¹ Bəsalɛl ǹdə́ Owɔləyaabɛ e súlí lyì bí byɛ̀bɛ́ gakó Cinu yà ń co lárma ǹdə́ surhə bə̀ wẽ́ mùnì ga bə ŋwɛ̀nɛ́ bə twĩ̀ tumə né còrhó-jì y zhe nə̀ tum mú, m'a wɛ̀rhɛ́ kɔn rɛ́ tɛ̀bɛ́ gakó Cinu pɔ rə̀ nyí mú.» ² Muyiisi ce bə byẽ̀ Bəsalɛl ǹdə́ Owɔləyaabɛ e súlí lyì bí byɛ̀bɛ́ gakó Cinu yà ń ce bə sú ǹdə́ lárma, bə̀ gakó j'à y'à shɛ̀nɛ́ bə̀ la tumə né tũ̌ mú. ³ Bə b'e zwẽ Esərayɛl lyì byǎ bɛ́ pansɛ́ bə̀ y'à lɔ còrhó-jì y lú yil mú Muyiisi sõ. Sə lyì bí gə́ y'à gwẽ̌ n'ê zə pansɛ́ bə̀ twí nəkɔkɔ́lɛ́ nəkɔkɔ́lɛ́ gakó mó ce, ⁴ tùntùnnə byɛ̀bɛ́ bə̀ y'à n'ê twĩ̀ còrhó-jì y tumə dúdúmə́ dúdúmə́ né mó zhǐr mə̀dù mə̀dù bə yẽ̌ tumə né bə̀ y'à n'ê twĩ̀ mú ni, ⁵ bə vò bə wɔ̀ Muyiisi ni: «Wẽ̀ ré tɛ̀bɛ́ lyì bí n'ê zə bə̀ twí mú búl rə̀ já dɛ̃́dɛ̃́ tumə né nyɛ̀bɛ́ Cinu pɔ nyí bə̀ bə̀ twĩ̌ mú yilə!» ⁶ Rə̀myɛ́ yi ní, Muyiisi pə nyí bə̀ bə̀ bwə̌l zulə́ jàà y w bə wɔ̀: «Bal ráá kɛ̃, bə̀k'a kə́ n tɛnɛ pansɛ còrhó-jì y yil yé!» Dwí rí j'â k'ê yə̀ pansɛ zə rə m'e bə̀ yé. ⁷ Pansɛ́ sə̀ y'à pɔ mɔ́ y'à yú tumə né nə̀ y'à la tũ̌ mú, sə̀ gaga mɔ́ búl sə dàl. ⁸ Tùntùnnə byɛ̀bɛ́ bə̀ y'à búl bə̀ yě tum rí yé shò du bə̀ dwã bɛ́ mɔ́ zə lɛ̃̌ bə̀ nyɔ̀ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ bə m'e sɔ̃̀ kàmə̀jɛ̀rh shíyə́, bə súlí bə zò shərəbɛ̃́bá èsã̌yùúli rə̀ búl rə̀ càn dɛ̃́dɛ̃́ sə̀ yó. ⁹ Kàmə̀jɛ̃̀ èdù gakó dwɛ̀lɛ̀ rɛ́ y'à wɔ́ jə̀-tórhó yírhə́ shí-èlyè ǹdə́ lyɛlɛ, è wɛ̃̀ rɛ́ y'à wɔ́ jə̀-tórhó yírhə́ nə̀na. Kàmə̀jɛ̀sɛ́ gakó dwɛ̀lɛ̀ rɛ́ ǹdə́ sə̀ wɛ̃̀ rɛ́ ga y'à mə̌ dwã. ¹⁰ Muyiisi jɛ̀nɛ̀ n kwè kàmə̀jɛ̀rh sə̀nu n zhílí dwã nɛ, rə̀myɛ́ kwã nɛ́, ń kwè sə̀ dwã sə̀nu y n zhílí sə̀myɛ dwã nɛ. ¹¹ N wɛ̀rhɛ́ pyì-kur rə̀ mɔ́rh námpùúlí lyẽẽ́se n ce kùr ré nã́yéé ré kàmə̀jɛ̃̀ nã́yə́ə́ y ne. N zɛ̃̀ n wɛ̀rhɛ́ èta myɛ n ce kùrə̀ nə̀lyè nyǎn rɛ́ kàmə̀jɛ̃̀ nánkwaá y myɛ nɛ. ¹² N ce lyẽẽ́se shí-ènu kàmə̀jɛ̃̀ nã́yə́ə́ y nyí rí ni n twèlé, n súlí n ce sə̀ dwã shí-ènu kàmə̀jɛ̀sɛ́ sə̀ zhí zhí dwã nɛ kùrə̀ né nə̀lyè nyǎn rɛ́ kàmə̀jɛ̃̀ nánkwaá nyí rí ni n twèlé, sə zǎ dwã sə̀lyè sə̀lyè. ¹³ Ń zùrhì sánə́má pyə́lsɛ shí-ènu n mə n pyə́l kàmə̀jɛ̀sɛ́ sə̀ zhí zhí dwã nɛ́ kùrə̀ né nə̀lyè y mó dwã nɛ, èta Yi kòrhó w j'a yə̀ kɔn rə̀dù námpúm. ¹⁴ Rə̀myɛ́ kwã nɛ́, ń sɔ̃̀ bɔ̃̀-kur kàmə̀jɛ̀rh shí ǹdə́ èdù ń la n mə n pú Yi kòrhó w yə́-pɛ̀lɛ́ yá. ¹⁵ Bɔ̃̀ kur kàmə̀jɛ̀sɛ́ shí ǹdə́ èdù y gakó y'à mə̌ dwã. Èdù gakó dwɛ̀lɛ̀ rɛ́ y'à wɔ́ jə̀-tórhó yírhə́ shə́-ètɔ̀, è wɛ̃̀ rɛ́ y'à wɔ́ jə̀-tórhó yírhə́ nə̀na. ¹⁶ Ń zhílí kàmə̀jɛ̀rh sə̀nu dwã nɛ sə̀ nyí, n zɛ̃̀ n kə́ n zhílí shə̀ldù myɛ dwã nɛ sə̀myɛ sə̀ nyí. ¹⁷ N wɛ̀rhɛ́ lyẽẽ́se shí-ènu n ce kàmə̀jɛ̀sɛ́ sə̀ zhí zhí dwã nɛ kùr ré nã́yéé ré kàmə̀jɛ̃̀ nánkwaá nyí rí ni n twèlé. N súlí n wɛ̀rhɛ́ rə̀myɛ́ rə̀dù y kàmə̀jɛ̀sɛ́ sə̀ zhí zhí dwã nɛ kùrə̀ né nə̀lyè nyǎn rɛ́ kàmə̀jɛ̃̀ nánkwaá y myɛ nyí rí ni n twèlé. ¹⁸ N zùrhì kàmmɔ pyə́lsɛ shí-ènu n mə n pyə́l kàmə̀jɛ̀sɛ́ sə̀ zhí zhí dwã nɛ kùrə̀ né nə̀lyè y mùnì ga kòrhó w yə̀ kɔn rə̀dù námpúm. ¹⁹ N súlí n tɛnɛ pyì-byərh tàndɛ rə̀ mɔ́rh nánshɛ̀n n mə n pyìlì kòrhó w kàmə̀jɛ̃̀ y yə́-pɛ̀lɛ́ wa, n súlí n pyìlì dɔfɛ̃́ɛ̃́sɛ tàndɛ ò yə́-pɛ̀lɛ́ wa. ²⁰ Rə̀myɛ́ kwã nɛ́, ń sə̀l ákáshá dǎr n cìì tɛ̃́ ń la mə n kwɛ̃́ Yi kòrhó wə́. ²¹ Dɔ̌ òdù gakó dwɛ̀lɛ̀ rɛ́ y'à wɔ́ jə̀-tórhó yírhə́ shíyə́, ò wɛ̃̀ rɛ́ y'à wɔ́ jə̀-tórhó yírh rə̀dù ǹdə́ fwã́; ²² Dǎr rɛ́ òdù gakó y'à zhe pyəla nə̀lyè, nə̀ y'à ŋwɛ́nɛ́ dwã nyí ni. Ń wɛ̀rhɛ́ Yi kòrhó w dǎr rɛ́ gakó èta. ²³ Yi kòrhó w dǎr rɛ́ shò kwã mɔ́, ń sə̀l rə̀ shí-èlyè, Yi kòrhó w sarh rɛ́ rə̀ zǎ Nəgɛɛvɛ səta, jə̀-jĩ́ sõ mó yilə; ²⁴ Ń zùrhì sə̀byì-kùlì wẽ̀ shə́-èna dǎr rɛ́ kùrə̀ né la rə̀ yó cṹ, wẽ̀ rə̀lyè dɔ̌ òdù gakó kùr wə, ò pyəla nɛ́ nə̀lyè y yilə, wẽ̀ dwã rə̀lyè dɔ̌ dõ kùr wə, òmyɛ pyəla nə̀lyè y yilə. ²⁵ Ń sə̀l dǎr shí-èlyè Yi kòrhó sarh rɛ́ dõ mó rə̀ zǎ jə̀-gwã̀ sõ mó yilə, ²⁶ n súlí n zùrhì sə̀byì-kùlì wẽ̀ shə́-éna dǎr rɛ́ kùrə̀ né la rə̀ yó cṹ mú, wẽ̀ rə̀lyè dɔ̌ òdù gakó kùr wə, wẽ̀ dwã rə̀lyè dɔ̌ dõ myɛ kùr wə. ²⁷ Ń sə̀l dǎr tə̀ldù, Yi kòrhó w etwã-kùr ré, kɔn zǎ nə̀-fɔ̀lɔ̀ w səta mɔ́ yilə; ²⁸ Ń súlí n sə̀ dǎr rə̀lyè Yi kòrhó w etwã-kùr ré kwã́ɔ̃́ yilə; ²⁹ Rə̀ y'à kɔl dwã nɛ rə̀ tɛ̃́ mɔ́, sə rə̀ yə́-pǎlsɛ́ zhə̀l sə zhí dwã nɛ cìbyǔ nã́yóó w bɔ̀l mɔ́ wẽ́. Ń wɛ̀rhɛ́ èta dǎr rɛ́ rə̀lyè y ga yilə, n mə n kwɛ̃́ Yi kòrhó w etwã-kùr ré nə̀gúlə́ né nə̀lyè yə́. ³⁰ Rə̀myɛ́ mɔ́ ce dǎr rɛ́ y'à wɔ́ dǎr lyɛlɛ ǹdə́ rə̀ sə̀byì-kùlì wẽ̀ ré rə̀ kùrə̀ né n'ê cĩ́ rə̀ yó mó shí ǹdə́ tə̀ldù: wẽ̀ rə̀lyè rə̀lyè dɔ̌ òdù gakó kùr wə. ³¹ Rə̀myɛ́ kwã nɛ́, ń sə̀l ákáshá də̀-byǎ: bə lyẽ bə̀nu Yi kòrhó w èpá èdù dǎr rɛ́ nɛ bə jarh, ³² bə lyẽ də̀-byǎ bə̀nu dwã Yi kòrhó w èpá dõ mó dǎr rɛ́ nɛ bə jarh, bə zɛ̃̀ bə lyẽ bə̀nu Yi kòrhó w etwã-kùr ré rə̀ zǎ nə̀-fɔ̀lɔ̀ w səta mɔ́ dǎr rɛ́ nɛ bə jarh. ³³ N ce cəcəl dɔ̌ w zhì Yi kòrhó w kùr w ò mɛrhɛ dwã ǹdə́ dǎr rɛ́ bòbõ̌ w o m'o vò o yí Yi kòrhó w yə́-pɛ̀lɛ́ wa. ³⁴ Ń yə̌l sánə́má n mə n fwàl dǎr rɛ́, n zùrhì rə̀ cìbyǔr rí bə̀ la də̀-byǎ bɛ́ rə̀ wẽ́ co mó ǹdə́ sánə́má, n súlí n yə̌l sánə́má n mə n fwàl də̀-byǎ bɛ́ bə̀ la dǎr rɛ́ nɛ lyõ bə jarh mɔ́. ³⁵ Rə̀myɛ́ kwã nɛ́, n zə pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ ǹdə́ lɛ̃̌ bə̀ nyɔ̀ n mə n sɔ̃̀ gɔ̀nɔ̀; n zò shərəbɛ̃́bá myaarhɛ n cĩ́ ò yó. ³⁶ Ń sə̀l ákáshá yə nə̀na, n yə̌l sánə́má n mə n fwàl nɛ ǹdə́ nə̀ pyə́lsɛ sə̀ zùrhì ǹdə́ sánə́má, gɔ̀nɔ̀ w yilə. Ń zùrhì sə̀byì-kùlì wẽ̀ rə̀na yə né kùrə̀ né la rə̀ yó cṹ. ³⁷ Ń zə lɛ̃̌ bə̀ nyɔ̀ ǹdə́ pyì-kur rə̀ mɔ́rh námpùúli ǹdə́ nánshɛ̀n e súlí nánshɛ̀n gwɛ̃́gwɛ̃́ n sɔ̃̀ gɔ̀nɔ̀ Yi kòrhó étwí-ènyí rí yilə; rə̀myɛ́ mɔ́ yàl lyì bí byɛ̀bɛ́ bə̀ y'à yě tum rí rə̀myɛ́ mɔ́ yé shò mó tum, ³⁸ ǹd'ô yə né nə̀nu yə́, ǹdə́ nə̀ pyə́lsɛ́ ǹdə́ nə̀ wẽ̀ ré, bə̀ la yə né yə́-pǎlsɛ́ w cṹ mú bə̀ yə̌l sánə́má bə m'e fwàl mɔ́, e súlí rə̀ wẽ̀ ré rə̀nu y yə né kùrə̀ né la rə̀ yó cṹ rə̀ zùrhì ǹdə́ kàmmɔ mɔ́.