koussoube-marc-lee_heb_text

Kǝ̀kàl-fwɛ̀lɛè 7

¹ Mɛlcǝsǝdɛkɛ yà ń wɔ́ Salɛm lyì pyɔ̌, e jà ń yà ń wɔ́ Yi rí tɛ̀bɛ́ rǝ̀ bǝ dõ zhe mó vwĩ̀-zwǝ́lnǝ. Abǝraham yà ń zhǝ̀l n bú ǹdǝ́ pyǎ n ŋwɛ̀nɛ́ bɛ, n ká n kwɛ̃̀ ń bàn jè, Mɛlcǝsǝdɛkɛ zɛ̃̀ n vò n jǝl mo sɔ́má yó, n cĩ́ bwǝl ń yó. ² Rǝ̀myɛ́ yó, Abǝraham vùr wẽ̀ ré tɛ̀bɛ́ ń zwẽ búlǝ́ né jàà w mɔ́ òdù shí gakó yó w n pɔ̃. Mɛlcǝsǝdɛkɛ kùr wɔ́: «Cángá pyɔ̌». Kɔn súlí myɛ, ń yà ń wɔ́ Salɛm lyì pyɔ̌. Rǝ̀ kùr wɔ́: «Yǝ̀-zùlǝ́ pyɔ̌». ³ Bǝ̀ yǝ̀ ń da ǹdǝ́ ń ná pár lwar yé. Bǝ̀ yǝ̀l dwí tɛ̌ yil lò ǹdǝ́ mɔ myɛ yé. Bǝ̀ yǝ̀ ń lul ré yò zɔ̀m, bǝ̀ yǝ̀ ń cu mú myɛ yò zɔ̀m yé. Ń nyɛrhɛ Yi Byǐ mú: ń wɔ́ vwĩ̀-zwǝ́lnǝ twéé twéé. ⁴ Lwar-na bǝ̀ nyǐ Mɛlcǝsǝdɛkɛ du lyì bí gakó! Nǝ́ nàmbal Abǝraham cìcì mú vùr wẽ̀ ré tɛ̀bɛ́ ń zwẽ búlǝ́ né jàà w mɔ́ kɔn rǝ̀dù shí gakó yó w n pɔ̃. ⁵ Wɔ́ Levyi dwí rí vwĩ̀-zwǝ́lnǝ bé ne bǝ̀ y'à pɔ nyí bǝ̀ bǝ̀ ce Esǝrayɛl lyì bí vùr bǝ̀ jɛ̃̀-kɔn rɛ́ kɔn rǝ̀dù shí gakó yó w bǝ pǝ bɛ. Bǝ̀ n'ê zwẽ rǝ̀myɛ́ mɔ́ bǝ̀ sõ, bǝ̀myɛ́ ga j'à wɔ́ Abǝraham byǎ. ⁶ Abǝraham vùr wẽ̀ ré tɛ̀bɛ́ ń zwẽ búlǝ́ né jàà w mɔ́ kɔn rǝ̀dù shí gakó yó w n pǝ Mɛlcǝsǝdɛkɛ nɛ. Mɛlcǝsǝdɛkɛ zɛ̃̀ n cĩ́ bwǝl mɔ̀bɔ́ Yi y'à bwǝl mo rǝ̀ nyí rí mú yó. Mɛlcǝsǝdɛkɛ jà ń yà ń dǝ̀ Levyi dwí rí lò yé. ⁷ E jà è gǝ wɔ́ zhǝ̀n yilǝ, wɔ́ náncɛ è n'ê cĩ́ bwǝl bǝ̀sɔ́bwɛ̀lɛ́ yó. ⁸ Vwĩ̀-zwǝ́lnǝ bé byɛ̀bɛ́ bǝ̀ y'à n'ê zwẽ kɔn rǝ̀dù shí gakó yó w mó y'a cì. Mɛlcǝsǝdɛkɛ myɛ zwẽ kɔn rǝ̀dù shí gakó yó wǝ, sǝ ńmyɛ̌ ŋwɛ́nɛ́ twéé twéé, ǹdǝ bǝ̀ gǝ́ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ byili ní. ⁹ Wɔ́ Levyi nɛ̀mɛ́ nɛ́ nǝ̀ y'à n'ê zwẽ kɔn rǝ̀dù shí gakó yó w Esǝrayɛl lyì bí sõ. E jà Levyi cìcì tó Abǝraham dɛnnɛ n vùr kɔn rǝ̀dù shí gakó yó w n pa, ¹⁰ bǝ̀ Mɛlcǝsǝdɛkɛ gǝ́ zhǝ̀l n jǝl Abǝraham mɔ́, ǹdǝ́ bǝ̀ gwẽ̌ yǝ̀ Levyi lùl yé, sǝ ǹdǝ́ ń ŋwɛ́nɛ́ ń nàmbal Abǝraham jal mɔ́ wa. ¹¹ Esǝrayɛl lyì bí nyǝ́ né wẽ́, bǝ̀ y'à byili bǝ̀ wɔ́ Levyi nɛ̀mɛ́ nɛ́ wẽ́ bǝ̀ mǝ̌ sǝ bǝ cír vwĩ̀-zwǝ́lnǝ bé né ǹdǝ Arɔ̃ ta. Sǝ bǝ̀ vwĩ̀-zwǝ́lnǝ tùntwǝ̃̀ǝ̃̀ né y'à yǝ̀ Yi pùbùlǝ̀ yí yé. È gǝ dǝ̀ rǝ̀myɛ́, wɔ́ byè yil bǝ̀ y'à b'a k'e pyà vwĩ̀-zwǝ́lnǝ dõ ǹdǝ Mɛlcǝsǝdɛkɛ ta? ¹² E jà vwĩ̀-zwǝ́lnǝ tùntwǝ̃̀ǝ̃̀ né gǝ k'ê dǝ̀ nǝ̀myɛ́, sǝ́ nyǐ nyí rí myɛ mǝ̌ sǝ rǝ lyǝ́r. ¹³ Zɔ̀mà nɛ́ nǝ̀myɛ́ wɔ́ nǝ́ Cǐnnǝ mú yò nǝ̀ n'ê zɔ̀mà. E jà wɔ́ kwálá dõ wẽ́ bǝ̀ lùl mò né. Sǝ kwálá y èmyɛ́ mɔ́ lò mǝ̀dù ga yǝ̀ vwĩ̀-zwǝ́lnǝ yàl yé. ¹⁴ Lyì bí gakó yě bǝ̀ nǝ́ Cǐnnǝ mú wɔ́ Zhidǝ kwálá y wẽ́ bǝ̀ lùl mò né, e jà Muyiisi gǝ́ zɔ̀m vwĩ̀-zwǝ́lnǝ bé cír mó yò mó, ń yǝ̀ kwálá y èmyɛ́ yò zɔ̀m yé. ¹⁵ Èlǎsɛ̃́, nǝ́ m'ǎ byili kɔn dɛ̀bɛ́ rǝ̀ b'a ce kɔn jǐrh pamparɛ̃ɛ̃ du: vwĩ̀-zwǝ́lnǝ dõ túwǝ́, ń nyɛrhɛ Mɛlcǝsǝdɛkɛ, ¹⁶ sǝ ńmyɛ̌ mɔ́ yǝ̀ vwĩ̀-zwǝ́lnǝ jǐrh ǹdǝ numbyínsí nyǝ́ né gǝ́ n'ê byili ní yé. Ń jǐrh vwĩ̀-zwǝ́lnǝ nyǔ mǝ̀ t'â la zhɔ̌ jàn yilǝ. ¹⁷ Zhǝ̀nà, bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Ǹ wɔ́ vwĩ̀-zwǝ́lnǝ byinǝ nǝ̀ bǝ zhɔ̌ zhe yilǝ, ǹdǝ Mɛlcǝsǝdɛkɛ ta.» ¹⁸ Nyí rí nándwǝ́l ré y'à bǝ kùr zhe, rǝ̀ gǝ́ y'à dǝ̀ námpúm mú yilǝ. Rǝ̀myɛ́ ce bǝ yẽ̌ re. ¹⁹ Muyiisi nyǝ́ né yǝ̀ ce kaka yǝ̀ námpúm yé, sǝ Yi nyì-bwelé y nǝ́ r'é dɛ̃̀ mɔ́ ce nǝ́ wɔ̌ nǝ́ bwǝlse re, bǝ̀ kɔn rɛ́ dɛ̀bɛ́ nǝ́ r'é dɛ̃̀ mɔ́ zhe kùr du. ²⁰ Kɔn súlí myɛ, ń gǝ́ jǐrh vwĩ̀-zwǝ́lnǝ mó, Yi cìcì yàl ń zhǝ̀n-cí. Sǝ vwĩ̀-zwǝ́lnǝ bé dwã bɛ́ yǝ̀ zhǝ̀n-cí zal yé. ²¹ Yi yàl Yezu zhǝ̀n-cí. Rǝ̀ zɔ̀m ń yò rǝ wɔ̀: «Cinu bwǝl nyí n wɔ̀: ‹Ǹ b'ǎ yǝ̀ vwĩ̀-zwǝ́lnǝ byinǝ nǝ̀ bǝ zhɔ̌ zhe yilǝ.› Sǝ ń nyì-bwelé y t'â la lyǝ́r yé.» ²² Wɔ́ rǝ̀myɛ́ è ce nǝ́ yě náàcɛ̀nɛ́ bǝ̀ nyǐ nǝ́ b'ǎ tó Yezu dɛnnɛ nǝ́ nǝ dɔbrɛ tɛ̀bɛ́ rǝ̀ càn du nã́yéé ré. ²³ Kɔn dõ ŋwɛ́nɛ́ rǝ̀ n'ê byili bǝ̀ Yezu ǹdǝ́ vwĩ̀-zwǝ́lnǝ bé dwã bɛ́ dǝ̀ rǝ̀dù yé: shãã ga vwĩ̀-zwǝ́lnǝ bé yàl nánzhǝzhɔ̌, bǝ̀ bǝ̀ cù cù bǝ pú dwã nɛ́, bǝ̀ yǝ̀ ŋwɛ̀nɛ́ bǝ súlí tum dí bǝ vò yé né yé. ²⁴ Sǝ Yezu gǝ́ ŋwɛ́nɛ́ twéé twéé mó ce, ń wɔ́ vwĩ̀-zwǝ́lnǝ byinǝ nǝ̀ bǝ zhɔ̌ zhe yilǝ. ²⁵ Rǝ̀myɛ́ ce, ń wɔ̌ ń mà n vwǎrh lyì bí byɛ̀bɛ́ bǝ̀ tó ń dɛnnɛ bǝ̀ n'ê yǎl bǝ bwǝlse Yi ni mú námpúm, bǝ̀ ń ŋwɛ́nɛ́ twéé gakó ń nǝ́ ń zal Yi cã̌ nɛ bǝ̀ yilǝ. ²⁶ Wɔ́ vwĩ̀-zwǝ́lnǝ náncɛ y èmyɛ́ dwí rí è mǝ̌ ǹdǝ́ nǝ́ba. Ń wɔ́ náàcɛ̀n námpúm; ń bǝ yò zhe yé; ń bǝ dóó myɛ zhe yé; ń yǝ̀ yǝ̀-bǝlwàálɛ cìnǝ́ ne gùlí yé. Yi zhẽ̌ mo dɛ̃̌ kɔn gakó yǝ́-pɛ̀lɛ́ wa. ²⁷ Ń dǝ̀ ǹdǝ vwĩ̀-zwǝ́lnǝ bé náncɛsɛ́ dwã bɛ́ ta yé. Bǝ̀myɛ́ n'ê jɛ̀rɛ̀ bǝ̀ zwǝ́l vwǝ̃̀ né bǝ pǝ Yi ni bǝ̀ sǝ̀pwà yǝ̀-bǝlwàálɛ yilǝ, fòró bǝ zɛ̃̀ bǝ zwǝ́l lyì bí dwã bɛ́ yǝ̀-bǝlwàálɛ yilǝ, sǝ Yezu pɔ ń cìn Yi ni n mǝ n zwǝ́l vwĩ̀ twǝr rǝ̀dù sá, twéé gakó yilǝ. ²⁸ Vwĩ̀-zwǝ́lnǝ bé náncɛsɛ́ shɛ̀bɛ́ bǝ̀ y'à n'ê cír ǹdǝ Muyiisi nyǝ́ né gǝ́ byili ní mú wɔ́ bǝ-jàn-zhǝǝre cìnǝ́. Sǝ rǝ̀myɛ́ kwã nɛ́, Yi cìcì yàl rǝ̀ Byǐ mú zhǝ̀n-cí, bǝ̀ ń sú rǝ̀ yírh, rǝ cír mo ń wɔ́ vwĩ̀-zwǝ́lnǝ náncɛ byinǝ nǝ̀ bǝ zhɔ̌ zhe yilǝ.