¹ Ywẽ̀ né rə̀myɛ́ gə́ lyɛ̃ kwã nɛ́, yó-cìnə́ bé yú à nyí ni bə wɔ̀ nɛ: «Esərayɛl dwí rí lyì bí ǹdə́ vwĩ̀-zwə́lnə bé ǹdə Levyi dwí rí lyì bí yə̀ bə̀ cìn vùr tənà y lyì bí wẽ́ yé. Bə̀ n'ê twĩ̀ pwarha tumə ǹdə Kanaã lyì bí ǹdə Yititəbá ǹdə Pərəzhitəbá ǹdə Zhəbuzhitəbá ǹdə Amɔ̃ byǎ bɛ́ ǹdə Mɔwaabɛ lyì bí ǹdə Ezhibti lyì bí e súlí Amɔrətəbá ta. ² Bə̀myɛ́ ǹdə́ bə̀ byǎ bɛ́ jú dwə́ né nə̀myɛ́ bə̀kwá, rə̀myɛ́ ce dwí rí Yi cǐ mú gùlí dwã ǹdə́ tənà y lyì bí. Yó-cìnə́ bé ǹdə́ lyì-fwààlɛ́ yàl nã́yə́ə́ bé bə zhǐr bə̀ nà y yó.» ³ À gə́ nyɛ̀ɛ̀ rə̀myɛ́ mɔ́, à kǎr à kàmə̀zwǐ y ǹdə́ à kàmə̀zù-fwɛ̀lɛ̀ y ga, à mǔr à ywésé ǹdə́ à tama nɛ́a, a zɛ̃̀ à jě tɛ̃́ ǹdə́ wu-zhùlù. ⁴ Lyì bí byɛ̀bɛ́ gakó Esərayɛl Yi rí zɔ̀mà nɛ́ y'à ce bə̀ n'ê kəkə, byɛ̀bɛ́ bə̀ shí yómə́-jè gə́ yə̀ bə̀ nà yó zhì mú shò kwã nɛ́ mɔ́, bə̀ bə jòm dwã yó à yala nɛ. Sə àmyɛ jòm tɛ̃́ ǹdə́ wu-zhùlù kɔn b'e yí də̀dɛ̀nɛ́ vwĩ̀ rí pɔ. ⁵ Də̀dɛ̀nɛ́ vwĩ̀ rí zwə́l yi rí gə́ yúwə́, à shə́r à wu-zhùlù w wẽ́ ǹdə́ à kàmə̀zwǐ y ǹdə́ à kàmə̀zù-fwɛ̀lɛ̀ y ga, námməkàárɛ, s'a tu à nə̀dwə́nə́ yó, a zhẽ̌ à jɛ̀sɛ́ a ce Cinu à Yi rí nib, ⁶ a zɛ̃̀ a wɔ̀ mɔ: «À Yi, cìzhìl nánfɔ̀lɔ̀ zhe ne s'a kwẽ̌ à yé a m'a zǎ mɔ́, à Yi, bə̀ nə́ yə̀-bəlwàálɛ́ jǐrh nánzhɔ̌, rə̀ púl ré lyɛ̃ nə́ ywẽ́ né, nə́ dóó byìl o yí dɛ̃̌-yi wə. ⁷ Kɔn zhì nə́ dabá yi ní ga e m'e yí zà dɛ̃ rɛ́, nə́ dóó w já; nə́ yə̀-bəlwàálɛ́ ce, nə́myɛ̌ ǹdə́ nə́ pyǎ bɛ́ e súlí nə́ vwĩ̀-zwə́lnə bé wɔ dwə́ né dwã bɛ́ pyǎ jɔ̃̀ wa, bə̀ n'ê gwi nə́ba ǹdə́ búlə́ shù, bə̀ n'ê zal nə́ba bə̀ m'ê zhə̀l yómə́-jè, bə̀ n'ê vwǎrh nə́ba, bə̀ n'ê ce nə́ba cìzhìl, ǹdə zà mɔ́ ta. ⁸ Sə èlǎsɛ̃́, kɔn gwẽ̌ yə̀ dɛnɛ yé, nə́ Cinu nə́ Yi rí, wu-bɔ̀nɔ̀ w ce nə́ lyì jàlà lú, n zɛ̃̀ n súlí n pə nə́ba jàà ń tənà y wẽ́; èta nə́ Yi rí pɔ pwẽ̀ nə́ yírhə́ né ne, rə zɛ̃̀ rə ce nə́ k'á zhe nyǔ námpɔ́lɛ́ nə́ yómdé wẽ́. ⁹ Nyǐ nə́ wɔ́ yómə́, sə nə́ yómdé wẽ́, nə́ Yi rí yə̀ nə́ba yẽ̌ yé. Rə̀ wu-bɔ̀nɔ̀ w wẽ́, rə̀ lwəl rə nyǐ nə́ba Pɛɛrəsɛ pyǎ bɛ́ yé né, rə ce nə́ k'á zə nyǔ, rə̀ gə́ ce nə́ k'é lù rə̀ ji y è zhǐ dɛ̃̌ mɔ́, nə́ lù è jì-bwə̀ə̀ré nə́ súlí nə́ lù Zhəda ǹdə́ Zhərəzalɛm byílsí yilə. ¹⁰ Sə èlǎsɛ̃́, nə́ Yi, bə̀kɔ́n nə́ b'ǎ wɔ̀ rə̀myɛ́ kwã nɛ́? Nyǐ nə́ yẽ̌ ǹ nyə́ né ne, ¹¹ nyɛ̀bɛ́ ǹ yà ǹ tó ǹ nyì-zwennə bé, ǹ tùntùnnə bé dɛnnɛ ń pə ǹ mə́ ǹ wə̀l mó: ‹Tənà y kɛ̀bɛ́ á la vò á zwẽ á cìní mú zhe jìmdi; sə wɔ́ tənà y dwə́ né nə̀ wɔ è wẽ́ mó cìnə́ bə̀ súlí bə ce, e zhì è kùr sõ e m'e yí è yə́-pɛ̀lɛ́ wa, e sú ǹdə́ bə̀ pwarha tumə né. ¹² Rə̀myɛ́ ce bə̀-na á bə̀kwá bɛ́ bə̀ byǎ bɛ́ nɛ pə bə jí yé, bə̀-na bə̀ bə̀kwá zal á pə á byǎ nɛ bə jí yé, bə̀-na ce bə̀ yə̀-zùlə́ ǹdə́ bə̀ jòmə́ cɛ̀nɛ̀ pyǎ yò zù ába yé, mùnì ga á b'ǎ jǐrh dwí tɛ̀bɛ́ rə̀ zhe jàn, á jí tənà y wẽ̀ ré, s'a súlí á dàl á pə á byǎ bɛ́ nɛ bə cìní gaga yilə.› ¹³ Nə́ Yi, wɔ́ nə́ tùm-bəywààlɛ́ ǹdə́ nə́ dwə́ə́ré nánfwààlɛ́ rə̀ ce zwini rí tɛ̀bɛ́ gakó m'e yí nə́ba; sə ǹdə́ rə̀myɛ́ ga ǹ yə̀ nə́ba còrhò-tum pɛ, mə mɛrhɛ dwã ǹdə́ nə́ yə̀-bəlwàálɛ́ yé, ǹ ce nə́myɛ̌ byɛ̀bɛ́ nə́ ŋwɛ́nɛ́ nyɔ̀nɔ̀ mɔ́ lú. ¹⁴ Rə̀myɛ́ ce, byè yil nə́ m'ǎ k'é zɛ̃̀ nə́ ji kùr nə́ n'ê cẽ ǹ nyə́ né zõ nə́ m'é wɛ̀rhɛ́ kɛ̃-júr ǹdə́ dwə́ né nyɛ̀bɛ́ nə̀ n'ê twĩ̀ pwarha tumə? Ǹ tá ǹ la lyim kǒ ǹdə́ nə́ba kɔn b'e yí ń ce nə́ jé tɛ̃́, lòlò tá ń la dǎl n lú? ¹⁵ Cinu Yi, Esərayɛl Yi rí, ǹ wɔ́ cángá cə́bal: zà dɛ̃ rɛ́ cìcì, nyǐ nə́ wɔ́ lyì byɛ̀bɛ́ bə̀ lú mú kùr ré. Nyǐ nə́ba ǹ yé né ǹdə́ nə́ dwə́ə́ré ga, e jà lò mə̀dù ga myɛ wàr ń nə́ ń zhì ǹ yé né ǹdə́ ń nyɛ̌ èta yé.»