¹ Rə̀myɛ́ yó, pyɔ̌ Dərəyuusi zɛ̃̀ n pə nyí bə̀ bə̀ gwɛ̃ bə pyà nə̀cɛ̀ndɛ́ jì y sábá nɛ́ nə̀ y'a wɔ Babyəlɔnɛ nɛ́ gàà mɔ́ wẽ́; ² Sə bə̀ nɔ sɛ́bɛ́ Ekəbatan, Meji tənà y kə̀kàlà y nyí rí jàà y kɛ̀bɛ́ bə̀ y'à lù bə kə́kɛ́lɛ́ mɔ́ wẽ́, bə̀ kɛ̃ rə̀ wẽ́ bə wɔ̀: «Sá-cĩ́ĩ́. ³ Pyɔ̌ Səruusi pyɛ̀lɛ̀ rɛ́ jú byin nã́yéé ré, ń pɔ nyí n wɔ̀: Zhərəzalɛm Yi jì y shò kwã nɛ́. Yi jì y m'a k'e lù jàà y kɛ̀bɛ́ bə̀ n'ê zwə́l vwə̃̀ né mó wẽ́ ǹdə́ è kùr rí nándwə́l ré yó: È yó w dɛ̃̌-zhìyə́ m'a yə̀ jə̀-tórhó yírhə́ shə̀ldù (60), è wɛ̃̀ rɛ́ myɛ yə̀ jə̀-tórhó yírhə́ shə̀ldù (60). ⁴ Bə̀ m'a cĩ́ nə́kul-sə̀lə̀ dwã yó bə tùrhì ni nə̀rh sə̀tɔ̀ dwã nɛ e súlí dǎr nándùn nà èdù. Sə wɔ́ pyɔ̌-kɛ̀lɛ́ y è m'a ŋwɛ́ɛ́ tum rí kwǎndɛ́. ⁵ E súlí myɛ, bə̀ m'a k'a zə Yi jì y wẽ̀ ré rə̀ zùrhì ǹdə́ sánə́má ǹdə́ sə̀byì-kùlì mú, Nabəkɔdɔnɔzɔɔrɛ yà ń pwà Zhərəzalɛm Yi jì y w n mə bə̀ Babyəlɔnɛ mɔ́ bə bà; wẽ̀ ré rə̀myɛ́ òdù gakó m'a k'a vò o cĩ́ ò jàà y w Zhərəzalɛm Yi jì y wə. Ǹ m'ǎ k'á cĩ́ ri Yi jì y wẽ́.» ⁶ «Rə̀myɛ́ ce, Efəraatɛ bù-fwɛ̀lɛ̀ y yi-zùr sõ mó nyí rí yó-cə́bal Tətənəyi ǹdə́ Shətaarɛ-Bozənəyi e súlí bə̀ tó-dwã tùntùnnə bé bə̀ wɔ Afarəsaakɛ nɛ́, Efəraatɛ yi-zùr sõ mó, á bə̀k'á ce á cìn rə̀ wẽ́ yé. ⁷ Yẽ̌-nə bə twĩ̀ Yi jì èmyɛ́ mɔ́ lú tumə né; Zhəda nyí rí yó-cə́bal mɔ́ e súlí Zhwifubá yé né cìnə́ bé m'a lù Yi jì y èmyɛ́ è kùr nándwə́l ré yó. ⁸ Nyǐ à nyə́ né, á cìn-zɛlɛ́ y ǹdə́ Zhwifubá yé né cìnə́ bé bə̀myɛ́ mɔ́, Yi jì y kɛ̀bɛ́ lú mú shò kwã nɛ́ mɔ́: wɔ́ pyɔ̌ myə̌l-kwǎndɛ́ Efəraatɛ bù-fwɛ̀lɛ̀ y yi-zùr sõ nyí rí n'ê pɛ mɔ́, bə̀ b'a m'e ŋwɛ́ɛ́ kɔn rɛ́ tɛ̀bɛ́ bala bɛ́ byɛ̀bɛ́ bə̀ la vǔr mú yó w ga, twéé gakó. ⁹ Bə̀ mà pə bɛ́ kɔn tɛ̀bɛ́ gakó bə̀ zhe rə̀ tum mú dɛ̃ gakó, sə dɛ̃ rə̀dù ga myɛ bə̀k'a mɛ̃ nánfò yé: nə̀-byə-twə́ə́le, pyì-byərh, pyì-bwǎlsɛ dɛ̃̌ Yi rí vwə̃̀ námpúmə́ cɛ̃́ɛ̃́ nɛ́ yilə; bə̀lɛ́ ǹdə́ nə̀kwə̃̌ ǹdə́ də̀vɛ̃́ e súlí nwə̃̌, kɔn tó kɔn dɛ̀bɛ́ Zhərəzalɛm vwĩ̀-zwə́lnə bé la byilu mú ni, ¹⁰ mùnì bə ŋwɛ̀nɛ́ bə pə vwə̃̀ nyɛ̀bɛ́ nə̀ n'ê swé lyim tɛ̃́ dɛ̃̌ Yi rí ni, sə bə súlí bə lwə̀l re pyɔ̌ ǹdə́ ń byǎ bɛ́ nyǔ mú yilə. ¹¹ Nyǐ à nyə́ né lò mɔ̀bɔ́ gakó ń gə cẽ nyí rí à kɛ̃ sɛ́bɛ́ rɛ́ wẽ́ mó zõ mó yilə: bə̀ mǔr ń jì y pɛ́lɛ́ rə̀dù sə bə cìì ri tɛ̃́, sə bə zɛ̃̀ bə kwè mo bə cìì rə̀ yó dɛ̃̌ gàà; sə bə súlí bə ce ń kɛ̀lɛ́ jǐrh bo-púl. ¹² Pyɔ̌ mɔ̀bɔ́ gakó ǹdə́ dwí tɛ̀bɛ́ gakó rə̀ m'a cẽ nyí rí tɛ̀bɛ́ zõ, rə zɛ̃̀ rə zhẽ̌ rə̀ jɛ̃̀ rə̀ la Yi jì y Zhərəzalɛm nɛ́ mɔ́ cɔ̌, sə Yi rí tɛ̀bɛ́ rə̀ ŋwɛ́nɛ́ jì y èmyɛ́ mɔ́ wẽ́ mó byirh rə̀-ná-cí rə ji tɛ̃́. Wɔ́ àmyɛ́, Dərəyuusi, à pɔ nyí; sə bə̀ wɛ̀rhɛ́ ǹdə rə̀ gə́ n'ê byili ni mú cìcì.» ¹³ Rə̀myɛ́ yó, Efəraatɛ bù-fwɛ̀lɛ̀ y yi-zùr sõ mó nyí rí yó-cə́bal Tətənəyi ǹdə́ Shətaarɛ-Bozənəyi e súlí bə̀ tó-dwã tùntùnnə bé wɛ̀rhɛ́ ǹdə pyɔ̌ Dərəyuusi nyí rí ń pɔ bə bə̀ mɔ́ gə́ y'à n'ê byili ní mú cìcì. ¹⁴ Zhwifubá yé né cìnə́ bé zhílí Yi jì y lú mú náàcɛ̀nɛ́ ǹdə Yi nyì-zwennə* Azhe ǹdə́ Yədo byǐ Zakarɛ gə́ y'à byili ní. Bə̀ lù y bə zhɛ̀, kɔn tó dwã ǹdə Esərayɛl Yi rí nyí rí e súlí ǹdə Pɛɛrəsɛ pyǎ Səruusi ǹdə́ Dərəyuusi e súlí Artazɛrzɛɛsɛ nyə́ né. ¹⁵ Bə lù Yi jì y èmyɛ́ bə zhɛ̀ Adaarɛ cànàa y dwã nə̀tɔ̀ yù wə, pyɔ̌ Dərəyuusi pyɛ̀lɛ̀ rɛ́ jú byinə nyə̀ldù byin rí. ¹⁶ Esərayɛl lyì byǎ bɛ́ ǹdə́ vwĩ̀-zwə́lnə bé ǹdə́ Levyi dwí rí lyì bí e súlí byɛ̀bɛ́ bə̀ y'à zɔ bə vò yómə́-jè mó dwã bɛ́ wɛ̀rhɛ́ wu-nyɔ̃̀ bə m'e pə Yi jì y kɛ̀bɛ́ Yi ni. ¹⁷ Bə̀ pɔ nə̀-byərh zɔ̌m ǹdə́ pyì-byərh zwã̌-èlyè ǹdə́ pyì-bwǎlsɛ zwã̌-èna rə̀myɛ́ mɔ́ yilə. Bə súlí bə pə bə̀cǐlsi shí ǹdə́ sə̀lyè, Esərayɛl kwálsɛ́ yó wə́, Esərayɛl lyì byǎ bɛ́ gakó yə̀-bəlɔ̀lɔ́ w yilə. ¹⁸ Bə̀ bɔ̀n vwĩ̀-zwə́lnə bé ǹdə́ Levyi dwí rí lyì bí kùkùlə̀ kùkùlə̀ Yi tum rí tũ̌ Zhərəzalɛm nɛ́ mɔ́ yilə, ǹdə Muyiisi nyə́ né sɛ́bɛ́ rɛ́ gə́ byili ní. ¹⁹ Byɛ̀bɛ́ bə̀ shí yómə́-jè bə bə̀ mɔ́ jú Pakɛ címsí cànà nã́yéé y dwã shí ǹdə́ nə̀na yù wə; ²⁰ vwĩ̀-zwə́lnə bé ǹdə́ Levyi dwí rí lyì bí gə́ y'à tó dwã bə kwɛrhɛ bə̀ cìn bə jǐrh wárhgáá mɔ́b, ce bə̀ gakó jǐrh wárhgáá: wɔ́ rə̀myɛ́ è ce bə zɛ̃̀ bə zwə́l Pakɛ címsí vwĩ̀ rí byɛ̀bɛ́ bə̀ shí yómə́-jè bə bə̀ mɔ́ e súlí bə̀ da-byǎ vwĩ̀-zwə́lnə bé ǹdə́ bə̀ cìcì mú yilə. ²¹ Èta Esərayɛl lyì byǎ bɛ́ bə̀ shí yómə́-jè bə bə̀ mɔ́ jú címsí ǹdə́ byɛ̀bɛ́ gakó bə cẽ tənà y dwə́ né jìmdí yò bə̀ la m'e tó be bə pyà Cinu, Esərayɛl Yi rí mú. ²² Bə̀ jú búrú w ò yə̀ sã̀-nə̀byẽ̌ ce mó címsí ǹdə́ wu-nyɔ̃̀ dwã nyàlpyɛ̀. Cinu yà ń ce bə̀ wun ní sú ǹdə́ wu-nyɔ̃̀, bə̀ ń yà ń ce Ashəri pyɔ̌ mɔ́ wu bùlə̀ né zhɛ́rhɛ́ bə̀ shò kwã nɛ́ n mə n súlí bi bɛlɛ, Yi jì yə́, Esərayɛl Yi rí jì y lú tum rí tũ̌ mú wẽ́.