¹ È gǝ wɔ́ nǝ́myɛ̌ yilǝ, Yi-ni-zhú zhǝ̀n-cínnǝ nánzhǝzhɔ̌ kǝ́kɛ́lɛ́ nǝ́ba. Rǝ̀myɛ́ ce, bà-nà nǝ́ yẽ̌ zhĩĩ dwí gakó ǹdǝ́ yǝ̀-bǝlwàálɛ́ rǝ̀ n'ê cǝ̀r nǝ́ yé ne nàná nàná mɔ́ nɛ, sǝ nǝ́ zɛ̃̀ nǝ́ dùr ywǝ́l mó bǝ̀ pɔ nǝ́ba mǝ̀ nyí mú ǹdǝ́ wu-jɔ̀. ² Nǝ́ kwẽ̌ nǝ́ nyǐ Yezu. Wɔ́ ńmyɛ̌ dɛnnɛ nǝ́ tó né nǝ́ zhí Yi ni. E jà wɔ́ ńmyɛ̌ ń mà n ce nǝ́ Yi-ni-zhú mú pyìrh. N shɛ̀nɛ́ n cì dǝ̀-jɔrhɔ́ yó, ń yǝ̀ cìzhìl nè gá yé, bǝ̀ ń yà ń yě wu-nyɔ̃̀ w kɔ̀bɔ́ ń yà ń la nɔ mɔ́ yò, sǝ èlǎsɛ̃́, ń jě Yi jǝ̀jĩ́ ni rǝ̀ pyɛ̀lɛ̀ rɛ́ dǝ̀gwã́ y yó. ³ Lyǐrh-nǝ yǝ̀-bǝlwàálɛ́ cìnǝ́ gǝ́ wɛ̀rhɛ́ Yezu ní yò. Bǝ̀ jú zùùrì ǹdǝ́ mɔ, bǝ nwɛ̀nɛ̀ mɔ̀, sǝ ń pyɛ́nɛ́ rǝ̀myɛ́ gakó wẽ́. Rǝ̀myɛ́ ce, ámyɛ pyɛ́nɛ́-na á cìnǝ̀, á wun bǝ̀k'a gǝ yé. ⁴ Á gǝ́ n'á zhɛ̃̀ yǝ̀-bǝlɔ̀lɔ́ w ga, á gwẽ̌ yǝ̀ w zhɛ̃̀ kɔn b'e yí á myǝ̌l jǝr yé. ⁵ Á swě Yi gǝ́ cící ába ǹdǝ rǝ̀ byǎ ta nɛ́ mɔ́? Rǝ̀ wòwǝ̀: «À byǐ, Cǐnnǝ gǝ byili mú ǹ yé, sǝ́ dɛ̃̀ ǹ cìnǝ̀. Ń gǝ ju mú búlǝ́, sǝ ǹ wu bǝ̀k'a gǝ rǝ̀myɛ́ yil yé; ⁶ bǝ̀ Cǐnnǝ gǝ só lò, ǹ gǝ dówǝ́, ń ya n byili mú ǹ yé; bǝ̀ byɛ̀bɛ́ ń yě bǝ̀ bǝ̀ wɔ́ ń byǎ mɔ́ gǝ dówǝ́, ń ya n ce jɛ̃̀ bǝ̀ yala nɛ.» ⁷ Shɛ̀nɛ́-na nɔ̀nɔ̀ w yò, bǝ̀ rǝ̀myɛ́ wɔ́ á yé Cǐnnǝ mó nǝ́ ń byili ába. Ń nǝ́ ń wɛ̀rhɛ́ ába ǹdǝ ń byǎ ta. Wɔ́ byǐ mɔ̌ ń ŋwɛ́nɛ́, ń gǝ dówǝ́, ń da tá ń byili mu ń yé? ⁸ Yi gǝ yǝ̀ ába á yé byili ǹdǝ rǝ̀ byǎ bɛ́ gakó ta, sǝ́ nyǐ á dǝ̀ rǝ̀ byǎ yé, á wɔ́ bɔ́bwá-byǎ. ⁹ Shãã ga, nǝ́ gǝ dówǝ́, nǝ́ dabá cɛ yó mó y'a byili nǝ́ba nǝ́ yé, nǝ́ j'ǎ n'é nyàm bɛ̀. Rǝ̀myɛ́ ce, nǝ́ mǝ̌ sǝ nǝ́ zwẽ nǝ́ Da mɔ́ ń ŋwɛ́nɛ́ Arǝzana w mɔ́ nyí ni du, mùnì ga nǝ́ zǝ myǝ̌l. ¹⁰ Nǝ́ dabá cɛ yó mó y'a byili nǝ́ba nǝ́ yé, sǝ kɔn t'â dɛnɛ yé, ǹdǝ bǝ̀myɛ surhǝ né gǝ́ mǝ̌ nɛ́. Sǝ Yi wɔ́ nǝ́ cɛ̀nɛ̀ yil, nǝ́ gǝ dówǝ́, rǝ̀ n'ê byili nǝ́ba nǝ́ yé, mùnì nǝ́ yǝ̀ náàcɛ̀nà ǹdǝ rǝ̀ ta. ¹¹ Zhǝ̀nà, nǝ́ gǝ dówǝ́, bǝ zɛ̃̀ bǝ̀ n'ê byili nǝ́ba nǝ́ yé, wu-nyɔ̃̀ tɛ̀nɛ́ yé; wɔ́ wu-zhìlù. Sǝ lò mó mɔ̀bɔ́ ń shɛ̀nɛ́ n pyɛ́nɛ́ ń cìn rǝ̀myɛ́ yi ní mú, mà n nǝ yǝ̀-zùlǝ́, dóó t'â la ń yó w yál yé. ¹² Rǝ̀myɛ́ yilǝ, ce-nǝ jàn nɛ́ á súlí á jɛ̀sɛ́ ǹd'á nǝ̀dwǝ́nǝ́ né nǝ̀ k'ê bǝ jɛ̀ mɔ́ jàn. ¹³ Kwě-nǝ sɔ́má kɛ̀bɛ́ è càn, mùnì ga lò mɔ̀bɔ́ ń nǝ́ ń twi cí, ń nà bǝ̀k'a dom yé, sǝ n nǝ bǝsàzùlí. ¹⁴ Ce-nǝ jàn nɛ́ yǝ̀-zùlǝ́ yǝ̀ ámyɛ̌ ǹdǝ́ lyì bí gakó bwǝ̌l wǝ, s'á tùntwǝ̃̀ǝ̃̀ né yí Yi pùbùlǝ̀. È gǝ dǝ̀ rǝ̀myɛ́, lò lò tá ń la Cǐnnǝ mó nɔ ǹdǝ́ ń yírh yé. ¹⁵ Dɛ̃̌-na á cìnǝ̀, mùnì lò mǝ̀dù ga bǝ̀ká n võ̀ Yi pɛnɛ́ y nánfò w ń cìn ni yé, s'á dɛ̃̀, lò bǝ̀ká n yǝ̀ á wẽ́, n yǝ̀ ǹdǝ cǒ kɔ̀bɔ́ ò nɛ̃̌ mɔ́ nyɛ̌ cɛ̀ɛ́ ta, n gúgǔ lyì bí dwã nɛ, n zhìlì bǝ̀ gakó yò yé. ¹⁶ S'á dɛ̃̀ myɛ, nǝ̀fòló ráá lò mɔ̀bɔ́ ń tá ń nyàm kɔn dɛ̀bɛ́ rǝ̀ wɔ́ Yi nyǎn bǝ̀k'a yǝ̀ á wẽ́ yé. Á bǝ̀k'á wɛ̀rhɛ́ ǹdǝ Ezǝyu ta yé. Ń zǝ ń náncɔɔrɛ́ n lyǝ́r kùr yó kùjú. ¹⁷ Á yě bǝ̀ rǝ̀myɛ́ kwã nɛ́, ń yà ń nǝ́ ń yǎl bǝ̀ ń da bwǝl cɛ̀nɛ̀ n pɔ̃, sǝ ń da cẽ. N kúrh yǝ́-nàná, ń mǝ́ ń nǝ́ ń yǎl sǝ ń da bùlǝ̀ né zhízhílí, sǝ ń gɔwa. ¹⁸ Ámyɛ̌ gǝ́ bwǝlse Yi ni mú, kɔn yǝ̀ yàl ǹdǝ Esǝrayɛl lyì bí ta yé. Bǝ̀myɛ́ nɔ Sǝnǝyi pyɔ̀ wá, bǝ̀ y'à wɔ̌ bǝ̀ m'a zǝ bǝ̀ jɛ̀rh bǝ dwǝ̀rh wǝ̀, bǝ nǝ myǐn mú, bǝ nǝ cǝ-byín dí, bǝ nǝ zho w nánfɔ̀lɔ̀ w pyɔ̀ w yó, ¹⁹ bǝ nyɛ̀ɛ̀ pɔ́lá cǝl, bǝ nyɛ̀ɛ̀ cǝl rǝ̀ y'à n'ê zɔ̀m ǹdǝ́ bɛ, bǝ zɛ̃̀ bǝ̀ n'ê lwǝ̀l sǝ cǝl ré yẽ̌ èta, rǝ̀ bǝ̀k'a k'e zɔ̀m yé. ²⁰ Nyí rí rǝ̀ y'à pɔ bǝ̀ lò mɔ̀bɔ́ ń ju ń nà pyɔ̀ w yó, ráá vwǎm mɔ̀bɔ́ mǝ̀ ju mǝ̀ nà ò yó, sǝ bǝ zǝ nǝ́kulǝ bǝ dul mo bǝ gu mú, ce bǝ̀ wun ga. ²¹ Kɔn rɛ́ bǝ̀ yírhǝ́ y'à nǝ mɔ́ y'à n'ê zɛ̃̀ wu ni. Rǝ̀myɛ́ ce Muyiisi wɔ̀: «Ywẽ zhe ne dɛ̃́dɛ̃́, à n'â didi.» ²² Sǝ ámyɛ̌ wɔ́ Sǝyɔ̃ pyɔ̀ wá, Yi nã́nyì cɔ wá, Zhǝrǝzalɛm y è ŋwɛ́nɛ́ dɛ̃̌ Arǝzana w mɔ́ nɛ á bwǝlse; wɔ́ màlɛ́kabá mɔ̀ɔ̀rhɛ̀ nánzhǝzhɔ̌ bǝ̀ n'ê jí címsi, ²³ 23 ǹdǝ́ lyì bí byɛ̀bɛ́ bǝ̀ yàl Yi lyì nã́yǝ́ǝ́ bé bǝ̀ yilǝ né kɛ̃ dɛ̃̌ Arǝzana w mɔ́ nɛ á bwǝlse. Wɔ́ Yi, lyì bí gakó bùr-kárna mɔ́, ǹdǝ́ lyì bí byɛ̀bɛ́ bǝ̀ k'ê bǝ dwǝ́ǝ́re zhe bǝ̀ jǐrh náàcɛ̀nà námpúm mú ni á bwǝlse. ²⁴ 24 Wɔ́ Yezu mú nǝ́ nɔ Yi dɔbrɛ́ nándùl ré ń jàn yil mó ne á bwǝlse. Ń ló ń jal mɔ́ tɛ̃́ n mǝ n ce nǝ́ jǐrh wárhgáá, sǝ rǝ̀myɛ́ n'ê yǎl rǝ wɔ̀ bǝ̀ ń jal mɔ́ zhe jàn du Abyǝǝ nyǎn mɔ́. ²⁵ Dɛ̃̌-na á cìnǝ̀, á bǝ̀k'á cẽ lò mɔ̀bɔ́ ń nǝ́ ń zɔ̀m ǹd'ába nyí ni yé. Á yě bǝ̀ byɛ̀bɛ́ bǝ̀ cẽ lò mó mɔ̀bɔ́ ń yà ń nǝ́ ń byili bi Yi nyǝ́ né cɛ yó mó nyí ni mú yǝ̀ lú còrhò-tum rí yé né yé. Nǝ́myɛ̌ zɛ̃̀ wɔ́ Yi rǝ̀ zhǐ dɛ̃̌ rǝ̀ n'ê zɔ̀m ǹdǝ́ nǝ́ba. Nǝ́ gǝ cẽ rǝ̀ nyí ni, nǝ́ wàr nǝ́ b'ǎ lú còrhò-tum rí yé né yé. ²⁶ Yi cǝl ré y'à n'ê zhízhǐ cɛ yá. Sǝ èlǎsɛ̃́, rǝ̀ bwǝl nyí rǝ wɔ̀: «À gwẽ̌ b'a ce cɛ y zhízhǐ; sǝ è k'ê dǝ̀ è dúdú yé. Wɔ́ èmyɛ́ ǹdǝ́ dɛ̃̌ yi rí ga.» ²⁷ «À gwẽ̌ b'a ce cɛ y zhízhǐ» zɔ̀mà nɛ́ nǝ̀myɛ́ mɔ́ n'ê yǎl nǝ byili bǝ̀ wẽ̀ ré tɛ̀bɛ́ Yi wɛ̀rhɛ́ mɔ́ b'a zhízhǐ, rǝ jé, mùnì ga wẽ̀ ré tɛ̀bɛ́ rǝ̀ wàr rǝ̀ la zhízhǔ mú yǝ̀ nɛ́. ²⁸ Nǝ́myɛ̌ nɔ tǝnà kɛ̀bɛ́ è t'â zhízhǐ gaga. Rǝ̀myɛ́ ce, bà-nà nǝ́ ce Yi nǝ̀báná, sǝ nǝ́ cèrhé re kɔn yí rǝ̀ bùlǝ̀, sǝ nǝ́ pǝ rɛ nǝ́ cìn námpúm ǹdǝ́ nyɔ̀mɔ̀, ²⁹ bǝ̀ nǝ́ Yi rí nyɛ̌ ǹdǝ myǐn mǝ̀ n'ê jí dɔ́dɔ́ ta.