koussoube-marc-lee_heb_text

Kǝ̀kàl-fwɛ̀lɛ̀ 4

¹ Shìrhǝ́ jàà y y'à bwǝl è nyí nǝ́ nàmbala bɛ́ mɔ́ gwẽ̌ n'ê jí nǝ́myɛ yilǝ. Rǝ̀myɛ́ ce, Dɛ̃̌-na á cìnǝ̀, á mǝ̀dù ga bǝ̀ká n mɛ̃ kwã nɛ́ yé. ² Bǝ̀ y'à bwǝ̀l yò-ècɔ̀nɔ̀ nyí rí bǝ byili bǝ̀byɛ nɛ, ǹdǝ bǝ̀ gǝ́ bwǝ̀l re bǝ byili nǝ́myɛ nɛ nɛ́. Sǝ bǝ̀myɛ́ rɛ zwẽ yé. Rǝ̀myɛ́ ce rǝ̀ yǝ̀ bɛ sɛ̃ yé. ³ Nǝ́myɛ̌ zwẽ nyí. Rǝ̀myɛ́ ce nǝ́myɛ̌ b'ǎ zù shìrhǝ́ jàà y wa. Yi zɔ̀m nǝ́ nàmbala bɛ́ yò rǝ wɔ̀: À bwǝl ǹdǝ lyim a pǝ bɛ́ a wɔ̀: ǎ nyǐ bǝ̀ t'á la shìrhǝ́ jàà y à tɛnɛ bǝ̀ yil mó w zú yé. Yi j'a zhɛ̀ rǝ̀ tum rí rǝ̀ gǝ́ wɛ̀rhɛ́ lũ w yi ní ga. ⁴ Bǝ̀ zɔ̀m Yi gǝ́ wɛ̀rhɛ́ lũ w rǝ zhɛ̀ dwã nɛ́ nyàlpyɛ̀ y yù w mú yò Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: Yi gǝ́ zhɛ̀ rǝ̀ tumǝ né gakó, rǝ̀ shǐrh dwã nɛ́ nyàlpyɛ̀ y yùwǝ̀. ⁵ Sǝ Yi k'e zɔ̀m shìrhǝ́ dɛ̃ rɛ́ yò kǝ́dò. Rǝ̀ wòwǝ̀: Bǝ̀ t'â la shìrhǝ́ jàà y kɛ̀bɛ́ à tɛnɛ bǝ̀ yil mó w yú yé. ⁶ Byɛ̀bɛ́ bǝ̀ jɛ̀rɛ̀ bǝ nyɛ̀ɛ̀ yȯ-ècɔ̀nɔ̀ nyí rí mú yǝ̀ rɛ zwẽ yé. Rǝ̀myɛ́ ce bǝ̀ yǝ̀ shìrhǝ́ jàà y wẽ́ yí yé. Sǝ lyì dwã wɔ̌ bǝ̀ m'a zù è wẽ́. ⁷ Wɔ́ rǝ̀myɛ́ è ce, Yi pyà dɛ̃ dõ, rǝ zɛ̃̀ rǝ̀ n'ê byẽ̀ dɛ̃ rɛ́ rǝ̀myɛ́ bǝ̀ zà. Rǝ̀myɛ́ kwã nɛ́, rǝ k'e tó Dǝvyidi dɛnnɛ rǝ zɔ̀m dɛ̃ rɛ́ rǝ̀myɛ́ mɔ́ yò kǝ̀kàlà y kɛ̀bɛ́ nǝ́ lyɛ̃ mɔ́ wẽ́ rǝ wɔ̀: Ámyɛ̌ gǝ nyɛ̀ɛ̀ Yi cǝl ré zà, s'á bǝ̀ká shĩ á zhã̌ yé. ⁸ Zhozwe gǝ yà ń zǝ Yi lyì bí n yí shìrhǝ́ jàà y wa, Yi gǝ k'ê yǝ̀ dɛ̃ dõ yò zɔ̀m yé. ⁹ Rǝ̀myɛ́ n'ê byili bǝ̀ shìrhǝ́ gwẽ̌ ŋwɛ́nɛ́ Yi lyì bí yilǝ. È nyɛ̌ ǹdǝ dwã nɛ́ nyàlpyɛ̀ y yù w shìrhǝ́ y ta. ¹⁰ Lò gǝ zù shìrhǝ́ jàà y Yi tɛnɛ mɔ́ wẽ́, ńmyɛ wɔ́ ń tumǝ né nǝ̀ zhɛ̀, n zɛ̃̀ ń nǝ́ ń shǐrh, ǹdǝ Yi gǝ́ zhɛ̀ rǝ̀myɛ tumǝ nɛ́ rǝ zɛ̃̀ rǝ shǐrh né. ¹¹ Rǝ̀myɛ́ ce, ce-nǝ nǝ́ ce jàn nɛ́ , mùnì ga nǝ́ zù shìrhǝ́ jàà y wa. Èta, lò lò tá ń la byɛ̀bɛ́ bǝ̀ yǝ̀ Yi nyǝ̀ná nɛ́ zwẽ mó surhǝ námmǝlwǎlsɛ́ kǒ n jé yé. ¹² Yi zɔ̀mɛ̀ rɛ́ wɔ́ nã́nyì, rǝ̀ zhe jàn. Rǝ̀ zhe nyí du búlǝ́ shǐ kɛ̀bɛ́ è yésé ga zhe nyí. Rǝ̀ n'ê zwì numbyíní wu w wẽ́, rǝ lyɛ̃ rǝ zù è yala nɛ́ cìnǝ́ né gakó wẽ́. Rǝ̀ n'ê bùr numbyíní wu-bùlǝ̀ né ǹdǝ́ è shilǝ né gakó bùrsi. ¹³ Kɔn rǝ̀dù ga tɛ̀nɛ́ lũ w wẽ́ rǝ̀ b'a lú Yi yé né yé. Rǝ̀ gǝ́ nǝ nǝ́ba pamparɛ̃ɛ̃ mɔ́ ce, rǝ̀ b'a bwǝ̀rh nǝ́ba nǝ́ tùntwǝ̃̀ǝ̃̀ né gǝ́ yàl nɛ́. ¹⁴ Nǝ́ zhe vwì-zwǝ́lnǝ náncɛ, ń du vwĩ̀-zwǝ́lnǝ bé gakó. Wɔ́ Yi byǐ Yezu. Ń zɛ̃̀ n vò dɛ̃̌ Yi gǝ́ ŋwɛ́nɛ́ mǝ̀gã̌. Rǝ̀myɛ́ ce, Zhǐ-nǝ nǝ́ zhì kɔn rɛ́ dɛ̀bɛ́ nǝ́ zwẽ rǝ̀ nyí mú yó kẽkẽ, ¹⁵ bǝ̀ vwĩ̀-zwǝ́lǝ mó náncɛ y nǝ́ zhe mó wɔ̌ ń mà n dùr nǝ́ nɔ̀nɔ̀ nǝ́ bǝ-jàn-zwǝǝré wẽ́. Bǝ̀ zhẽ̀ mo kɔn gakó wẽ̀ ǹdǝ nǝ́myɛ ta. Sǝ ń yǝ̀ yǝ̀-bǝlɔ̀lɔ́ wɛ̀rhɛ́ yé. ¹⁶ Rǝ̀myɛ́ ce, bà-nà nǝ́ vò Yi Jàn-bǝ-swẽ́-zhe ǹdǝ́ yò-ècɔ̀nɔ̀ w cǝ́bal mɔ́ sõ, mùnì n dùr nǝ́ nɔ̀nɔ̀, nǝ́ gǝ zhe sɛ̃ɛ̃́ tum sǝ n sɛ̃ nǝ́ba.