koussoube-marc-lee_exo_text

Kǝ̀kàl-fwɛ̀lɛ̀ 29

¹ Nyǐ ǹ gə́ m'ǎ wɛ̀rhɛ́ nɛ́ ń mə́ ce Aarɔ̃ ǹdə́ ń byǎ bɛ́ yə̀ vwĩ̀-zwə́lnə bə̀ n'ê twĩ̀ bə̀ pɛ nɛ mɔ́: zə nə̀-bya ǹdə́ pyì-byərh sə̀lyè kaka bə sɛ zhe mó, ² rə̀myɛ́ kwã nɛ́, zə bə̀lɛ́ mún ń mə́ wɛ̀rhɛ́ búrú ò yə̀ sã̀-nə̀byẽ̌ ce ǹdə́ búúri bə̀ zə nwə̃̌ bə m'e ywə́rh rə̀ mún mú rə̀ yə̀ sã̀-nə̀byẽ̌ ce e súlí ŋwǎmsɛ sə̀ yə̀ sã̀-nə̀byẽ̌ ce bə̀ zhɛ́rhɛ́ nwə̃̌ sə̀ yó. ³ Ǹ m'ǎ ce re sǝ́yǎ wẽ́, ń zɛ̃̀ ń kwè sə́yǎ y ń tó dwã ǹdə́ nə̀-bya y ǹdə́ pyì-byesé sə̀lyè y ne ń vò ń pə Cinu ni. ⁴ Ǹ m'ǎ zə Aarɔ̃ ǹdə́ ń byǎ bɛ́ ń mə́ vò dwã-joló kòrhó nyí rí ni, ń shɛ bɛ nɛ̃̌ mɔ́. ⁵ Ǹ m'ǎ zɛ̃̀ ń kwè gàndɛ́ ń zù Aarɔ̃ nɛ: kàmə̀zù-pɔ́lɛ́ y ǹdə́ kàmə̀zù-èdɔ̀lɔ̀ w ǹdə́ vwĩ̀-zwə́lnə náncɛ kàmə̀zwǐ y ǹdə́ nə̀bán yó kàmə̀jɛ̃̀ yá, ń zɛ̃̀ ń zə vwĩ̀-zwə́lnə náncɛ y kàmə̀zwǐ y lyẽẽ́sé ń lyẽ. ⁶ Ǹ m'ǎ zɛ̃̀ ń kwè yó-bɔrɔ́ w ń cĩ́ ń yó wə, ń súlí ń cĩ́ myɔrhɔ w ò n'ô byili bə̀ bə̀ pɔ mɔ Yi ní mú yó-bɔrɔ́ w yó. ⁷ Rə̀myɛ́ kwã nɛ́, ǹ m'ǎ kwè nwə̃̌ y bə̀ la ń yó ló bə m'e byili bə̀ bə̀ cír mu mú ń ló ń yó w yó ń mə́ cír mu. ⁸ Ǹ m'ǎ zɛ̃̀ ń ce Aarɔ̃ byǎ bɛ́ bwəlse, ń zù bi bə̀ kàmə̀zù-pɔ́lsɛ́, ⁹ ń lyẽ Aarɔ̃ ǹdə́ bə̀myɛ́ ga cã̌-tàndɛ́ bə̀ cə̌rh ne, ń pú bi bə̀ yə́-púr rí; kɔn zhì dɛ̃ rɛ́ rə̀myɛ́ mɔ́, bə̀ m'a cìní vwĩ̀-zwə́lnə tum rí, wɔ́ nyí rə̀ m'à j'â ŋwɛ́nɛ́ gaga yilə. Ǹ m'ǎ pə tum rí ŋwɔ̀nɔ́ w Aarɔ̃ ǹdə́ ń byǎ bɛ́ nɛ. ¹⁰ Ǹ m'ǎ zə nə̀-bya y ń bə̀ dwã-joló kòrhó w nyí rí ni; Aarɔ̃ ǹdə́ ń byǎ bɛ́ m'a cĩ́ bə̀ jɛ̀rh nə̀-bya y yó w yó. ¹¹ Ǹ m'ǎ zɛ̃̀ ń zwə́l y Cinu yé né, dwã-joló kòrhó w nyí rí ni. ¹² Ǹ m'ǎ kwɛ̃́ nə̀-bya y jal mɔ́ kə̀kàlà ń mɔ́rh ǹ jə̀fɔ́lɛ́ nɛ́ ń mə́ cĩ́ cĩ́ mu vwĩ̀-jùlú w nyimi ní yó. Rə̀myɛ́ kwã nɛ́, ǹ m'ǎ ló jal mɔ́ kùr ré vwĩ̀-jùlú w kùr wə. ¹³ Ǹ m'ǎ vùr è wu lyur rí nwǐsí gakó ǹd'ê cɛ̃ rɛ́ ǹdə́ ocə̀-pwala nɛ́ nə̀lyè y ǹdə́ nwǐsí sə̀ dɛ̃ rɛ mɔ́ ń ji myǐn vwĩ̀-jùlú w yó. ¹⁴ Sə ǹ m'ǎ du zulə́ jàà y w ń vò ń ji nə̀-bya y nàmá bɛ́ ǹd'ê tɔ̀nɔ̀ w ǹd'ê lyur rí myǐn. Rə̀myɛ́ mɔ́ wɔ́ yə̀-bəlɔ̀lɔ́ w sǔbri nɔ vwĩ̀. ¹⁵ Rə̀myɛ́ kwã nɛ́, ǹ m'ǎ zə pyì-bya y nã́yə́ə́ y ń bà, Aarɔ̃ ǹdə́ ń byǎ bɛ́ m'a cĩ́ bə̀ jɛ̀rh è yó w yó. ¹⁶ Ǹ m'ǎ zɛ̃̀ ń zwə́l y ń kwɛ̃́ è jal mɔ́ ń zhɛ́rhɛ́ vwĩ̀-jùlú w cã̌ y nɛ ń kə́kɛ́lɛ́. ¹⁷ Ǹ m'ǎ põ̀ yə, ń pyir y nǎm nǎm, ń súlí ń shɛ̀rh è wu lyur rí ǹdə́ è nə̀-gwěsé ń ló nàmá bɛ́ ǹdə́ yó w yó. ¹⁸ Ǹ m'ǎ ji pyì-bya y námpúm myǐn vwĩ̀-jùlú w yó. Rə̀myɛ́ mɔ́ wɔ́ vwĩ̀ námpúm cɛ̃́ɛ̃́ Cinu yilə, rə̀ wɔ́ vwĩ̀ rí tɛ̀bɛ́ rə̀ kɔn gakó n'ê jí myǐn mú, lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ mɔ́ Cinu yilə. ¹⁹ Rə̀myɛ́ kwã nɛ́, ǹ m'ǎ zə pyì-byərh sə̀lyè nyǎ y ń bà, Aarɔ̃ ǹdə́ ń byǎ bɛ́ m'a cĩ́ bə̀ jɛ̀rh è yó w yó. ²⁰ Ǹ m'ǎ zɛ̃̀ ń zwə́l y ń kwɛ̃́ è jal mɔ́ kə̀kàlà ń cĩ́ cĩ́ Aarɔ̃ ǹdə́ ń byǎ bɛ́ jə̀-jĩ́ zhã̌ nɛ́ ǹdə́ bə̀ jə̀-jĩ́ jə̀fɔ́-byəəré ǹdə́ bə̀ jə̀-jĩ́ nə̀fɔ́-byəəré yó; ǹ m'ǎ zɛ̃̀ ń zhɛ́rhɛ́ jal mɔ́ kùr ré vwĩ̀-jùlú w cã̌ y nɛ ń kə́kɛ́lɛ́. ²¹ Ǹ m'ǎ twərh jal mɔ́ mɔ̀bɔ́ mə̀ wɔ vwĩ̀-jùlú w yó mó námpɔ́lɛ́ ǹdə́ nwə̃̌ y bə̀ n'ê lwé lyì bí yó bə̀ m'ê cír be mó námpɔ́lɛ́, ń zhɛ́rhɛ́ Aarɔ̃ ǹdə́ ń gàndɛ́ e súlí ń byǎ bɛ́ ǹdə́ bə̀ gàndɛ́ ga yó, èta Aarɔ̃ ǹdə́ ń gàndɛ́ e súlí ń byǎ bɛ́ ǹdə́ bə̀ gàndɛ́ ga m'a yə̀ àmyɛ́ Cinu ni bə̀ pɔ bɛ. ²² Pyì-byərh sə̀lyè nyǎ y vwĩ̀ rí m'a yə̀ vwĩ̀-zwə́lnə bé tum rí kùr-jirə́ y vwĩ̀ rí. Ǹ m'ǎ kwè pyì-bya y wẽ̀ ré rə̀ zhe nwǐsí mú, nə̀byíl ré ǹdə́ wu lyur rí nwǐsí ǹdə́ cɛ̃ rɛ́ ǹdə́ ocə̀-pwala nɛ́ ǹdə́ nə̀ nwǐsí e súlí kùr-cí rí; ²³ ǹ m'ǎ súlí ń vùr búúrí rə̀ yə̀ sã̀-nə̀byẽ̌ ce mó sə́yǎ y è cĩ́ à yé né mó wẽ́, búrú nánjújúnú òdù ǹdə́ búrú bə̀ ju ǹdə́ nwə̃̌ òdù e súlí ŋwɛ̀mɛ́ èdù. ²⁴ Ǹ m'ǎ kwè rə̀ gakó ń ce Aarɔ̃ ǹdə́ ń byǎ bɛ́ jɔ̃̀ w ń ce bə pɛ̃ rɛ ǹdə bə̀ gə́ mə̌ sə bə wɛ̀rhɛ́ nɛ́ bə m'e pə pɛnɛ́ Cinu yé né mó né. ²⁵ Ǹ m'ǎ k'á zwẽ re bə̀ jɔ̃̀ w ń súlí vwĩ̀ námpúm cɛ̃́ɛ̃́ rɛ́ kɔn rɛ́ nɛ ń ji myǐn vwĩ̀-jùlú w yó, rə yə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́ Cinu yé né. Rə̀ m'a yə̀ vwĩ̀ rí tɛ̀bɛ́ rə̀ kɔn gakó n'ê jí myǐn Cinu yilə. ²⁶ Ǹ m'ǎ kwè Aarɔ̃ pyì-bya y bə̀ zwə́l bə m'e pɔ̃ ŋwɔ̀nɔ́ w nyɛ̀l rɛ́ ń pə Cinu ni ǹdə bə̀ gə́ mə̌ sə bə wɛ̀rhɛ́ nɛ́ bə m'e pɔ̃ rɛ nɛ́. Wɔ́ rə̀myɛ́ rə̀ m'a yə̀ ǹ cəl ré. ²⁷ Ǹ m'ǎ pə Aarɔ̃ ǹdə́ ń byǎ bɛ́ pyì-bya y bə̀ zwə́l bə m'e pə bɛ ŋwɔ̀nɔ́ w mɔ́ nyɛ̀l rɛ́ bə̀ y'à pɔ Yi ni mú ǹdə́ kùr-cí rí bə̀ y'à vùr mú Cinu ni. ²⁸ Rə̀myɛ́ m'a yə̀ kɔn rɛ́ tɛ̀bɛ́ Esərayɛl lyì byǎ bɛ́ mə̌ dwã sə bə̀ j'â n'ê wɛ̀rhɛ́ Aarɔ̃ ǹdə́ ń byǎ bɛ́ yil gaga yilə, bə̀ rə̀ wɔ́ jɛ̃̀-jirə́ sə rə̀myɛ́ m'a j'â yə̀ Esərayɛl lyì byǎ bɛ́ jɛ̃̀-jirə́ bə̀ n'ê pɛ bə̀ yə̀-zùlə́ vwə̃̀ né yó: rə̀ m'a yə̀ bə̀ jɛ̃̀-jirə́ bə̀ n'ê pɛ Cinu ni. ²⁹ Aarɔ̃ cu mú kwã nɛ́, bə̀ m'a pə ń vwĩ̀ rí zwə́l tum rí gàndɛ́ ń nɛ̀mɛ́ nɛ́ nɛ bə zù, dɛ̃ rɛ́ tɛ̀bɛ́ bə̀ la nwə̃̌ y bə̀ yó w ló bə m'e cír bi, sə bə súlí bə pə bɛ ŋwɔ̀nɔ́ w mɔ́. ³⁰ Ń byǎ bɛ́ mə̀dù y mɔ̀bɔ́ ń la mɔ pú n yə̀ vwĩ̀-zwə́lnə, n zù dwã-joló w kòrhó w w n mə n twĩ̀ vwĩ̀-zwə́lnə tum rí còrhó-jì y w mú, mà n zù ri dwã nyàlpyɛ̀. ³¹ Ǹ m'ǎ kwè pyì-bya y bə̀ zwə́l bə m'e pə ŋwɔ̀nɔ́ w mɔ́ nàmá bɛ́ ń pə bə shɛ̃̀ jàà y kɛ̀bɛ́ bə̀ vùr rə̀myɛ́ mɔ́ yil mú wẽ́. ³² Aarɔ̃ ǹdə́ ń byǎ bɛ́ m'a zhì dwã-joló kòrhó w étwí-ènyí rí w bə m'e dɔ̃̀ pyì-bya y nàmá bɛ́ ǹdə́ búrú w ò dàl sə́yǎ y w mɔ́. ³³ Bə̀ m'a dɔ̃̀ kɔn rɛ́ tɛ̀bɛ́ bə̀ zə bə m'e lwə̀l sǔbri mú, bə̀ gə tú bə̀ n'ê cír bi bə súlí bə̀ n'ê pɛ bɛ ŋwɔ̀nɔ́ w yi ní. Lò nánfò bə mə̌ sə n dɔ̃̀ rɛ yé, bə̀ bə̀ pɔ rɛ Yi ni. ³⁴ È zɛ̃̀ nəkɔkɔ́lɛ́ yá, vwĩ̀ rí bə̀ zwə́l bə m'e pə ŋwɔ̀nɔ́ w nàmá bɛ́ ǹdə́ búrú w gə dàl, sə́ ji rə̀ kùr-dɛ̀lɛ̀ y myǐn. Lò bə̀ká n dɔ̃̀ rɛ yé, bə̀ wɔ́ Yi ni bə̀ pɔ rɛ. ³⁵ Wɔ́ èta ǹ m'ǎ wɛ̀rhɛ́ nɛ́ Aarɔ̃ ǹdə́ ń byǎ bɛ́ yilə, kɔn tó dwã ǹdə́ kɔn rɛ́ tɛ̀bɛ́ gakó à pɔ mɔ́ rə̀ nyí mú. Ǹ m'ǎ j'á kwè dwã nyàlpyɛ̀ ń mə́ pə bɛ ŋwɔ̀nɔ́ wá. ³⁶ Dɛ̃ gakó, ǹ m'ǎ zwə́l nə̀-bya vwĩ̀ yə̀-bəlwàálɛ́ sǔbri nɔ yilə; ǹ m'ǎ zwə́l vwĩ̀ rí kɔn tó dwã ǹdə bə̀ gə́ n'ê wɛ̀rhɛ́ nɛ́ sǔbri pɔ yi ní mú vwĩ̀-jùlú w yó ń mə́ vùr ò jìmdí, ń zɛ̃̀ ń súlí ń ló nwə̃̌ ò yó ń mə́ pə w Cinu ni. ³⁷ Ǹ m'a twĩ̀ vwĩ̀-jùlú w jìmdí vǔr tũ̀twĩ̀ĩ̀ rí rə̀myɛ́ mɔ́ myɛ ń súlí ń pə w Yi ni dwã nyàlpyɛ̀ wẽ́: èta vwĩ̀-jùlú w m'a jǐrh Yi dúdú nyɔ̃̌, kɔn rɛ́ tɛ̀bɛ́ rə̀ m'a dwə̀rh vwĩ̀-jùlú w myɛ m'a jǐrh Yi nyǎn. ³⁸ Súlí nyǐ kɔn rɛ́ tɛ̀bɛ́ ǹ la vwĩ̀-jùlú w yó zwə́l mó: pyì-bwǎlsɛ sə̀lyè sə̀ zhe byin rə̀dù rə̀dù, dɛ̃ gakó, twéé twéé yilə. ³⁹ Ǹ m'ǎ zwə́l pyì-bwɛ̀lɛ́ èdù y nəkɔkɔ́lɛ́ nɛ, ń zwə́l è dõ mó cɛ y gə tú è n'ê byíbyílí yi ní. ⁴⁰ Ǹ m'ǎ súlí mún cəə́le rə̀tɔ̀ mə̀ ywə́rh ǹdə́ nwə̃̌ kaka yə̀ y gùlí lyítər ǹdə́ fwã́ ǹdə́ də̀vɛ̃́ bə̀ la tɛ̃́ ló bə pə Cinu ni lyítər ǹdə́ fwã́ pyì-bwɛ̀lɛ́ nã́yə́ə́ y ne. ⁴¹ Ǹ m'ǎ zwə́l pyì-bwǎlsɛ́ sə̀lyè nyǎ y cɛ y gə tú è n'ê byíbyílí yi ní, ń súlí mún cəə́le rə̀tɔ̀ mə̀ ywə́rh ǹdə́ nwə̃̌ kaka yə̀ y gùlí lyítər ǹdə́ fwã́ ǹdə́ də̀vɛ̃́ lyítər ǹdə́ fwã́ bə̀ la tɛ̃́ ló bə pə Cinu ni ǹdə nəkɔkɔ́lɛ́ y ta: rə̀ m'a yə̀ lwẽ́ nã́nyə̀nyɛ̀lɛ́ rə̀ n'ê swé lyim tɛ̃́, vwĩ̀ tɛ̀bɛ́ rə̀ kɔn gakó jú myǐn Cinu yilə. ⁴² Rə̀myɛ́ mɔ́ m'a j'a yə̀ twéé twéé vwĩ̀ námpúm cɛ̃́ɛ̃́ rɛ́ á m'ǎ n'á zwə́l byin byin gakó, dwã-joló w kòrhó w étwí-ènyí rí wə, Cinu yé né. Wɔ́ gàà à m'a jəl ába nɛ́ a m'a zɔ̀m ǹdə́ mɔ́ nɛ́. ⁴³ À m'a jəl Esərayɛl lyì byǎ bɛ́ jàà y èmyɛ́ wẽ́, sə à còrhó w m'a ce e jǐrh àmyɛ́ jàà. ⁴⁴ À m'a ce dwã-joló kòrhó w ǹdə́ vwĩ̀-jùlú w jǐrh àmyɛ́ nyǎn. À m'a cír Aarɔ̃ ǹdə́ ń byǎ bɛ́ bə twĩ̀ à vwĩ̀ rí zwə́l tum rí. ⁴⁵ À m'a yə̀ Esərayɛl lyì byǎ bɛ́ cəcəl wə, sə à m'a yə̀ bə̀ Yi. ⁴⁶ Bə̀ m'a lwar bə̀ wɔ́ àmyɛ́ Cinu, à ce bə shə́r Ezhibti tənà y w mùnì a yə̀ bə̀ cəcəl w mó, à wɔ́ bə̀ Yi rí. Wɔ́ àmyɛ́ Cinu à wɔ́ bə̀ Yi rí.