¹ Rǝ̀myɛ́ ce, cèrhè-nǝ nǝ́ cèrhè còrhò mɔ̀bɔ́ mǝ̀ wɔ́ námpwǝ̀lǝ́ nyǎm Kristǝ shò-kwã nɛ́, sǝ nǝ́ yẽ̌ kùr-ju kàrmɔ́ nɛ. ² Bǝ̀ byili ába bǝ̀ yẽ̌-nǝ tùntwǝ̃̀ǝ̃̀ né nyɛ̀bɛ́ nǝ̀ n'ê zǝ lò nǝ̀ zhǝ̀l cu jàà w mɔ́ nɛ, s'á zhí Yi ni. Bǝ̀ zɔ̀m nɛ̃̌-mɔ́ɔ́lɛ ǹdǝ́ jɛ̀sɛ́ còlò lyì bí yó mó, ǹdǝ́ cùùrí bùrhù mú, ǹdǝ́ bùrsí kɔ́ dɛ̃ rɛ́ nánkwɛɛ́ rɛ́ yò ǹd'ába. Rǝ̀myɛ́ ce, nǝ́ bǝ mǝ̌ sǝ nǝ́ k'á ji kùr nǝ́ n'é zɔ̀m rǝ̀myɛ́ yò bǝ́ byili ába yé. ³ Yi gǝ pɔ sɔ́má, nǝ́ b'ǎ cèrhè kɔn dɛ̀bɛ́ rǝ̀ mǝ̌ ǹdǝ́ námpwǝ̀lǝ́ Kristǝ shò-kwã nɛ́. ⁴ Byɛ̀bɛ́ Yi pwẽ̀ ré yǝ̌r, bǝ nǝ Yi pɛnɛ́ yá, Eshirhǝ náàcɛ̀nɛ́ só bǝ̀myɛ yó; ⁵ bǝ pwírí Yi zɔ̀mɛ̀ rɛ́ nyɛ̀, bǝ lwar lũ w kɔ̀bɔ́ ò bàn mɔ́ jàn rɛ́ gǝ́ la nɛ́ yál, ⁶ lyì bí bǝ̀myɛ́ mɔ́ k'a zù tùntwǝ̃̀ǝ̃̀ námmǝlwǎlsɛ wẽ́, bǝ̀ k'ê wàr bɛ bǝ̀ la ce bǝ pyìrhí bǝ̀ wun yé; bǝ̀ kɔn nyɛ̌ ǹdǝ wɔ́ Yi Byǐ mú bǝ̀ k'a kwɛrhɛ bǝ̀ n'ê pǝpa dǝ̀-jɔrhɔ́ yó ta, lyì bí dwã bɛ́ zɛ̃̀ bǝ nǝ sɔ́má bǝ̀ n'ê tùrh mo. ⁷ Cɛ kɛ̀bɛ́ è n'ê nɛ dwà nɛ̃̌ pɔ́npɔ́n, è n'ê swẽ́, wẽ̀ ré tɛ̀bɛ́ bǝ̀ dù è wẽ́ mó byì rǝ ce byì-ècɛ̀nà è cìnǝ́ bé bǝ̀ n'ê vwàl mɔ́ yilǝ, sǝ Yi n'ê cĩ́ bwǝl è yó. ⁸ Sǝ è k'a lyĩ sɔr ǹdǝ́ gɔ dúdú, bǝ̀ n'ê wǝ̀l b'è bǝ càn yé. Yi t'â la dɔnɔ rǝ m'e zhìlì è yò yé, sǝ è yó m'a e gu ǹdǝ́ myǐn ju. ⁹ Nǝ́ dɔwabá nántwǝ̌rh, nǝ́ n'é zɔ̀m èta, nǝ́ j'ǎ yě náàcɛ̀nɛ́ bǝ̀ wɔ́ sɔ́má kɛ̀bɛ́ è càn, è la vwǎrh jàà w yó á ŋwɛ́nɛ́. ¹⁰ Yi wɔ́ cángá cǝ́bal. Rǝ̀ wàr rǝ̀ la á gǝ́ só re mó, ǹdǝ́ kɔn dɛ̀bɛ́ á n'á wɛ̀rhɛ́ mɔ́ yò sǒ yé. Á tó rǝ̀ lyì bí á y'ǎ n'á sɛ̃ shãã ga mɔ́ dɛnnɛ á byili b'ǎ só re, sǝ wɔ́ èta á gwẽ̌ n'á wɛ̀rhɛ́ nɛ́ zà. ¹¹ Sǝ nǝ́ n'é yǎl b'ǎ mǝ̀dǝ̀ gakó ce jàn nɛ́ n já ń nǝ́ ń wɛ̀rhɛ́ èta, kɔn m'e yí Cǐnnǝ mó dɛ̃ rɛ́, mùnì ga á nǝ kɔn dɛ̀bɛ́ gakó á n'á dɛ̃̀ Cǐnnǝ mó sõ mó. ¹² Á bǝ́k'á jǐrh nǝ̀wàcànyǝla yé. Yál-na lyì byɛ̀bɛ́ bǝ̀ zhí Yi ni, bǝ̀ n'ê zhìlì bǝ̀ yala nɛ, bǝ̀ lyì byɛ̀bɛ́ bǝ̀ n'ê wɛ̀rhɛ́ èta, bǝ̀ b'ǎ nǝ cǝl kɔn rɛ́ dɛ̀bɛ́ Yi bwǝl rǝ̀ nyí mú wẽ́. ¹³ Yi gǝ́ bwǝl nyí Abǝraham nɛ mɔ́, lò dõ yǝ̀ nɛ́ yàl ńmyɛ kǝ́ ń du Yi sǝ n mǝ n yǝ̀ rǝ̀ zhǝ̀n-cí, ¹⁴ rǝ̀ wò Abǝraham nɛ: Zhǝ̀n zhǝ̀nà, à b'a cĩ́ bwǝl ǹ yó, sǝ à b'a pɔ̃́ dwí rǝ pù. ¹⁵ Abǝraham pyɛ́nɛ́ n dɛ̃̀ kɔn dɛ̀bɛ́ Yi bwǝl mo rǝ̀ nyí mú, sǝ ń nɔ rɛ. ¹⁶ Numbyíní gǝ la nyí bwǝl, wɔ́ lò mɔ̀bɔ́ ńmyɛ kǝ́ ń du ńmyɛ ń nǝ́ ń yàl ń zhǝ̀n-cí. ¹⁷ Èta, Yi myɛ gǝ́ y'à n'ê yǎl rǝ byili Abǝraham dwí rí rǝ̀ mǝ̌ ǹdǝ́ kɔn rɛ́ rǝ̀ bwǝl rǝ̀ nyí mú ni pamparɛ̃ɛ̃ bǝ̀ nyǐ rǝ̀ nyí-bwelé t'â la kwǎrh mó ce, rǝ̀ cìcì yàl rǝ̀ zhǝ̀n-cí. ¹⁸ Nyì-bwelé kɛ̀bɛ́ è zhe zhǝ̀n-cí t'â lyǝ́r yé. Yi cìcì wàr rǝ̀ b'a yǝ̀ rǝ̀ bwelé y zhǝ̀n-cí, e zɛ̃̀ e yǝ̀ kɔma yé. Èta, rǝ̀myɛ́ n'ê zal nǝ́ wun ni dɛ̃́dɛ̃́ nǝ́ yẽ̌ kɔn gakó ne, nǝ́ m'é dɛ̃̀ kɔn dɛ̀bɛ́ Yi bwǝl nǝ́ba rǝ̀ nyí mú. ¹⁹ Kɔn rɛ́ rǝ̀myɛ́ mó ce nǝ́ bùlǝ̀ né zhǐ kẽkẽ jàà èdù. Rǝ̀myɛ́ ce, nǝ́ wɔ̌ nǝ́ b'ǎ zù Yi jì y jàà y kɛ̀bɛ́ è càn dɛ̃́dɛ̃́ Yi gǝ́ jě mǝ̀gã̌ mɔ́ wẽ́. ²⁰ Wɔ́ gàà Yezu tó yé n vò ń jě né nǝ́ yilǝ, n jǐrh vwĩ̀-zwǝ́lnǝ náncɛ ǹdǝ Mɛlcǝsǝdɛkɛ ta byinǝ nǝ̀ bǝ zhɔ̌ zhe yilǝ.