¹ Nyǐ dwə́ né yó-cìnə́ bé byɛ̀bɛ́ bə̀ tó ne bə shə́r Babyəlɔnɛ nɛ́, pyɔ̌ Artazɛrzɛɛsɛ pyɛ̀lɛ̀ rɛ́ jú yi ní mú, bə̀myɛ́ ǹdə́ bə̀ nàmbala bɛ́ yilə né: ² Pyənaasɛ jì y wẽ́: Gɛrəshɔn; Yətamaarɛ jì y wẽ́: Danəyəə; Dəvyidi jì y wẽ́: Atuushi, ³ Shəkanya jì y lò mə̀dù; Parɔɔshɛ jì y wẽ́: Zakarɛ e súlí bala zɔ̌m ǹdə́ shí-ènu bə̀ kɛ̃; ⁴ Paatɛ-Mɔwaabɛ jì y wẽ́: Zəraya byǐ Elyowenəyi e súlí bala zwã̌-èlyè ǹdə́ mɔ; ⁵ Zatu jì y wẽ́: Yazhɛl byǐ Shəkanya ǹdə́ bala zwã̌-ètɔ̀ bə̀ tó mo; ⁶ Adin jì y wẽ́: Yɔnatã byǐ Ebɛɛdɛ ǹdə́ bala shí-ènu bə̀ tó mo; ⁷ Elam jì y wẽ́: Atalya byǐ Yəshaya ǹdə́ bala shə́-shàlpyɛ̀ bə̀ tó mo; ⁸ Shəfaca jì y wẽ́: Myəkayəə byǐ Zəbaja ǹdə́ bala shə́-lyɛlɛ bə̀ tó mo; ⁹ Yɔwaabɛ jì y wẽ́: Yəyəə byǐ Obaja ǹdə́ bala zwã̌-èlyè ǹdə́ shí ǹdə́ lyɛlɛ bə̀ tó mo; ¹⁰ Bəni jì y wẽ́: Yɔsəfya byǐ Shəlomiiti ǹdə́ bala zɔ̌m ǹdə́ shə́-shə̀ldù bə̀ tó mo; ¹¹ Bəbəyi jì y wẽ́: Bəbəyi byǐ Zakarɛ ǹdə́ bala shí-èlyè bə̀ tó mo; ¹² Azəgaadɛ jì y wẽ́: Akatan byǐ Yɔwanã ǹdə́ bala zɔ̌m ǹdə́ shí bə̀ tó mo; ¹³ Adɔnəkam jì y wẽ́: ń byì-kwãã́sɛ́ sə̀tɔ̀ y Elyəfəlɛɛtɛ ǹdə́ Yəyəə ǹdə́ Shəmaya e súlí bala shə́-shə̀ldù bə̀ tó be; ¹⁴ Byəgəvəyi jì y wẽ́: Utəyi ǹdə́ Zəkuuri ǹdə́ bala shə́-shàlpyɛ̀ bə̀ tó be. ¹⁵ À cĩ́ bi dwã yó bwǐ y è la Aava səta mɔ́ yala nɛ, nə́ zul gàà nə́ wɛ̀rhɛ́ dwã nə̀tɔ̀. À myə̀lɛ́ dwí rí lyì bí ǹdə́ vwĩ̀-zwə́lnə bé cɛ̀nɛ̀ cɛ̀nɛ̀ s'a yə̀ Levyi dwí rí lò mə̀dù ga nɛ yé. ¹⁶ A zɛ̃̀ a twĩ̀ yó-cìnə́ bé Elyəzɛɛrɛ ǹdə́ Arəyɛl ǹdə́ Shəmaya ǹdə́ Elənataanɛ ǹdə́ Yəriibi ǹdə́ Elənataanɛ ǹdə́ Nataanɛ ǹdə́ Zəkarəya ǹdə́ Məshəlam ǹdə́ cə̀rhnə̀ bé Yəyəriibi e súlí Elənataanɛ, ¹⁷ a pə bɛ nyí bə̀ bə̀ zhəl Kasəfya nyí rí yó-cə́bal Yədo sõ; a byili bi kɔn dɛ̀bɛ́ bə̀ mə̌ sə bə wɔ̀ Yədo ǹdə́ ń da-byǎ bɛ́ ǹdə́ tùntùnnə bé sanna bɛ́ byɛ̀bɛ́ bə̀ wɔ Kasəfya nyí rí w mú ni, mùnì bə zə tùntùnnə bə b'e pə nə́ba nə́ Yi jì y tum rí yilə. ¹⁸ Nə́ Yi rí jɛ̃̀ y gə́ y'à cèlè nə́ yó è n'ê yìlì nə́ba mó ce, bə zə Shərəbya, lárma cə́bal, ǹdə́ ń byǎ bɛ́ e súlí ń da-byǎ bɛ́, bə̀ yàl nunə shí ǹdə́ lyɛlɛ bə̀ b'e pə nə́ba. Shərəbya yà ń wɔ́ Mali jì y lò, Mali zɛ̃̀ ń yà ń wɔ́ Levyi nɔ̃̌, Levyi zɛ̃̀ ń yà ń wɔ́ Esərayɛl byǐ. ¹⁹ E súlí Ashabya, Mərəri jì y lò Yəshaya ǹdə́ ń da-byǎ e súlí bə̀ byǎ, nunə shí-èlyè y'à tó mo. ²⁰ E súlí tùntùnnə bé byɛ̀bɛ́ Dəvyidi ǹdə́ yó-cìnə́ bé y'à pɔ bə̀ n'ê sɛ̃ Levyi dwí rí lyì bí ni mú nunə zwã̌-èlyè, bə̀myɛ́ gakó yilə né y'à kɛ̃. ²¹ À bwə̀l nyì-lyõṍ gàà, Aava bwǐ w nyí ni, mùnì ga nə́ lwəl nə́ cìn tɛ̃́ Cinu nə́ Yi rí yé né mùnì n sɛ̃ nə́ba nə́ kwè sɔ́má y ǹdə́ yə̀-zùlə́, nə́myɛ̌ ǹdə́ nə́ bə̀sɔ́ná bɛ́ e súlí nə́ zhĩĩ rí. ²² À wɛ̀rhɛ́ èta bə̀ cìzhìl y'à zhe ne ǹdə́ eshə-jòmnə shə̀dɛ́ɛ́sɛ lwə̌l pyɔ̌ nɛ mùnì ga sə yìlì nə́ba zwə̀ bé yé né sɔ́má yó; bə̀ nə́ y'ǎ wə̀l pyɔ̌ nɛ: «Nə́ Yi rí n'ê cèlè rə̀ jɛ̃̀ rə̀ yìlì byɛ̀bɛ́ bə̀ n'ê pyà rɛ mɔ́; sə rə̀ lyim rí cɛ̀ dɛ̃́dɛ̃́ byɛ̀bɛ́ gakó bə̀ n'ê yẽ̌ re mó yilə.» ²³ Rə̀myɛ́ ce, nə́ lyẽ nə́ nyí, nə́ m'é lwə̀l sɛ̃ɛ̃́ y èmyɛ́ mɔ́ nə́ Yi rí ni, sə rə zwẽ nə́ lwə̌l mó. ²⁴ Rə̀myɛ́ kwã à zə vwĩ̀-zwə́lnə yó-cìnə́ shí ǹdə́ bə̀lyè, e súlí Shərəbya ǹdə́ Ashabya ǹdə́ bə̀ da-byǎ shíyə́, a m'a vò kwã nɛ́. ²⁵ A mɛrhɛ sə̀byǐ mú ǹdə́ sánə́má mɔ́ e súlí wẽ̀ ré pyɔ̌ mɔ́ ǹdə́ ń cícírnə bé ǹdə́ ń shərnə bé e súlí Esərayɛl lyì byǎ bɛ́ bə̀ y'à wɔ tənà w mɔ́ y'à zə bə m'e bə̀ nə́ Yi rí jì y yil mú, a pə bɛ. ²⁶ À pɔ bɛ sə̀byì-kùlì cəə́le mɔ̀ɔ̀rhɛ̀ shí-èlyè e súlí wẽ̀ rə̀ zùrhì ǹdə́ sə̀byǐ cəə́le mɔ̀ɔ̀rhɛ̀ rə̀tɔ̀, sánə́má cəə́le mɔ̀ɔ̀rhɛ̀ rə̀tɔ̀, ²⁷ sánə́má kǎzɔ̀má shí-èlyè bə̀ yé y yú sánə́má sə̀byì-kùlsì shí-èlyè, wẽ̀ rə̀ zùrhì ǹdə́ kàmmɔ rə̀ búl rə̀ càn yàà rə̀ n'ê jə́jɛ̀mɛ́; rə̀ càn ǹdə sánə́má wẽ̀ ta. ²⁸ A zɛ̃̀ a wɔ̀ bɛ: «Á wɔ́ lyì byɛ̀bɛ́ Cinu cǐ námpúm, wẽ̀ ré tɛ̀bɛ́ myɛ wɔ́ Cinu ni bə̀ pɔ rɛ; sə̀byǐ mú ǹdə́ sánə́má mɔ́ myɛ wɔ́ pùbùlə̀ pɛnɛ́ bə̀ pɔ Cinu á dabá Yi rí ni. ²⁹ Ce-nə jàn nɛ́ á zə rɛ náàcɛ̀nɛ́ kɔn b'e yí á mɛrhɛ rɛ vwĩ̀-zwə́lnə bé ǹdə́ Levyi dwí rí lyì bí e súlí Esərayɛl dwə́ né yó-cìnə́ bé Zhərəzalɛm nɛ́ mɔ́ yé né, Cinu Yi ji y jǐnsí wẽ́.» ³⁰ Rə̀myɛ́ yó, vwĩ̀-zwə́lnə bé ǹdə́ Levyi dwí rí lyì bí zwẽ sə̀byǐ mú, sánə́má mɔ́ ǹdə́ wẽ̀ ré bə̀ mɛrhɛ mɔ́ bə̀ la nyǐ rə̀ yò, mùnì ga bə zə rɛ bə m'e vò Zhərəzalɛm, nə́ Yi rí jì y wẽ́. ³¹ Nə́ zhǐr Aava bwǐ y nyí ni cànà nã́yéé y dwã shí ǹdə́ nə̀lyè yù wə, nə́ m'é la Zhərəzalɛm. Nə́ Yi rí y'à n'ê yìlì nə́ba. Rə̀myɛ́ ce, rə̀ vwǎrh nə́ba zù-bal ǹdə́ vwǎrhna mɔ́ mɔ̀bɔ́ ń y'à ń shèè tɛ̃́ mɔ́ jɔ̃̀ wa. ³² Nə́ gə́ yú Zhərəzalɛm, nə́ shǐrh gàà dwã nə̀tɔ̀. ³³ Dwã nə̀na dɛ̃ rɛ́, nə́ mɛrhɛ sə̀byǐ mú ǹdə́ sánə́má mɔ́ e súlí wẽ̀ ré nə́ Yi rí jì y wə, nə́ zɛ̃̀ nə́ kwè re nə́ ce Urəya byǐ Mərəmɔɔtɛ, vwĩ̀-zwə́lnə mó jɔ̃̀ wa. Pyənaasɛ byǐ Eləyazaarɛ e súlí Levyi dwí rí lyì bí Yəshəwa byǐ Yɔzabaadɛ ǹdə́ Byinwi byǐ Nəwaja y'à ŋwɛ́nɛ́ ǹdə́ mɔ. ³⁴ Rə̀ yó w ǹdə́ rə̀ dùmì rí ga y'à ŋwɛ́nɛ́. Bə zɛ̃̀ bə̀ kɛ̃ dùmì rí gakó yó w sɛ́bɛ́ wẽ́. Rə̀myɛ́ yi ní, ³⁵ byɛ̀bɛ́ bə̀ y'à shí yómə́-jè bə kwɛ̃̀ bə bə̀ mɔ́ zwə́l vwə̃̀ bə pə Esərayɛl Yi rí ni: Bə̀ pɔ mɔ, nə̀-byə-twə́ə́le shə́-ètɔ̀, pyì-byərh shí-nə̀bɔ́ ǹdə́ shə̀ldù e súlí pyì-bwǎlsɛ shə́-shàlpyɛ̀ ǹdə́ shàlpyɛ̀ Esərayɛl gakó yilə, rə yə̀ vwə̃̀ námpúmə́ cɛ̃́ɛ̃́ e súlí bə̀cǐlsi shí ǹdə́ sə̀lyè vwĩ̀ Esərayɛl yə̀-bəlɔ̀lɔ́ sǔbri nɔ yilə. Rə̀myɛ́ gakó yàl vwĩ̀ námpúm cɛ̃́ɛ̃́ Cinu yilə. ³⁶ Rə̀myɛ́ kwã nɛ́, bə zɛ̃̀ bə pə pyɔ̌ mɔ́ nyə́ né sɛ́bɛ́ rɛ́ ń gə́ cǐ má kə̀kàl-fwàlsɛ́ yó-cìnə́ ǹdə́ kə̀kàl-bwǎlsɛ́ yó-cìnə́ bé bə̀ wɔ Efəraatɛ bù-fwɛ̀lɛ̀ y yi-zùr sõ mó nyí rí w mú ni. Sə bə̀ sɛ̃ Esərayɛl lyì bí ni Yi jì y shò kwã nɛ́.