koussoube-marc-lee_heb_text

Kǝ̀kàl-fwɛ̀lɛ̀ 2

¹ Wɔ́ rǝ̀myɛ́ è ce, nǝ́ mǝ̌ sǝ nǝ́ dɛ̃̀ nǝ́ cìn náàcɛ̀nɛ́ ǹdǝ́ zɔ̀mà nɛ́ nyɛ̀bɛ́ nǝ́ cili mú, nǝ́ zhì kẽkẽ, mùnì ga nǝ́ bǝ̀k'á jé yé. ² Zɔ̀mà nɛ́ Yi twĩ̀ màlɛ́kabá bǝ b'e byili mú n'ê twĩ̀ nǝ̀ tum. Lò mɔ̀bɔ́ ń yǝ̀ nɛ zwẽ gakó nǝ còrhò-tum dɛ̀bɛ́ ń mǝ̌ dwã ǹdǝ́ rɛ. ³ Etǝr nǝ́myɛ̌ b'ǎ tó né nǝ́ lú còrhò-tum rí yé né ǹdǝ́ nǝ́ gǝ yǝ̀ vwǎrh mɔ́ mǝ̀ zhe kùr dɛ̃́dɛ̃́ mɔ́ yò shɛ̀nɛ́. Wɔ́ Cinnǝ mó cìcì ń jɛ̀rɛ̀ n bwǝ̀l vwǎrh mɔ́ yò n byili lyì bí ni. Sǝ byɛ̀bɛ́ bǝ̀ nyɛ̀ɛ̀ mǝ̀ yò mó myɛ byili bǝ̀ mǝ̀ zhe kùrǝ̀. ⁴ Sǝ Yi cìcì y'à n'ê ce bǝ̀ wɛ̀rhɛ́ wò-jààrɛ̀, ǹdǝ́ màmyaarhɛ, ǹdǝ́ tùm-fwààlɛ̀ dwí gakó, rǝ pǝ bɛ Eshirhǝ náàcɛ̀nɛ́ paánsɛ́ myɛ ǹdǝ rǝ̀ gǝ́ n'ê yǎl nɛ́, rǝ m'e byili bǝ̀ tɛ̀bɛ́ bǝ̀ n'ê byili mú wɔ́ zhǝ̀nà. ⁵ Lũ w nǝ́ r'é zɔ̀m ò yò ò bàn mɔ́, dǝ̀ màlɛ́kabá nɛ Yi pɔ ò pyɛ̀lɛ̀ rɛ́ yé. ⁶ Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ jàà èdù wẽ́ bǝ̀ lò mǝ̀dù wòwǝ̀: «Yi, numbyíní wɔ́ byè, ǹ mǝ́ ǹ bùl è yò? Byè è wɔ́, ǹ mǝ́ ǹ nyǐ è yò? ⁷ Ǹ ce màlɛ́kabá dwini yǝ, sǝ kɔn yǝ̀ dɛnɛ yé. Ǹ pɔ y zùwǝ́, ń zhẽ̌ è yó dɛ̃̌, ⁸ ǹ ce è cǐ kɔn gakó.» Bǝ̀ gǝ́ wò bǝ̀ Yi ce numbyíní cǐ kɔn gakó mó, rǝ̀myɛ́ n'ê byili bǝ̀ kɔn rǝ̀dù ga tɛ̀nɛ́ è bǝ cǐ yé. Nǝ́ j'ǎ gwẽ̌ bǝ kɔn nɛ èlǎsɛ̃́ rǝ̀ n'ê byili bǝ̀ numbyíní cǐ kɔn gakó yé. ⁹ Sǝ tɛ̀bɛ́ nǝ́ yě mó, nǝ́ yě bǝ̀ Yi gǝ́ ce màlɛ́kabá dwini Yezu dwã màngɛlɛ́ wẽ́ mó kwã nɛ́, rǝ̀ pɔ mɔ zùwǝ́, rǝ zhẽ̌ ń yó dɛ̃̌ ń gǝ́ nwɛ̀nɛ̀ n cì mú yilǝ. Wɔ́ Yi sónó w yil ń shɛ̀nɛ́ n cì, sǝ wɔ́ lyì bí gakó yil ń cùwǝ̀. ¹⁰ Wɔ́ Yi rǝ̀ wɛ̀rhɛ́ lũ wǝ́, rǝ̀myɛ́ rǝ̀ cǐ wǝ. Yi n'ê yǎl bǝ̀ rǝ̀ byǎ bɛ́ nánzhǝzhɔ̌ myɛ nǝ rǝ̀ zùwǝ́ yǝ́. Rǝ̀ ce mɔ̀bɔ́ ń la vwǎrh mɔ́ sɔ́má y rǝ̀ byǎ bɛ́ nɛ byilu mú tó ń nɔ̀nɔ̀ w dɛnnɛ n yǝ̀ cángá námpúm. ¹¹ Yezu nǝ́ ń vùr numbyínǝ́ bé yǝ̀-bǝlwàálɛ́ bǝ jǐrh wárhgáá. Mɔ̀bɔ́ ń nǝ́ ń vùr yǝ̀-bǝlwàálɛ́ mɔ́ ǹdǝ́ byɛ̀bɛ́ ń vùr bǝ̀ yǝ̀-bǝlwàálɛ́ mɔ́ ga Da mɔ́ wɔ́ mǝ̀dù. Wɔ́ rǝ̀myɛ́ è ce, ń tá ń dùr cìzhìl ǹdǝ́ bǝ̀ byõ̌ bǝ̀ ń da-byǎ yé. ¹² Ń wòwǝ̀: «À Yi, à m'a bwǝ̀l ǹ yil ré a byili à da-byǎ bɛ́ nɛ. À m'a cèrhé mó ǹ gùlú w lyì bí yé né.» ¹³ N kǝ́ n wɔ̀: «À b'a zhí Yi ni ǹdǝ́ à wu gakó.» N kǝ́ n wɔ̀ kǝ́dò: «Nyǐ àmyɛ́ ǹdǝ́ byǎ bɛ́ byɛ̀bɛ́ Yi pɔ nǝ mɔ́.» ¹⁴ Sǝ byǎ bɛ́ bǝ̀myɛ́ wɔ́ numbyínsi. Shǝtana wɔ̌ bɛ è n'ê gwi. Wɔ́ rǝ̀myɛ́ è ce, Yezu myɛ jǐrh numbyíní ǹdǝ bǝ̀ ta, n cì. ¹⁵ N zǝ ń cu mú n zhìlì Shǝtana yò. Wɔ́ èmyɛ́ è zhe cu mú jàn dɛ́. Ń wɛ̀rhɛ́ èta mùnì ga n zwẽ byɛ̀bɛ́ cu mú ywẽ y'à ce bǝ̀ nyɛ̌ ǹdǝ yómǝ́ ta bǝ̀ bǝ̀swɛ́nɛ́ yi ní ga mɔ́. ¹⁶ Ń yǝ̀ twí màlɛ́kabá nɛ sãɔ̃ yé. Wɔ́ Abǝraham dwí rí ni ń tú sãɔ̃. ¹⁷ Wɔ́ rǝ̀myɛ́ è ce, kɔn yàl nyɔ́ɔ́ bǝ̀ ń nyɛrhɛ ń da-byǎ bɛ́ námpúm, mùnì ga n jǐrh bǝ̀ vwĩ̀-zwǝ́lnǝ náncɛ, n twĩ̀ Yi tum rí ǹdǝ́ wu-bɔ̀nɔ̀ ǹdǝ rǝ̀ gǝ́ n'ê yǎl nɛ́, mùnì ga n pǝ dwí rí yǝ̀-bǝlwàálɛ́ sǔbri. ¹⁸ Zhǝ̀nà, Shǝtana swèlè Yezu cìcì, n nwɛ̀nɛ̀. Rǝ̀myɛ́ ce, ń wɔ̌ byɛ̀bɛ́ Shǝtana n'ê swèlè mó ne ń la sãɔ̃.