¹ Zhəda ǹdə́ Bɛ̃zhamɛ lyì bí zwə̀ bé gə́ nyɛ̀ɛ̀ bə̀ byɛ̀bɛ́ bə̀ shí yómə́-jè mó y'à n'ê lwì jì, Cinu Yi, Esərayɛl Yi rí, yil mú, ² bə zɛ̃̀ bə bə̀ Zorobəbyəə ǹdə́ dwə́ né yó-cìnə́ bé sõ bə wɔ̀ bɛ: «Nə́ m'ǎ tó ába nə́ lù! Nyǐ nə́myɛ n'ê ce Yi, á Yi rí ǹdə á ta, nə́ súlí nə́ n'ê zwə́l vwə̃̀ nə́ pɛ rɛ, Ashəri pyɔ̌ Asharadɔ̃, ń zə nə́ba n bə̀ nyɔ̀nɔ̀ mɔ́, yi ní ga.» ³ Sə Zorobəbyəə ǹdə́ Zhozwe ǹdə́ dwə́ né yó-cìnə́ bé dwã bɛ́ lyár bɛ bə wɔ̀: «Nə́myɛ̌ ǹd'ámyɛ̌ t'á la dwã nɛ́ mú nə́ m'é lù jì nə́myɛ̌ Yi rí yil yé; wɔ́ nə́myɛ̌ dúdú nə́ mə̌ sə nə́ lù jì Cinu Yi, Esərayɛl Yi rí yilə, ǹdə Pɛɛrəsɛ pyɔ̌ Səruusi gə́ pɔ nyí ní.» ⁴ Ǹdə́ rə̀myɛ́ ga lyì bí ŋwɛ̀nɛ́ bə ce Zhəda lyì bí wun ga, bə súlí bə ce ywẽ bo-lùrnə̀ bé wẽ́. ⁵ Bə pə wársɛ cícírnə ne mùnì bə ce tum rí lyɛ̃̀ kùrə̀, kɔn zhì Pɛɛrəsɛ pyɔ̌ Səruusi pyɛ̀lɛ̀ rɛ́ yi ní ga e m'e yí Dərəyuusi pyɛ̀lɛ̀ rɛ́. ⁶ Pyɔ̌ Zɛrzɛɛsɛ pyɛ̀lɛ̀ rɛ́ jú kùr jirə́ y yi ní, Zhwifubá zwə̀ bé kɛ̃ sɛ́bɛ́ bə m'e ce cà Zhəda ǹdə́ Zhərəzalɛm lyì bí ni. ⁷ Pyɔ̌ Artazɛrzɛɛsɛ yi ní, Byəshəlam ǹdə́ Myətərədaatɛ ǹdə́ Tabəyɛl e súlí bə̀ tó-dwã tùntùnnə bé kɛ̃ sɛ́bɛ́ bə pə Pɛɛrəsɛ pyɔ̌ Artazɛrzɛɛsɛ nɛ; sɛ́bɛ́ rɛ́ y'à kɛ̃ ǹdə́ Araməyɛ̃ kəkɛ̃ɛ̃ rɛ́ e súlí rə̀ zɔ̀mà nɛ́. ⁸ Tənà y nyí rí gàà mɔ́ yó-cə́bal Erəwum ǹdə́ sá-kanna Shəməshəyi kɛ̃ sɛ́bɛ́ bə pə pyɔ̌ Artazɛrzɛɛsɛ nɛ, Zhərəzalɛm shò kwã nɛ́ bə wɔ̀: ⁹ «Tənà y nyí rí gàà mɔ́ yó-cə́bal Erəwum ǹdə́ sá-kanna Shəməshəyi ǹdə́ bə̀ tó-dwã tùntùnnə bé bə̀ ŋwɛ́nɛ́ Din ǹdə́ Afarəsataakɛ ǹdə́ Tarəpɛl ǹdə́ Afaraasɛ ǹdə́ Erɛɛkɛ ǹdə́ Babyəlɔnɛ ǹdə́ Suuzi ǹdə́ Dəya e súlí Elam nyí rí wẽ́, ¹⁰ e súlí dwə́ né dwã bɛ́ lyì bí, Asənapaarɛ, lyì-fɔ̀lɔ̀ w ń yil du mú, pwà n bə̀ n ce bə̀ jě Samarɛ nɛ́ mɔ́ e súlí tənà y kə̀kàlà y è wɔ Efəraatɛ bù-fwɛ̀lɛ̀ y yi-zùr sõ mó.» ¹¹ Nyǐ sɛ́bɛ́ rɛ́ bə̀ kɛ̃ bə pɔ̃ mɔ́ zɔ̀mà nɛ́: «Pyɔ̌ Artazɛrzɛɛsɛ, wɔ́ ǹ tùntùnnə bé bə̀ wɔ tənà y è wɔ Efəraatɛ bù-fwɛ̀lɛ̀ y yi-zùr sõ mó. ¹² Nyǐ nə́ mə̌ sə nə́ ce pyɔ̌ lwar bə̀ Zhwifubá byɛ̀bɛ́, bə̀ shí ǹ sõ bə bə̀ nə́ sõ Zhərəzalɛm nɛ́ mɔ́, k'â n'ê lwì cɔ námmənyɔnɔ ǹdə́ námməlɔ̀lɔ́ w kɔ̀bɔ́; bə̀ jɛ̀nɛ̀ bə nyǐ byílsí kùrə̀ né gə́ cĩ́ má yò bə zɛ̃̀ bə̀ k'â n'ê lwì si bə cĩ́ dɛ̃̌. ¹³ Rə̀myɛ́ ce, nə́ mə̌ sə nə́ ce pyɔ̌ lwar bə̀ nyǐ cɔ w kɔ̀bɔ́ gə k'ô lùwə̀, ò byílsí myɛ k'e lù sə cĩ́ dɛ̃̌, ò lyì bí k'ê t'â la jɛ̃̀-kɔn pɔ yé, bə̀ k'ê t'â la myə̌l-kwǎndɛ ǹdə́ sɔ́má y è n'ê tó gàà è lyɛ̃ mɔ́ kwǎndɛ́ pɔ yé, sə rə̀myɛ́ gakó m'a gu yó ǹdə́ pyǎ bɛ́ yò zhùlù. ¹⁴ Nə́ gə́ zɛ̃̀ nə́ n'ê jí pyɔ̌ mɔ́ jɔ̃̀ w mɔ́, e súlí myɛ kɔn gə́ bə mə̌ bə̀ nə́ yẽ̌ bə ce pyɔ̌ cìzhìl èta mɔ́ ce, nə́ kɛ̃ sɛ́bɛ́ nə́ la m'e byili ywẽ̀ né nyɛ̀bɛ́ pyɔ̌ nɛ, ¹⁵ mùnì ga bə gwɛ̃ bə kàrmə̀ ǹ dabá ywẽ̀ né lyǐrh sɛ́bɛ́ rɛ́ wẽ́: sɛ́bɛ́ rɛ́ rə̀myɛ́ mɔ́ wẽ́, ǹ m'ǎ lwar sə ǹ m'ǎ púrí bə̀ cɔ w kɔ̀bɔ́ wɔ́ cɔ námmənyɔnɔ, ò n'ô cɔ̀ pyǎ bɛ́ ǹdə́ tənà y kə̀kàlsɛ́ ywẽ̀, e súlí myɛ wɔ́ cɔ w òmyɛ́ wẽ́ zɔ̀mà j'â n'ê zɛ̃̀ nɛ́ kùr ju yi ní ga. Wɔ́ rə̀myɛ́ rə̀ ce cɔ w òmyɛ́ mɔ́ y'a m'o jé tɛ̃́. ¹⁶ Nə́ n'é ce pyɔ̌ lwar bə̀ cɔ w kɔ̀bɔ́ gə k'ô lùwə̀, ò byílsí k'e lù sə cĩ́ dɛ̃̌, rə̀myɛ́ m'a ce ǹ kə́ ǹ tá ǹ la kaka cìnú Efəraatɛ bù-fwɛ̀lɛ̀ y yi-zùr sõ mó w yé.» ¹⁷ Pyɔ̌ mɔ́ zɛ̃̀ n twĩ̀ bə vò bə lyár bɛ bə wɔ̀: «Yə̀-zùlə́ yál nɛ́ ǹdə́ tənà y nyí rí gàà mɔ́ yó-cə́bal Erəwum ǹdə́ sá-kanna Shəməshəyi ǹdə́ bə̀ tó-dwã tùntùnnə bé bə̀ ŋwɛ́nɛ́ Samarɛ ǹdə́ Efəraatɛ bù-fwɛ̀lɛ̀ y yi-zùr sõ nyí rí wẽ́ mó. ¹⁸ Nyǐ sɛ́bɛ́ rɛ́ tɛ̀bɛ́ á kɛ̃ á pə nə́ba mɔ́, bə̀ kàrmə̀ rɛ pamparɛ̃ɛ̃ à yé né. ¹⁹ A zɛ̃̀ a ce bə gwɛ̃ bə kàrmə̀ ywẽ̀ né lyǐrh sɛ́bɛ́ rɛ́ wẽ́, sə bə̀ púrí bə̀ kùr ju yi ní ga cɔ w kɔ̀bɔ́ n'ô bwí ǹd'ô pyǎ bɛ́, ò j'à sú ǹdə́ nyí-ni-cõ tũ̀twĩ̀ĩ̀ ǹdə́ búlə́. ²⁰ Zhərəzalɛm nɛ́, pyǎ nánfwààlɛ yàl nɛ́ bə̀ jú pyɛ̀lɛ̀ Efəraatɛ bù-fwɛ̀lɛ̀ y yi-zùr sõ nyí rí púlə́púlə́ yó wə; bə̀ y'à n'ê pɛ bɛ lɔrɔ́, myə̌l-kwǎndɛ́ ǹdə́ sɔ́má y è n'ê tó gàà è lyɛ̃ bə̀ n'ê kwè mó kwǎndɛ́. ²¹ Rə̀myɛ́ ce, pə-na nyí bə̀ bə̀ ce lyì bí bə̀myɛ́ èta mɔ́ yẽ̌ tum rí zhúlú ni; bə̀ bə̀k'a lù cɔ w kɔ̀bɔ́ ǹdə́ nyí gə yə̀ à sõ shí yé. ²² Dɛ̃̌-na á cìnə̀ á bə̀k'á zə yò w kɔ̀bɔ́ á dədal yé, ò lwɛlɛ rɛ́ b'e pɔ̀lɛ̀, ò zɛ̃̀ ò la pyǎ bɛ́ yò zhùlù yé.» ²³ Bə̀ gə́ kàrmə̀ pyɔ̌ Artazɛrzɛɛsɛ nyí sɛ́bɛ́ rɛ́ Erəwum ǹdə́ sá-kanna Shəməshəyi ǹdə́ bə̀ tó-dwã tùntùnnə bé yé né bə zhɛ̀, bə j'a zɛ̃̀ bə vò Zhwifubá bə̀ wɔ Zhərəzalɛm nɛ́ mɔ́ sõ làlà làlà, bə nyɛ́ɛ́ bɛ ǹdə́ jàn bə ce bə yẽ̌ tum rí zhúlú ni. ²⁴ Èta, Yi jì y lú tum rí Zhərəzalɛm nɛ́ mɔ́ j'a zhì, sə rə̀ zhǔ mú mə̀myɛ́ dɛnɛ gaga kɔn m'e yí Pɛɛrəsɛ pyɔ̌ Dərəyuusi pyɛ̀lɛ̀ rɛ́ jú byinə nə̀lyè nyǎn rɛ́.