¹ Cinu kə́ n wɔ̀ Muyiisi ni: «Zhəl Faraɔ̃ sõ ń vò ń wɔ̀ mɔ: Nyǐ Cinu Ebərəbá Yi rí nyí rí: Yẽ̌ à dwí rí ni rə shə́r mùnì ga rə vò rə cèrhé ne. ² Ǹ gə gwẽ̌ cẽ ǹ tá ǹ la rɛ yõ̌ rə shə́r, ń cẽ ǹ nə́ ǹ cə̀r re, ³ Cinu mà n ce cím-bəlwɛ̀lɛ́ è búl è cɛ̀ dɛ̃́dɛ̃́ gurhi vwàmá nɛ́ nyɛ̀bɛ́ nə̀ wɔ ǹ cɛsɛ́ wẽ́ mó ǹdə́ ǹ shəshesé ǹdə́ ǹ bə̀nesé ǹdə́ ǹ yómdé ǹdə́ ǹ nɛ̃ nɛ́ e súlí ǹ pyììsí! ⁴ Cinu mà n pɔr Esərayɛl lyì byǎ bɛ́ vwàmá nɛ́ ǹdə́ Ezhibti lyì bí nyə̀ná nɛ́ dwã wa. Vwǎm mə̀dù ga myɛ t'â la cú Esərayɛl lyì byǎ bɛ́ vwàmá nɛ́ wẽ́ yé.» ⁵ Cinu zɛ̃̀ n cír rə̀ yi rí, n wɔ̀: «Cinu mà n wɛ̀rhɛ́ rɛ tənà y wẽ́ nəkɔl dɛ̃ rɛ́ cìcì.» ⁶ Sə è zɛ̃̀ nəkɔkɔ́lɛ́ y Cinu wɛ̀rhɛ́ rɛ: Ezhibti lyì bí vwàmá nɛ́ púlə́púlə́ cì, sə vwǎm mə̀dù ga yə̀ cì Esərayɛl lyì byǎ bɛ́ vwàmá nɛ́ wẽ́ yé. ⁷ Faraɔ̃ twĩ̀ bə vò bə byɛ́lɛ́, sə bə̀ púrí vwǎm mə̀dù ga myɛ yə̀ cì Esərayɛl lyì byǎ bɛ́ vwàmá nɛ́ wẽ́ yé! Sə ǹdə́ rə̀myɛ́ ga, Faraɔ̃ gwẽ̌ cẽ n twĩ̀ yó-kùlù; ń yə̀ dwí rí ni yẽ̌ rə shə́r yé. ⁸ Cinu wɔ̀ Muyiisi ǹdə́ Aarɔ̃ nɛ: «Pwǎ-na kúl myìn-táfúlú jə̀-gúlə́ nə̀lyè, á gə yú Faraɔ̃ yé né, sə Muyiisi la w dɛ̃̌. ⁹ Ò m'a jǐrh kɔ́kɔ̀rhɔ́ Ezhibti tənà y yó wə, o ce kúkùlə́ nə̀ n'ê jǐrh nyəla ji Ezhibti tənà y numbyínsí ǹdə́ è vwàmá nɛ́ yala nɛ́ nɛ.» ¹⁰ Bə̀ pwà kúl myìn-táfúlú w bə b'e zhì Faraɔ̃ yé né; Muyiisi la w dɛ̃̌, sə ò ce kúkùlə́ nə̀ n'ê jǐrh nyəla ji numbyínsí ǹdə́ vwàmá nɛ́ yala nɛ́ nɛ. ¹¹ Sə kúkùlə́ né ce lyì bí byɛ̀bɛ́ bə̀ n'ê twĩ̀ jə̀jǐrh-ywẽ̀ tumə né mó yə̀ ŋwɛ̀nɛ́ bə zhì Muyiisi yé né yé, bə̀ nə̀ y'à fwər bə̀myɛ́ ǹdə́ Ezhibti lyì bí gakó yala nɛ́. ¹² Sə Cinu kùl Faraɔ̃ wu wə́, ń yə̀ Muyiisi ǹdə́ Aarɔ̃ cili yé, ǹdə Cinu gə́ yà ń dámǎ n wɔ̀ Muyiisi ni ní. ¹³ Cinu kə́ n wɔ̀ Muyiisi ni: «Dùlí ń zɛ̃̀ nəkɔkɔ́lɛ́ shãã shãã ń vò Faraɔ̃ sõ, ń vò ń wɔ̀ mɔ: Nyǐ Cinu, Ebərəbá Yi rí nyí rí: Yẽ̌ à dwí rí ni rə shə́r mùnì ga rə vò rə cèrhé ne. ¹⁴ Bə̀ èlǎsɛ̃́ myɛ̌, à m'a ce màbyə́ə́re dwí gakó pú ǹmyɛ́ ǹdə́ ǹ tùntùnnə bé ǹdə́ ǹ dwí rí, mùnì ga ń lwar bə̀ nyǐ à bə nyɛrh-dõ zhe cɛ y yó yé. ¹⁵ À gə y'à pyɛ́nɛ́ a zhẽ̌ jɛ̃̀ ǹmyɛ́ ǹdə́ ǹ dwí rí yó, cím-bəlwɛ̀lɛ́ gə y'à gu ǹmyɛ́ ǹdə́ ǹ dwí rí ga, ń jé tɛ̃́ cɛ y yó, èlǎsɛ̃́-lǎsɛ̃́. ¹⁶ Sə nyǐ kɔn rɛ́ tɛ̀bɛ́ rə̀ ce a yẽ̌ mó ǹ gwẽ̌ ŋwɛ́nɛ́ mɔ́: wɔ́ mùnì ga a ce ń lwar à jàn rɛ́ gə́ wɔ́ nɛ́, sə bə bwə̀l à yil ré bə byili lũ w púlə́púlə́ wə. ¹⁷ Ǹ gwẽ̌ cẽ ǹ nə́ ǹ cə̀r à dwí rí dwirí y yé ne. ¹⁸ Nəkɔl dɛ̃ rɛ́, yi rí tɛ̀bɛ́ èta cìcì mú, à m'a ce bədũ̀kwələ dwà nánfwɛ̀lɛ̀ nyɔ̀, è dwí rí gwẽ̌ yə̀ Ezhibti ní nywɛ̀, Ezhibti tənà y gə́ ju kùr yi ní ga kɔn m'e yí zà mɔ́ gaga yé. ¹⁹ Rə̀myɛ́ ce, ce bə vò bə pyà jàà bə ce ǹ vwàmá nɛ́ ǹdə́ kɔn rɛ́ tɛ̀bɛ́ gakó ǹ cǐ rə̀ wɔ gɔ sõ mó. Bədũ̀kwələ né m'a gu lò mɔ̀bɔ́ gakó ń mɛ̃ gɔ sõ ǹdə́ vwǎm mɔ̀bɔ́ gakó mə̀ mɛ̃ gɔ sõ, bə̀ yə̀ zə bə bə̀ jè mó.» ²⁰ Lyì bí byɛ̀bɛ́ bə̀ nyàm Cinu zɔ̀mɛ̀ rɛ́, Faraɔ̃ tùntùnnə bé wẽ́ mó, co bə̀ tùntùnnə bé ǹdə́ bə̀ vwàmá nɛ́ jìsí wẽ́. ²¹ Sə byɛ̀bɛ́ bə̀ yə̀ rə kwè ǹdə zɔ̃̀-twə̌ ta mɔ́, yẽ̌ bə̀ tùntùnnə bé ǹdə́ bə̀ vwàmá nɛ́ nɛ gɔ sõ. ²² Cinu wɔ̀ Muyiisi ni: «Zhẽ̌ ǹ jɛ̃̀ y ń ce dɛ̃̌-yi wə, sə bədũ̀kwələ ló tɛ̃́ Ezhibti tənà y púlə́púlə́ wə, numbyínə́ bé ǹdə́ vwàmá nɛ́ e súlí cɛsɛ́ gɔ w gakó Ezhibti tənà y yó.» ²³ Muyiisi zhẽ̌ ń də̀-dɔ̀lɔ̀ w n ce dɛ̃̌-yi wə, Cinu ce dwà-gùlú j'a zɛ̃̀ ò n'ô domə, bədũ̀kwələ n'ê lwé tɛ̃́: Dwà-myǐn mú tu cɛ y yó, Cinu ce bədũ̀kwələ dwà búl e nyɔ̀ Ezhibti tənà y wa. ²⁴ Bədũ̀kwələ, dwà-myǐn ǹdə́ bədũ̀kwələ rə̀ n'ê tó dwã, bədũ̀kwələ nə̀ y'à búl nə̀ já: Ezhibti tənà y y'à gwẽ̌ yə̀ rə̀myɛ́ dwí rí nɛ è gə́ wɔ́ tənà yi ní ga yé. ²⁵ Bədũ̀kwələ né gu kɔn dɛ̀bɛ́ gakó rə̀ y'à wɔ gɔ sõ, numbyínə́ bé ǹdə́ vwàmá nɛ́ ga. Nə̀ gu cɛsɛ́ gɔ w gakó, nə pɔ́pɔ̀lɛ́ cèmé né gakó Ezhibti tənà y púlə́púlə́ wə. ²⁶ Gɔshɛn nyí rí dúdú wẽ́, Esərayɛl lyì byǎ bɛ́ gə́ y'à wɔ mə̀gã̌ mɔ́, bədũ̀kwələ né yə̀ nɛ́ lwé yé. ²⁷ Rə̀myɛ́ yó, Faraɔ̃ ce bə byẽ̀ Muyiisi ǹdə́ Aarɔ̃ n zɛ̃̀ n wɔ̀ bɛ: «Èlǎsɛ̃́ myɛ̌, à dówə́; Cinu ń wɔ́ cángá cə́bal mɔ́; àmyɛ́ ǹd'â dwí rí nə́ wɔ́ dwə́ə́ré cìnə́ bé. ²⁸ Zə-na Cinu cã̌ nɛ bə̀ də̀-byɛɛ́sɛ́ ǹdə́ bədũ̀kwələ né búl rə lyɛ̃ cɛ nɛ èlǎsɛ̃́. À m'a yẽ̌ ába á shə́r á vò, à k'â t'â la ába cə̌r kɔn dɛnɛ yé.» ²⁹ Muyiisi wɔ̀ mɔ: «À gə du cɔ w w yi ní, à m'a zhẽ̌ à jɛ̀sɛ́ a ce Cinu ni; də̀-byɛɛ́sɛ́ m'a zhɛ̀, bədũ̀kwələ né myɛ k'ê t'â la tɛ̃́ ló yé, mùnì ga ń lwar bə̀ wɔ́ Cinu ń cǐ lũ wə́. ³⁰ S'a j'à yě bə̀ ǹmyɛ́ ǹdə́ ǹ tùntùnnə bé gwẽ̌ t'á nyàm Cinu Yi yé.» ³¹ Lɛ̃̌ y ǹdə́ orzhɛ y ga cɔ̀, bə̀ orzhɛ y y'à n'ê lùlə̀, lɛ̃̌ y myɛ y'à wɔ́ pùnə́. ³² Sə bə̀lɛ́ y dwə́ kùrə̀ né nə̀lyè y gə́ y'à wɔ́ nánkwaárɛ́ mɔ́ ce, nə̀ yə̀ cɔ̀ yé. ³³ Muyiisi shə́r Faraɔ̃ sõ, n súlí n du cɔ w wa, n zɛ̃̀ n zhẽ̌ ń jɛ̀sɛ́ dɛ̃̌ n zə Cinu cã̌ nɛ, də̀-byɛɛ́sɛ́ ǹdə́ bədũ̀kwələ né j'a zhì; dwà y k'ê yə̀ nɛ̃̌ tɛ̃́ cìr yé. ³⁴ Sə Faraɔ̃ gə́ púrí dwà y ǹdə́ bədũ̀kwələ né e súlí də̀-byɛɛ́sɛ́ ga zhì mú, n zɛ̃̀ n kə́ n wɛ̀rhɛ́ yə̀-bəlɔ̀lɔ́ kə́dò. Ńmyɛ̌ ǹdə́ ń tùntùnnə bé twĩ̀ yó-kùùlì. ³⁵ Faraɔ̃ wu w j'a gwẽ̌ cə̀ə̀lè o mɛ̃ nánkùlù; ń yə̀ Esərayɛl lyì byǎ bɛ́ nɛ yẽ̌ bə shə́r yé, ǹdə Cinu gə́ yà ń dámǎ n tó Muyiisi dɛnnɛ n byili ní.