koussoube-marc-lee_ezr_text

Kǝ̀kàl-fwɛ̀lɛ̀ 10

¹ Esədəraasɛ gə́ yà ń tú n tu n zə ń yé y n pú tɛ̃́ Yi jì y yé né, ń mə́ ń lwə̀l Yi n súlí ń mə́ ń tùrhì ń yə̀-bəlwàálɛ́ ǹdə́ yə́-nàná yi ní, Esərayɛl lyì bí tú dwã yó nánjə̀jóló, bala ǹdə́ kana e súlí bə̀sɔ́ná ga, ń yala nɛ, bə zɛ̃̀ bə̀ n'ê bobwere yə́-nàná tɛ̃́. ² Rə̀myɛ́ yi ní, Yəyəə byǐ Shəkanya, Elam nɔ̃̌ òdù, zɛ̃̀ n wɔ̀ Esədəraasɛ nɛ: «Nə́ yə̀ nə́ nà yó zhì ǹdə́ nə́ Yi rí yé, nə́ gə́ jú dwə́ né dwã bɛ́, nə̀ wɔ tənà y mɔ́ bə̀kwá bɛ́ mɔ́ yilə. Sə kɔrhɔ gwẽ̌ ŋwɛ́nɛ́ yò w òmyɛ́ shò kwã nɛ́ Esərayɛl yilə: ³ rə̀myɛ́ ce, sə á bə̀ nə́ bwəl nyí Yi yé né sə nə́ jì dwə́ né dwã bɛ́ bə̀kwá bɛ́ gakó ǹdə́ bə̀ bə̀sɔ́ná bɛ́ bə vò jè, ǹdə à yó-cə́bal e súlí byɛ̀bɛ́ bə̀ n'ê nyàm nə́ Yi rí nyí rí gə́ n'ê cící nə́ba mɔ́ nɛ́. ⁴ Zɛ̃̀ dɛ̃̌, nyǐ yò w lyẽ mó; nə́ wɔ ǹ kwã nɛ́; zə wu-jɔ̀ sə́ twĩ̀ ǹdə́ ǹ wu gakó!» ⁵ 5 Esədɛraasɛ já n zɛ̃̀, n ce vwĩ̀-zwə́lnə bé ǹdə́ Levyi dwí rí lyì bí ǹdə́ Esərayɛl púlə́púlə́ yó-cìnə́ bé bwəl nyí bə̀ bə̀ m'a wɛ̀rhɛ́ ǹdə kɔn gə́ y'à byili ní; bə̀ zhə̀n ga bwəl nyí. ⁶ Esədəraasɛ shí tɛ̃́ ń gə́ yà ń jě má, Yi jì y yé né mó n zɛ̃̀; n zhǐr n vò Elyəshiibi byǐ Yɔwanã jì y səta; sə ń gə́ yú gàà mɔ́, ń yə̀ kùjú jí, ń yə̀ nɛ̃̌ myɛ nywɛ̀ yé; bə̀ ń yà ń wɔ wu-zhùlù nánfɔ̀lɔ̀ wẽ́, byɛ̀bɛ́ bə̀ shí yómə́-jè bə bə̀ mɔ́ gə́ yə̀ bə̀ nà yó zhì mú yilə. ⁷ Bə ce bə bwə̀l Zhəda ǹdə́ Zhərəzalɛm nɛ́ bə byili byɛ̀bɛ́ bə̀ shí yómə́-jè bə bə̀ mɔ́ nɛ bə̀ bə̀ bə̀ dwã yó Zhərəzalɛm nɛ́. ⁸ Lò mɔ̀bɔ́ gakó ń yə̀ twí dwã nɛ́ nə̀tɔ̀ y wẽ́, ǹdə yé né cìnə́ bé ǹdə́ náncɛsɛ́ nyí rí gə́ y'à n'ê byili ní, bə̀ m'a zwẽ ń jɛ̃̀-kɔn rɛ́ gakó bə yẽ̌ mo bə ce Yi jì y wə, sə bə̀ m'a vùr ń cìcì mú byɛ̀bɛ́ bə̀ shí yómə́-jè y bə bə̀ mɔ́ kùkùl ré wẽ́. ⁹ Rə̀myɛ́ yó, Zhəda ǹdə́ Bɛ̃zhamɛ lyì bí gakó zɛ̃̀ bə bə̀ dwã yó Zhərəzalɛm nɛ́ dwã nɛ́ nə̀tɔ̀ y wẽ́; è y'à wɔ́ cànsɛ̀ nə̀bɔ́ nyǎ y dwã shí-èlyè yù wə. Lyì bí gakó mɛ̃ Yi jì y kùr wə, bə̀ y'à n'ê kəkə yò w òmyɛ́ mɔ́ ǹdə́ dwà y è y'à n'ê nywɛ̀ mɔ́ yilə. ¹⁰ Vwĩ̀-zwə́lnə Esədəraasɛ zɛ̃̀ n zhì dɛ̃̌ n wɔ̀ bɛ: «Á yə̀ á nà y yó zhì yé, dwə́ né dwã bɛ́ bə̀kwá bɛ́ jú mú zɛ̃̀ rə súlí rə pɔ̀lɛ̀ Esərayɛl dóó wə́. ¹¹ Rə̀myɛ́ ce tùrhì-nə á dwə́ə́ré Cinu Yi, á dabá Yi rí ni, sə á wɛ̀rhɛ́ ń pùbùlə̀: vǔr-nə á cìn dwə́ né dwã bɛ́ lyì bí wẽ́, sə á súlí á vùr bə̀ bə̀kwá bɛ́.» ¹² Lyì bí byɛ̀bɛ́ gakó bə̀ y'à tú dwã yó mó tó dwã bə wɔ̀ dɛ̃̌dɛ̃̌: «Wɔ́ zhə̀nà! Nə́myɛ̌ nə́ mə̌ sə nə́ wɛ̀rhɛ́ ǹdə ǹ gə́ byili ní! ¹³ Sə lyì bí já e jà wɔ́ dwèsé myɛ yi; nə́ wàr pwẽ̀ ne cə-èlá y w nə́ la nɛ́ zhǔ yé. E súlí myɛ, yò w kɔ̀bɔ́ də̀ dɛ̃ rə̀dù ráá dwã nə̀lyè nyɔ̃̌ yé, bə̀ nə́myɛ̌ byɛ̀bɛ́ ò co nə́ twə́r né mó já dɛ̃́dɛ̃́. ¹⁴ Kɔn gə́ wɔ́ èta mɔ́ ce, nə́ n'é lwə̀l sə nə́ yó-cìnə́ bé zhì nyɔ̀nɔ̀ lyì bí byɛ̀bɛ́ gakó bə̀ tú dwã yó mó yil yilə. Sə lyì bí byɛ̀bɛ́ gakó, bə̀ wɔ nə́ cɛmɛ nɛ́ wẽ́, bə̀ jú dwə́ dwã bə̀kwá bə̀ bə̀ yé né yi rí tɛ̀bɛ́ bə̀ la cír mú, ǹdə́ cɔ gakó náncɛsɛ́ e súlí ò bù-kárna bɛ́, kɔn b'e yí nə́ Yi rí lyim rí, rə̀ zɛ̃̀ rə̀ n'ê yì nə́ba yò w kɔ̀bɔ́ shò kwã nɛ́ mɔ́ tu.» ¹⁵ Sə Asayəə byǐ Zhɔnatã ǹdə́ Cəkəva byǐ Yazəya cẽ kɔn rɛ́ rə̀myɛ́ mɔ́, Məshəlam ǹdə́ Levyi dwí rí lò Shəbətəyi zɛ̃̀ bə ce nyí bə̀ kwã. ¹⁶ Sə byɛ̀bɛ́ bə̀ shí yómə́-jè mó wɛ̀rhɛ́ ǹdə bə̀ gə́ y'à yò né. Bə̀ cír lyì, jì gakó, kɛ̀lɛ́ y cə́bal, bə kɛ̃ lò gakó ǹdə́ ń yil ré, bə súlí vwĩ̀-zwə́lnə Esədəraasɛ nɛ; bə̀ jòm kúlí cànsɛ̀ shí nyǎ y dɛ̃ nã́yéé ré yù w bə̀ la m'e pyà yò w yé shò. ¹⁷ Sə byin rí rə̀ pú mú, cànà nã́yéé y dɛ̃ nã́yéé ré yù wə, bə̀ zhɛ̀ bala bɛ́ byɛ̀bɛ́ gakó bə̀ y'à jú dwə́ dwã bə̀kwá bɛ́ mɔ́ yò wə́. ¹⁸ Vwĩ̀-zwə́lnə bé byǎ bɛ́ wẽ́, byɛ̀bɛ́ bə̀ y'à jú dwə́ né dwã bɛ́ bə̀kwá bɛ́ mɔ́ y'à wɔ́: Yɔsadaakɛ byǐ Zhozwe byǎ bɛ́ ǹdə́ ń da-byǎ bɛ́ wẽ́, y'à wɔ́: Maasəya ǹdə́ Elyəzɛɛrɛ ǹdə́ Yəriibi e súlí Gədalya; ¹⁹ Bə̀ zhẽ̌ bə̀ jɛ̃̀ bə bwəl nyí bə̀ bə̀ b'a jì bə̀ kana bɛ́ bə ce bə vò jè, sə bə̀ m'a súlí bə pə pyì-bya bə̀ dóó w kɔrhɔ yilə; ²⁰ Yəmɛɛrɛ byǎ bɛ́ wẽ́, y'à wɔ́: Anəni ǹdə́ Zəbaja; ²¹ Arim byǎ bɛ́ wẽ́, y'à wɔ́: Maasəya ǹdə́ Elya ǹdə́ Shəmaya ǹdə́ Yəyəə e súlí Uzha; ²² Pashəwuuri byǎ bɛ́ wẽ́, y'à wɔ́: Elyowenəyi ǹdə́ Maasəya ǹdə́ Yəsəmayəə ǹdə́ Nətanəyəə ǹdə́ Yɔzabaadɛ e súlí Elasa. ²³ Levyi dwí rí lyì bí wẽ́, y'à wɔ: Yɔzabaabɛ ǹdə́ Shəmeyi ǹdə́ Kəlaya, bə̀ n'ê byẽ̀ mo myɛ bə̀ Kələta ǹdə́ Pətayəya ǹdə́ Yəwudə e súlí Elyəzɛɛrɛ. ²⁴ Núnnə bé wẽ́, y'à wɔ́: Elyəshiibi. Bwə̀rsé dɛ̀nna bɛ́ wẽ́, y'à wɔ́: Shəlum ǹdə́ Tɛlɛm e súlí Uri. ²⁵ È gə wɔ́ Esərayɛl lyì byǎ bɛ́ yilə: Parɔɔshɛ byǎ bɛ́ wẽ́, y'à wɔ́: Aramya ǹdə́ Yəzhəya ǹdə́ Maləca ǹdə́ Myəmyini ǹdə́ Eləyazaarɛ ǹdə́ Maləca e súlí Bənaya; ²⁶ Elam byǎ bɛ́ wẽ́, y'à wɔ́: Matanya ǹdə́ Zakarɛ ǹdə́ Yəyəə ǹdə́ Abədi ǹdə́ Yərəmɔɔtɛ e súlí Elya; ²⁷ Zatu byǎ bɛ́ wẽ́, y'à wɔ́: Elyəwonəyi ǹdə́ Elyəshiibi ǹdə́ Matanya ǹdə́ Yərəmɔɔtɛ ǹdə́ Zabaadɛ e súlí Azəza; ²⁸ Bəbəyi byǎ bɛ́ wẽ́, y'à wɔ́: Yɔwanã ǹdə́ Ananya ǹdə́ Zəbəyi e súlí Atələyi; ²⁹ Bəni byǎ bɛ́ wẽ́, y'à wɔ́: Məshəlam ǹdə́ Məluuki ǹdə́ Adaya ǹdə́ Yəshuubi ǹdə́ Shəyal e súlí Yərəmɔɔtɛ ³⁰ Paatɛ-Mɔwaabɛ byǎ bɛ́ wẽ́, y'à wɔ́: Adəna ǹdə́ Kəlal ǹdə́ Bənaya ǹdə́ Maasəya ǹdə́ Matanya ǹdə́ Bəsalɛl ǹdə́ Byinwi e súlí Manaasɛ; ³¹ Arim byǎ bɛ́ wẽ́, y'à wɔ́: Elyəzɛɛrɛ ǹdə́ Yəsha ǹdə́ Maləca ǹdə́ Shəmaya ǹdə́ Shəmɔ ǹdə́ ³² Bɛ̃zhamɛ ǹdə́ Məluuki e súlí Shəmarəya; ³³ Ashum byǎ bɛ́ wẽ́, y'à wɔ́: Mətənəyi ǹdə́ Matata ǹdə́ Zabaadɛ ǹdə́ Elyəfəlɛɛtɛ ǹdə́ Yərəməyi ǹdə́ Manaasɛ e súlí Shəmeyi; ³⁴ Bəni byǎ bɛ́ wẽ́, y'à wɔ́: Məədəyi ǹdə́ Aməram ǹdə́ Uwɛl ǹdə́ ³⁵ Bənaya ǹdə́ Bəja ǹdə́ Kəluwu ǹdə́ ³⁶ Vanya ǹdə́ Mərəmɔɔtɛ ǹdə́ Elyəshiibi ǹdə́ ³⁷ Matanya ǹdə́ Matənya ǹdə́ Yəsəyi ǹdə́ ³⁸ Bəni ǹdə́ Byinwi ǹdə́ Shəmeyi ǹdə́ ³⁹ Shələmya ǹdə́ Natã ǹdə́ Adaya ǹdə́ ⁴⁰ Makənadəbəyi ǹdə́ Shəshəyi ǹdə́ Shərəyi ǹdə́ ⁴¹ Azarɛl ǹdə́ Shələmya ǹdə́ Shəmarəya ǹdə́ ⁴² Shəlum ǹdə́ Amarəya e súlí Zhozefu; ⁴³ Nebo byǎ bɛ́ wẽ́, y'à wɔ́: Yəyəə ǹdə́ Məcəshə ǹdə́ Zabaadɛ ǹdə́ Zəbyəna ǹdə́ Yədəyi ǹdə́ Zuwəə e súlí Bənaya. ⁴⁴ Bala bɛ́ bə̀myɛ́ mɔ́ gakó y'à jú dwə́ dwã bə̀kwá; sə bə̀ y'à nɔ bə̀sɔ́ná ǹdə́ kana bɛ́ bə̀myɛ́ jàlà bə̀ sõ.