¹ Cinu wɔ̀ Muyiisi ni: «Sə́l nə́kulu bwə̀lse sə̀lyè sə nyɛrhɛ dwã ǹdə nã́yéésé ta; à m'a kɛ̃ zɔ̀mà nɛ́ nyɛ̀bɛ́ cìcì nə̀ y'à kɛ̃ bwə̀lsé nã́yéésé ǹ fwàr tɛ̃́ ń bɔbwɛlɛ mɔ́ yó mó sə̀ yó. ² Tɛnɛ nəkɔl nəkɔkɔ́lɛ́ y yilə; ǹ m'ǎ dámǎ ń jì Sənəyi pyɔ̀ w yó ń bə̀ ń zhì à yé né ò yə́-pɛ̀lɛ́ w gàà mɔ́. ³ Lòlò bə̀ká n tó mó n jì yé; bə̀ bə̀ lò nɛ pyɔ̀ w yó yé; və̌-yɔ̀lɔ́ w ǹdə́ vwàmá nánfwààlɛ́ myɛ t'â la gɔ-dɔ́m pyɔ̀ w nyí ni yé.» ⁴ Muyiisi sə̀ nə́kulu bwə̀lse sə nyɛrhɛ dwã ǹdə nã́yéésé ta, n dùlí n zɛ̃̀ nəkɔkɔ́lɛ́ shãã shãã n jì Sənəyi pyɔ̀ w yó ǹdə́ nə́kulu bwə̀lsé sə̀lyè y ń jɔ̃̀ w ǹdə Cinu gə́ yà ń pɔ mɔ nyí ni. ⁵ Cinu só n bə̀ ébɔ̃ w wẽ́, n bə̀ n zhì ǹdə́ Muyiisi. Muyiisi zɛ̃̀ n byẽ̀ ń yil ré bə̀ «Cinu». ⁶ Rə̀myɛ́ kwã nɛ́, Cinu tó Muyiisi yé né n lyɛ̃ ń mə́ ń bwə̀l ń zhe: «Cinu, Cinu, Yi rí tɛ̀bɛ́ rə̀ wɔ́ nɔ̀nɔ̀-dǔr ǹdə́ sónó cə́bal, à lyim t'â zɛ̃̀ làlà yé, à sú ǹdə́ wu-bɔ̀nɔ̀ ǹdə́ sónó, ⁷ à n'â zhì nà èdù yó ǹdə́ nàmbala kùrə̀ mɔ̀ɔ̀rhɛ̀ nánzhəzhɔ̌, à n'â zhìlì à yala nɛ dwə́ə́ré ǹdə́ yó-kùlù tũ̀twə̃̀ə̃̀ né e súlí yə̀-bəlwàálɛ́ yi ní, e jà à t'â yẽ̌ re rə̀ mɛ̃ nánfò yé. À n'â pɛ còrhò-tum byǎ bɛ́ ǹdə́ nɛ̀mɛ́ nɛ́ nɛ bə̀ dabá dwə́ə́ré yilə, kɔn b'e yí bə̀ nàmbala kùrə̀ nə̀tɔ̀ ráá nə̀na.» ⁸ Muyiisi já n jòm ń nə̀dwə́nə́ yó, n tu n zə ń yé n pú tɛ̃́ n mə n cèrhé Cinu. ⁹ N zɛ̃̀ n wɔ̀: «À gə j'â sú ǹ yírh zhə̀n zhə̀na Cinu, sə Cinu bə̀ n yə̀ nə́ cəcəl w n tó nə́ba nə́ m'é zhə̀lə̀. Dwí rí tɛ̀bɛ́ búl rə̀ wɔ́ yó-kùùlì cìnə́, sə ǹdə́ rə̀myɛ́ ga ǹ m'ǎ pə nə́ba nə́ dóó w ǹdə́ nə́ yə̀-bəlɔ̀lɔ́ w sǔbri, ń súlí ń ce nə́ jǐrh ǹmyɛ́ cəl kɔna.» ¹⁰ Cinu wɔ̀ Muyiisi ni: «À m'a zə dɔbrɛ ǹd'ába. À la tũ̀-fwààlɛ̀ tũ̌ ǹ dwí rí gakó yírh wə, rə̀ dwí rí gwẽ̌ yə̀ wɛ̀rhɛ́ jàà kə̀l kə̀l w cɛ yó ráá dwí rə̀dù ga myɛ sõ yé. Dwí rí tɛ̀bɛ́ gakó rə̀ kə́kɛ́lɛ́ mɔ́ mɔ́ m'a nə bə̀ Cinu tũ̀-fɔ̀lɔ̀ wá, tũ̀-fɔ̀lɔ̀ w kɔ̀bɔ́ à la a tó ǹ dɛnnɛ a wɛ̀rhɛ́ mɔ́ n'ê zɛ̃̀ wu ni. ¹¹ Tó kɔn rɛ́ tɛ̀bɛ́ à la mɔ́ rə̀ nyí pɔ zà mɔ́ náàcɛ̀nɛ́. À m'a jì Amɔrətəbá ǹdə́ Kanaã lyì bí ǹdə́ Yititəbá ǹdə́ Pərəzhitəbá ǹdə́ Yivyitəbá e súlí Zhəbuusi lyì bí ǹ yé né. ¹² Dɛ̃̌ ǹ cìnə̀, ǹ bə̀k'á ce dwã yó ǹdə́ tənà y ǹ la è wẽ́ zú mú lyì bí yé, rə̀myɛ́ wɔ̌ rə̀ yàl pɔ̀mɔ̀ ǹ yilə. ¹³ Á gaga mɔ́ m'ǎ wǔr bə̀ vwĩ̀-jùúlí, á mà bə̀ nə́kulə né bə̀ cìì tɛ̃́ mɔ́ á lo; á m'ǎ súlí á gõ̀ Ashəra pálá nɛ́. ¹⁴ Rə̀myɛ́ mɔ́ yilə: ǹ tá ǹ la tu ń zə ǹ yé ń pú tɛ̃́ yi dõ yé né ń mə́ cèrhé re yé, bə̀ Cinu yil ré wɔ́: ‹Zuni cə́bal› (‹Bwɛ̃̌-dǔr cə́bal›), ń wɔ́ bwɛ̃̌-dǔr Yia. ¹⁵ Ǹ tá ǹ la dɔbrɛ zal ǹdə́ tənà y lyì bí yé: è gə də̀ rə̀myɛ́ bə̀ gə tú bə̀ n'ê cèrhé bə̀ yə né, bə súlí bə̀ n'ê zwə́l vwə̃̀ bə̀ pɛ nɛ yi ní, bə̀ m'a byẽ̀ mó ń tó be ń dɔ̃̀ bə̀ vwə̃̀ né nàmá bɛ́. ¹⁶ Ǹ gə zɔ bə̀ bə̀kwá bɛ́ ń pə ǹ byǎ bɛ́ nɛ bə jí, bə̀ bə̀kwá bɛ́ m'a cèrhé bə̀ yə né, sə bə̀ m'a súlí bə vwɛ̃ ǹ byǎ bɛ́ bə ce bə tó be bə cèrhé bə̀ yə né. ¹⁷ Ǹ tá ǹ la lù zə ń mə́ zùrhì yə èsã̌yùúli yé. ¹⁸ Ǹ m'ǎ jí búúri rə̀ yə̀ sã̀-nə̀byẽ̌ ce mó címsí. Ǹ m'ǎ dɔ̃̀ búúri rə̀ yə̀ sã̀-nə̀byẽ̌ ce dwã nyàlpyɛ̀ Abyiibi cànà y wa, ǹdə à gə́ pɔ mɔ́ nyí ní, bə̀ wɔ́ Abyiibi cànà y w ǹ shə́r Ezhibti ní. ¹⁹ Byì-yə́ə́ ń wɔ́ bal gakó wɔ́ àmyɛ́ à cǐ mu. Èta myɛ ǹ m'ǎ zwə́l ǹ vwàmá nɛ́ byì-yéésé námbyalsɛ́, vwàmá nánfwààlɛ́ ráá və̌-ywàálɛ́ byǎ bɛ́ ń pɛ̃. ²⁰ Sə è gə wɔ́ bə̀na byì-yə́ə́ námbyɛlɛ́, ǹ m'ǎ zə pyì-bwɛ̀lɛ́ ń cĩ́ è jàà wa. Ǹ gə yə̀ pyì-bwɛ̀lɛ́ zə ń cĩ́ è jàà wa, sə́ mà è byã y nɛ ń gu yə. Ǹ m'ǎ cĩ́ kɔn ǹ byì-cɛ y è wɔ́ bal gakó jàà wa. Bə̀ t'â bàn àmyɛ́ yé né ǹdə́ jə̀-fwə̀r yé. ²¹ Ǹ m'ǎ twĩ̀ ǹ tumə né dwã nyə̀ldù, sə dwã nyàlpyɛ̀ dɛ̃ rɛ́, ǹ m'ǎ yẽ̌ nə̀ tũ̌ ni, ń shǐrh. Má è wɔ́ vwál ráá jòrhó yi myɛ, ǹ tá ǹ la tum tũ̌ yé. ²² Ǹ m'ǎ jí səmyɛnsɛ́ címsíb bə̀lɛ́ ywẽ́ nã́yə́ə́ né kwar mɔ́ yi ní ǹdə́ jòrhó w címsí byin rí zhɔ̌ mɔ́ yi ní. ²³ Twər rə̀tɔ̀ byin rí wẽ́, ǹ dwí rí bala bɛ́ gakó m'a bə̀ Yó-cə́bal Cinu, Esərayɛl Yi rí yé né. ²⁴ 2Zhə̀n zhə̀nà, à gə tú à jì dwə́ né ǹ yé né, a zwẽ bə̀ tenesé a pɔ̃́, a ce ǹ tənà y wɛ̀lɛ̀ e súlí kwã, ǹ gə tú ǹ bàn Cinu ǹ Yi rí yé né, twər rə̀tɔ̀ byin byin gakó yi ní, lòlò tá ń la ń bùlə̀ è yó cṹ yé. ²⁵ Ǹ tá ǹ la jal vwĩ̀ zwə́l ń zɛ̃̀ ń súlí búrú ò cò sã̀-nə̀byẽ̌ ń pɛ̃ yé; vwǎm mɔ́ bə̀ gu Pakɛ y címsí yil mú nàmá bɛ́ t'â la dɛ̃̌ cṹ cəcɛ̃ kɔn b'e yí cɛ y lə́ yé. ²⁶ Ǹ m'ǎ zə ǹ cɛ y wẽ̀ ré byǎ nã́yə́ə́ bé ń mə́ bə̀ Cinu ǹ Yi rí jì y wẽ́. Ǹ tá ǹ la bɔ̀-bwɛ̀lɛ́ shɔ̃̀ è ná yil mú w yé.» ²⁷ Cinu kə́ n pə nyí Muyiisi ni n wɔ̀: «Kɛ̃ zɔ̀mà nɛ́ nyɛ̀bɛ́, b'è wɔ́ nə̀myɛ́ à n'â ce yé né à m'â zə dɔbrɛ ǹdə́ ǹmyɛ́ ǹdə́ Esərayɛl lyì byǎ bɛ́.» ²⁸ Muyiisi já n mɛ̃ gàà ǹdə́ Cinu dwã shə́-èna, nə̀nyɛ́nɛ́ ǹdə́ cəcɛ̃ ga. Ń yə̀ kùjú jí, ń yə̀ nɛ̃̌ myɛ nywɛ̀ yé. N kɛ̃ dɔbrɛ nyə́ né shí y nə́kulu bwə̀lsé yó. ²⁹ E jà Muyiisi gə́ shí Sənəyi pyɔ̀ w yó n só tɛ̃́ ǹdə́ dɔbrɛ nyə́ né bwə̀lsé sə̀lyè y ń jɔ̃̀ w yi ní, ń yà ń yə̀l bə̀ ńmyɛ̌ Muyiisi gə́ yà ń zhərh ǹdə́ Cinu mú y'à ce ń yé-zwã̌ y y'à n'ê jə́jɛ̀mɛ́ yé. ³⁰ Aarɔ̃ ǹdə́ Esəryɛl lyì byǎ bɛ́ gakó gə́ púrí Muyiisi yé-zwã̌ y y'à n'ê jə́jɛ̀mɛ́ mɔ́ ce, ywẽ zɔ bɛ́ ǹdə́ ń nyí ni yú. ³¹ Rə̀myɛ́ yi ní Muyiisi byẽ̀ be, Aarɔ̃ ǹdə́ Esərayɛl lyì byǎ bɛ́ yó-cìnə́ bé gakó zɛ̃̀ bə kwɛ̃̀ bə bə̀ ń sõ, Muyiisi zɛ̃̀ n zɔ̀m ǹdə́ bɛ. ³² Rə̀myɛ́ kwã nɛ́, Esərayɛl lyì byǎ bɛ́ zɛ̃̀ bə twẽ̌ bə yí ń nyí ni, n zɛ̃̀ n cĩ́ bi nyə́ né nyɛ̀bɛ́ gakó Cinu yà ń pɔ mɔ Sənəyi pyɔ̀ w yó mó. ³³ Muyiisi gə́ zɔ̀m ǹdə́ bɛ n zhɛ̀ kwã, ń zə kàmə̀jɛ̃̀ n mə n círhí ń yé-zwã̌ yá. ³⁴ Muyiisi gə zhə̀l Cinu yé né ń la zhərh ǹdə́ mɔ yi ní gakó, ń yà ń nə́ ń pàr kàmə̀jɛ̃̀ y ń yé y ne, kɔn m'e yí ń gə tú ń ká ń la pwẽ̀ ne du. Ń gə tú ń du kwã nɛ́, ń nə́ ń cĩ́ nyə́ né nyɛ̀bɛ́ gakó Cinu pɔ mɔ mɔ́ Esərayɛl lyì byǎ bɛ́ nɛ. ³⁵ Esərayɛl lyì byǎ bɛ́ y'à n'ê nyǐ Muyiisi yé-zwã̌ y è y'à n'ê jə́jɛ̀mɛ́ mɔ́. Muyiisi ya n kə́ n vwɛ̃ kàmə̀jɛ̃̀ y n mə n pyìlì ń yé-zwã̌ y kɔn m'e yí ń gə kə́ ń kwɛ̃̀ ń la vò n zhərh ǹdə́ Cinu.