1 Muyiisi byẽ̀ Esərayɛl lyì byǎ bɛ́ gakó n cĩ́ dwã yó n zɛ̃̀ n wɔ̀ bɛ: «Nyǐ Cinu nyə́ né ń pɔ mùnì ga bə tó ne mó: 2 Lò gakó mà n twĩ̀ ń tumə né dwã nyə̀ldù, sə dwã nyàlpyɛ̀ dɛ̃ rɛ́ m'a yə̀ dɛ̃ tɛ̀bɛ́ rə̀ wɔ́ Yi dɛ̃ á yilə, shìrhə́ dɛ̃ rɛ́, Cinu shìrhə́ dɛ̃ rɛ́. Bə̀ m'a gu lò mɔ̀bɔ́ gakó ń twĩ̀ tum dɛ̃ rɛ́ rə̀myɛ́ mɔ́ yù wə. 3 Á t'á la myǐn myɛ cìcì jóó á gə wɔ mə̀gã̌, shìrhə́ y dɛ̃ rɛ́ yù w yé.» 4 Muyiisi súlí n wɔ̀ Esərayɛl lyì byǎ bɛ́ púlə́púlə́ ne: «Nyǐ Cinu nyí rí ń pɔ mɔ́: 5 Lə-na á jɛ̃̀-kɔn á pə Cinu ni; pùbùlə̀ cə́bal gakó mà n zə ń jɛ̃̀-kɔn rɛ́ n bə̀ n pə Cinu ni: sánə́má ǹdə́ sə̀byì-kùlì ǹdə́ kàmmɔ 6 6ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ kɛ̀bɛ́ è càn ǹdə́ bɔ̃̀ kur 7 ǹdə́ pyì-byərh tàndɛ rə̀ mɔ́rh nánshɛ̀n ǹdə́ dɔfɛ̃́ɛ̃́sɛ tàndɛ ǹdə́ ákáshá dǎr 8 ǹdə́ nwə̃̌ pàntámsɛ́ yilə, ǹdə́ wẽ̀ rə̀ lwẽ́ nã́nyə̀nyɛ̀lɛ́ ǹdə́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ e súlí wẽ̀ ré tɛ̀bɛ́ rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú 9 ǹdə́ nə́kul-shɛ̀mà dwí rə̀dù e súlí nə̀ dwã náàcɛ̀nà, vwĩ̀-zwə́lnə náncɛ y kàmə̀zwǐ y ǹdə́ ń nə̀bán yó kàmə̀jɛ̃̀ y bɔ́bwár yilə. 10 1Tùntùnnə byɛ̀bɛ́ gakó bə̀ yě tum rí yé shò á cəcəl w mó m'a nə dwã bə twĩ̀ tum rí tɛ̀bɛ́ gakó Cinu pɔ nyí bə̀ bə twĩ̌ mú: 11 Yi kòrhó w ǹd'ô yə́-pɛ̀lɛ́ kàmə̀jɛ̃̀ y e súlí ò yə́-pɛ̀lɛ́ kàmə̀jɛ̃̀ y dõ mó ǹd'ô pyə́lsɛ́ ǹd'ô dǎr rɛ́ bə̀ m'e kwɛ̃́ w mɔ́ ǹd'ô də̀-jaarhɛ́ ǹd'ô yə né e súlí ò wẽ̀ ré tɛ̀bɛ́ yə né kùrə̀ né n'ê cĩ́ rə̀ yó mó; 12 ǹdə́ kùlkṍ w ǹd'ô də̀-byǎ bɛ́ ǹd'ô nyí-byǐ rí ǹd'ô gɔ̀nɔ̀ w ò n'ô bɔ̀n Yi jì y dwã w mɔ́; 13 ǹdə́ tabəlɛ́ y ǹd'ê də̀-byǎ bɛ́ ǹd'ê wẽ̀ ré dwã bɛ́ gakó e súlí búrú w bə̀ n'ê pɛ Yi ni mú; 14 ǹdə́ ku w bə̀ n'ê cĩ́ pàntámsɛ́ ò yó mó ǹd'ô wẽ̀ ré dwã bɛ́ ǹd'ô pàntámsɛ́ e súlí pàntámsɛ́ nwə̃̌ yə́; 15 15 ǹdə́ vwĩ̀-jùlú w bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ ò yó mó ǹd'ô də̀-byǎ bɛ́ ǹdə́ nwə̃̌ y bə̀ m'ê pɛ Yi tum rí tũ̌ ŋwɔ̀nɔ́ w mɔ́, ǹdə́ wẽ̀ ré rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú ǹdə́ étwí-ènyí gɔ̀nɔ̀ w Yi kòrhó w étwí-ènyí rí yil mú; 16 ǹdə́ vwə̃̀ námpúmə́ cɛ̃́ɛ̃́ nɛ́ vwĩ̀-jùlú w ǹd'ô kàmmɔ ku ǹd'ô bɔ̀là ǹdə zhəzhərhá ta ǹd'ô də̀-byǎ bɛ́ e súlí ǹd'ô wẽ̀ ré gakó ǹdə́ zhǎ y ǹdə́ ku w kɔ̀bɔ́ zhǎ kùr ré y'à cĩ́ ò yó mó; 17 ǹdə́ Yi kòrhó w kɔ̀nɔ́ w kàmə̀jɛ̀sɛ́ ǹd'ô yə né ǹdə́ wẽ̀ ré tɛ̀bɛ́ nə̀ kùrə̀ né n'ê cĩ́ nə̀ yó mó e súlí kɔ̀nɔ́ w nyí rí gɔ̀nɔ̀ wá; 18 ǹdə́ Yi kòrhó w pálá nɛ́ ǹdə́ kɔ̀nɔ́ w pálá nɛ́ e súlí nə̀ nyínsí; 19 ǹdə́ vwĩ̀-zwə́lnə gàndɛ́ bə̀ n'ê zwì bə̀ m'ê twĩ̀ tum rí còrhó-jì y wẽ́ mó ǹdə́ vwĩ̀-zwə́lnə náncɛ y gàndɛ́ Aarɔ̃ yil mú, e súlí gàndɛ́ tɛ̀bɛ́ ń byǎ bɛ́ la zu bə m'e twĩ̀ vwĩ̀ rí zwə́l tum rí mú.» 20 Rə̀myɛ́ kwã nɛ́, Esərayɛl lyì byǎ bɛ́ gakó j'a làà dwã nɛ bə yẽ̌ Muyiisi ni. 21 Rə̀myɛ́ yó, pùbùlə̀ cìnə́ bé ǹdə́ lò mɔ̀bɔ́ gakó ń yà ń zhe yə̀wǎl pɛnɛ́ pɔ yilə, zə ń jɛ̃̀-kɔn rɛ́ n bə̀ n pə Cinu ni, dwã-joló kòrhó w lú mú ǹd'ô tumə né e súlí vwĩ̀-zwə́lnə gàndɛ́ yilə. 22 Bala ǹdə́ kana ga túwə́. Pùbùlə̀ cə́bal gakó zə sánə́má wẽ̀ n mə n bà: bɔ́bwár ráá bwẽ́ wẽ̀, bɔ́bwár cìbyǔr ǹdə́ jə̀fɔ́lá cìbyǐr n pə Cinu ni ǹdə bə̀ gə́ y'à mə̌ sə bə wɛ̀rhɛ́ nɛ́ bə m'e pə sánə́má mɔ́ nɛ́. 23 Lò mɔ̀bɔ́ gakó ń yà ń zhe pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ kɛ̀bɛ́ è càn ǹdə́ bɔ̃̀ kur ǹdə́ pyì-byərh tàndɛ rə̀ mɔ́rh nánshɛ̀n ráá dɔfɛ̃́ɛ̃́sɛ tàndɛ ń sõ zə rɛ n mə n bà. 24 Lò mɔ̀bɔ́ gakó ń yà ń cĩ́ sə̀byì-kùlì ráá kàmmɔ kwã nɛ́ Cinu yilə, zə rɛ n bə̀ n pə Cinu ni. Lò mɔ̀bɔ́ gakó ń yà ń zhe ákáshá dǎr, zə rɛ n bə̀ n pə tumə né gakó tũ̌ yilə. 25 Kana bɛ́ byɛ̀bɛ́ gakó bə̀ y'à yě pyì-kur sɔ̃́ cɛ̀nɛ̀ cɛ̀nɛ̀ mɔ́ sɔ̃̀ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə m'e bà. 26 Kana dwã bə̀myɛ́ y'à yě tum rí yé shò e jà bə̀ y'à só bə̀ tum rí myɛ, myɛ sɔ̃̀ bɔ̃̀-kur bə m'e bà. 27 Dwí rí yó-cìnə́ bé zə nə́kul-shɛ̀mà dwí rə̀dù ǹdə́ nə̀ dwã náàcɛ̀nà, vwĩ̀-zwə́lnə náncɛ y kàmə̀zwǐ y ǹdə́ nə̀bán yó kàmə̀jɛ̃̀ y bɔ́bwár yilə; 28 e súlí wẽ̀ rə̀ lwẽ́ nã́nyə̀nyɛ̀lɛ́ ǹdə́ nwə̃̌ pàntámsɛ́ yilə, ǹdə́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́ ǹdə́ wẽ̀ ré rə̀ lwẽ́ nã́nyə̀nyɛ̀lɛ́ bə̀ n'ê ji myǐn mú. 29 Esərayɛl lyì byǎ bɛ́ gakó, bala ǹdə́ kana ga, byɛ̀bɛ́ bə̀ wun y'à búl nə̀ nyɛ̀ bə̀ n'ê yǎl bə pə kɔn tum rí tɛ̀bɛ́ Cinu tó Muyiisi dɛnnɛ n pə rə̀ nyí mú yil mú, zə rɛ bə b'e pə Cinu ni ǹdə́ bə̀ wun gakó. 30 Muyiiisi wɔ̀ Esərayɛl lyì byǎ bɛ́ nɛ: «nyì wé! Cinu cír Uri byǐ Bəsalɛl, Uuri nɔ̃̌ wa, Zhəda kwálá y lò. 31 Ń ce n sú ǹdə́ Yi Eshirhə y mùnì n zə lárma ǹdə́ surhə ǹdə́ lwar e súlí tumə dwí gakó tũ̌ ŋwɔ̀nɔ́: 32 Ń wɔ̌ ń tɛ́rɛ́ n wɛ̀rhɛ́ wẽ̀ rə̀ càn dɛ̃́dɛ̃́, n zùrhì sánə́má ǹdə́ sə̀byì-kùlì e súlí kàmmɔ wẽ̀, 33 ń wɔ̌ ń sə̀l nə́kulə náàcɛ̀nà bə̀ m'ê cĩ́ bɔ́bwár wẽ̀, wẽ̀ ré yó, ń wɔ̌ ń sə̀l dǎr n súlí n twĩ̀ tumə dwí gakó. 34 Cinu pɔ tumə né nə̀myɛ́ mɔ́ dwí rí còrhò mó ŋwɔ̀nɔ́ ńmyɛ̌ ǹdə́ Ayəsamaakɛ byǐ Owɔləyaabɛ, Dan kwálá y lò mó ne. 35 Ń ce bə sú ǹdə́ lárma mùnì ga bə ŋwɛ̀nɛ́ bə sə̀ nə́kulə náàcɛ̀nà nɛ́, bə kɛ̃ wẽ̀ ré èsã̌yùúlí, bə ŋwɛ̀nɛ́ bə zò wẽ̀ èsã̌yùúli pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ yó, bə ŋwɛ̀nɛ́ bə sɔ̃̀ sɔ́rá, bə ŋwɛ̀nɛ́ bə twĩ̀ tumə dwí gakó sə bə súlí bə ŋwɛ̀nɛ́ bə tɛ́rɛ́ bə wɛ̀rhɛ́ tumə dwí gakó.