¹ Rǝ̀myɛ́ ce, da-byǎ Kristǝ-lyì, ámyɛ̌ byɛ̀bɛ́ Yi byẽ̀ mó, nyǐnǝ Yezu. Wɔ́ ńmyɛ̌ ń wɔ́ vwĩ̀-zwǝ́lnǝ náncɛ y Yi twĩ̀, nǝ́ zɛ̃̀ nǝ́ tó ńmyɛ̌ dɛnnɛ nǝ́ zhí Yi ni. ² Wɔ́ Yi rǝ̀ cír mo tum dí rǝ̀myɛ́ yilǝ. Ń wɛ̀rhɛ́ ǹdǝ rǝ̀ gǝ́ n'ê yǎl nɛ́, ǹdǝ Muyiisi ta. Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Muyiisi yàl Yi tùntùnnǝ̀ nántwǝ̌. Ń wɛ̀rhɛ́ ǹdǝ rǝ̀ gǝ́ n'ê yǎl nɛ́ rǝ̀ kɛ̀lɛ́ y gakó wẽ́.» ³ Lò gǝ lù jì, bǝ̀ mǝ̌ sǝ bǝ cèrhé mɔ̀bɔ́ ń lù y mú du yǝ. ⁴ Jì gakó wɔ́ lò ń nǝ́ ń lwì yǝ̀, sǝ mɔ̀bɔ́ ń wɛ̀rhɛ́ kɔn gakó mó, wɔ́ Yi. ⁵ Shãã ga, Muyiisi yàl Yi tùntùnnǝ̀ nántwǝ̌. Ń wɛ̀rhɛ́ ǹdǝ rǝ̀ gǝ́ n'ê yǎl nɛ́ rǝ̀ kɛ̀lɛ́ y gakó wẽ́. N yǝ̀ kɔn rɛ́ dɛ̀bɛ́ rǝ̀ y'à m'a byili lyì bí ni mú zhǝ̀n-cínnǝ. ⁶ 6 Sǝ Kristǝ wɔ́ Yi Byǐ. Rǝ̀ ce ń cǐ rǝ̀ kɛ̀lɛ́ yá. Sǝ wɔ́ nǝ́myɛ̌ nǝ́ wɔ́ rǝ̀ kɛ̀lɛ́ yá, ǹdǝ́ nǝ́ gǝ n'é zwẽ nyí ǹdǝ́ nǝ́ wun gakó bǝ̀ Yi nyì-bwelé y t'â la kwǎrh. ⁷ Rǝ̀myɛ́ ce, cili-nǝ kɔn rɛ́ dɛ̀bɛ́ Eshirhǝ náàcɛ̀nɛ́ byili mú. È wòwǝ̀: «Ámyɛ̌ gǝ nyɛ̀ɛ̀ Yi cǝl ré zà, ⁸ s'á bǝ̀k'á shĩ á zhã̌, ǹdǝ á nàmbala bɛ́ gǝ́ wɛ̀rhɛ́ nɛ́ gɔ-elũ èpòlò w wẽ́ mó ta yé. Bǝ̀ cẽ Yi nyǝ̀ná nɛ́ bǝ zhẽ̀ rè, bǝ m'e pyà rǝ̀ nyí.» ⁹ Yi wòwǝ̀: «Á nàmbala bɛ́ zhẽ̀ nè gàà, mùnì ga bǝ̀ yírhǝ́ nǝ kɔn dɛ̀bɛ́ à la wɔ̀rhɔ́ mɔ́. Sǝ bǝ̀ yírhǝ́ nɔ rɛ byinǝ shǝ́-èna. ¹⁰ Wɔ́ rǝ̀myɛ́ è ce, à lyim zɛ̃̀ ǹdǝ́ bɛ a wɔ̀: ‹Bǝ̀ bùlǝ̀ né ŋwɛ́nɛ́ jó sɔ́má yó dɛ̃ gakó. Bǝ̀ t'â yǎl bǝ lwar sɔ́msɛ́ shɛ̌ yil à byili bi yé.› ¹¹ À bwǝl ǹdǝ́ lyim a pǝ bɛ a wɔ̀: ǎ nyǐ bǝ̀ t'â la shìrhǝ́ jàà y à tɛnɛ bǝ̀ yil mó w yú yé.» ¹² Da-byǎ, dɛ̃̌-na á cìnǝ̀, lò mǝ̀dù ga bǝ̀ká n yǝ̀ á wẽ́ bùlǝ̀ námmǝlwǎlsɛ ce n yẽ̌ Yi rí nã́nyì y ni n cẽ rǝ zhú yé. ¹³ Yi zɔ̀mɛ̀ rɛ́ sɛ́bɛ́ rɛ́ gǝ́ wò bǝ̀: «Á gǝ nyɛ̀ɛ̀ Yi cǝl ré zà» mɔ́, zǝ-na zɔ̀mɛ̀ rɛ́ rǝ̀myɛ́ á cící dwã, mùnì ga yǝ̀-bǝlɔ̀lɔ́ wɔ̀rhɔ́ shilǝ bǝ̀k'a jǝ́jɛ̀rɛ́ á mǝ̀dù ga, ń gǝ nyɛ̀ɛ̀ Yi cǝl ré, sǝ n shĩ ń zhã̌ yé. ¹⁴ Nǝ́ gǝ j'á zɔ nǝ́ gǝ́ ju kùr nǝ́ zù Kristǝ né mó kẽkẽ, sǝ́ nyǐ nǝ́ wɔ́ ń tó-dwã. ¹⁵ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Ámyɛ̌ gǝ nyɛ̀ɛ̀ Yi cǝl ré zà, s'á bǝ̀k'á shĩ á zhã̌, ǹdǝ á nàmbala bɛ́ gǝ́ wɛ̀rhɛ́ nɛ́ gɔ-elũ èpòlò w wẽ́ mó ta yé.» ¹⁶ Wɔ́ byɛ̌ lyì bǝ̀ nyɛ̀ɛ̀ Yi cǝl ré bǝ zɛ̃̀ bǝ zhɛ̃̀ rɛ mó? Bǝ̀myɛ́ gakó Muyiisi mǝ n du Ezhibti ní mú. ¹⁷ Yi lyim rí gǝ́ zɛ̃̀ byinǝ né shǝ́-èna y wẽ́ mó, wɔ́ ǹdǝ́ byɛ̌ lyì? Wɔ́ byɛ̀bɛ́ bǝ̀ wɛ̀rhɛ́ yǝ̀-bǝlwàálɛ gɔ-elũ èpòlò w wẽ́ bǝ cì mú. ¹⁸ Wɔ́ byɛ̌ nɛ Yi bwǝl rǝ pa bǝ̀ bǝ̀ t'â la shìrhǝ́ jàà y rǝ̀ tɛnɛ bǝ̀ yil mó w yú mú? Wɔ́ byɛ̀bɛ́ bǝ̀ yǝ̀ nyí zwẽ mó. ¹⁹ Sǝ nǝ́ pwírí wɔ́ bǝ̀ gǝ́ yǝ̀ pyɛ́nɛ́ bǝ zhí Yi ni mú è ce, bǝ̀ yǝ̀ ŋwɛ̀nɛ́ bǝ yí shìrhǝ́ jàà y Yi y'à tɛnɛ bǝ̀ yil mó w yé.