¹ Cinu lyár Muyiisi n wɔ̀: «Èlǎsɛ̃́, ǹ m'ǎ nə kɔn rɛ́ tɛ̀bɛ́ à la Faraɔ̃ nɛ wɔ̀rhɔ́ mɔ́:À jɛ̃̀ y jàn rɛ́ m'a nyɛ́ɛ́ mɔ n yẽ̌ be bə shə́r,À jɛ̃̀ y jàn rɛ́ m'a nyɛ́ɛ́ mɔ ń cìcì mú jì bi bə shə́r ń tənà y wa!»Yi k'e byili Muyiisi ni bə̀ wɔ́ rə̀myɛ́ rə̀ n'ê twĩ̀ mu ² Yi wə̀l Muyiisi ni: Àmyɛ́ wɔ́ Cinu. ³ À lyí Abəraam ǹdə́ Yəzakɛ ǹdə́ Zhakɔɔbɛ a byili bi b'à wɔ́ Yi rí tɛ̀bɛ́ rə̀ wɔ́ Jàn cə́bal, sə à yə̀ ce bə lwar b'à súlí à yíl «Cinu» yé. ⁴ Rə̀myɛ́ kwã nɛ́, à zɔ dɔbrɛ ǹdə́ bɛ, a bwəl nyí b'à m'a pə bɛ Kanaã, tənà y bə̀ zhə̀l bə̀ jě è wẽ́ mó, bə̀ gə́ wɔ́ zhələ mə̀gã̌ mɔ́. ⁵ Èlǎsɛ̃́, à nyɛ̀ɛ̀ Esərayɛl lyì byǎ bɛ́, Ezhibti lyì bí n'ê nyɛ́ɛ́ bɛ bə̀ ce bə̀ twĩ̀ mú wɔ́wɔ́lɔ́ mɔ́, sə à lyǐrh à dɔbrɛ́ à zɔ ǹdə́ bɛ mɔ́ yò ⁶ Rə̀myɛ́ ce, wál Esərayɛl lyì byǎ bɛ́ nɛ: Àmyɛ́ wɔ́ Cinu.À m'a vùr ába Ezhibti lyì bí tũ̀-kùlə̀ né wə, À m'a zwẽ ába bə̀ yómdé wə,À m'a zə à jàn rɛ́ nánfɔ̀lɔ̀ w a súlí a bùr bursi nánfɔ̀lɔ̀ a m'a vwǎrh ába, ⁷ À m'a ce á jǐrh dwí tɛ̀bɛ́ rə̀ wɔ́ àmyɛ́ dwí, sə àmyɛ m'a yə̀ Yi á yilə.Á m'ǎ lwar b'àmyɛ́ wɔ́ Cinu,À wɔ́ á Yi rí: Yi rí tɛ̀bɛ́ rə̀ n'ê vùr ába Ezhibti lyì bí tũ̀-kùlə̀ né w mó. ⁸ À m'a ce á zù tənà y à zhẽ̌ à jɛ̃̀ dɛ̃̌ a m'a bwəl è nyí Abəraam ǹdə́ Yəzakɛe súlí Zhakɔɔbɛ nɛ mɔ́ wẽ́.À m'a pə y ába á cìní.Àmyɛ́ wɔ́ Cinu. ⁹ Muyiisi cĩ́ zɔ̀mà nɛ́ nə̀myɛ́ mɔ́ Esərayɛl lyì byǎ bɛ́ nɛ, sə bə̀ yómdé tũ̀-kùlə̀ né zwini rí gə́ y'à ce bə̀ wun y'à n'ê gɛ mɔ́ ce bə̀ yə̀ mo cili yé. ¹⁰ Cinu kə́ n wɔ̀ Muyiisi ni: ¹¹ «Zhəl ń wɔ̀ Ezhibti pyɔ̌ Faraɔ̃ nɛ, bə̀ ń yẽ̌ Esərayɛl lyì byǎ bɛ́ nɛ bə shə́r ń tənà y wa!» ¹² Sə Muyiisi lyár Cinu n wɔ̀: «Esərayɛl lyì byǎ bɛ́ cìcì mú yə̀ à zɔ̀mà nɛ́ cili yé, etər Faraɔ̃ mà n tó né n mə n cili ni ní, àmyɛ́ mɔ̀bɔ́ à nyí rí wàr zɔ̀mà mɔ́?» ¹³ Rə̀myɛ́ yó, Cinu zɔ̀m ǹdə́ Muyiisi ǹdə́ Aarɔ̃, n súlí n twĩ̀ bi Esərayɛl lyì byǎ bɛ́ ǹdə́ Ezhibti pyɔ̌ Faraɔ̃ sõ ǹdə́ ń nyə́ né, mùnì ga bə ce Esərayɛl lyì byǎ bɛ́ shə́r Ezhibti tənà y wa. ¹⁴ Nyǐ bə̀ nàmbala bɛ́ dwə́ né yó-cìnə́ bé: Esərayɛl byì-cɛ Orɔbɛn byǎ bɛ́ yàl Anɔɔkɛ ǹdə́ Pəlu ǹdə́ Esərɔ̃ e súlí Kərəmyi. Wɔ́ bə̀myɛ́ bə̀ yàl Orɔbɛn jìsí yó-cìnə́ bé. ¹⁵ Shəmənyɔ̃ byǎ bɛ́ yàl Yəmuwɛl ǹdə́ Yamɛ̃ ǹdə́ Owaadɛ ǹdə́ Yakɛ̃ ǹdə́ Sɔwaarɛ e súlí Kanaã lyì kɛ̃ mɔ́ byǐ Shəwul. Wɔ́ bə̀myɛ́ bə̀ yàl Shəmənyɔ̃ jìsí yó-cìnə́. ¹⁶ Nyǐ Levyi byǎ bɛ́ yilə né kɔn tó dwã ǹdə́ bə̀ nàmbala bɛ́ Gɛrəshɔn ǹdə́ Kəyaatɛ e súlí Mərəri. Levyi wɛ̀rhɛ́ byinə zɔ̌m ǹdə́ shə́-ètɔ̀ ǹdə́ nyàlpyɛ̀ cɛ yó. ¹⁷ Gɛrəshɔn byǎ bɛ́ yàl Lyəbənyi ǹdə́ Shəməyi, kɔn tó dwã ǹdə́ bə̀ jìsí. ¹⁸ Kəyaatɛ byǎ bɛ́ yàl Aməram ǹdə́ Yəsaarɛ ǹdə́ Ebərɔ̃ e súlí Uzhəə. Kəyaatɛ wɛ̀rhɛ́ byinə zɔ̌m ǹdə́ shə́-ètɔ̀ ǹdə́ nə̀tɔ̀ cɛ yó. ¹⁹ Mərəri byǎ bɛ́ yàl Məli ǹdə́ Mushi. Wɔ́ bə̀myɛ́ bə̀ yàl Levyi jìsí kɔn tó dwã ǹdə́ bə̀ nɛ̀mɛ́ nɛ́. ²⁰ Aməram jí ń nə̀-kɛ̃ Yɔkəbɛɛdɛ; Yɔkəbɛɛdɛ lù Aarɔ̃ ǹdə́ Muyiisi n pɔ̃. Aməram wɛ̀rhɛ́ byinə zɔ̌m ǹdə́ shə́-ètɔ̀ ǹdə́ nyàlpyɛ̀ cɛ yó. ²¹ Yəsaarɛ byǎ bɛ́ yàl Kore ǹdə́ Nəfɛɛgɛ e súlí Zəkəri. ²² Uzhəə byǎ bɛ́ yàl Myəkəyəə ǹdə́ Eləsafã e súlí Sitəri. ²³ Aarɔ̃ jí Amyənadaabɛ bə̀kɔ́ Elǝshəba, Naashɔ̃ nəkɔ́ mɔ́; n zə mɔ n lù Nadaabɛ ǹdə́ Abyəwu ǹdə́ Eləyazaarɛ e súlí Yətamaarɛ. ²⁴ Kore byǎ bɛ́ yàl Asiiri ǹdə́ Eləkana e súlí Abyasaafɛ. Wɔ́ bə̀myɛ́ bə̀ yàl Kore byǎ bɛ́ jìsí. ²⁵ Aarɔ̃ byǐ Eləyazaarɛ yà ń jú Pɔcɛl bə̀kɔ́; Pɔcɛl lù Pyənaasɛ n pɔ̃. Wɔ́ bə̀myɛ́ bə̀ yàl Levyi kwálá y dwə́ né yó-cìnə́ bé kɔn tó dwã ǹdə́ bə̀ jìsí. ²⁶ Wɔ́ Aarɔ̃ ǹdə́ Muyiisi ni Cinu yà ń pɔ nyí n wɔ̀: «Ce-nə Esərayɛl lyì byǎ bɛ́ pú dwã nɛ kùkùl kùkùl ǹdə shə̀dɛ́ɛ́sɛ ta, bə shə́r Ezhibti tənà y wa»; ²⁷ Wɔ́ bə̀myɛ́ bə̀ zɔ̀m ǹdə́ Ezhibti pyɔ̌ Faraɔ̃, bə m'e ce Esərayɛl lyì byǎ bɛ́ shə́r Ezhibti ní mú. Wɔ́ Muyiisi ǹdə́ Aarɔ̃. ²⁸ Dɛ̃ rɛ́ tɛ̀bɛ́ Cinu zɔ̀m ǹdə́ Muyiisi Ezhibti ní mú, ²⁹ ń wə̀l Muyiisi ni dɛ̃ rɛ́ rə̀myɛ́ mɔ́ yù wə: «Àmyɛ́ wɔ́ Cinu, zhəl ń cĩ́ Ezhibti pyɔ̌ Faraɔ̃ nɛ kɔn rɛ́ tɛ̀bɛ́ gakó à byili mú mú», ³⁰ Muyiisi zhì Cinu yé né n lyár mɔ n wɔ̀: «Nyǐ à nyí wàr zɔ̀mà nɛ́ yé. Etər Faraɔ̃ mà n tó né n cili ni ní?»