¹ Cinu kə́ n wɔ̀ Muyiisi ni: «Zhəl Faraɔ̃ sõ bə̀ wɔ́ àmyɛ́ à ce ńmyɛ̌ ǹdə́ ń tùntùnnə bé n'ê twĩ̀ yó-kùùlì, mùnì ga a tó rə̀ dɛnnɛ a twĩ̀ tũ̀-fwààlɛ tɛ̀bɛ́ rə̀ n'ê byili b'à ŋwɛ́nɛ́ bə̀ cəcəl wə, ² sə ǹmyɛ mə́ súlí ń cĩ́ còrhò-tum mɔ̀bɔ́ à pɔ Ezhibti lyì bí ni mú e súlí tũ̀-fwààlɛ́ tɛ̀bɛ́ à twĩ̀ bə̀ sõ mó nyí rí ǹ byǎ bɛ́ ǹdə́ ǹ nɛ̀mɛ́ nɛ́ nɛ. Á m'ǎ zɛ̃̀ á lwar b'àmyɛ́ wɔ́ Cinu.» ³ Muyiisi ǹdə́ Aarɔ̃ zɛ̃̀ bə vò Faraɔ̃ sõ bə yí bə wɔ̀ mɔ: «Nyǐ Cinu, Ebərəbá Yi rí nyí rí: Ǹ nə m'ǎ cẽ ǹ cìn tɛ̃́ lwəl à yé né kɔn m'e yí dǒ? Yẽ̌ à dwí rí ni rə shə́r mùnì ga rə vò rə cèrhé ne. ⁴ Ǹ gə já ǹ gwẽ̌ cẽ ǹ tá ǹ la rɛ yõ̌ rə shə́r, à m'a ce səsɔ̀mɛ̀ bə̀ ǹ tənà y wẽ́ nəkɔl dɛ̃ rɛ́. ⁵ Nə̀ m'a ləlɛ tɛ̃́ nə pyi cɛ y gakó lò kə́ ń wàr ń la y nɔ ǹdə́ ń yírh yé. Nə̀ m'a jí kɔn rɛ́ tɛ̀bɛ́ bədũ̀kwələ né yə̀ cɔ mɔ́, nə̀ m'a dɔ̃̀ á cèmé né nyɛ̀bɛ́ gakó nə̀ n'ê lyĩ cɛsɛ́ wẽ́ mó. ⁶ Nə̀ m'a sú ǹ pyɔ̌-kɛ̀lɛ́ y jìsí ǹdə́ ǹ tùntùnnə bé jìsí e súlí Ezhibti lyì bí púlə́púlə́ jìsí. Ǹ dabá ǹdə́ ǹ nàmbala bɛ́ j'â gwẽ̌ yə̀ rə̀myɛ́ mɔ́ nɛ, bə̀ gə́ wɔ cɛ yó ga, kɔn m'e yí zà yé.» Rə̀myɛ́ kwã nɛ́, Muyiisi shə́r Faraɔ̃ sõ, n ká n kwɛ̃̀. ⁷ Faraɔ̃ tùntùnnə bé wɔ̀ mɔ: «Numbyíní y kɛ̀bɛ́ nə m'a yə̀ pɔ̀mɔ̀ nə́ yil kɔn m'e yí dǒ? Yẽ̌ lyì bí byɛ̀bɛ́ nɛ bə shə́r mùnì ga bə vò bə cèrhé Cinu bə̀ Yi rí. Ǹ já ǹ gwẽ̌ bə nɛ bə̀ Ezhibti tənà y wɔ́ cɔ́ è j'â n'ê cɔ̀ è la nà?» ⁸ Bə k'a ce Muyiisi ǹdə́ Aarɔ̃ kwɛ̃̀ bə bə̀ Faraɔ̃ sõ, Faraɔ̃ zɛ̃̀ n wɔ̀ bɛ: «Zhəl-nə á vò á cèrhé Cinu á Yi rí. Sə è nə wɔ́ lyì byɛ̌ bə̀ la mɔ́?» ⁹ Muyiisi lyár mɔ n wɔ̀: «Nə́ m'ǎ zə nə́ bə̀sɔ́ná bɛ́ ǹdə́ nə́ náncɛsɛ́ ǹdə́ nə́ bala-byǎ bɛ́ ǹdə́ nə́ kana-byǎ bɛ́ e súlí nə́ və̌-ywàálɛ́ ǹdə́ nə́ vwàmá nánfwààlɛ́ nə́ m'é vò. B'è wɔ́ címsi nə́ mə̌ sə nə́ jí Cinu yilə.» ¹⁰ Faraɔ̃ lyár ń mə́ ń mɔ̀n bɛ n wɔ̀: «Bə̀ Cinu yál nɛ́ ǹd'ába à gə yẽ̌ ámyɛ̌ ǹd'á byǎ bɛ́ nɛ á shə́r yi ní. Nyǐ-nə lwɛlɛ rɛ́ á n'á pyà mɔ́ ma wé! ¹¹ Nyǐ rə̀myɛ́ mɔ́ wàr rə̀ la wɔ̀rhɔ́ yé! Ámyɛ̌ bala bɛ́ zhəl-nə á cèrhé Cinu bə̀ wɔ́ rə̀myɛ́ á n'á yàlá.» Bə zɛ̃̀ bə jì bi Faraɔ̃ sõ bə ce pwẽ̀ ne. ¹² Cinu zɛ̃̀ n wɔ̀ Muyiisi ni: «Cèlè ǹ jɛ̃̀ y Ezhibti tənà y yó w ń mə́ ce səsɔ̀mɛ̀ nɛ́ bə̀ nə pú yə; nə dɔ̃̀ è gɔ w bədũ̀kwələ né yẽ̌ mó gakó.» ¹³ Muyiisi cèlè ń də̀-dɔ̀lɔ̀ w Ezhibti tənà y yó wə, Cinu ce zho ò shí yi-púrhí sõ bə̀ o ce tənà y yó wə, dɛ̃ rɛ́ rə̀myɛ́ mɔ́ námpúm, nə̀nyɛ́nɛ́ y ǹdə́ cəcɛ̃ y ga. È zɛ̃̀ nəkɔkɔ́lɛ́ yá, bə̀ púrí zho w y'à zɔ səsɔ̀mɛ̀ nɛ́ o m'o bà. ¹⁴ Nə j'a zɛ̃̀ nə làà dɛ̃̌ nə sú Ezhibti tənà y gakó, nə jòm è cə-yala gakó wə: bə̀ y'à gwẽ̌ yə̀ səsɔ̀mɛ̀ nánjə̀jóló w òmyɛ́ dwí rí nɛ gaga yé, bə̀ k'ê yə̀ nə̀ dwí rí myɛ nɛ rə̀myɛ́ kwã nɛ́ myɛ yé. ¹⁵ Nə j'a pú tənà y gakó, e jǐrh námbyĩ́. Nə dɔ̃̀ tənà y gɔ w ǹdə́ cèmé né byǎ bɛ́ bədũ̀kwələ né y'à yə̀ cɔ mɔ́. Vɔ nánlyɔ̀ yə̀ cǒ yó mɛ̃, gɔ myɛ yə̀ dàl cɛsɛ́ wẽ́ Ezhibti tənà y púlə́púlə́ w yé. ¹⁶ Faraɔ̃ já n ká n yə̀ làlà n byẽ̀ Muyiisi ǹdə́ Aarɔ̃ n wɔ̀ bɛ: «À dó Cinu, á Yi rí e súlí ámyɛ̌ cìcì mú. ¹⁷ À n'â lwə̀l mó bə̀ ǹ kə́ pɛ̃ sǔbri à dóó w yil èlǎsɛ̃́. Zə-na Cinu á Yi rí cã̌ nɛ, mùnì ga n ce cu mɔ̀bɔ́ twẽ̌ à nyí ni mə vò kwã nɛ́.» ¹⁸ Muyiisi shə́r Faraɔ̃ sõ, n zə Cinu cã̌ nɛ. ¹⁹ Cinu ce zho w jǐrh zho nánfɔ̀lɔ̀ ò shí yi-zùr sõ o zə səsɔ̀mɛ̀ nɛ́ o m'o zǎ vwal-gɔ nə̀-fɔ̀lɔ̀ w səta. Səsɔ̃̀ òdù ga myɛ yə̀ dàl Ezhibti tənà y w yé. ²⁰ Sə Cinu kùl Faraɔ̃ wu wə́, Faraɔ̃ yə̀ Esərayɛl lyì byǎ bɛ́ nɛ yẽ̌ bə shə́r yé. ²¹ Cinu kə́ n wɔ̀ Muyiisi ni: «Zhẽ̌ ǹ jɛ̃̀ ń ce dɛ̃̌-yi wə. Sə cə-byín námbyín fúrí, lò wɔ̌ ń dwə̀rh ǹdə́ ń jɛ̃̀ mɔ́, pú Ezhibti tənà yá!» ²² Muyiisi zhẽ̌ ń jɛ̃̀ y n ce dɛ̃̌-yi wə, sə cə-byín námbyín fúrí j'a pú Ezhibiti tənà y gakó, dwã nə̀tɔ̀. ²³ Dwã nə̀tɔ̀ y wẽ́, Ezhibti lyì bí mə̀dù ga yə̀ ŋwɛ̀nɛ́ n nə ń da-byǐ ǹdə́ ń yírh yé, bə̀ mə̀dù ga myɛ yə̀ ń jàà kùr ré yó zɛ̃̀ yé. E jà pwẽ̀ y'à ŋwɛ́nɛ́ Esərayɛl lyì byǎ bɛ́ gakó sõ, bə̀ gə́ y'à wɔ mə̀gã̌ gakó. ²⁴ Faraɔ̃ byẽ̀ Muyiisi n wɔ̀ mɔ: «Zhəl-nə á vò á cèrhé Cinu. Á və̌-ywàálɛ́ ǹd'á vwàmá nánfwààlɛ́ dúdú nə̀ mə̌ sə nə mɛ̃. Sə á bə̀sɔ́ná bɛ́ wɔ̌ bə̀ tó ába bə̀ zhə̀lə̀.» ²⁵ Muyiisi lyár Faraɔ̃ n wɔ̀: «È nə wɔ́ ǹmyɛ́ ǹ m'ǎ pə nə́ba vwàmá nɛ́ nyɛ̀bɛ́ nə́ la m'é zwə́l yə̀-zùlə́ vwə̃̀ né ǹdə́ vwə̃̀ námpúmə́ cɛ̃́ɛ̃́ nɛ́ nə́ pə Cinu nə́ Yi rí ni? ²⁶ Nə́ vwàmá nɛ́ m'a tó nə́ba, nə́ vwǎm mə̀dù ga myɛ t'â la mãɔ̃ yé. Bə̀ wɔ́ nə̀myɛ́ wẽ́ nə́ la nɛ́ vǔr nə́ m'é cèrhé Cinu nə́ Yi rí. Nə́ gə yə̀ gàà yí, nə́myɛ cìcì mú wàr nə́ m'ǎ lwar kɔn rɛ́ tɛ̀bɛ́ nə́ mə̌ sə nə́ pə Cinu ni mú pár yé.» ²⁷ Sə Cinu kùl Faraɔ̃ wu wə́, Faraɔ̃ yà ń tá ń yǎl n yẽ̌ Esərayɛl lyì byǎ bɛ́ nɛ bə shə́r yé. ²⁸ Faraɔ̃ wɔ̀ Muyiisi ni: «Jé tɛ̃́ nyɔ̀nɔ̀! À k'â t'â yǎl a nə mɔ́ à yé né yé. Dɛ̃ rɛ́ tɛ̀bɛ́ ǹ m'ǎ k'á bə̀ à yé né mó m'a yə̀ ǹ cu dɛ̃!» ²⁹ Muyiisi lyár Faraɔ̃ n wɔ̀: «Ǹdə ǹ gə́ wə̀l né! À k'â t'â bàn ǹ yé né kə́dò yé!»