¹ Cinu súlí n wɔ̀: Nyǐ nyə́ dwã ǹ la ń zɔ̀m nə̀ yò ń byili Esərayɛl lyì byǎ bɛ́ nɛ: ² Ǹ gə yè yə-bal ń wɔ́ Ebərəbá dwí rí lò, ń mà n twĩ̀ byinə nyə̀ldù, sə byinə nyàlpyɛ̀ byin rí, ń mà n nə ń cìnə̀, n shə́r ǹ sõ, ń tá ń la kwǎndɛ kwã̀ɔ̃́ yé. ³ Ń gə yà ń tú ǹ sõ ǹdə́ ń wɔ́ bəjə̀m-bal, ń mà n ká n kwɛ̃̀ bəjə̀m-bal. Ń gə yà ń zhe kɛ̃, ń kɛ̃ mɔ́ mà n tó mo n kwɛ̃̀. ⁴ Ń yó-cə́bal mɔ́ gə yà ń pɔ mɔ kɛ̃, kɛ̃ mɔ́ zɛ̃̀ n lù bala-byǎ ráá kana-byǎ n pɔ̃, ń yó-cə́bal mɔ́ mà n cìní kɛ̃ mɔ́ ǹdə́ ń bə̀sɔ́ná bɛ́ ga, sə ńmyɛ̌ mà n nə ń cìnə̀, n kwɛ̃̀ ń dúdú. ⁵ Sə yə-bal mɔ́ gə wə̀lə̀: «À só à yó-cə́bal mɔ́ ǹd'â kɛ̃ mɔ́ e súlí à bə̀sɔ́ná bɛ́, à t'â yǎl a nə à cìn s'a kwɛ̃̀ a yẽ̌ be yé», ⁶ ń yó-cə́bal mɔ́ mà n zə mɔ n mə n bwəlse Yi yala nɛ, n zə mɔ n mə n yí ń jì y étwí-ènyí rí ni ráá étwí-ènyí rí bòlò w sarh nɛ, n zə məshǐm n mə n pwə́r ń zhɛ̃̌ rɛ́. Kɔn zhì dɛ̃ rɛ́ rə̀myɛ́ mɔ́, ń mà n já ń nə́ ń twĩ̀ ń pɛ mɔ twéé twéé. ⁷ Bal gə kwè ń bə̀kɔ́ n yè, yə-kɛ̃ ńmyɛ̌ mɔ́ tá ń la ń cìn nɔ ǹdə bala byɛ̀bɛ́ bə̀ wɔ́ yómə́ gə́ n'ê nɛ bə̀ cìn ní ta yé. ⁸ Yə-kɛ̃ mɔ́ gə yə̀ ń yó-cə́bal mɔ́ bùlə̀ yí, yó-cə́bal mɔ́ zɛ̃̀ ń tá ń yǎl mɔ́ ń la jú n yə̀ ń kɛ̃, ń mà n ce bə̀ kwɛ̃̌ mùnì ga n nə ń cìnə̀. Ń yó-cə́bal mɔ́ bə sɔ́má zhe ń yè mó ǹdə́ dwí dõ lyì yé, b'è m'a yə̀ wɔ́ myíní ń myìnì mu. ⁹ Sə è gə wɔ́ yé ń yè mo ń la ń byǐ ni pɔ, ń mà n wɛ̀rhɛ́ mɔ ǹdə lùl-e-púrí y nyə́ né gə́ byili ní, kana-byǎ bɛ́ shò kwã nɛ́ mɔ́. ¹⁰ Yə-kɛ̃ mɔ́ yó-cə́bal mɔ́ gə jú kɛ̃ dõ n mə n súlí mu, ń tá ń la kùjú w ǹdə́ gàndɛ́ e súlí kɛ̃-jú nyə́ né kaka bɔ̌ ń kɛ̃ nã́yə́ə́ mó yil yé. ¹¹ Ń gə tá ń pɛ mɔ wẽ̀ kùrə̀ nə̀tɔ̀ y rə̀myɛ́ mɔ́, yə-kɛ̃ mɔ́ mà n nə ń cìn n shə́r sə ń tá ń la sə̀byǐ kwã̀ɔ̃́ yé. ¹² Lò mɔ̀bɔ́ ń mà numbyíní n gu, sə bə gu ńmyɛ. ¹³ Sə ń gə yə̀ jɛ̀nɛ̀ n pyà ń gu mú, bə̀ wɔ́ Yi rə̀ shɛ̀nɛ́ n tó ń jɛ̃̀ nɛ, à m'a byili mú jàà, gurnə mó dùr n vò n shèè è wẽ́. ¹⁴ Sə è gə wɔ́ lò mó mɔ̀bɔ́ ń lyim zɛ̃̀ rə̀ n'ê yì ń dõ dɛ̃́dɛ̃́, n zɛ̃̀ n zə surhə n yíní mu n gu, má rə̀-ná-cí zhə̀l n vò n pyɛ́l à vwĩ̀-jùlúa w ni n mə n ce cã̌ myɛ, ǹ m'ǎ kɔl mɔ gàà mùnì ga bə gu mu. ¹⁵ Lò mɔ̀bɔ́ ń mà ń da ráá ń ná, sə bə gu mu. ¹⁶ Lò mɔ̀bɔ́ ń ŋwɔ̀l numbyíní, ń gə yè y ráá bə̀ nɔ y ń sõ, sə bə gu mu. ¹⁷ Lò mɔ̀bɔ́ ń bwəl lwɛlɛ n pə ń da ráá ń ná nɛ, sə bə gu mu. ¹⁸ Lyì gə n'ê bwí dwã, mə̀dù zɛ̃̀ n mà ń dõ mó ǹdə́ jɛ̃̀ ráá n zə nə́kulu n dul mu n cɛ̀mɛ̀ kɔn b'e yí n pyẽ̀ tɛ̃́, sə ń yə̀ cì, ¹⁹ lò mó mɔ̀bɔ́ ń cɛ̀mɛ̀ mɔ́ gə wɔ̌ ń nə́ ń zɛ̃̀ ń zhí ń də̀-dɔ̀lɔ̀ w ń dwi pwẽ̀ ne, bə̀ t'â la còrhò-tum lò mó mɔ̀bɔ́ ń cɛ̀mɛ̀ mɔ mɔ́ nɛ pɔ yé. È wɔ́ ń gə́ mɛ̃ ń yə̀ tum twĩ̀ mú dúdú kwǎndɛ ń mà n kwɛ̃̌ sə n súlí n ce bə shili mu kɔn m'e yí n wárh. ²⁰ Lò mɔ̀bɔ́ ń mà ń yə-bal ráá ń yə-kɛ̃ ǹdə́ gwə̌ n gu, sə bə cĩ́ bə̀ jim ń yó. ²¹ Sə yə-bal mɔ́ ráá yə-kɛ̃ mɔ́ bə̀ mà mɔ́ gə bwəl bə gwẽ̌ wɛ̀rhɛ́ dɛ̃ rə̀dù ráá dwã nə̀lyè rə̀myɛ́ kwã nɛ́, bə̀ t'â la bə̀ jim cṹ, bə̀ bə̀ y'à wɔ́ bə̀ yó-cə́bal wɛ́rɛ́ kɔna. ²² Bala gə n'ê bwí dwã bə zɛ̃̀ bə zhə̀r epùwə̀, e j'a lù ǹd'ê pwǐ y gwẽ̌ yə̀ yí yé, yò dõ gə yə̀ ò twə́r né ce, bə̀ m'a kwɛ̃̌ kɔn rɛ́ tɛ̀bɛ́ kɛ̃ mɔ́ byal mɔ́ la bɛ byilu mú. Bə̀ m'a jɛ̀nɛ̀ bə zhərh ǹdə́ dwã yò w shò kwã nɛ́ bə ce dwã yó, bə zɛ̃̀ bə kwɛ̃̌. ²³ Sə yò gə yàl nɛ́, wɔ́ myə̌l bə̀ m'a m'e cĩ́ myə̌l jim, ²⁴ yírh bə̀ m'a m'e cĩ́ yírh jim, yélé bə̀ m'a m'e cĩ́ yélé jim, jɛ̃̀ bə̀ m'a m'e cĩ́ jɛ̃̀ jim, nà bə̀ m'a m'e cĩ́ nà jim, ²⁵ myǐn zə e m'e mɔ̌r bə̀ m'a m'e cĩ́ myǐn zə e m'e mɔ̌r jim, lò cɔ̀mɔ̀ bə̀ m'a m'e cĩ́ lò cɔ̀mɔ̀ jim, mààrɛ̀ bə̀ m'a m'e cĩ́ mààrɛ̀ jim. ²⁶ Lò gə mà ń yə-bal ráá ń yə-kɛ̃ yírh n lá, ń mà n dwĩ̀ mu, ń yírh ré rə̀ lɔ́ mɔ́ jàà wa. ²⁷ È gə wɔ́ ń yə-bal ráá ń yə-kɛ̃ yélé ń mà n ká, ń mà n dwĩ̀ mu, yélé ré rə̀ kɔ́ mɔ́ jàà wa. ²⁸ Nɔ̃ gə zò bal ráá kɛ̃ ǹd'ô nyimi ní o gu, bə̀ m'a dul w bə gu, sə bə̀ t'â la ò nàmá bɛ́ dɔ́m yé. Bə̀ t'â la yò cṹ ò cə́bal mɔ́ yó w yé. ²⁹ Sə nɔ̃ w gə y'à jɛ̀nɛ̀ o myɛ̀rhɛ̀ lyì bí pwǎ shãã ga, bə jà cĩ́ ò cə́bal mɔ́ nɛ n zɛ̃̀ ń yə̀ w yìlì, rə̀myɛ́ yi ní, ò gə zɛ̃̀ ò gu bal ráá kɛ̃, sə bə dul w bə gu. Bə̀ m'a súlí bə gu ò cə́bal mɔ́ myɛ. ³⁰ Bə̀ gə ju mu bwã̌, ń mà n pə kɔn rɛ́ tɛ̀bɛ́ gakó bə̀ m'a pɔ̃ rə̀ nyí mú, n mə n zwẽ ń myə̌l ré. ³¹ Nɔ̃ w gə gu bal-byǐ ráá kɛ̃-byǐ, sə bə wɛ̀rhɛ́ w ǹdə nyí rí rə̀myɛ́ mɔ́ gə́ n'ê byili ní. ³² Nɔ̃ w gə zò yə-bal ráá yə-kɛ̃ o gu, ò cə́bal mɔ́ mà n kwɛ̃̌ wár-kùlsi shə́-ètɔ̀ yə-bal mɔ́ ráá yə-kɛ̃ mɔ́ yó-cə́bal mɔ́ nɛ; sə bə dul nɔ̃ w bə gu. ³³ Lò gə yẽ̌ nɛ̃̌-gɔ́rɔ́ nyí rí ni nánfò ráá n kù nɛ̃̌-gɔ́rɔ́ n zɛ̃̀ ń yə̀ ò nyí rí ni pyi nɔ̃ ráá bə̀na zɛ̃̀ e tu ò wẽ́, ³⁴ nɛ̃̌-gɔ́rɔ́ w cə́bal mɔ́ mà n cə̀rh. Ń mà n pə sə̀byǐ vwǎm mɔ́ mə̀ cù mú cə́bal mɔ nɛ. Ń mà n zɛ̃̀ n cìní vwǎm mɔ́ mə̀ cù mú. ³⁵ Lò nɔ̃ gə zò lò dõ nɔ̃ o gu, bə̀ m'a yè nɔ̃ w ò yírhə́ ŋwɛ́nɛ́ mɔ́, bə tə̀ ò wársɛ́ ǹdə́ dwã; bə̀ m'a súlí bə tə̀ kɔ̀bɔ́ ò cù mú myɛ. ³⁶ Sə bə̀ gə y'à yě bə̀ nɔ̃ w òmyɛ́ mɔ́ y'à jɛ̀nɛ̀ o myɛ̀rhɛ̀ ò n'ô zwè shãã ga, ò cə́bal mɔ́ jà n zɛ̃̀ ń yə̀ w yìlì, ń mà n cə̀rh nɔ̃ kɔ̀bɔ́ ò cù mú jàà wa, sə ńmyɛ̌ mà n cìní kɔ̀bɔ́ ò cù mú.