¹ Esərayɛl Yi rí gə́ só Yi nyì-zwennə Azhe ǹdə́ Zakarɛ, Yədo byǐ mú, yó w bə zɛ̃̀ bə zɔ̀m ǹdə́ Zhwifubá bə̀ y'à wɔ Zhəda ǹdə́ Zhərəzalɛm nɛ́ ń yil ré yil mú yi ní, ² Shəyaləcəə byǐ Zorobəbyəə ǹdə́ Yɔsadaakɛ byǐ Zhozwe j'a zɛ̃̀ bə̀ n'ê lwì Yi jì y Zhərəzalɛm nɛ́ mɔ́; sə Yi nyì-zwennə bé y'à ŋwɛ́nɛ́ ǹdə́ bɛ, bə̀ m'ê kwɛ̃́ bɛ. ³ Rə̀myɛ́ yi ní, Efəraatɛ bù-fwɛ̀lɛ̀ y yi-zùr sõ nyí rí yó-cə́bal Tətənəyi, e súlí Shətaarɛ-Bozənəyi ǹdə́ bə̀ tó-dwã tùntùnnə bé bə̀ bə bwə̀rh be bə wɔ̀: «Mɔ̌ ń pɔ ába nyí b'ǎ lú Yi jì y kɛ̀bɛ́ s'á súlí á lù è byílsí á cĩ́ dɛ̃̌? ⁴ Nə́ zɛ̃̀ nə́ n'é wə̀l ába: Pə-na nə́ba lyì bí byɛ̀bɛ́ bə̀ n'ê lwì jì y kɛ̀bɛ́ yilə né!» ⁵ Sə Esərayɛl Yi rí y'à n'ê yìlì Zhwifubá yé né cìnə́ bé: bə̀ yə̀ ce bə yẽ̌ tum rí zhúlú ni yé. Bə̀ y'à n'ê dɛ̃̀ sə bə kɛ̃ sɛ́bɛ́ bə̀ m'e cĩ́ nyí pyɔ̌ Dərəyuusi ni yò w shò kwã nɛ́, sə pyɔ̌ myɛ zɛ̃̀ n kɛ̃ sɛ́bɛ́ n càrh bɛ n mə n byili kɔn ò shò kwã nɛ́. ⁶ Wɔ́ sɛ́bɛ́ rɛ́ tɛ̀bɛ́ Efəraatɛ bù-fwɛ̀lɛ̀ y yi-zùr sõ nyí rí yó-cə́bal Tətənəyi ǹdə́ Shətaarɛ-Bozənəyi e súlí bə̀ tó-dwã tùntùnnə bé bə̀ wɔ Afarəsaakɛ nɛ́, Efəraatɛ bù-fwɛ̀lɛ̀ y yi-zùr sõ nyí rí wẽ́ mó, kɛ̃ bə pə pyɔ̌ Dərəyuusi ni. ⁷ Bə̀ kɛ̃ kɔn rɛ́ tɛ̀bɛ́ sɛ́bɛ́ rɛ́ wẽ́ bə pə bə vò bə pɔ̃: «Yə̀-zùlə́ námpúm yál ǹdə́ pyɔ̌ Dərəyuusi! ⁸ Pyɔ̌, lwar bə̀ nyǐ nə́ zhə̀l Zhəda, tənà y kə̀kàlà y wa, Yi rí nánfɔ̀lɔ̀ w jì y wə. Bə̀ n'ê lwì y ǹdə́ nə́kulə nə̀ sə̀lə̀, sə bə̀ súlí bə̀ n'ê ce dǎr byílsí wə. Tum rí n'ê twĩ̀ ǹdə́ yala nɛ zhùlù rə j'à n'ê zhə̀l náàcɛ̀nɛ́ bə̀ jɔ̃̀ wa. ⁹ Sə nə́ bwə̀rh yé né cìnə́ bé nə́ wɔ̀: ‹Mɔ̌ ń pɔ ába nyí b'ǎ lú jì y kɛ̀bɛ́ s'á súlí á lù è byílsí á cĩ́ dɛ̃̌?› ¹⁰ Nə́ súlí nə́ wɔ̀ bɛ bə̀ bə̀ pə nə́ba bə̀ yilə né mùnì nə́ kɛ̃ byɛ̀bɛ́ bə̀ wɔ́ bə̀ yé né cìnə́ bé nyə̀ná nɛ́ nə́ pə pyɔ̌ nɛ sə n mə n lwar. ¹¹ Nyǐ bə̀ gə́ lyár nə́ba nɛ́: ‹Nə́ wɔ́ dɛ̃̌-yi rí ǹdə́ tɛ̃́ cɛ y ga Yi rí tùntùnnə, è wɔ́ Yi jì y kɛ̀bɛ́ Esərayɛl pyɔ̌ nánfɔ̀lɔ̀ òdù y'à lù o zhɛ̀ è byinə ju ní èlǎsɛ̃́ mɔ́, nə́ k'é n'é lwì. ¹² Sə nə́ dabá ce dɛ̃̌ Yi rí lyim zɛ̃̀. Rə̀myɛ zɛ̃̀ rə ce be Kəlde lyì bal Nabəkɔdɔnɔzɔɔrɛ, Babyəlɔnɛ pyɔ̌ mɔ́ jɔ̃̀ wa. Wɔ́ ńmyɛ̌ ń cɔ̀ jì y kɛ̀bɛ́ n zɛ̃̀ n pwà lyì bí n mə n vò Babyəlɔnɛ. ¹³ Sə Babyəlɔnɛ pyɔ̌ Səruusi pyɛ̀lɛ̀ rɛ́ jú byin nã́yéé ré, Səruusi pɔ nyí bə̀ bə̀ k'a lù Yi jì yə́. ¹⁴ E súlí myɛ, Yi jì y wẽ̀ ré rə̀ y'à zùrhì ǹdə́ sánə́má e súlí ǹdə́ sə̀byì-kùlì, Nabəkɔdɔnɔzɔɔrɛ yà ń ce bə̀ vùr Zhərəzalɛm Yi jì y wə, n zə n bə̀ n cĩ́ Babyəlɔnɛ còrhó-jì w mú, Səruusi ce bə k'á vùr ri Babyəlɔnɛ còrhó-jì y wə, n pə lò mə̀dù ń yíl Shəshəbasaarɛ, n yà ń ce n jǐrh ń tənà y kə̀kàlà èdù yó-cə́bal mɔ́ nɛ. ¹⁵ Ń wə̀l mo bə̀ ń pwǎ wẽ̀ ré tɛ̀bɛ́ ń vò ń cĩ́ Zhərəzalɛm Yi jì y wẽ́, sə n ce bə k'a lù Yi jì y è kùr ré yó. ¹⁶ Shəshəbasaarɛ ńmyɛ̌ mɔ́ já n zɛ̃̀ n bə̀ n ji Yi jì y kùr tɛ̃́ Zhərəzalɛm nɛ́. Kɔn zhí rə̀myɛ́ yi ní ga e m'e yí zà, bə̀ j'â gwẽ̌ n'ê lwì yə, sə bə̀ gwẽ̌ yə̀ y gwi yé.› ¹⁷ Sə èlǎsɛ̃́, kɔn gə wɔ́ pyɔ̌ pùbùlə̀ sə bə pyà pyɔ̌ nə̀cɛ̀ndɛ́ jì y wẽ́, Babyəlɔnɛ nɛ́ gàà, bə nyì ǹdə́ pyɔ̌ Səruusi gə yà ń pɔ nyí bə̀ bə̀ lú Yi jì y kɛ̀bɛ́ Zhərəzalɛm nɛ́. E súlí kɔn rɛ́ tɛ̀bɛ́ pyɔ̌ mɔ́ yà ń kɔ́ yò w òmyɛ́ shò kwã nɛ́, sə bə ce rə yí nə́ba.»