¹ Sə Cinu wə̀l Muyiisi ni: «Nyǐ à n'â ce ǹ wɔ́ yi Faraɔ̃ yilə, sə ǹ da-byǐ Aarɔ̃ mà n yə̀ ǹ nyì-zwennə. ² Ǹ m'ǎ byili ǹ da-byǐ Aarɔ̃ nɛ kɔn rɛ́ tɛ̀bɛ́ gakó à la mɔ́ rə̀ nyí pɔ mɔ́. Aarɔ̃ mà n zɛ̃̀ n kwè re n cĩ́ Faraɔ̃ nɛ mùnì ga n yẽ̌ Esərayɛl lyì byǎ bɛ́ nɛ bə shə́r ń tənà y wa; ³ 3sə àmyɛ́ m'a kù Faraɔ̃ wu wə́, a m'a ce à myaarhɛ́ ǹdə́ à tũ̀-fwààlɛ́ yó w súlí Ezhibti tənà y wa, ⁴ sə ǹdə́ rə̀myɛ́ ga Faraɔ̃ tá ń la ába cilu yé. À m'a byili à jɛ̃̀ y jàn rɛ́ Ezhibti lyì bí ni, sə à m'a bùr bùrsi nánfɔ̀lɔ̀ a m'a ce à shə̀dɛ́ɛ́sɛ́, à dwí Esərayɛl lyì byǎ bɛ́ shə́r Ezhibti tənà y wa. ⁵ À gə tú à zhẽ̌ à jɛ̃̀ Ezhibti lyì bí yó w a m'a pə bɛ còrhò-tum a súlí a ce Esərayɛl lyì byǎ bɛ́ shə́r bə̀ sõ kwã nɛ́, Ezhibti lyì bí m'a lwar b'àmyɛ́ wɔ́ Cinu.» ⁶ Muyiisi ǹdə́ Aarɔ̃ j'a wɛ̀rhɛ́ kɔn rɛ́ tɛ̀bɛ́ Cinu yà ń pɔ bɛ rə̀ nyí mú cìcì. ⁷ Muyiisi yà ń zhe byinə shə́-lyɛlɛ, Aarɔ̃ zɛ̃̀ ń yà ń zhe byinə shə́-lyɛlɛ ǹdə́ nə̀tɔ̀, bə̀ gə́ zhə̀l bə vò bə zɔ̀m ǹdə́ Faraɔ̃ yi ní mú. ⁸ Cinu wɔ̀ Muyiisi ǹdə́ Aarɔ̃ nɛ: ⁹ «Faraɔ̃ gə wə̀l ába: Wɛ̀rhɛ́-na màmyɔ, sə́ wɔ̀ Aarɔ̃ nɛ: Kwě ǹ də̀-dɔ̀lɔ̀ w ń dul tɛ̃́ Faraɔ̃ yé né, ò m'a jǐrh dɔm nánjǝ́gɔ́rɔ́!» ¹⁰ Muyiisi ǹdə́ Aarɔ̃ zɛ̃̀ bə bə̀ Faraɔ̃ sõ bə wɛ̀rhɛ́ ǹdə Cinu gə́ yà ń pɔ bɛ nyí ní. Aarɔ̃ dul ń də̀-dɔ̀lɔ̀ w tɛ̃́ Faraɔ̃ ǹdə́ ń tùntùnnə bé yé né, də̀-dɔ̀lɔ̀ w jǐrh dɔm nánjǝ́gɔ́rɔ́. ¹¹ Sə Faraɔ̃ myɛ ce bə byẽ̀ lárma cìnə́ bé ǹdə́ lyì bí byɛ̀bɛ́ bə̀ y'à n'ê twĩ̀ jə̀jǐrh-ywẽ̀ tumə né Ezhibti ní mú; sə bə̀myɛ zə bə̀ wẽ̀ ré ŋwɔ̀nɔ́ w bə wɛ̀rhɛ́ tɛ̀bɛ́ Muyiisi ǹdə́ Aarɔ̃ y'à wɛ̀rhɛ́ mɔ́ cìcì: ¹² Bə̀ mə̀dù gakó dul ń də̀-dɔ̀lɔ̀ w tɛ̃́ sə ò jǐrh dɔm nánjǝ́gɔ́rɔ́. Sə Aarɔ̃ də̀-dɔ̀lɔ̀ w lyìl bə̀ nyǎn rɛ́. ¹³ Ǹdə́ rə̀myɛ́ ga, Faraɔ̃ cẽ n kù ń wu wə́; ń yə̀ Muyiisi ǹdə́ Aarɔ̃ cili yé, ǹdə Cinu gə́ yà ń dámǎ n wɔ̀ nɛ́. ¹⁴ Cinu wɔ̀ Muyiisi ni: «Faraɔ̃ nə́ ń twĩ̀ yó-kùlù, ń cẽ ń tá ń la dwí rí ni yõ̌ rə shə́r yé. ¹⁵ Nəkɔl nəkɔkɔ́lɛ́ yá, Faraɔ̃ gə tú ń du ń la nɛ̃̌ mɔ́ nyí ni sə́ vò ń sõ. Dɛ̃̌ mɔ Niili y nyí ni. Ǹ m'ǎ kwè də̀-dɔ̀lɔ̀ w ò y'à jǐrh dɔm mɔ́ ń zə ǹ jɔ̃̀ wa. ¹⁶ Ǹ m'ǎ wɔ̀ Faraɔ̃ nɛ: Cinu, Ebərəbá Yi rí y'à twĩ̀ ni a b'a wɔ̀ mɔ́: Yẽ̌ à dwí rí ni rə du mùnì ga rə vò rə cèrhé ne gɔ-elũ èpòlò w wə, sə kɔn m'e yí zà, ǹ yə̀ cili yé. ¹⁷ Rə̀myɛ́ ce, nyǐ Cinu nyí rí: Àmyɛ́ m'a zə də̀-dɔ̀lɔ̀ w à jɔ̃̀ w mɔ́ a m'a mà Niili y nàná bɛ́ sə bə̀ m'a jǐrh jal. Ǹ m'ǎ zɛ̃̀ ń lwar b'à wɔ́ Cinu. ¹⁸ Emwěsé Niili y w mú m'a cì, Niili y m'a sú ǹdə́ lwẽ́ námmədɔ̀rhɔ̀ sə Ezhibti lyì bí k'ê t'â la ŋwɔ̀nɔ́ bə nyɔ̀ è nàná bɛ́ yé.» ¹⁹ Cinu wɔ̀ Muyiisi ni: «Pə nyí Aarɔ̃ nɛ ń wɔ̀: Kwě ǹ də̀-dɔ̀lɔ̀ wá, sə́ zhẽ̌ ǹ jɛ̃̀ y Ezhibti nàná bɛ́ yó wə, è bwǐsí ǹdə́ è nɛ̃̌-gwáárɛ́ ǹdə́ è pwə́ə́lé yó wə, e súlí nɛ̃̌ gə wɔ mə̀gã̌ gakó, sə rə̀ nɛ̃̌ mɔ́ jǐrh jal! Bə̀ Ezhibti tənà y púlə́púlə́ sú ǹdə́ jal, dɔ̌-nə̀zhẽ̌ né ǹdə́ nə́kulu nə̀zhẽ̌ né ga!» ²⁰ Muyiisi ǹdə́ Aarɔ̃ wɛ̀rhɛ́ kɔn rɛ́ tɛ̀bɛ́ Cinu yà ń pɔ bɛ rə̀ nyí mú. Aarɔ̃ zhẽ̌ ń də̀-dɔ̀lɔ̀ w dɛ̃̌ n mà Niili y nàná bɛ́ Faraɔ̃ ǹdə́ ń tùntùnnə bé yírh wə. Niili y nàná bɛ́ gakó j'a jǐrh jal. ²¹ Emwěsé Niili y w mú j'a cì, Niili y j'a sú ǹdə́ lwẽ́ námmədɔ̀rhɔ̀, Ezhibti lyi bí k'ê yə̀ ŋwɛ̀nɛ́ bə nyɔ̀ è nàná bɛ́ yé. Ezhibti tənà y gakó y'à j'a sú ǹdə́ jal. ²² Sə Ezhibti lyì bí byɛ̀bɛ́ bə̀ y'à n'ê twĩ̀ jə̀jǐrh-ywẽ̀ tumə né Ezhibti ní mú myɛ zə bə̀ wẽ̀ ré ŋwɔ̀nɔ́ w bə̀myɛ wɛ̀rhɛ́ rə̀myɛ́ mɔ́ myɛ cìcì. Faraɔ̃ cẽ n kù ń wu wə́, ń yə̀ Muyiisi ǹdə́ Aarɔ̃ cili yé, ǹdə Cinu gə́ yà ń dámǎ n wɔ̀ nɛ́. ²³ Faraɔ̃ ká n kwɛ̃̀ n zù ń sõ kɛ̀lɛ́ wa, ń yə̀ re kwè ǹdə yò ta yé. ²⁴ Ezhibti lyì bí gakó kù gwáárɛ bə twèlé Niili y vɔ̀mɛ̀ nɛ́ nɛ bə m'e pyà nə̀-nyɔ̀mà, bə̀ bə̀ y'à k'ê wàr Niili y nàná bɛ́ bə̀ nywɛ̀ yé. ²⁵ Kɔn wɛ̀rhɛ́ dwã nyàlpyɛ̀, Cinu gə́ ce Niili y nàná bɛ́ jǐrh jal mɔ́ kwã nɛ́.