¹ Ywẽ̀ né nə̀myɛ́ gakó kwã nɛ́, pyɔ̌ Artazɛrzɛɛsɛ pyɛ̀lɛ̀ rɛ́ jú yi ní, Esədəraasɛ túwə́. Ń yà ń wɔ́ Səraya byǐ, Səraya zɛ̃̀ ń yà ń wɔ́ Azarəya byǐ, Azarəya zɛ̃̀ ń yà ń wɔ́ Yələca byǐ, ² Yələca zɛ̃̀ ń yà ń wɔ́ Shəlum byǐ, Shəlum zɛ̃̀ ń yà ń wɔ́ Sadɔɔkɛ byǐ, Sadɔɔkɛ zɛ̃̀ ń yà ń wɔ́ Ayətuubi byǐ, ³ Ayətuubi zɛ̃̀ ń yà ń wɔ́ Amarəya byǐ, Amarəya zɛ̃̀ ń yà ń wɔ́ Azarəya byǐ, Azarəya zɛ̃̀ ń yà ń wɔ́ Mərayɔɔtɛ byǐ, ⁴ Mərayɔɔtɛ zɛ̃̀ ń yà ń wɔ́ Zəraya byǐ, Zəraya zɛ̃̀ ń yà ń wɔ́ Uzhi byǐ, Uzhi zɛ̃̀ ń yà ń wɔ́ Buki byǐ, ⁵ Buki zɛ̃̀ ń yà ń wɔ́ Abyəshɔwa byǐ, Abyəshɔwa zɛ̃̀ ń yà ń wɔ́ Pyənaasɛ byǐ, Pyənaasɛ zɛ̃̀ ń yà ń wɔ́ Eləyazaarɛ byǐ, Eləyazaarɛ zɛ̃̀ ń yà ń wɔ́ Aarɔ̃, vwĩ̀-zwə́lnə náncɛ y byǐ. ⁶ Esədəraasɛ ńmyɛ̌ mɔ́ shí Babyəlɔnɛ n bà. Ń yà ń wɔ́ Yi nyə́ né byilnə, ń yà ń yě Muyiisi nyə́ né nyɛ̀bɛ́ Cinu Yi, Esərayɛl Yi rí y'à pɔ mɔ́ yé shò dɛ̃́dɛ̃́. Cinu Yi, ń Yi rí gə́ y'à ŋwɛ́nɛ́ ǹdə́ mɔ mɔ́ ce, pyɔ̌ mɔ́ pɔ mɔ kɔn dɛ̀bɛ́ gakó ń yà ń lwə̀l mo mó. ⁷ Esərayɛl lyì byǎ bɛ́ ǹdə́ vwĩ̀-zwə́lnə bé ǹdə́ Levyi dwí rí lyì bí ǹdə́ núnnə bé ǹdə́ bwə̀rsé dɛ̀nna bɛ́ e súlí Yi jì y tùntùnnə bé sanna bɛ́ jàlà kwɛ̃̀ bə bə̀ Zhərəzalɛm, pyɔ̌ Artazɛrzɛɛsɛ pyɛ̀lɛ̀ rɛ́ jú byinə nyàlpyɛ̀ byin rí; ⁸ Esədəraasɛ myɛ kwɛ̃̀ n bə̀ Zhərəzalɛm cànsɛ̀ sə̀nu nyǎa yó; è y'à wɔ́ pyɔ̌ mɔ́ pyɛ̀lɛ̀ rɛ́ jú byinə nyàlpyɛ̀ byin rí. ⁹ Wɔ́ ńmyɛ̌ ń yà ń cír cànà nã́yéé y dɛ̃ nã́yéé ré ń la n mə n zhǐr Babyəlɔnɛ nɛ́. N zɛ̃̀ n yí Zhərəzalɛm, cànsɛ̀ sə̀nu nyǎ y dɛ̃ nã́yéé ré yù wə, bə̀ ń Yi rí y'à cèlè rə̀ jɛ̃̀ ń yó w rə̀ n'ê yìlì mu. ¹⁰ Zhə̀n ga, Esədəraasɛ yà ń pwèlè ń wu ń nə́ ń pyà sə n sú Cinu nyə́ né kùrə̀, ń nə́ ń wɛ̀rhɛ́ ǹdə nə̀ gə́ n'ê byili ní n súlí ń nə́ cèrhè nyə́ né ǹdə́ lùl-e-púrsí Esərayɛl lyì byǎ bɛ́ nɛ. ¹¹ Nyǐ pyɔ̌ Artazɛrzɛɛsɛ sɛ́bɛ́ rɛ́ ń kɛ̃ n pə vwĩ̀-zwə́lnə ǹdə́ nyə́ né byilnə Esədəraasɛ nɛ mɔ́. Esədəraasɛ yà ń wɔ́ kɔn rɛ́ tɛ̀bɛ́ Cinu nə́ ń pɛ rə̀ nyí mú e súlí ń nyə́ né ń pɔ Esərayɛl shò kwã nɛ́ mɔ́ byilnə. Rə̀ kɛ̃ rə wɔ̀: ¹² «Àmyɛ́ Artazɛrzɛɛsɛ, pyǎ bɛ́ pyɔ̌ mɔ́, à n'â ce ǹmyɛ́ Esədəraasɛ, dɛ̃̌ Yi rí Nyə́ né byilnə mó. ¹³ Nyǐ à nyə́ né: à gə́ cǐ má nyí rí wẽ́, lò mɔ̀bɔ́ gakó ń wɔ Esərayɛl dwí rí wẽ́, rə̀ vwĩ̀-zwə́lnə bé ǹdə́ rə̀ Levyi dwí rí lyì bí wẽ́, ń nə́ ń yǎl n vò Zhərəzalɛm, sə n tó mó n vò! ¹⁴ 14 Nyǐ wɔ́ pyɔ̌ mɔ́ ǹdə́ ń cícírnə bwàlpyɛ̀ y bə̀ twĩ̀ mú bə̀ ǹ zhəl ń vò ń nyǐ bə̀ gə́ n'ê tó ǹ Yi rí Nyə́ né nə̀ wɔ ǹ jɔ̃̀ w mɔ́ nɛ́, Zhəda ǹdə́ Zhərəzalɛm nɛ́; ¹⁵ sə́ súlí ń zə pyɔ̌ mɔ́ ǹdə́ ń cícírnə bé pùbùlə̀ pánsɛ́ sə̀byǐ mú ǹdə́ bə̀ sánə́má mɔ́ ń vò ń pə Esərayɛl Yi rí rə̀ jì y wɔ Zhərəzalɛm nɛ́ mɔ́ nɛ; ¹⁶ e súlí sə̀byǐ mú ǹdə́ sánə́má mɔ́ ǹdə́ pùbùlə̀ pánsɛ́ shɛ̀bɛ́ lyì bí ǹdə́ vwĩ̀-zwə́lnə bé Babyəlɔnɛ nyí rí wẽ́ mó la zə bə bà, bə̀ Yi rí jì y è wɔ Zhərəzalɛm nɛ́ mɔ́ yilə. ¹⁷ Rə̀myɛ́ yilə, ǹ m'ǎ ce jàn nɛ́ ń zə sə̀byǐ mú mə̀myɛ́ ń mə́ yè nə̀-byərh ǹdə́ pyì-byərh ǹdə́ pyì-bwǎlsɛ e súlí kɔn rɛ́ tɛ̀bɛ́ bə̀ zhe rə̀ tum jíjí byǎ pánsɛ́ ǹdə́ də̀vɛ̃́ pánsɛ́ yilə. Ǹ m'ǎ zɛ̃̀ ń zə rə̀ gakó ń vò ń mə́ ń zwə́l vwĩ̀ á Yi rí ji y è wɔ Zhərəzalɛm nɛ́ mɔ́ vwĩ̀-jùlú w yó. ¹⁸ Ǹmyɛ́ ǹdə́ ǹ da-byǎ bɛ́ m'ǎ zə sə̀byǐ mú ǹdə́ sánə́má mɔ́ kùr rí á wɛ̀rhɛ́ tɛ̀bɛ́ á n'â bùl bə̀ rə̀ càn sə á m'ǎ wɛ̀rhɛ́ rɛ rə tó á Yi rí pùbùlì rí ni. ¹⁹ Cĩ́ wẽ̀ tɛ̀bɛ́ gakó bə̀ la mɔ́ pɔ Yi jì y tum rí yil mú Zhərəzalɛm Yi rí yé né. ²⁰ Tɛ̀bɛ́ rə̀ mùrì mú ǹ Yi rí jì y yilə, ǹ m'ǎ ce pyɔ̌ mɔ́ nə̀cɛ̀ndɛ́ jì y ŋwɛ́ɛ́ rɛ. ²¹ ‹Àmyɛ́ pyɔ̌ Artazɛrzɛɛsɛ, à n'â pɛ nyí Efəraatɛ yi-zùr sõ nyí rí nə̀cɛ̀ndɛ́ yìlnə bé ne, bə̀ bə̀ wɛ̀rhɛ́ dɛ̀bɛ́ gakó vwĩ̀-zwə́lnə Esədəraasɛ, dɛ̃̌ Yi rí nyə́ né byilnə mó, la bɛ lwə̌l mó cìcì. ²² Bə̀ m'a pɔ̃ kɔn yí ǹdə sə̀byǐ cəə́le mɔ̀ɔ̀rhɛ̀ rə̀tɔ̀ ta ǹdə́ bə̀lɛ́ cəə́le mɔ̀ɔ̀rhɛ̀ shə́-ètɔ̀ ǹdə́ də̀vɛ̃́ lyítərə mɔ̀ɔ̀rhɛ̀ rə̀na ǹdə́ nwə̃̌ lyítərə mɔ̀ɔ̀rhɛ̀ rə̀na e súlí nə̀kwə̃̌ kɔn yí ǹdə ń gə́ nə́ yǎl nɛ́. ²³ Nyí rí tɛ̀bɛ́ gakó dɛ̃̌ Yi rí pɔ mɔ́, sə bə ce jàn nɛ́ bə pyìrh ri làlà dɛ̃̌ Yi rí jì y yilə, mùnì ga ń lyim bə̀k'a zɛ̃̀ rə̀ n'ê yì pyɔ̌ mɔ́ gə́ cǐ má nyí rí ǹdə́ ń byǎ bɛ́ yé. ²⁴ E súlí myɛ, nə́ n'ê byili ába bə̀ bə̀ bə mə̌ sə bə zwẽ lɔrɔ́ ǹdə́ myə̌l-kwǎndɛ́ e súlí sɔ́má tó kwǎndɛ́ vwĩ̀-zwə́lnə bé ǹdə́ Levyi dwí rí lyì bí ǹdə́ núnnə bé ǹdə́ bwə̀rsé dɛ̀nna bɛ́ e súlí Yi jì y tùntùnnə bé sanna bɛ́, bə̀ bala ǹdə́ bə̀ kana, mə̀dù ga sõ yé.› ²⁵ È gə wɔ́ ǹmyɛ́ Esədəraasɛ cìcì yilə, zə ǹ Yi rí surhə né nə̀ wɔ ǹ jɔ̃̀ w mɔ́ ń mə́ cír bù-kárna ǹdə́ byɛ̀bɛ́ bə̀ n'ê pɛ còrhò-tum nyí mú, bə kə́ lyì bí byɛ̀bɛ́ gakó bə̀ ŋwɛ́nɛ́ Efəraatɛ yi-zùr sõ nyí rí w mú bùrsí, e súlí lyì byɛ̀bɛ́ gakó bə̀ yě ǹ Yi rí nyə́ né mó bùrsí; sə á cèrhè ne lò mɔ̀bɔ́ ń yə̀l ne mó ne. ²⁶ Lò mɔ̀bɔ́ gakó ń yə̀ ǹ Yi rí ǹdə́ pyɔ̌ mɔ́ nyí rí gə́ n'ê byili ní cìcì zwẽ, sə bə pyìrh còrhò-tum nyí rí ń yilə: bə gu mu ráá bə mà mɔ ráá bə ji mu bwã̌ ráá bə ce mo byə̀nə́-jù wə.» ²⁷ Esədəraasɛ zɛ̃̀ n zhẽ̌ ń cəl n wɔ̀: «Cinu Yi, nə́ dabá Yi rí nə còrhó. Ńmyɛ̌ mɔ̀bɔ́ ń co surhə né pyɔ̌ wẽ́ n mə n zɛ̃̀ n pyà Cinu jì y è wɔ Zhərəzalɛm nɛ́ mɔ́ yó-dɛ̃̌-zhõ̌. ²⁸ Ń wu-bɔ̀nɔ̀ w wẽ́, Cinu lwəl n nyǐ ni pyɔ̌ mɔ́ ǹdə́ ń cícírnə bé e súlí ń shərnə bé náncɛsɛ́ gakó yírh wə. Cinu à Yi rí gə́ yà ń ŋwɛ́nɛ́ ǹdə́ nɛ mɔ́ ce, à zɔ wu-jɔ̀, a zɛ̃̀ a cĩ́ Esərayɛl lyì byǎ bɛ́ yó-cìnə́ jàlà dwã yó bə̀ la tó ne bə vò.»