¹ Já-na á zǝ sónó ǹdǝ́ dwã twéé twéé ǹdǝ da-byǎ ta Kristǝ wẽ́. ² Lò gǝ tú á sõ, á mǝ̌ s'á zwẽ ń zhǝǝle cɛ̀nɛ̀. Á bǝ̀k'á swě yé. Lyì jàlà wɛ̀rhɛ́ èta, sǝ bǝ̀ zwẽ màlɛ́kabá zwǝǝle, bǝ j'à yǝ̀ lwar yé. ³ Tɛ́rɛ́-na byǝ̀nǝ́-jì cìnǝ́ bé yò, ǹdǝ ámyɛ tó á ŋwɛ́nɛ́ byǝ̀nǝ́-jù w ta. Tɛ́rɛ́-na byɛ̀bɛ́ lyì bí n'ê wɛ̀rhɛ́ lwɛlɛ mɔ́ yò, ǹdǝ bǝ̀ n'ê wɛ̀rhɛ́ lwɛlɛ ámyɛ nɛ ta. ⁴ Lyì bí gakó mǝ̌ sǝ bǝ nyɛ̀ kɔn dɛ̀bɛ́ Yi byili kɛ̃-jú shȯ-kwã nɛ́ mɔ́. Bal mǝ̌ sǝ n jòm ǹdǝ́ ń kɛ̃ mɔ́ dúdú, kɛ̃ myɛ mǝ̌ sǝ n jòm ǹdǝ́ ń byal mɔ́ dúdú, bǝ̀ Yi la byɛ̀bɛ́ gakó bǝ̀ wɔ́ nǝ̀fwǝ̀ǝ́le, bǝ j'à n'ê twĩ̀ yààyàà mɔ́, bùrsi kɔ́ rǝ pǝ bɛ còrhò-tum. ⁵ Á bǝ̀k'á yǝ̀ wársɛ yómǝ́ yé. Ce-nǝ á wun yǝ̀ nyɛ̀n ǹdǝ́ kɔn dɛ̀bɛ́ á zhe, bǝ̀ Yi wòwǝ̀: à t'â la mɔ́ yõ̌ yé; à t'â la à kwã m'a zǎ mɔ́ gaga yé. ⁶ Rǝ̀myɛ́ ce, nǝ́ wɔ̌ nǝ́ wǝ̀l ǹdǝ́ wu-jɔ̀ bǝ̀: Cǐnnǝ mó mà n sɛ̃ nɛ; à t'â la ywẽ dǔr yé. Lò lò wàr nɛ ń la kaka wɔ̀rhɔ́ yé. ⁷ Lyǐrrh-nǝ á yé né cìnǝ́ bé nã́yǝ́ǝ́ bé bǝ̀ bwǝ̀l Yi zɔ̀mɛ̀ rɛ́ bǝ byili ába mɔ́ yò. Nyǐ-nǝ bǝ̀ gǝ́ yàl nɛ́ kɔn m'e yí bǝ̀ yó-gurǝ́, s'á kwè bǝ̀ nà. ⁸ Yezu Kristǝ wɔ́ ńmyɛ̌ mǝ̀dù yǝ́, ń yàl nɛ́ dǝ̀lànɛ ǹdǝ́ zà, ǹdǝ́ byinǝ nǝ̀ bǝ zhɔ̌ zhe yilǝ. ⁹ Á bǝ̀k'á yẽ̌ bǝ zǝ còrhò dwí tɛ̃̌tɛ̃̌ bǝ m'e jǝ́jɛ̀rɛ́ ába yé. Còrhò mó gǝ n'ê shí Yi Yi pɛnɛ́ y nánfò y è n'ê pɛ nǝ́ba wu-jɔ̀ mɔ́ wẽ́, rǝ̀myɛ́ càn. Sǝ è gǝ wɔ́ nyǝ́ né nyɛ̀bɛ́ bǝ̀ n'ê byili kùjúúrí shò-kwã mɔ́, nǝ̀ gwẽ̌ yǝ̀ byɛ̀bɛ́ bǝ̀ n'ê tó ne mó ne sɛ̃ gaga yé. ¹⁰ Nǝ́myɛ̌ zhe vwĩ̀-jìlú, sǝ Zhwifubá vwĩ̀-zwǝ́lnǝ bé bǝ̀ n'ê twĩ̀ Yi kòrhó w wẽ́ mó bǝ sɔ́má zhe bǝ̀ n'ê jí nǝ́ vwĩ̀-jìlú w kùjú w yé. ¹¹ Vwàmá nɛ́ nyɛ̀bɛ́ vwĩ̀-zwǝ́lnǝ náncɛ y nǝ́ ń zǝ nǝ̀ jal mɔ́ ń zwì Yi kòrhó w jàà náàcɛ̀nɛ́ y wẽ́ yǝ̀-bǝlwàálɛ vǔr yil mó, bǝ̀ k'â n'ê zǝ nɛ bǝ̀ dwi pwẽ̀ nè bǝ̀ ji myǐn. ¹² Wɔ́ rǝ̀myɛ́ è ce bǝ̀ yǝ̀ Yezu myɛ gwi cɔ w wẽ́ yé. Bǝ̀ gu mu kwã nɛ́, mùnì n zǝ ń cìcì jal mɔ́ n shàrh lyì bí yǝ̀-bǝlwàálɛ́, bǝ jǐrh wárhgáá. ¹³ Rǝ̀myɛ́ ce, bà-na nǝ́myɛ du pwẽ̀ ne nǝ́ vò ń sono, nǝ́myɛ shɛ̀nɛ́ fulsi ǹdǝ ń ta. ¹⁴ Kɔn nyɛ̌ ǹdǝ́ wɔ́ cɔ wẽ́ nǝ́ jě né ta cɛ yó, sǝ cɔ w òmyɛ́ t'â la nɛ́ mãɔ̃ yé, ò la lyãɔ̃. Nǝ́ zɛ̃̀ nǝ́ n'ê pyà cɔ w kɔ̀bɔ́ ò la tà-kwã o bǝ̀ mɔ́. ¹⁵ Bà-nà nǝ́ pǝ vwĩ̀ tɛ̀bɛ́ rǝ̀ wɔ́ còrhó nyǎn Yi ni twéé twéé Yezu Kristǝ jàn yilǝ. Rǝ̀ kùr wɔ́ nwíísi shɛ̀bɛ́ sǝ́ wɔ́ rǝ̀ còrhó nyɛ̌rh. ¹⁶ Á bǝ́k'á swě cɛ̀nɛ̀ wɔ̀rhɔ́ yò yé, s'á sɛ̃ dwã nɛ, bǝ̀ wɔ́ rǝ̀myɛ́ rǝ́ wɔ́ vwĩ̀ tɛ̀bɛ́ rǝ̀ yú Yi pùbùlǝ̀. ¹⁷ Shɛ̀nɛ́-na á yó-cìnǝ́ bé nyí, s'á zwẽ bǝ̀ zɔ̀mà nɛ́, bǝ̀ bǝ̀ n'ê yìlì ába. Bǝ̀ b'a zhì Yi yé né bǝ byili kɔn gǝ́ tó né. Rǝ̀myɛ́ ce, á gǝ n'á shɛ̀nɛ́ bǝ̀ nyí ni, bǝ̀ b'a twĩ̀ bǝ̀ tum rí cɛ̀nɛ̀. È gǝ dǝ̀ rǝ̀myɛ́, bǝ̀ b'a twĩ̀ ri ǹdǝ́ wu-zhìlù, sǝ rǝ̀ t'â la ába sãɔ̃ yé. ¹⁸ Lwǝ̌l-nǝ Yi nǝ́ yil twéé twéé. nǝ́ yě náàcɛ̀nɛ́ bǝ̀ dóó tɛ̀nɛ́ nǝ́ yó w yé, bǝ̀ nǝ́ n'é yǎl nǝ́ wɛ̀rhɛ́ cɛ̀nɛ̀ twéé twéé. ¹⁹ À n'â lwǝ̀l ába ǹd'â wu gakó: lwǝ̌l-nǝ Yi mùnì rǝ sɛ̃ nɛ a k'a bǝ̀ á sõ làlà. ²⁰ Yi wɔ́ yǝ̀-zùlǝ́ panna. Wɔ́ rǝ̀myɛ́ rǝ̀ bwìrhì nǝ́ Cǐnnǝ Yezu mú ń wɔ́ pyììsí nǝ̀nɔ̀n náncɛ y mɔ́, ń zɛ̃̀ n du cùùri wẽ́. Rǝ̀ zɔ dɔbrɛ ǹdǝ́ nǝ́ba ń vwĩ̀ rí jal mɔ́ jàn yilǝ. ²¹ Yi b'a ce á ŋwɛ̀nɛ́ á wɛ̀rhɛ́ kɔn dɛ̀bɛ́ gakó rǝ̀ càn, mùnì ga á wɛ̀rhɛ́ rǝ̀ pùbùlǝ̀, sǝ rǝ pyìrh rǝ̀ pùbùlǝ̀ né nǝ́myɛ̌ wẽ́ Yezu Kristǝ jàn yilǝ. Ń mà n nǝ zùwǝ́ byinǝ nǝ̀ bǝ zhɔ̌ zhe yilǝ! Amɛn! ²² Da-byǎ, à n'â lwǝ̀l ába, s'á pyɛ́nɛ́ á cili cícú mú mɔ̀bɔ́ èta mɔ́. Nyǐ-nǝ zɔ̀mà nɛ́ nyɛ̀bɛ́ à kɛ̃ sɛ̀bɛ́ rɛ́ wẽ́ mó bǝ já yé. ²³ À n'â yǎl a byili ába bǝ̀ nyǐ bǝ̀ vùr nǝ́ da-byǐ Timote byǝ̀nǝ́-jù wǝ. Ń gǝ tú à sõ làlà, á b'a zǝ mɔ a bǝ̀ á sõ. ²⁴ Ce-nǝ á yé né cìnǝ́ bé, ǹdǝ́ Yi lyì bí gakó. Yitǝlyi Kristǝ-lyì bí myɛ n'ê ce ába. ²⁵ Yi b'a cĩ́ bwǝl á gakó yó!