¹ Rə̀myɛ́ kwã nɛ́, ǹ m'ǎ fwar vwĩ̀-jùlú ǹdə́ ákáshá dɔ̌ wẽ̀ ré rə̀ lwẽ́ nã́nyə̀nyɛ̀lɛ́ myǐn ju yilə. ² Ò dwɛ̀lɛ̀ rɛ́ m'a yə̀ jə̀-tórhó yírh rə̀dù, ò wɛ̃̀ rɛ́ yə̀ jə̀-tórhó yírh rə̀dù, ò sarha nɛ́ nə̀na y ga dwɛ̀lɛ̀ rɛ́ m'a mɛrhɛ dwã; ò dɛ̃̌-zhìyə́ y m'a yə̀ jə̀-tórhó yírhə́ nə̀lyè. Ǹ m'ǎ ce ò nyimi ní dɛ̃ w nə yə̀ kɔn rə̀dù ǹdə́ wa. ³ Ǹ m'ǎ yə̌l sánə́má mɔ̀bɔ́ mə̀ càn ń mə́ fwàl ò dɛ̃̌ yé y ǹd'ô sarha nɛ́ ń kə́kɛ́lɛ́, e súlí ò nyimi ní; ǹ m'ǎ zə sánə́má ń cĩ́ nà ń mə́ kə́kɛ́lɛ́ ò cã̌ yá. ⁴ Ǹ m'ǎ lù sánə́má cìbyǔr rə̀lyè ń ce vwĩ̀-jùlú w sarha nɛ́ nə̀lyè y ne, nà y ǹ cĩ́ ǹdə́ sánə́má mɔ́ kùr wə, bə̀ la də̀-byǎ bɛ́ rə̀ wẽ́ co bə̀ m'ê zhĩ vwĩ̀-jùlú wə́. ⁵ Ǹ m'ǎ zə ákáshá dɔ̌ ń mə́ sə̀ də̀-byǎ bɛ́ ń zɛ̃̀ ń yə̌l sánə́má ń mə́ fwàl bɛ. ⁶ Ǹ m'ǎ cĩ́ vwĩ̀-jùlú w gɔ̀nɔ̀ w ò n'ô círhí dɔbrɛ kùlkṍ w dɔbrɛ́ nyə́ né bwə̀lsé wɔ ò wẽ́ mó yé y wə; nyí-byǐ rí rə̀ ŋwɛ́nɛ́ kùlkṍ w yó mó yé né, à gə́ la mɔ́ jəl mə̀gã̌ mɔ́. ⁷ Aarɔ̃ mà n ji wẽ̀ ré rə̀ lwẽ́ nã́nyə̀nyɛ̀lɛ́ mɔ́ myǐn gàà. Ń mà n ji ri myǐn nəkɔkɔ́lɛ́ gakó ń gə tú ń la pàntámsɛ́ kɔrhɔ yi ní. ⁸ Aarɔ̃ gə tú ń la pàntámsɛ́ ju cɛ y gə tú è n'ê byíbyílí yi ní myɛ, ń mà n súlí n ji wẽ̀ ré rə̀ lwẽ́ nã́nyə̀nyɛ̀lɛ́ myɛ myǐn. Lwẽ́ nã́nyə̀nyɛ̀lɛ́ èmyɛ́ mɔ́ m'à j'â ŋwɛ́nɛ́ twéé twéé Cinu yé né, byin byin gakó. ⁹ Á t'á la wẽ̀ tɛ̌ tɛ̌ rə̀ lwẽ́ nã́nyə̀nyɛ̀lɛ́ myǐn ju vwĩ̀-jùlú w yó yé, á t'á la vwĩ̀ námpúm cɛ̃́ɛ̃́ zwə́l ò yó yé, á t'á la jíjí byǎ cṹ ò yó vwĩ̀ kɔn yil yé, á t'á la də̀vɛ̃́ ló ò yó yé. ¹⁰ Sə twər rə̀dù byin wẽ́, Aarɔ̃ mà n zwə́l jìmdi vǔr vwĩ̀ rí vwĩ̀-jùlú nyimi ní yó. Ń mà n zə vwĩ̀ rí bə̀ m'ê lwə̀l sǔbri twər rə̀dù byin gakó wẽ́ jal mɔ́ n mə n vùr ò jìmdí, byin byin gakó. Vwĩ̀-jùlú w òmyɛ́ m'a yə̀ Cinu dúdú nyɔ̃̌. ¹¹ Cinu kə́ n wɔ̀ Muyiisi ni: ¹² «Ǹ gə tú ǹ nə́ ǹ gàl Esərayɛl lyì byǎ bɛ́ ǹ la ń mə́ lwar bə̀ yó w yi ní, bə̀ mə̀dù gakó mà n pə ń myə̌l ré kwǎndɛ; èta màbyóó òdù ga t'â la bə zal yé. ¹³ Lò mɔ̀bɔ́ bə̀ la gál mɔ́ mà n pə sə̀byì-kùlì dùmì rí fwã́, ǹdə́ bə̀ gə jə̀ə̀le ǹdə́ còrhó-jì sə̀byì-kùlì y è dùmì rí wɔ́ gə̀rámmɛbá bə̀nu mú. Səbyì-kùlì dùmì rí fwã́ y m'a yə̀ kɔn rɛ́ tɛ̀bɛ́ bə̀ n'ê pɛ Cinu ni. ¹⁴ Lò mɔ̀bɔ́ gakó bə̀ la gál, ń zhe byinə shí-èlyè ráá ń lyɛ̃ byinə shí-èlyè, ń mà n pə Cinu kɔn rɛ́. ¹⁵ È gə wɔ́ kɔn rɛ́ tɛ̀bɛ́ á la Cinu ni pɔ á myə̌l-kwǎndɛ́ yil mú, lò mɔ̀bɔ́ ń wɔ́ nə̀cɛ̀m-bal tá ń la pɔ kɔn dwini sə̀byì-kùlì fwã́ y yé, lò mɔ̀bɔ́ ń wɔ́ nə̀mɔ̀ myɛ tá ń la pɔ kɔn mùrì sə̀byì-kùlì fwã́ y yé. ¹⁶ Ǹ m'ǎ zwẽ myə̌l-kwǎndɛ́ Esərayɛl lyì byǎ bɛ́ sõ dwã-joló kòrhó w tum rí yilə. Sə rə̀myɛ́ mɔ́ m'a yə̀ Esərayɛl lyì byǎ bɛ́ myə̌l ré zõ kwǎndɛ́ yò lyǐrh Cinu yé né.» ¹⁷ Cinu kə́ n wɔ̀ Muyiisi ni: ¹⁸ «Ǹ m'ǎ zùrhì kàmmɔ zhǎ, sə ku w kɔ̀bɔ́ è kùr rí cĩ́ ò yó mó myɛ zùrhì ndə́ kàmmɔ, yala sám yilə; ǹ m'ǎ cĩ́ y dwã-joló kòrhó w ǹdə́ vwĩ̀-jùlú w bwə̌l mó wə, ń zɛ̃̀ ń ce nɛ̃̌ è wẽ́. ¹⁹ Aarɔ̃ ǹdə́ ń byǎ bɛ́ m'à n'ê sàm bə̀ jɛ̀sɛ́ ǹdə́ bə̀ nèsé né gàà. ²⁰ Bə̀ gə tú bə̀ la dwã-joló kòrhó w zú bə̀ m'a zhə́zhɛ́lɛ́ bə̀ cìn ǹdə́ nɛ̃̌ mɔ́ mùnì ga bə̀ bə̀k'a cì yé. Bə̀ gə la vwĩ̀-jùlú w nyí ni bwəlse bə̀ la m'e twĩ̀ bə̀ tum rí, ráá bə̀ gə la kɔn rɛ́ tɛ̀bɛ́ rə̀ gakó mə̌ sə rə jí myǐn mú myǐn ju Cinu yil mú, ²¹ bə̀ m'a sã̀ bə̀ jɛ̀sɛ́ ǹdə́ bə̀ nèsé mùnì bə̀ bə̀k'a cì yé. Rə̀myɛ́ mɔ́ m'a yə̀ nyí rə̀ m'à j'â ŋwɛ́nɛ́, Aarɔ̃ ǹdə́ ń nɛ̀mɛ́ nɛ́ yilə, byin byin gakó.» ²² Cinu kə́ n wɔ̀ Muyiisi ni: ²³ Ǹ m'ǎ súlí ń pyà nǔrh sə̀ lwẽ́ ré j'â wɔ́ nã́nyə̀nyɛ̀lɛ́ dɛ̃́dɛ̃́: myííria è yə̀ zal cəə́le rə̀nu; ǹdə́ shənamɔɔmɛb è lwẽ́ nã́nyə̀nyɛ̀lɛ́ cəə́le rə̀lyè ǹdə́ fwã́, ǹdə́ kanɛlc è lwẽ́ nã́nyə̀nyɛ̀lɛ́ cəə́le rə̀lyè ǹdə́ fwã́, ²⁴ ǹdə́ káásɛd cəə́le rə̀nu, bə̀ gə la mɔrhɔ ǹdə́ còrhó-jì y mɔrhɔ ku wə́, e súlí olyivyé nwə̃̌ lyítərə bwə̀ldù. ²⁵ Ǹ m'ǎ gùlí ri dwã nɛ ń mə́ wɛ̀rhɛ́ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́. Rə̀myɛ́ mɔ́ m'a yə̀ lò mɔ̀bɔ́ ń yě tum rí yé shó mó tum. È m'a yə̀ nwə̃̌ y kɛ̀bɛ́ bə̀ m'ê pɛ Yi tum rí tũ̌ ŋwɔ̀nɔ́ w mɔ́. ²⁶ Ǹ m'ǎ byèè y dwã-joló kòrhó w yó ǹdə́ nyə́ né bwə̀lsé kùlkṍ w yó, ²⁷ ǹdə́ tabəlɛ́ y ǹd'ê wẽ̀ ré gakó yó ǹdə́ ku w kɔ̀bɔ́ bə̀ n'ê cĩ́ pàntámsɛ́ ò yó mó yó ǹd'ô wẽ̀ ré yó ǹdə́ vwĩ̀-jùlú w bə̀ n'ê ji wẽ̀ ré rə̀ lwẽ́ nã́nyə̀nyɛ̀lɛ́ y ò yó mó yó ²⁸ ǹdə́ vwə̃̀ námpúmə́ cɛ̃́ɛ̃́ nɛ́ jùlú w yó ǹd'ômyɛ wẽ̀ ré gakó yó ǹdə́ zhǎ y yó e súlí ku w kɔ̀bɔ́ è kùr ré cĩ́ ò yó mó yó ń pə Cinu ni. ²⁹ Ǹ m'ǎ pə rɛ Cinu ni, sə rə̀ m'a jǐrh Cinu dúdú nyǎn; kɔn rɛ́ tɛ̀bɛ́ rə̀ la wẽ̀ ré rə̀myɛ́ mɔ́ dwə̀rh rə̀myɛ́ kwã nɛ́ m'a yə̀ Cinu nyǎn. ³⁰ Ǹ m'ǎ twərh nwə̃̌ y Aarɔ̃ ǹdə́ ń byǎ bɛ́ myɛ yó wə, ń zɛ̃̀ ń ce bə twĩ̀ à vwĩ̀ rí zwə́l mó tum rí. ³¹ Rə̀myɛ́ kwã nɛ́, ǹ m'ǎ zɛ̃̀ ń wɔ̀ Esərayɛl lyì byǎ bɛ́ nɛ: Nwə̃̌ y kɛ̀bɛ́ wɔ́ tum rí ŋwɔ̀nɔ́ w pɔ nwə̃̌ yə́; è m'à j'â ŋwɛ́nɛ́ byin byin gakó àmyɛ́ tum rí yilə. ³² Lò mə̀dù ga tá ń la y tùr yé; á t'á la è dwí rí wɔ̀rhɔ́ myɔrhɔ yé, b'è wɔ́ Yi rə̀ cǐ yə, è m'a j'a yə̀ Yi rə̀ cǐ yə, ámyɛ̌ yilə. ³³ Bə̀ m'a vùr lò mɔ̀bɔ́ ń wɛ̀rhɛ́ è dwí rí n zɛ̃̀ n twərh y lò nánfò yó, ń dwí rí wẽ́. ³⁴ Cinu kə́ n wɔ̀ Muyiisi ni: Pyǎ wẽ̀ tɛ̀bɛ́ rə̀ lwẽ́ wɔ́ nã́nyə̀nyɛ̀lɛ́: shətɔrákəsɛ ǹdə́ ámbərɛ ǹdə́ galəbanɔme è lwẽ́ nã́nyə̀nyɛ̀lɛ́ e súlí ãsã́ kaka yə̀ y gùlí, sə rə̀myɛ́ mɔ́ gakó mɛrhɛ dwã. ³⁵ Ǹ m'ǎ zə rɛ ń gùlí dwã ń wɛ̀rhɛ́ kɔn rɛ́ tɛ̀bɛ́ rə̀ lwẽ́ wɔ́ nã́nyə̀nyɛ̀lɛ́, rə̀ co nə̀kwə̃̌, kaka yə̀ rɛ gùlí yé, Yi tum rí yilə; rə̀myɛ́ mɔ́ m'a yə̀ lò mɔ̀bɔ́ ń yě tum rí rə̀myɛ́ mɔ́ yé shò mó tum. ³⁶ Ǹ m'ǎ vùr námpɔ́lɛ́ ń nɔ̀ gúmgúm ń vò ń cĩ́ dɔbrɛ nyə́ né bwə̀lsé yé né, dwã-joló kòrhó w wẽ́, à gə́ la mɔ́ jəl mə̀gã̌ mɔ́. Rə̀myɛ́ m'a yə̀ Yi dúdú nyǎn. ³⁷ Á t'á la wẽ̀ ré rə̀ lwẽ́ nã́nyə̀nyɛ̀lɛ́ ǹ la wɔ̀rhɔ́ mɔ́ dwí rí wɔ̀rhɔ́ á cìcì yil yé; rə̀ dwí rí m'a wɛ̀rhɛ́ Cinu dúdú yilə. ³⁸ Bə̀ m'a vùr lò mɔ̀bɔ́ ń mà n tə̀ rə̀ lwẽ́ nã́nyə̀nyɛ̀lɛ́ y yil n wɛ̀rhɛ́ rə̀ dwí rí ń cìn yil mú, ń dwí rí wẽ́.