¹ Dwí rí púrí Muyiisi yà ń nə́ ń dɛnɛ ǹdə́ pyɔ̀ w yó shí n só tɛ̃́; rə bə̀ rə jòm dwã yó Aarɔ̃ yala nɛ, rə zɛ̃̀ rə wɔ̀ mɔ: «Zɛ̃̀ dɛ̃̌! Wɛ̀rhɛ́ yə ń pə nə́ba nə yə̀ nə́ yé né, bə̀ nə́ yə̀l kɔn rɛ́ tɛ̀bɛ́ rə̀ yú Muyiisi mú mɔ̀bɔ́ ń ce nə́ shə́r Ezhibti tənà y w mɔ́ nɛ yé.» ² Aarɔ̃ wɔ̀ bɛ: «Vǔr-nə sánə́má zhə̌-kɔ̀nà nɛ́ nə̀ wɔ á kana bɛ́ ǹdə́ á bala-byǎ bɛ́ ǹdə́ á kana-byǎ bɛ́ zhã̌ nɛ́ nɛ mɔ́ á b'ǎ pɛ̃.» ³ Dwí rí lyì bí púlə́púlə́ vùr sánə́má zhə̌-3 Dwí rí lyì bí púlə́púlə́ vùr sánə́má zhə̌-kɔ̀nà nɛ́ bə̀ y'à co bə̀ zhã̌ nɛ mɔ́, bə b'e pə Aarɔ̃ nɛ. ⁴ Aarɔ̃ gə́ zwẽ sánə́má mɔ́ bə̀ jɔ̃̀ w kwã, ń yə̌l mo n ló fòrhó wẽ́, n mə n zùrhì nũ̌-bwə̀lə̀ èsã̌yùlú. Rə̀myɛ́ yó, Esərayɛl lyì byǎ bɛ́ búbwéé bə wɔ̀: «Esərayɛl lyì byǎ, nyǐ-nə á yə né nə̀ ce á shə́r Ezhibti tənà y w mɔ́!» ⁵ Aarɔ̃ gə́ nɔ rə̀myɛ́ mɔ́, ń lù vwĩ̀-jùlú, nũ̌-bwə̀lə̀ y èsã̌yùlú w yé né; rə̀myɛ́ kwã nɛ́, n zɛ̃̀ n bwə̀l n wɔ̀: «Nəkɔl wɔ́ címsi nánfɔ̀lɔ̀ Cinu yilə!» ⁶ È zɛ̃̀ nəkɔkɔ́lɛ́ yá, bə̀ gə́ j'a zɛ̃̀ tɛ̃́, bə̀ zwə́l vwə̃̀ námpúmə́ cɛ̃́ɛ̃́, bə súlí bə zə yə̀-zùlə́ vwə̃̀ bə m'e bà; dwí rí jòm tɛ̃́ rə jí rə súlí rə nyɔ̀, rə zɛ̃̀ rə̀ n'ê dədala. ⁷ Rə̀myɛ́ yi ní, Cinu wə̀l Muyiisi ni: «Só tɛ̃́ làlà, bə̀ ǹ dwí rí ǹ ce rə shə́r Ezhibti tənà y w mɔ́ wɛ̀rhɛ́ yə̀-bəlɔ̀lɔ́ nánfɔ̀lɔ̀. ⁸ Bə̀ yə̀ dɛ̃̀ bə m'e ywə̀r sɔ́má y à byili bi mú yó yé. Bə̀ zùrhì nũ̌-bwə̀lə̀ èsã̌yùlú, bə wùlì tɛ̃́ ò yé né bə m'e cèrhé wə, bə zwə́l vwə̃̀ bə pə w bə zɛ̃̀ bə wɔ̀: Esərayɛl lyì byǎ, nyǐ-nə á yə né nə̀ ce á shə́r Ezhibti tənà y w mɔ́.» ⁹ Sə rə̀myɛ́ yi ní, Cinu wə̀l Muyiisi ni: «À yě dwí rí tɛ̀bɛ́ gə́ wɔ́ nɛ́: rə̀ wɔ́ yó-kùùlì dúdú cìnə́! ¹⁰ Rə̀myɛ́ ce yẽ̌ a nyǐ rə̀ na. À lyi-shùùrí m'a ce a ce rə jé tɛ̃́, sə à m'a ce ǹmyɛ́ jǐrh dwí nánjə̀jóló.» ¹¹ Sə Muyiisi wə̀l Cinu ń Yi rí ni n mə n só rə̀ lyim tɛ̃́: «Cinu, byè yil ǹ nə m'ǎ ló ǹ lyi-shùùrí ǹ dwí rí tɛ̀bɛ́ ǹ ce rə shə́r Ezhibti tənà y w ǹdə́ jàn nánfɔ̀lɔ̀ w mɔ́, ǹdə́ ǹ jɛ̃̀ y jàn rɛ́ mɔ́ yó? ¹² Byè yil ǹ nə m'ǎ ce Ezhibti lyì bí wɔ̀: ‹È wɔ́ bə̀ lwɛlɛ ń nə́ ń pyà n mə n ce bə shə́r nə́ tənà y wa, wɔ́ mùnì ga n gu bi pyàr rɛ́ wa, n ce bə jé tɛ̃́ lyə́m lyə́m cɛ y yó!› Só ǹ lyim rí rə̀ n'ê yì dɛ̃́dɛ̃́ mɔ́ tɛ̃́ sə́ yẽ̌ lwɛlɛ wɔ̀rhɔ́ ǹ dwí rí ni. ¹³ Lyǐrh ǹ tùntùnnə Abəraam ǹdə́ Yəzakɛ e súlí Esərayɛl, ǹ yà ǹ zɔ ǹ cìcì yil ré ń mə́ bwəl be nyí mú yò. Ǹ wə̀l be: À m'a ce á dwí rí pù rə yə̀ nánjə̀jóló ǹdə cã̀mə́sɔ̌sɛ́ dɛ̃̌-yi w mú ta. Sə à m'a pə tənà y kɛ̀bɛ́ gakó à bwəl è nyí mú á nɛ̀mɛ́ nɛ́ nɛ, e yə̀ bə̀ cəl bə cìní y twéé twéé yilə.» ¹⁴ Rə̀myɛ́ yó, Cinu já n yẽ̌ lwɛlɛ rɛ́ tɛ̀bɛ́ ń yà ń nə́ yǎl n wɛ̀rhɛ́ ń dwí rí ni mú ni. ¹⁵ Muyiisi shí pyɔ̀ w yó n kwɛ̃̀ n só tɛ̃́, ǹdə́ nyə́ né bwə̀lsé sə̀lyè y sə̀ yésé ga y'à kɛ̃ mɔ́ ń jɔ̃̀ wa; ¹⁶ bwə̀lsé y'à wɔ́ Yi rə̀ sə̀l se, kəkɛ̃ɛ̃ rɛ́ myɛ y'à wɔ́ Yi kəkɛ̃ɛ̃ rɛ́ rə̀ kɛ̃ sə̀ yó. ¹⁷ Zhozwe gə́ nyɛ̀ɛ̀ dwí rí wu-nyɔ̃̀ búbwéésé, ń wə̀l Muyiisi ni: «Búlə́ búbwéése n'ê búbwéé zulə́ jàà y wa!» ¹⁸ Sə Muyiisi lyár mɔ n wɔ̀: «È də̀ lyì bə̀ jú bɛlɛ myɛ nwíísi yé, è k'ê də̀ lyì byɛ̀bɛ́ bə̀ ŋwɛ̀nɛ́ búlə́ jàà w myɛ nwíísi yé, è wɔ́ lyì bə̀ n'ê nún bə̀ kwɛ̃́ dwã nyí ni nwíísi à nyɛ̌!» ¹⁹ Sə Muyiisi gə́ tú n bwəlse zulə́ jàà y w yi ní, ń nɔ nũ̌-bwə̀lə̀ y èsã̌yùlú wə́, ǹdə́ dwí rí myɛ rə̀ y'à n'ê sɛ, ń lyim j'a zɛ̃̀ rə̀ n'ê yì dɛ̃́dɛ̃́. N zhẽ̌ bwə̀lsé sə̀ y'à wɔ ń jɔ̃̀ w mɔ́ dɛ̃̌dɛ̃̌ n fwar tɛ̃́ sə bɔbwɛlɛ pyɔ̀ w nà y nɛ. ²⁰ N kwè nũ̌-bwə̀lə̀ y dwí rí y'à zùrhì mú n ji myǐn, n zɛ̃̀ n kwè ò myìn-táfúlú w n nɔ̀ tɔ̀mɔ̀ gúmgúm, n zɛ̃̀ n kwè tɔ̀mɔ̀ w n ló nɛ̃̌ w n pə Esərayɛl lyì byǎ bɛ́ nɛ bə nyɔ̀. ²¹ Rə̀myɛ́ kwã nɛ́, Muyiisi bwə̀rh Aarɔ̃ n wɔ̀: «Bə̀kɔ́n dwí rí tɛ̀bɛ́ wɛ̀rhɛ́ mɔ́ ń mə́ vwɛ̃ yə̀-bəlɔ̀lɔ́ nánfɔ̀lɔ̀ w kɔ̀bɔ́ ń pə rɛ?» ²² Aarɔ̃ lyár mɔ n wɔ̀: «À n'â lwə̀l mó bə̀ ǹ lyim bə̀k'a zɛ̃̀ yé! Ǹ cìcì mú yě bə̀ dwí rí tɛ̀bɛ́ t'â dɛnɛ ǹdə́ lwɛlɛ wɔ̀rhɔ́ yé. ²³ Rə̀ tú rə wɔ̀ nɛ: ‹Zùrhì yə ń pə nə́ba nə yə̀ nə́ yé né, bə̀ nə́ yə̀l kɔn dɛ̀bɛ́ rə̀ yú Muyiisi mú mɔ̀bɔ́ ń ce nə́ shə́r Ezhibti tənà y w mɔ́ nɛ yé.› ²⁴ A zɛ̃̀ a bwə̀rh be a wɔ̀: ‹Mɔ̌ lò ń zhe sánə́má?› Bə zɛ̃̀ bə vùr mo bə̀ zhã̌ nɛ bə pɛ̃, a zə myǐn a yə̌l mo. Wɔ́ mə̀myɛ́ à m'a zùrhì nũ̌-bwə̀lə̀ y kɛ̀bɛ́.» ²⁵ Muyiisi púrí bə̀ Aarɔ̃ yà ń yẽ̌ dwí rí rə̀ y'à n'ê wɛ̀rhɛ́ rə̀ pùbùlə̀ mó ne, n ce rə̀ zwə̀ bé n'ê fulsi ri. ²⁶ Rə̀myɛ́ yó, Muyiisi zhə̀l n zhì zulə́ jàà y bwə̀rə̀ y w n wɔ̀: «Lyì byɛ̀bɛ́ bə̀ só Cinu mú bə̀ bə zhì à kwã nɛ́!» Levyi kwálá y lyì bí gakó bə̀ bə zhì bə kə́kɛ́lɛ́ mɔ. ²⁷ N wɔ̀ bɛ: «Nyǐ Cinu, Esərayɛl lyì byǎ bɛ́ Yi rí nyí rí: Lò gakó sə́ kwè ǹ búlə́ shù w ń lyẽ ǹ cí ni, tó-nə zulə́ jàà y étwí-ènyí étwí-ènyí gakó á k'á bwérhé, á gu á da-byǐ ráá á dɔwa ráá á jè-dõ!» ²⁸ Levyi kwálá y lyì bí wɛ̀rhɛ́ kɔn rɛ́ tɛ̀bɛ́ Muyiisi yà ń wə̀l be mó, sə lyì bí byɛ̀bɛ́ bə̀ gu dwí rí wẽ́ mó yú nunə mɔ̀ɔ̀rhɛ̀ rə̀tɔ̀ (3000). ²⁹ Rə̀myɛ́ kwã nɛ́, Muyiisi wə̀l Levyi kwálá y lyì bí ni: «Zà dɛ̃ rɛ́, zwẽ-nə vwĩ̀-zwə́lnə tum rí ŋwɔ̀nɔ́ w Cinu nə́ ń pɛ ába, lò gakó gə́ gu ń byǐ ráá ń da-byǐ mú yilə; bə̀ Cinu cĩ́ bwəl á yó zà dɛ̃̀ rɛ́.» ³⁰ È zɛ̃̀ nəkɔkɔ́lɛ́ yá, Muyiisi wə̀l dwí rí ni: «Á wɛ̀rhɛ́ yə̀-bəlɔ̀lɔ́ nánfɔ̀lɔ̀, rə̀myɛ́ ce à m'a jì a vò Cinu sõ, dɛ̀ga, à m'a nə á yə̀-bəlɔ̀lɔ́ w sǔbri.» ³¹ Muyiisi já n kə́ n kwɛ̃̀ n vò Cinu sõ, n yí n wɔ̀ mɔ: «nyì wé Cinu! Dwí rí tɛ̀bɛ́ wɛ̀rhɛ́ yə̀-bəlɔ̀lɔ́ nánfɔ̀lɔ̀; rə̀ zə sánə́má rə zùrhì yə rə̀ cìn yilə. ³² Sə à n'â lwə̀l mó èlǎsɛ̃́ bə̀ ǹ pə rɛ rə̀ yə̀-bəlɔ̀lɔ́ w sǔbri! È gə də̀ rə̀myɛ́, sə́ pɔ́pɔ̌ à yil ré ǹ kɛ̃ nyǔ mú sɛ́bɛ́ rɛ́ wẽ́ mó.» ³³ 3 Cinu lyár mɔ n wɔ̀: «Wɔ́ lò mó mɔ̀bɔ́ ń dó ne mó yil ré à m'a pɔ́pɔ̌ à sɛ́bɛ́ rɛ́ wẽ́. ³⁴ Zɛ̃̌ ń vò èlǎsɛ̃́, ń zə dwí rí ń mə́ vò jàà y kɛ̀bɛ́ à byili mú mú wə. À màlɛ́ka y m'a tó ǹ yé. Sə dɛ̃ rɛ́ tɛ̀bɛ́ à bàn còrhò-tum pɔ mɔ́, à m'a pə rɛ còrhò-tum rə̀ yə̀-bəlɔ̀lɔ́ w yilə.» ³⁵ Zhə̀n ga, Cinu pɔ còrhò-tum dwí rí ni nũ̌-bwə̀lə̀ y rə̀ y'à zùrhì mú yilə, nũ̌-bwə̀lə̀ y kɛ̀bɛ́ Aarɔ̃ yà ń zùrhì mú.