¹ Bə̀ gə zɔ ŋwɔ̀l-bal cəcɛ̃ nɛ ǹdə́ ń nə́ ń pwə́r byílí, bə zɛ̃̀ bə gu mu, bə̀ t'â la ń jal mɔ́ jim cṹ yé. ² Sə bə̀ gə gu mu ǹdə́ yi rí y'à púrh rə yí dɛ̃̌, bə̀ m'a cĩ́ ń jal mɔ́ jim. Ŋwɔ̀l-bal gakó mə̌ dwã sə n cə̀rh kɔna, kɔn rɛ́ tɛ̀bɛ́ ń ŋwɔ̀l mɔ́ jàà wa: ń gə bə kaka zhe, sə bə yè mo bə cĩ́ kɔn rɛ́ tɛ̀bɛ́ ń ŋwɔ̀l mɔ́ jàà wa. ³ Bə̀ gə nɔ vwǎm mɔ́ ń ŋwɔ̀l mɔ́ nã́nyì ń jɔ̃̀ wa, è wɔ́ nɔ̃ ráá bə̀na ráá pyìrhə̀, ń mà n cə̀rh vwàmá nə̀lyè vwǎm mə̀dù gakó jàà wa. ⁴ Lò gə yẽ̌ ń vwàmá nɛ nə zù ń dõ cɛ ráá ń də̀vɛ̃́-cèmé cɛ wẽ́ nə dɔ̃̀, wɔ́ ń cɛ y kɛ̀bɛ́ è j'â càn dɛ̃́dɛ̃́ mɔ́ jíjí rí ráá ń də̀vɛ̃́-cèmé né cɛ y kɛ̀bɛ́ è j'â càn dɛ̃́dɛ̃́ mɔ́ də̀vɛ̃́-cèmé byǎ bɛ́ ń mà n mə n cə̀rh. ⁵ Lò gə ju sɔ̀lɔ̀ myǐn, myǐn mú zɛ̃̀ mə lyɛ̃ mə jí bə̀lɛ́ bə̀ kwar bə cĩ́ púl púl mú ráá kɛ̀bɛ́ è gwẽ̌ zhǐ dɛ̃̌ mɔ́ ráá cɛsɛ́, ń mà n cə̀rh kɔn rɛ́ tɛ̀bɛ́ myǐn mú jú mú. ⁶ Lò gə pɔ sə̀byǐ ráá wẽ̀ dwã ń dõ ne n cĩ́, ŋwɔ̀l-bal zɛ̃̀ n bə̀ n ŋwɔ̀ rɛ ń sõ jù wə, bə̀ gə zɔ ŋwɔ̀l-bal mɔ́, ń mà n cə̀rh kɔn rɛ́ tɛ̀bɛ́ ń ŋwɔ̀l mɔ́ rə yí rə̀ twər kùrə̀ nə̀lyè. ⁷ Sə bə̀ gə yə̀ ŋwɔ̀l-bal mɔ́ zal, lò mó mɔ̀bɔ́ kɔn rɛ́ jé ń sõ jù w mú mà n bə̀ n zhì Yi yé né n bwəl nyí mùnì ga bə lwar b'è də̀ ńmyɛ̌ ń kwè ń dõ mó kɔn rɛ́ yé. ⁸ Dwã vɔ̃ gə ŋwɛ́nɛ́ lyì cəcəl wə, nɔ̃ ráá bə̀na ráá pyìrhə̀ ráá kàmə̀zù-fwɛ̀lɛ̀ ráá kɔn dɛ̌ dɛ̌ rə̀ jé shò kwã nɛ́, mɔ̀ zhe bə̀ «Wɔ́ mə̀myɛ́ cìcì», mɔ̀ myɛ zhe bə̀ «Wɔ́ mə̀myɛ́ cìcì», sə bə zə yò w bə m'e yí Yi yé né. Lò mó mɔ̀bɔ́ Yi la dóó ń yó w cṹ mú mà n cə̀rh kɔn yí vwàmá nə̀lyè, ń dõ mó né. ⁹ Lò gə pyi bə̀na ráá nɔ̃ ráá pyìrhə̀ ráá vwǎm mɔ̌ mɔ̌ ń dõ ne, vwǎm mɔ́ gə zɛ̃̀ mə̀ cùwə̀ ráá mə cɛ̀mɛ̀ ráá vwǎrhna zə mɔ bə m'e lyɛ̃ e jà lò yə̀ lwar, ¹⁰ mɔ̀bɔ́ bə̀ y'à pyi mu vwǎm mɔ́ mà n zə Cinu yil ré n bwəl nyí bə̀ ń yə̀ ń dõ mó kɔn rɛ́ ŋwɔ̀l yé. Vwǎm mɔ́ cə́bal mɔ́ mà n zwẽ nyí. Sə mɔ̀bɔ́ bə̀ y'à pyi mu vwǎm mɔ́ tá ń la kaka cə̌rh yé. ¹¹ Sə bə̀ gə ŋwɔ̀l mɔ ń nyí ni, ń mà n cə̀rh mə̀ cə́bal nɛ. ¹² È gə wɔ́ gɔ ku ò zɔ vwǎm mɔ́ o dɔ̃̀ o zhəzhɛrɛ, ń mà n pwà vwǎm mɔ́ nàmá bɛ́ bə̀ dàl mɔ́ n mə n bà, rə̀ yə̀ zhə̀n pɔ kɔna. Ń tá ń la cə̌rh vwǎm mɔ́ gɔ ku w zɔ o dɔ̃̀ yil yé. ¹³ Lò gə zwẽ vwǎm ń dõ sõ, vwǎm mɔ́ zɛ̃̀ mə cɛ̀mɛ̀ ráá mə cì ǹdə́ mə̀ cə́bal mɔ́ tɛ̀nɛ́, ń mà n cə̀rh. ¹⁴ Sə è gə yàl mə̀ cə́bal mɔ́ yírh wə, ń tá ń la cə̌rh yé. Sə è gə y'à wɔ́ zwẽ́ ń zwẽ mo ń la mə n twĩ̀ sə n kwɛ̃̌ mɔ, ń mà n pə mə̀ ye yə́. ¹⁵ Bal gə swèlè kɛ̃-byǐ è gwẽ̌ yə̀l bal párá, n zù ǹdə́ yá, ń mà n pə è zhùùrí, n zɛ̃̀ n jí y e yə̀ ń kɛ̃. ¹⁶ Kɛ̃-byǐ y da mɔ́ gə cẽ ń bə̀kɔ́ mɔ́ pɔ, bal mɔ́ mà n pə sə̀byǐ mə mɛrhɛ kana-byǎ bɛ́ byɛ̀bɛ́ bə̀ gwẽ̌ yə̀l bal pár mɔ́ zhùùrí ye yə́. ¹⁷ Ǹ tá ǹ la kɛ̃ mɔ̀bɔ́ ń nə́ ń twĩ̀ jə̀jǐrh-ywẽ̀ tumə né ne yõ̌ nã́nyì yé. ¹⁸ Bə̀ gu lò mɔ̀bɔ́ ń zù ǹdə́ vwǎm mɔ́. ¹⁹ Bə̀ gu lò mɔ̀bɔ́ ń nə́ ń zwə́l vwə̃̀ ń pɛ yə dwã nɛ, n yẽ̌ Cinu dúdú ni pɔ mɔ́ nɛ, Cinu yilə. ²⁰ Ǹ tá ǹ la pyà ń tó zhə-bal mɔ̀bɔ́ ń jě ǹ sõ mó dɛnnɛ ń zɛ̃̀ yé ráá ǹ ta ǹ la mɔ nɔ̀nɔ̀ yé, bə̀ ámyɛ yàl zhələ Ezhibti tənà y wa. ²¹ Á t'á la ejə̃̀-kɛ̃ mə̀dù ga ráá bə̀tɛ̀lɛ́ èdù ga nɔ̀nɔ̀ yé. ²² Ǹ gə nwɛ̀nɛ̀ bə̀myɛ́ mə̀dù, n zɛ̃̀ n búbwéé n ce ne, à m'a cili ń búbwéé yə́, ²³ à lyim rí m'a j'a zɛ̃̀ dɛ̃́dɛ̃́, sə à m'a gu ába ǹdə́ búlə́ shù. Á kana bɛ́ m'a jǐrh ejə̃̀-kana, á byǎ bɛ́ myɛ m'a jǐrh bə̀tǎlsɛ. ²⁴ Ǹ gə jìmì sə̀byǐ à dwí rí lò ne, mɔ̀bɔ́ ń wɔ́ nə̀mɔ̀ ń ŋwɛ́nɛ́ ǹdə́ mɔ́ nɛ, ǹ tá ǹ la mɔ wɔ̀rhɔ́ ǹdə jìmnə̀ bé dwã bɛ ta yé. Á t'á la mɔ nyɔ́ɔ́ n pyà twirí n pə ába yé. ²⁵ Ǹ gə zwẽ ǹ dõ kàmə̀zù-fwɛ̀lɛ̀ kɔn rɛ́ tɛ̀bɛ́ ǹ pɔ mɔ mɔ́ jàà wa, sə́ vò ń pə y ǹdə́ yi rí gwẽ̌ yə̀ zwì yé, ²⁶ bə̀ wɔ́ èmyɛ́ dúdú è wɔ́ ń gàmə̀lyɔ̀nɔ̀, ń mə́ ń círhí ń yala nɛ́. Bə̀kɔ́n ń la pyìlù n mə n pyẽ̀ tɛ̃́? Ń gə búbwéé ń co ne, à m'a cili mu, b'àmyɛ́ wɔ́ nɔ̀nɔ̀-dǔr cə́bal. ²⁷ Ǹ tá ǹ la Yi tǔrh yé; ǹ tá ǹ la lwɛlɛ bwəl ń pə lò mɔ̀bɔ́ ń wɔ́ yó-cə́bal nɛ ǹ dwí rí wẽ́ yé. ²⁸ Ǹ tá ǹ la ǹ jíjə́ né byǎ bɛ́ byɛ̀bɛ́ bə̀ byìl mú ǹdə́ ǹ də̀vɛ̃́ y yə dwã nɛ pɔ yé. Ǹ m'ǎ súlí ń pɛ̃ ǹ byì-cɛsɛ́. ²⁹ Ǹ m'ǎ wɛ̀rhɛ́ èta myɛ ǹdə́ ǹ nɛ̃ nɛ́ e súlí ǹ pyììsí byì-yéésé: vwǎm mɔ́ byì-yə́ə́ y m'a mɛ̃ è ná y kwã nɛ́ dwã nyàlpyɛ̀; ³⁰ sə è dwã lyɛlɛ dɛ̃ rɛ́, ǹ m'ǎ zə y ń zwə́l vwĩ̀ ń pɛ̃. ³¹ Á m'ǎ yə̀ à dwí námpúm cɛ̃́ɛ̃́. Á t'á la vwǎm mɔ̀bɔ́ gɔ ku zɔ o dɔ̃̀ o zhəzhɛrɛ mɔ́ dɔ́m yé. Á m'ǎ pə mɔ kǔlse ne.