Kǝ̀kàl-fwɛ̀lɛ̀ 8
1
Dɛ̀bɛ́ nǝ́ n'é byili mú gakó n'ê yǎl e wɔ̀ bǝ̀ wɔ́ vwĩ̀-zwǝ́lnǝ náncɛ y èmyɛ́ dwí rí nǝ́ zhe, ń jě Yi rí rǝ̀ jàn bǝ swɛ̃́ zhe mó jǝ̀jĩ́ ni Arǝzana wa.
2
Ń nǝ́ ń twĩ̀ vwĩ̀-zwǝ́lnǝ náncɛ tum rí jàà y náàcɛ̀nɛ́ y wẽ́, Yi kòrhó w zhǝ̀n zhǝ̀n ga ò ŋwɛ́nɛ́ dɛ̃̌ Arǝzana w mɔ́ wẽ́. Kòrhó w òmyɛ́ dǝ̀ numbyíní jɛ̃̀ tum té, wɔ́ Cǐnnǝ mó ń pú wǝ.
3
Wɔ́ vwĩ̀ paánsɛ́ Yi ni pɔ yil bǝ̀ n'ê cír vwĩ̀-zwǝ́lnǝ náncɛ gakó. Yezu myɛ mǝ̌ sǝ n pǝ kɔn Yi ni.
4
Ń gǝ́ yà ń ŋwɛ́nɛ́ cɛ yó, ń gǝ yǝ̀ vwĩ̀-zwǝ́lna yàl yé, bǝ̀ vwĩ̀-zwǝ́lnǝ jɛ̀rɛ̀ bǝ̀ ŋwɛ́nɛ́ bǝ̀ n'ê pɛ vwǝ̃̀ paánsɛ Yi ni ǹdǝ Muyiisi nyǝ́ né gǝ́ n'ê byili ní.
5
Vwĩ̀-zwǝ́lnǝ bé tumǝ né bǝ̀ n'ê twĩ̀ mú wɔ́ Arǝzana nyǝ̀ná nɛ́ nyɔrhɔ, Muyiisi gǝ́ yà ń la kòrhó w pú yi ní, Yi zɔ̀m ǹdǝ́ mɔ́ rǝ wɔ̀: Zhìlì ǹ yala nɛ ń pú kòrhó w ǹdǝ à gǝ́ pɔ mɔ́ nyí pyɔ̀ w yó né ta.
6
Sǝ tum rí tɛ̀bɛ́ bǝ̀ pɔ Yezu ni mú du vwĩ̀-zwǝ́lnǝ bé dwã bɛ́ nyǎn rɛ́. Wɔ́ ńmyɛ̌ dɛnnɛ Yi tó rǝ zǝ dɔbrɛ tɛ̀bɛ́ rǝ̀ càn du nã́yéé ré ǹdǝ́ nǝ́ba, bǝ̀ kɔn dɛ̀bɛ́ Yi bwǝl nǝ́ba rǝ̀ nyí bǝ̀ rǝ̀ la nǝ́ba pɔ mɔ́ zhe kùr du.
7
Dɔbrɛ́ nã́yéé ré gǝ y'à tó rǝ̀ sɔ́má y cɛ̀nɛ̀, bǝ̀ gǝ yǝ̀ dɔbrɛ dõ zal yé.
8
Wɔ́ rǝ̀myɛ́ è ce Yi ju búlǝ́ rǝ wɔ̀: Cǐnnǝ mó wòwǝ̀: dɛ̃ ŋwɛ́nɛ́ rǝ̀ bànà, à b'a zǝ dɔbrɛ nándùl ǹdǝ́ Esǝrayɛl ǹdǝ́ Zhidǝ lyì bí.
9
Rǝ̀ t'â la yál ǹdǝ tɛ̀bɛ́ à zɔ ǹdǝ́ bǝ̀ nàmbala bɛ́ à gǝ́ zɔ bǝ̀ jɛ̃̀ nɛ a ce bǝ shǝ́r Ezhibti ni yi ní mú ta yé. Cǐnnǝ mó kǝ́ n wɔ̀: wɔ́ bǝ̀myɛ́ cìcì bǝ̀ cɔ̀ dɔbrɛ́ rǝ̀myɛ́. Rǝ̀myɛ́ ce, àmyɛ yẽ̌ be.
10
Sǝ dɛ̃ rɛ́ tɛ̀bɛ́ rǝ̀ bàn mɔ́ gǝ tú è yúwǝ́, à b'a ce à nyǝ́ né Esǝrayɛl lyì bí surhǝ né wẽ́, a kɛ̃ nɛ bǝ̀ wun ní wẽ́. À b'a yǝ̀ bǝ̀ Yi, sǝ bǝ̀ b'a yǝ̀ à lyì. Wɔ́ rǝ̀myɛ́ rǝ̀ b'a yǝ̀ à dɔbrɛ́ à la zal ǹdǝ́ bɛ mɔ́.
11
Lò lò kǝ́ ń tá ń la ń jè-dõ ráá ń da-byǐ ne wál bǝ̀ ń pyǎ Cǐnnǝ mó pár lwar yé, bǝ̀ náncɛrh ǹdǝ́ bǝ̀ bǝ̀sɔ́ná gakó b'a lwar à párá.
12
À b'a pǝ bɛ bǝ̀ dwǝ́ǝ́ ré sǔbri; à k'â t'â la bǝ̀ yǝ̀-bǝlwàálɛ́ yò lyǐrh kǝ́dò yé.
13
Yi gǝ́ zɔ̀m dɔbrɛ́ nándùl ré yò mó, n'ê byili bǝ́ nã́yéé ré jǐrh nándwǝ́l. Zhǝ̀nà, kɔn dɛ̀bɛ́ rǝ̀ jǐrh nándwǝ́l k'ê bǝ jàn zhe yé; rǝ̀ n'ê lyɛ̃.