koussoube-marc-lee_ezr_text

Kǝ̀kàl-fwɛ̀lɛ̀ 3

¹ Cànsɛ̀ shàlpyɛ̀ nyǎa y yó, rə̀myɛ́ ǹdə́ Esərayɛl lyì byǎ bɛ́ y'à jě bə̀ cɛmɛ nɛ́ wẽ́, bə du bə bə̀ dwã yó ǹdə lò mə̀dù ta Zhərəzalɛm nɛ́. ² Yɔsadaakɛ byǐ Zhozwe zɛ̃̀, ńmyɛ̌ ǹdə́ ń da-byǎ vwĩ̀-zwə́lnə bé e súlí Shəyaləcəə byǐ Zorobəbyəə ǹdə́ ń da-byǎ bɛ́ bə lù Esərayɛl Yi rí vwĩ̀-jùlú bə̀ m'ê pɛ vwə̃̀ námpúmə́ cɛ̃́ɛ̃́ ò yó ǹdə rə̀ gə́ kɛ̃ Yi lò Muyiisi Nyí rí sɛ́bɛ́ rɛ́ wẽ́ né. ³ Ǹdə́ lyì bí ywẽ y'à zhe be ga, bə k'a lù vwĩ̀-jùlú w ò kùr rí yó. Bə zɛ̃̀ bə pə vwə̃̀ námpúmə́ cɛ̃́ɛ̃́ Cinu Yi ni ò yó, nəkɔkɔ́lɛ́ ǹdə́ də̀dɛ̀nɛ́ ga vwə̃̀ námpúmə́ cɛ̃́ɛ̃́ nɛ́. ⁴ Rə̀myɛ́ kwã, bə zɛ̃̀ bə jí Kwə̀ə́rhé címsí bə̀ y'à n'ê pɛ vwə̃̀ námpúmə́ cɛ̃́ɛ̃́ dɛ̃ gakó nə yí nə̀ yó w ǹdə lùl-e-púrí nyí rí gə́ y'à n'ê byili ní. ⁵ Rə̀myɛ́ kwã nɛ́, bə̀ y'à j'â n'ê pɛ dɛ̃ gakó vwĩ̀ námpúm cɛ̃́ɛ̃́ rɛ́ ǹdə́ càn-dǔlsí vwə̃̀ námpúmə́ cɛ̃́ɛ̃́ nɛ́ ǹdə́ Cinu címsí dwã nɛ́ nyə̀ná nɛ́ e súlí byɛ̀bɛ́ bə̀ y'à n'ê pɛ pùbùlə̀ pánsɛ́ Cinu ni mú vwə̃̀ né. ⁶ Cànsɛ̀ shàlpyɛ̀ nyǎ y dɛ̃ nã́yéé réc, bə̀ ju kùr bə̀ n'ê pɛ vwə̃̀ námpúmə́ cɛ̃́ɛ̃́ nɛ́ Cinu Yi ni. E jà rə̀myɛ́ yi ní ǹdə́ bə̀ y'à gwẽ̌ yə̀ Cinu jì y kùr ré ji yé. ⁷ Rə̀myɛ́ kwã nɛ́, bə zɛ̃̀ bə pə sə̀byǐ nə́kul-sə̀lnə bé ǹdə́ də̀-sə̀lnə bé ne, e súlí jíjí ǹdə́ kɔ̀-nyɔ̀ɔ̀mà ǹdə́ nwə̃̌ Sədɔ̃ lyì bí ǹdə́ Tiiri lyì bí ni, mùnì bə ce sɛ́ɛ́dərɛd dǎr tó nə̀-fɔ̀lɔ̀ w nɛ rə zhì Lyəbã rə bə̀ Zhafa, kɔn tó nyí rí Pɛɛrəsɛ pyɔ̌ Səruusi yà ń pɔ mɔ́ nɛ. ⁸ Sə bə̀ gə́ kwɛ̃̀ bə bə̀ Zhərəzalɛm, Cinu jì y cɔ w wẽ́, byinə nə̀lyè nyǎn rɛ́, cànsɛ̀ sə̀lyè nyǎ y wẽ́, Shəyaləcəə byǐ Zorobəbyəə ǹdə́ Yɔsadaakɛ byǐ Zhozwe e súlí bə̀ da-byǎ bɛ́ dwã bɛ́, ǹdə́ vwĩ̀-zwə́lnə bé ǹdə́ Levyi dwí rí lyì bí ǹdə́ lyì bí byɛ̀bɛ́ gakó bə̀ y'à shí yómə́-jè bə bə̀ Zhərəzalɛm mɔ́, ju kùr bə vùr Levyi dwí rí lyì bí, byinə shí cìnə́ è m'ê la, bə̀ la yə̀ Cinu Yi jì y lú tumə né yé né. ⁹ Sə Zhozwe ǹdə́ ń byǎ bɛ́ ǹdə́ ń da-byǎ bɛ́ ǹdə́ Kadəmyɛl ǹdə́ ń byǎ bɛ́ ǹdə́ Zhəda byǎ bɛ́ ǹdə́ bə̀myɛ́ gakó mù dwã nɛ, bə̀ n'ê kál tùntùnnə mɔ̀bɔ́ gakó ń yà ń nə́ ń twĩ̀ Yi jì y yó mó. Enadaadɛ byǎ bɛ́ e súlí bə̀ byǎ bɛ́ ǹdə́ bə̀ da-byǎ bɛ́ bə̀ wɔ́ Levyi dwí rí lyì bí myɛ twə́r y'à ŋwɛ́nɛ́. ¹⁰ Rə̀myɛ́ yó, bo-lùrnə̀ bé gə́ tú bə cĩ́ Cinu jì y kùr ré tɛ̃́, bə̀ cĩ́ vwĩ̀-zwə́lnə bé, bə̀ zù kàmə̀zǔrh dwí rə̀dù ǹdə́ pɔ́lsɛ, e súlí Asaafɛ byǎ bɛ́ bə̀ wɔ́ Levyi dwí rí lyì bí ǹdə́ bə̀ twə́nə́ bə̀ jɔ̃̀ w bə̀ jààsɛ́ wa, mùnì bə cèrhé Cinu Yi ǹdə Esərayɛl lyì pyɔ̌ Dəvyidi gə́ yà ń pɔ nyí ní. ¹¹ Bə̀ y'à n'ê cèrhé Cinu, bə súlí bə̀ n'ê ce ń nə̀báná, bə̀ m'ê kwɛ̃́ dwã nyí ni bə̀ zhe: «Nyǐ ń wɔ́ wu-bɔ̀nɔ̀ cə́bal, nyǐ ń sónó Esərayɛl yil mú də̀ zhɔ̌ kɔn yé.» Dwí rí gakó lyì bí jəjɔ bə m'e cèrhé Cinu Yi, Cinu jì y kùr ré tɛ̃́ ju mú yilə. ¹² Rə̀myɛ́ yó, vwĩ̀-zwə́lnə bé nánzhəzhɔ̌ ǹdə́ Levyi dwí rí lyì bí ǹdə́ dwí rí yó-cìnə́ byɛ̀bɛ́ bə̀ byinə né y'à já mɔ́, bə̀ y'à nɔ Yi jì nã́yéé y mó, y'à n'ê kúrh bə̀ cələ n'ê dwi, bə̀ gə́ tú bə̀ n'ê ji Cinu jì nándwə̃̀ y kùr ré tɛ̃́ bə̀ yírh w yi ní. Sə lyì dwã nánzhɔ̌ myɛ y'à n'ê jəjɔ ǹdə́ wu-nyɔ̃̀. ¹³ Rə̀myɛ́ ce, lòlò yà ń kə́ ń wàr ń pɔr wu-nyɔ̃̀ jəjɔ mɔ́ ǹdə́ cìlə́ né dwã w yé, bə̀ lyì bí gakó y'à n'ê mà búbwéése nánfwàlsɛ̀, shɛ̀bɛ́ ǹ gə wɔ pyépyé myɛ ǹ nyɛ̌ sɛ mɔ́.