¹ Vwĩ̀-zwǝ́lnǝ náncɛ gakó wɔ́ lyì bí wẽ́ bǝ̀ n'ê cír mo né. Ń nǝ́ ń lwǝ̀l Yi bǝ̀ yilǝ. Ń nǝ́ ń pɛ vwĩ̀ paánsɛ́ Yi ni lyì bí yǝ̀-bǝlwàálɛ sǔbri nɔ yilǝ. ² Ń wɔ̌ ń nyɛ̀ɛ̀ byɛ̀bɛ́ bǝ̀ jé, bǝ zɛ̃̀ bǝ̀ n'ê dwé ǹdǝ́ bǝ̀ yǝ̀l mó zɔ̀mà kùrǝ̀, n dùr bǝ̀ nɔ̀nɔ̀, bǝ̀ ńmyɛ cìcì mú wɔ́ bǝ-jàn-zhǝǝre cí. ³ Rǝ̀myɛ́ ce, kɔn n'ê nyɛ́ɛ́ mɔ bǝ̀ ń pǝ vwĩ̀ paánsɛ́ Yi ni ńmyɛ̌ cìcì mú ǹdǝ́ lyì bí dwã bɛ́ yǝ̀-bǝlwàálɛ́ ga yilǝ. ⁴ Lò tá ń pɛ ŋwɔ̀nɔ́ w òmyɛ́ ń cìn nì yé. Wɔ́ Yi rǝ̀ n'ê cír mo, rǝ byẽ̀ mò ǹdǝ rǝ̀ gǝ́ byẽ̀ Arɔ̃ nɛ́. ⁵ Kristǝ myɛ wɔ́ èta. Ń gǝ́ jǐrh vwĩ̀-zwǝ́lnǝ náncɛ mɔ́, è dǝ̀ ńmyɛ̌ cìcì ń pɔ ŋwɔ̀nɔ́ w òmyɛ́ ń cìn nì yé. Wɔ́ Yi rǝ̀ pɔ mɔ wa. Rǝ̀ wò mò: «Ǹ wɔ́ à byǐ; kɔn zhí zà, à jǐrh ǹ Da.» ⁶ Sǝ rǝ̀ zɔ̀m jàà dõ wǝ, rǝ wɔ̀: «Ǹ wɔ́ vwĩ̀-zwǝ́lnǝ byinǝ nǝ̀ bǝ zhɔ̌ zhe yilǝ, ǹdǝ Mɛlcǝsǝdɛkɛ ta.» ⁷ Yezu gǝ́ yà ń ŋwɛ́nɛ́ lũ w wẽ́ yi ní, ń yà ń nǝ́ ń lwǝ̀l mɔ̀bɔ́ ń wɔ̌ mɔ ń la vwǎrh cu jɔ̃̀ w mɔ́ nɛ ǹdǝ́ wìrhí nánfwɛ̀lɛ̀ ǹdǝ́ yǝ́-nàná; sǝ ń gǝ́ lwǝl ń cìn tɛ̃́ Yi yé né mó ce, rǝ̀ zwẽ ń lwǝ̌l mó. ⁸ 8 Ǹdǝ́ ń wɔ́ Yi Byǐ ga, ń tó nɔ̀nɔ̀ dwí tɛ̀bɛ́ gakó ń nwɛ̀nɛ̀ mɔ́ dɛnnɛ n cèrhè nyí ni shɔ̀nɔ́. ⁹ Ń gǝ́ pyìrh kɔn gakó n zhɛ̀, n jǐrh byɛ̀bɛ́ bǝ̀ n'ê shɛ̀nɛ́ ń nyí ni mú zwennǝ twéé gakó yilǝ. ¹⁰ Yi cír mo n yǝ̀ vwĩ̀-zwǝ́lnǝ náncɛ ǹdǝ Mɛlcǝsǝdɛkɛ ta. ¹¹ Zɔ̀mà nánzhǝzhɔ̌ ŋwɛ́nɛ́ nǝ́ r'é yǎl nǝ́ byili Kristǝ gǝ́ wɔ́ vwĩ̀-zwǝ́lnǝ náncɛ y mɔ́ shò-kwã nɛ́, sǝ á gǝ́ t'á nyɛ̀ɛ̀ zɔ̀mɛ̀ kùr nàná mɔ́ ce, nǝ̀ byilu b'a yǝ̀ zwini. ¹² Á y'ǎ mǝ̌ s'á jǐrh kàrmɔ̀ byilnǝ shãã shãã ga, sǝ nyǐ ába, kɔn gwẽ̌ wɔ́ nyɔ́ɔ́ bǝ̀ bǝ̀ k'a ji kùr bǝ cèrhè ába kùr-ju kàrmɔ́ Yi nyǝ̀ná nɛ́ shò-kwã nɛ́ mɔ́. Á k'á wàr kùjú nánkùlù á n'á jí yé. Wɔ́ yil bǝ̀ mǝ̌ sǝ bǝ ce á nyí ni. ¹³ E jà lò mɔ̀bɔ́ ń gwẽ̌ nǝ́ ń nywɛ̀ yil, ń nyɛ̌ ǹdǝ byì-shɛ̀mɛ́ ta; ń yǝ̀l cángá nyǝ̀ná nɛ́ yé-shò yé. ¹⁴ Sǝ kùjú nánkùlù wɔ́ lyì byɛ̀bɛ́ bǝ̀ jǐrh námpwǝ̀lǝ́ nyɔ̃̌, bǝ̀ bǝ̀ nɔ ywẽ̀ nánzhǝzhɔ̌. Rǝ̀myɛ́ ce, bǝ̀ yě cɛ̀nɛ̀ ǹdǝ́ lwɛlɛ pár dwã wa.