¹ Cinu kə́ n wɔ̀ Muyiisi ni: ² «nyì wé! À cír Uri byǐ Bəsalɛl, Uuri nɔ̃̌ wá, Zhəda kwálá y lò, ³ a ce n sú ǹdə́ Yi Eshirhə y mùnì ga n zə lárma ǹdə́ surhə ǹdə́ lwar ǹdə́ tumə dwí gakó tũ̌ ŋwɔ̀nɔ́: ⁴ ń wɔ̌ ń tɛ́rɛ́ ń wɛ̀rhɛ́ wẽ̀ rə̀ càn dɛ̃́dɛ̃́, ń wɔ̌ ń zùrhì sánə́má ǹdə́ sə̀byì-kùlì e súlí kàmmɔ wẽ̀, ⁵ ń wɔ̌ ń sə̀l nə́kulə náàcɛ̀nà bə m'e cĩ́ bɔ́bwár wẽ̀, wẽ̀ ré yó, ń wɔ̌ ń sə̀l dǎr n súlí n twĩ̀ tumə dwí gakó. ⁶ À súlí a cír Ayəsamaakɛ byǐ Owɔləyaabɛ, Dan kwálá y lò, ń la n sɛ̃ mɔ. À co lárma bə̀ mə̀dù gakó wẽ́ mùnì ga bə wɛ̀rhɛ́ kɔn rɛ́ tɛ̀bɛ́ gakó à pɔ bɛ rə̀ nyí mú: ⁷ dwã-joló kòrhó w ǹdə́ nyə́ né kùlkṍ w ǹdə́ kùlkṍ w nyí-byǐ rí ò yə́-pɛ̀lɛ́ w mɔ́ ǹdə́ kòrhó w wẽ̀ ré dwã bɛ́ gakó ⁸ ǹdə́ tabəlɛ́ y ǹd'ê wẽ̀ ré ǹdə́ ku w bə̀ n'ê cĩ́ pàntámsɛ́ ò yó ò zùrhì ǹdə́ sánə́má mɔ̀bɔ́ mə̀ càn mɔ́ ǹd'ô wẽ̀ ré dwã bɛ́ gakó ǹdə́ vwĩ̀-jùlú w bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ y myǐn ò yó mó ⁹ ǹdə́ vwə̃̀ námpúmə́ cɛ̃́ɛ̃́ nɛ́ vwĩ̀-jùlú w ǹd'ô wẽ̀ ré dwã bɛ́ gakó ǹdə́ zhǎ y ǹdə́ è ku w kɔ̀bɔ́ è kùr rí cĩ́ ò yó mó ¹⁰ ǹdə́ vwĩ̀ rí zwə́l tum rí gàndɛ́, Aarɔ̃ ǹdə́ ń byǎ bɛ́ m'a zù bə m'e twĩ̀ vwĩ̀ rí zwə́l tum rí mú ¹¹ ǹdə́ nwə̃̌ y bə̀ m'ê pɛ Yi tum rí tũ̌ ŋwɔ̀nɔ́ w mɔ́ e súlí wẽ̀ ré rə̀ lwẽ́ nã́nyə̀nyɛ̀lɛ́ bə̀ mə̌ sə bə ji ri myǐn còrhó-jì y w mú. Bə̀ m'a wɛ̀rhɛ́ kɔn tó nyí rí tɛ̀bɛ́ à pɔ mɔ́ mɔ́ cìcì rə̀ kɔn gakó wẽ́.» ¹² Cinu kə́ n wɔ̀ Muyiisi ni: ¹³ «Wál Esərayɛl lyì byǎ bɛ́ nɛ: Á m'ǎ tó à shìrhə́ dwã nɛ́ nyí rí, bə̀ nə̀ wɔ́ myɔrhɔ w kɔ̀bɔ́ ò j'â ŋwɛ́nɛ́ àmyɛ́ ǹd'ámyɛ̌ cəcəl w gaga yilə, ò m'a ce bə lwar bə̀ wɔ́ àmyɛ́ Cinu à cír ába á wɔ́ à lyì. ¹⁴ Á m'ǎ tó shìrhə́ dɛ̃ rɛ́ nyí rí, bə̀ rə̀ wɔ́ Yi dɛ̃. Bə̀ m'a gu lò mɔ̀bɔ́ ń yə̀ nyí rí ni tó mó. Bə̀ m'a vùr lò mɔ̀bɔ́ ń twĩ̀ tum dɛ̃ rɛ́ rə̀myɛ́ yù w mú ń dwí rí wẽ́. ¹⁵ Lò gakó mà n twĩ̀ ń tumə né dwã nyə̀ldù y wẽ́, sə dwã nyàlpyɛ̀ dɛ̃ rɛ́ wɔ́ shìrhə́, shìrhə́ dɛ̃ rɛ́ rə̀ wɔ́ Cinu dɛ̃ rɛ́ mɔ́. Bə̀ m'a gu lò mɔ̀bɔ́ gakó ń twĩ̀ tum shìrhə́ dɛ̃ rɛ́ yù wə. ¹⁶ Esərayɛl lyì byǎ bɛ́ m'a tó shìrhə́ dɛ̃ rɛ́ nyí rí, bə ce shìrhə́ dɛ̃ rɛ́ yə̀ dɔbrɛ tɛ̀bɛ́ rə̀ m'à j'â ŋwɛ́nɛ́ gaga yil mú myɔrhɔ byin byin gakó. ¹⁷ Dɛ̃ rɛ́ rə̀myɛ́ mɔ́ m'a yə̀ dɔbrɛ́ rə̀ lyẽ àmyɛ́ ǹdə́ Esərayɛl lyì byǎ bɛ́ dwã nɛ mɔ́ myɔrhɔ; zhə̀n ga, Cinu wɛ̀rhɛ́ dɛ̃̌ ǹdə́ cɛ dwã nyə̀ldù wẽ́, sə dwã nyàlpyɛ̀ dɛ̃ rɛ́ ń yə̀ tum twĩ̀ yé, ń yẽ̌ n shǐrh.» ¹⁸ Yi gə́ zɔ̀m ǹdə́ Muyiisi Sənəyi pyɔ̀ w yó rə zhɛ̀, rə̀ kwè nyə́ né rə̀ cìcì jɛ̃̀ y kɛ̃ nə́kulu bwə̀lsé sə̀lyè y yó mó rə pɔ̃.