ zɛ̃̀ bǝ̀ n'ê byẽ̀ ò jìní y bǝ̀ «Jàà y kɛ̀bɛ́ è càn dɛ̃́dɛ̃́ du». ⁴ Bǝ wɛ̀rhɛ́ ku bǝ̀ n'ê ji wẽ̀ rǝ̀ lwẽ́ nã́nyǝ̀nyɛ̀lɛ́ ò yó, bǝ zǝ sánǝ́má bǝ pɔ́pɔ̌ w bǝ cĩ́ jàà y èmyɛ́ wẽ́. Dɔbrɛ́ kùlkṍ w myɛ y'à ŋwɛ́nɛ́ è wẽ́, bǝ̀ y'à zǝ sánǝ́má bǝ pɔ́pɔ̌ wa. Sǝ nǝ̀zhĩ̌ y'à ŋwɛ́nɛ́ ò wẽ́, bǝ̀ zǝ sánǝ́má bǝ mɔ ya, bǝ ce mã́nɛ è wẽ́. Arɔ̃ dǝ̀-dɔ̀lɔ̀ w ò y'à púrh vɔr mɔ́ myɛ y'à ŋwɛ́nɛ́ ò wẽ́, e súlí nǝ́kulǝ né nyɛ̀bɛ́ dɔbrɛ́ zɔ̀mà nɛ́ y'à kɛ̃ nǝ̀ yó mó. ⁵ Bǝ mɔ wẽ̀ ǹdǝ màlɛ́kabá ta bǝ cĩ́ kùlkṍ w yó, rǝ̀ n'ê byili bǝ̀ Yi ŋwɛ́nɛ́ gàà ǹdǝ́ rǝ̀ zùwǝ́. Wẽ̀ dé tɛ̀bɛ́ y'à zhe vɔ̀mɛ̀. Rǝ̀ vɔ̀mɛ̀ nɛ́ ywǝ́l mó y'à n'ê círhí ku w kɔ̀bɔ́ bǝ̀ y'à n'ê lwé vwǎm jal mɔ́ ò yó yǝ̀-bǝlwàálɛ sǔbri lwǝ̌l yil mó. Sǝ nǝ́ wàr wẽ̀ dé tɛ̀bɛ́ gakó nǝ́ la byilu èlǎsɛ̃́ yé. ⁶ Wɔ́ èta bǝ̀ tɛnɛ kòrhó w né. Vwĩ̀-zwǝ́lnǝ bé n'ê zwì ò jì-ná y wẽ́ twéé twéé bǝ̀ twĩ̀ bǝ̀ tumǝ né. ⁷ Wɔ́ vwĩ̀-zwǝ́lnǝ bé yé né cìnǝ́ bé gakó náncɛ y dúdú ń nǝ́ ń zwì ò jìní y wǝ, sǝ wɔ́ twǝr rǝ̀dù byin gakó. Ń gǝ la zú, ń mǝ̌ sǝ n zǝ vwĩ̀ jal n zù n pǝ Yi ni, ń cìcì yilǝ, ǹdǝ́ lyì bí dwã bɛ́ yǝ̀-bǝlwàálɛ́ bǝ̀ wɛ̀rhɛ́ ǹdǝ́ bǝ̀ yǝ̀l mó yilǝ. ⁸ Eshirhǝ náàcɛ̀nɛ́ tó rǝ̀myɛ́ dɛnnɛ è n'ê byili bǝ̀ kòrhó w nándṍ w gǝ gwẽ̌ n'ê jí, sɔ́má tɛ̀nɛ́ sǝ lò zù jàà y kɛ̀bɛ́ è càn dɛ̃́dɛ̃́ du páá mɔ́ wẽ́ yé. ⁹ Sǝ rǝ̀myɛ́ wɔ́ myɔrhɔ èlǎsɛ̃́ mɔ́ yilǝ. Ò n'ô byili bǝ̀ vwĩ̀ paánsɛ́ bǝ̀ n'ê pɛ Yi ni mú wàr sǝ̀ ce lò mó mɔ̀bɔ́ ń nǝ́ ń pɛ sɛ mɔ́ wu w pyìrhí o zǎ Yi námpúm yé. ¹⁰ Sǝ nyǝ́ né nǝ̀myɛ́ wɔ́ kùjú ǹdǝ́ numbyíní gǝ́ mǝ̌ s'e shàrh è yala nɛ́ dwí gakó né è yò kɔrhɔ ǹdǝ́ Yi mú nyǝ́ nǝ̀ pɔwa. Nyǝ́ né nǝ̀myɛ́ pɔ nǝ m'e dɛ̃̀ dɛ̃ rɛ́ tɛ̀bɛ́ Yi kwɛrhɛ kɔn gakó mó. ¹¹ Sǝ èlǎsɛ̃́, Kristǝ túwǝ́. Ńmyɛ̌ ń wɔ́ vwĩ̀-zwǝ́lnǝ mó náncɛ yá. Cɛ̀nɛ̀ tɛ̀bɛ́ Yi y'à bwǝl nyí bǝ̀ rǝ̀ la nǝ́ba pɔ mɔ́ gakó wɔ́ ńmyɛ̌ dɛnnɛ nǝ́ tó né nǝ́ nǝ rɛ. Ń zù kòrhó w kɔ̀bɔ́ ò zhe kùr du nã́yóó mó, o j'a sú yírh dɛ̃́dɛ̃́ mɔ́ wa. Kòrhó w òmyɛ́ dǝ̀ lũ w kɔ̀bɔ́ nyɔ̃̌ yé, b'è dǝ̀ numbyínsi sǝ̀ pú w yé. ¹² Ń zù jàà y kɛ̀bɛ́ è càn dɛ̃́dɛ̃́ du mú wẽ́ twǝr rǝ̀dù sá, twéé gakó yilǝ. È dǝ̀ bǝ̀-cǐlsi ǹdǝ́ nǝ̀-byǝ-etwǝ́ǝ́le jal ń pɔ yé. Wɔ́ ń cìcì jal mɔ́ ń pɔ n mǝ n vwǎrh nǝ́ba twéé gakó yilǝ. ¹³ Bǝ̀ n'ê zǝ bǝ̀-cǐlsi ǹdǝ́ nǝ̀-byǝrh jal mɔ́, bǝ̀ n'ê zǝ nǝ̀-cɛl bǝ̀ n'ê gwi bǝ̀ fúl mó tɔ̀mɔ̀ w bǝ̀ súlí, bǝ̀ m'ê zhɛ́rhɛ́ lyì bí byɛ̀bɛ́ bǝ̀ dó mó yó bǝ̀ kwɛrhɛ bǝ̀ pwẽ̀ né mó yò, sǝ rǝ̀myɛ́ t'â wɛ̀rhɛ́ kaka bǝ̀ wun ní wẽ́ yé. ¹⁴ È gǝ wɔ́ èta, lwar-na bǝ̀ Kristǝ jal mɔ́ zhe jàn du rǝ̀myɛ́ gakó dɛ̃́dɛ̃́, bǝ̀ Kristǝ pɔ ń cìn Yi ni ǹdǝ vwĩ̀-kɔn dɛ̀bɛ́ rǝ̀ bǝ jìmdì zhe ta ǹdǝ́ Eshirhǝ náàcɛ̀nɛ́ jàn. Tùntwǝ̃̀ǝ̃̀ né nyɛ̀bɛ́ nǝ̀ n'ê cĩ́ lò cu sɔ́má yó mó byèlè nǝ́ wun ní, sǝ ń jal mɔ́ vùr nǝ́ yǝ̀-bǝlwàálɛ́ nǝ́ jǐrh wárhgáá, mùnì nǝ́ ŋwɛ̀nɛ́ nǝ́ twĩ̀ Yi nã́nyì y tum dí. ¹⁵ Wɔ́ ńmyɛ̌ dɛnnɛ Yi tó né rǝ zǝ dɔbrɛ nándùl ǹdǝ́ nǝ́ba. Ń shɛ̀nɛ́ n cì n mǝ n vwǎrh numbyínǝ́ bé bǝ̀ yǝ̀-bǝlwàálɛ́ bǝ̀ y'à n'ê wɛ̀rhɛ́ dɔbrɛ́ nã́yéé ré yi ní mú wẽ́. Ń wɛ̀rhɛ́ èta mùnì byɛ̀bɛ́ Yi byẽ̀ mó ŋwɛ̀nɛ́ bǝ nǝ cɛ̀nɛ̀ rɛ́ tɛ̀bɛ́ rǝ̀ t'â la zhɔ̌, Yi bwǝ̀l rǝ̀ nyí mú. ¹⁶ Lò gǝ pɔ nyí bǝ̀ ń gǝ cù sǝ bǝ wɛ̀rhɛ́ kɔn dɛ̀bɛ́ èta, ń gǝ gwẽ̌ yǝ̀ cì, ń nyí rí rǝ̀myɛ́ mɔ́ t'â jí yé. ¹⁷ Sǝ ń gǝ tú ń cùwǝ̀, wɔ́ rǝ̀myɛ́ yi ní, ń nyí rí zɛ̃̀ rǝ̀ n'ê jí. ¹⁸ Wɔ́ rǝ̀myɛ́ è ce, dɔbrɛ́ nã́yéé ré gǝ́ tú è la zal, bǝ̀ jɛ̀rɛ̀ bǝ ló vwǎm jal tɛ̃́. ¹⁹ Muyiisi jɛ̀rɛ̀ n byili nyǝ́ né púlǝ́púlǝ́ lyì bí gakó ne ǹdǝ nǝ̀ gǝ́ kɛ̃ sɛ́bɛ́ rɛ́ wẽ́ né, n zɛ̃̀ n kwè nǝ̀-byǝ-etwǝ́ǝ́le ǹdǝ́ bǝ̀-cǐlsi jal ǹdǝ́ nɛ̃̌ n kwè pyì-kur nándǝ̀dwààlɛ̀ nánshɛ̀n ǹdǝ́ dɔ̌ ná-èkùlí n mɔ́rh nɛ́, n jɛ̀rɛ̀ n zhɛ́rhɛ́ nyǝ́ né sɛ́bɛ́ rɛ́ yó, n zɛ̃̀ n zhɛ́rhɛ́ lyì bí gakó yó, ²⁰ n zɛ̃̀ n wɔ̀: «Jal mɔ́ mɔ̀bɔ́ wɔ́ dɔbrɛ́ Yi zɔ ǹd'ába mɔ́ myɔrhɔ.» ²¹ Rǝ̀myɛ́ kwã nɛ́, n zɛ̃̀ n zhɛ́rhɛ́ jal mɔ́ kòrhó w ǹdǝ́ wẽ̀ ré tɛ̀bɛ́ bǝ̀ y'à m'ê twĩ̀ Yi tumǝ né mó gakó yó. ²² È gǝ wɔ́ nyǝ́ né gǝ́ n'ê byili ní mú, wɔ́ jal mǝ̀ n'ê ce kɔn gakó jǐrh wárhgáá, sǝ rǝ̀ jàlà ŋwɛ́nɛ́ rǝ̀ wàr yé. Jal gǝ yǝ̀ tɛ̃́ lwé, sǔbri pɔ tɛ̀nɛ́ yé. ²³ Kɔn gǝ wɔ́ nyɔ́ɔ́ sǝ bǝ zwǝ́l vwǝ̃̀ mùnì wẽ̀ ré tɛ̀bɛ́ rǝ̀ wɔ́ Arǝzana nyǎn rɛ́ nyaarhɛ́ mɔ́ jǐrh wárhgáá, sǝ́ nyǐ Arǝzana nyǎn rɛ́ cìcì mú wɔ́ vwĩ̀ tɛ̀bɛ́ rǝ̀ zhe kùr dɛ̃́dɛ̃́ mɔ́ bǝ̀ mǝ̌ sǝ bǝ zwǝ́l rǝ̀ yilǝ. ²⁴ Zhǝ̀nà, Kristǝ yǝ̀ kòrhó kɔ̀bɔ́ numbyínsi pú ò nyɛrhɛ kɔ̀bɔ́ ò ŋwɛ́nɛ́ dɛ̃̌ Arǝzana w mɔ́ wẽ́ zwì yé. Ń zɛ̃̀ n vò dɛ̃̌ Arǝzana w Yi cìcì sõ ń nǝ́ ń lwǝ̀l rè nǝ́ yilǝ. ²⁵ Zhwifubá vwĩ̀-zwǝ́lnǝ bé náncɛ y nǝ́ ń zǝ vwàmá jal ń zwì kòrhó w jàà y kɛ̀bɛ́ è càn dɛ̃́dɛ̃́ du mú wẽ́ byin byin gakó, sǝ Kristǝ yǝ̀ nɛ́ zwì n pǝ ń cìn twǝr nánzhǝzhɔ̌ yé. ²⁶ Kɔn gǝ y'à yàl èta, ń yà ń mà n nwɛ̀nɛ̀ twǝr nánzhǝzhɔ̌ lũ w kùr-ju yi ní ga. Sǝ ń byili ń cìn dwã nɛ́ nyɛ̀bɛ́ nánkwaá nɛ́ èta mɔ́ wẽ́ twǝr rǝ̀dù sá twéé gakó yilǝ, n pǝ ń cìn ǹdǝ vwĩ̀ kɔn ta n mǝ n vùr yǝ̀-bǝlwàálɛ́. ²⁷ Lò gakó mǝ̌ sǝ n cì twǝr rǝ̀dù sá, Yi zɛ̃̀ rǝ bùr ń bùrsì. ²⁸ Èta, Kristǝ myɛ pɔ ń cìn ǹdǝ vwĩ̀-kɔn ta twǝr rǝ̀dù sá, n mǝ n vùr lyì nánzhǝzhɔ̌ yǝ̀-bǝlwàálɛ. Ń mà n ká n bà, sǝ è dǝ̀ yǝ̀-bǝlwàálɛ vǔr yil kǝ́dò yé. Wɔ́ byɛ̀bɛ́ bǝ̀ n'ê dɛ̃̀ mɔ̀ mɔ́ vwǎrh yilǝ.