¹ Cinu pɔ nyí Muyiisi ni n wɔ̀: «Zhǐr jàà y kɛ̀bɛ́ wẽ́, ǹmyɛ́ ǹdə́ dwí rí ǹ ce rə shə́r Ezhibti tənà y w mɔ́, ń jì ń vò tənà y à bwəl è nyí Abəraam ǹdə́ Yəzakɛ ǹdə́ Zhakɔɔbɛ nɛ mɔ́ wa, a m'a wɔ̀: ‹Wɔ́ ǹ dwí rí ni à m'a pə ya.› ² À m'a twĩ̀ à màlɛ́ka y e yə̀ ǹ yé né, à m'a jì Kanaã lyì bí ǹdə́ Amɔrətəbá ǹdə́ Yititəbá ǹdə́ Pərəzhitəbá ǹdə́ Yivyitəbá e súlí Zhəbuusi lyì bí. ³ Jíl ń vò tənà y yil ǹdə́ tùr n'ê dùr tɛ̃́ è wẽ́ mó wə. Sə àmyɛ́ cìcì t'â la á cəcəl w yál a m'a tó ába a vò yé, b'ǎ wɔ́ dwí tɛ̀bɛ́ rə̀ wɔ́ yó-kùùlì cìnə́, à m'a gurhi ába sɔ́má yó lyə́m lyə́m.» ⁴ Dwí rí nyɛ̀ɛ̀ Cinu lwɛlɛ nyí rí rə̀myɛ́ mɔ́, wu-zhùlù nánfɔ̀lɔ̀ zə rɛ; lò mə̀dù ga myɛ yə̀ ń címsi kàmə̀zwǐsi zwì yé. ⁵ Cinu wɔ̀ Muyiisi ni: «Wál Esərayɛl lyì byǎ bɛ́ nɛ: Á wɔ́ dwí tɛ̀bɛ́ rə̀ wɔ́ yó-kùùlì cìnə́. À gə yàl á cəcəl w a vò ǹd'ába námpɔ́lɛ́ myɛ cìcì, à wɔ̌ à m'a ce á jé tɛ̃́. Vǔr-nə á címsi kàmə̀zwǐsí á cĩ́ tɛ̃́, à m'a zɛ̃̀ a lwar kɔn rɛ́ tɛ̀bɛ́ à mə̌ s'a wɛ̀rhɛ́ ába mɔ́.» ⁶ Esərayɛl lyì byǎ bɛ́ gə́ zhǐr Orɛɛbɛ pyɔ̀ w nyí ni kwã nɛ, bə̀ k'ê yə̀ bə̀ címsi kàmə̀zwǐsí zwì yé. ⁷ Esərayɛl lyì byǎ bɛ́ gə́ y'à tú bə cĩ́ bə̀ zulə́ jàà y yi ní, Muyiisi ya n pwà kòrhó w wẽ̀ ré n mə n du zulə́ jàà y w n twẽ̌ è nyí ni n vò pyépyé n pú w gàà, ń yà ń nə́ ń byẽ̀ w bə̀ «Dwã-joló kòrhó» Rə̀myɛ́ yi ní, lò mɔ̀bɔ́ ń yà ń nə́ ń yǎl n pyà n sú Cinu wu yà ń nə́ ń shə́r zulə́ jàà y w ń zhə̀l dwã-joló w kòrhó w səta. ⁸ Sə Muyiisi gə tú ń du ń la kòrhó w səta, dwí rí púlə́púlə́ y'a zɛ̃̀ rə̀ zhǐ dɛ̃̌, lò gakó ń kòrhó w nyí rí ni, ń nə́ ń nyǐ Muyiisi kɔn b'e yí n vò n zù kòrhó w wə. ⁹ Muyiisi gə tú ń zù kòrhó w w yi ní, ébɔ̃ w y'à n'ô swé tɛ̃́ ò zhì ò nyí rí ni, Cinu yà n zɛ̃̀ n zhì ébɔ̃ w w ń nə́ ń zɔ̀m ǹdə́ mɔ. ¹⁰ Dwí rí púlə́púlə́ y'a nə ébɔ̃ w kòrhó w nyí rí ni. Rə y'a zɛ̃̀ rə zhì dɛ̃̌ rə̀myɛ́ yi ní, lò gakó zhì ń kòrhó w nyí rí ni n tu n zə ń yé y n pú tɛ̃́. ¹¹ Cinu yà ń zhǐ Muyiisi yé y wə, ń mə́ ń zɔ̀m ń ce mo, ǹdə numbyínsi sə̀lyè gə́ y'a zhǐ dwã yé y w sə̀ n'ê zɔ̀m ǹdə́ dwã nɛ́. Rə̀myɛ́ kwã nɛ́, Muyiisi ya n kwɛ̃̀ n bə̀ zulə́ jàà y wa, sə ń sanna, Nuuni byǐ Zhozwe, ń wɔ́ ébɔ́-dǎl mɔ́, yà ń tá ń shə́r kòrhó w w yé. ¹² Muyiisi wɔ̀ Cinu ni: «nyì wé! Ǹmyɛ́ cìcì ǹ wə̀l ne: ‹Ce dwí rí tɛ̀bɛ́ shə́r›, sə ǹ yə̀ ce a lwar lò mó mɔ̀bɔ́ ǹ la tũ̌ n bə̀ n sɛ̃ nɛ mɔ́ pár yé. E jà, wɔ́ ǹmyɛ́ ǹ yà ǹ wə̀lə̀: ‹À yě ǹ párá›, ǹ súlí ń wɔ̀ myɛ: ‹À só mó›. ¹³ Ǹ gə só ne zhə̀n zhə̀nà, sə́ byili ni ǹ wu bùlə̀ né, à m'a zɛ̃̀ a lwar ǹ pár pamparɛ̃ɛ̃, ǹ sónó w m'a yə̀ zhə̀n kɔna à yilə. Ǹ bə̀k'á swě bə̀ dwí rí tɛ̀bɛ́ wɔ́ ǹmyɛ́ dwí yé!» ¹⁴ Cinu lyár Muyiisi n wɔ̀: «Àmyɛ́ cìcì mú m'a zhìì mú a súlí a pɔ̃́ shìrhə́?» ¹⁵ Muyiisi wɔ̀ mɔ: «Ǹ cìcì gə cẽ ǹ tá ǹ la nə́ba tó, sə ǹ bə́k'á ce nə́ zhǐr nyɔ̀nɔ̀ yé. ¹⁶ È nə wɔ́ bə̀kɔ́n dɛnnɛ bə̀ m'a tó né bə lwar bə̀ ǹ só àmyɛ́ ǹdə́ ǹ dwí rí? È də̀ ǹ gə́ m'ǎ tó nə́ba ǹ nə́ ǹ zhə̀l mó, rə̀myɛ́ mɔ́ zɛ̃̀ rə ce, àmyɛ́ ǹdə́ ǹ dwí rí k'é bə dwí tɛ̌ tɛ̌ nyɛ̌ lũ w púlə́púlə́ w mó nà?» ¹⁷ Cinu wɔ̀ Muyiisi ni: «À m'a súlí a wɛ̀rhɛ́ kɔn rɛ́ tɛ̀bɛ́ ǹ nə́ ǹ lwə̀l ne mó myɛ, bə̀ ǹ sú à yírh, à súlí à yě ǹ pár myɛ.» ¹⁸ Muyiisi lwə̀l Cinu n wɔ̀: «Ce a nə ǹ còrhó wə́!» ¹⁹ !» Cinu wɔ̀ mɔ: «À m'a tó ǹ yé né a lyɛ̃ a m'a byili mú à wu-bɔ̀nɔ̀ w gə́ já nɛ́, a súlí a bwə̀l ‹Cinu› rə̀ wɔ́ à yil ré, ǹ yé né. À n'â wɛ̀rhɛ́ cɛ̀nɛ̀ lò mó mɔ̀bɔ́ à n'â yǎl mɔ́ nɛ, à n'â dùr lò mó mɔ̀bɔ́ à n'â yǎl a dùr ń nɔ̀nɔ̀ mɔ́ nɔ̀nɔ̀.» ²⁰ Cinu súlí n wɔ̀: «Ǹ wàr ǹ m'ǎ nyǐ à yé-zwã̌ y yé, bə̀ numbyíní wàr è m'a nyǐ à yé-zwã̌ y e j'a gwẽ̌ zə myə̌l yé.» ²¹ Cinu wɔ̀ mɔ: «Nyǐ jàà à nyí ni. Ǹ m'ǎ zhì pyɔ̀-nə́kulu w kɔ̀bɔ́ yó. ²² À gə tú à n'â lyɛ̃ à m'â byili à còrhó w yi ní, à m'a ce mó nə́kulu w gógòló w wə, a zɛ̃̀ a zə à jɛ̃̀ y a m'a círhí mú. ²³ Rə̀myɛ́ kwã nɛ́, à m'a pə́ à jɛ̃̀ yá, sə ǹ m'ǎ nə à kwã yá. Sə è gə wɔ́ à yé-zwã̌ yá, lòlò wàr y ń la nɔ yé.»