¹ Rə̀myɛ́ yó, Yi zɛ̃̀ rə wɔ̀ tɛ̀bɛ́ gakó Esərayɛl lyì byǎ bɛ́ nɛ: ² «Wɔ́ àmyɛ́ Cinu, ǹ Yi rí, à ce ń shə́r Ezhibti tənà y wa, yómə́-jè né mó: ³ Ǹ tá ǹ la yə dwã zal àmyɛ́ yé né yé. ⁴ Ǹ tá ǹ la yi rə̀dù ga èsã̌yùlú ráá kɔn rɛ́ tɛ̀bɛ́ rə̀ wɔ dɛ̃̌-yi rí w ráá cɛ y yó ráá cɛ y kùr w nàná bɛ́ wẽ́ nyɔrhɔ wɔ̀rhɔ́ yé. ⁵ Ǹ tá ǹ la tɛ̃́ wùlù yə né nə̀myɛ́ mɔ́ yé né yé, e súlí myɛ ǹ tá ǹ la nɛ còrhó yé, bə̀ wɔ́ àmyɛ́ Cinu à wɔ́ ǹ Yi rí, Yi rí tɛ̀bɛ́ rə̀ zhe bwɛ̃̌ dǔr mú; rə̀ n'ê pɛ dabá byɛ̀bɛ́ bə̀ súl re mó dóó w còrhò-tum bə̀ byǎ bɛ́ nɛ, kɔn b'e yí nɛ̀mɛ́ kùrə̀ nə̀tɔ̀ ǹdə́ kùrə̀ nə̀na. ⁶ Sə rə̀ n'ê byili rə̀ wu-bɔ̀nɔ̀ w lyì bí byɛ̀bɛ́ bə̀ só ré bə súlí bə̀ n'ê zwẽ rə̀ nyə́ né mó nɛ̀mɛ́ kùrə̀ mɔ̀ɔ̀rhɛ̀ nánzhəzhɔ̌ nɛ. ⁷ Ǹ tá ǹ la Cinu ǹ Yi rí yil ré byõ̌ nánfò yé, bə̀ Cinu tá ń la lò mó mɔ̀bɔ́ ń byẽ̀ ń yil ré nánfò mó ne yõ̌ ǹdə rə̀-ná-cí bə dóó zhe ta yé. ⁸ Bə̀ lyǐrh shìrhə́ dɛ̃ rɛ́ yò, bə ce rə yə̀ Cinu dɛ̃. ⁹ Ǹ m'ǎ twĩ̀ ǹ tumə né gakó dwã nyə̀ldù wẽ́, ¹⁰ sə dwã nyàlpyɛ̀ dɛ̃ rɛ́ wɔ́ shìrhə́ dɛ̃ rɛ́ tɛ̀bɛ́ Cinu, ǹ Yi rí cǐ mú. Dɛ̃ rɛ́ rə̀myɛ́ yù wə, ǹmyɛ́ ráá ǹ byǐ ráá ǹ bə̀kɔ́ ráá ǹ tùntùnnə, bal ráá kɛ̃, ráá ǹ vwàmá nɛ́ ráá zhə-bal mɔ̀bɔ́ ń wɔ ǹ cɛmɛ nɛ́ wẽ́ mó, tá ń la tum rə̀dù ga tũ̌ yé. ¹¹ Bə̀ Cinu wɛ̀rhɛ́ dɛ̃̌-yi rí ǹdə́ cɛ y e súlí nə̀-fɔ̀lɔ̀ w ǹdə́ kɔn rɛ́ tɛ̀bɛ́ gakó rə̀ wɔ rə̀ wẽ́ mó dwã nyə̀ldù, sə ń shǐrh dwã nyàlpyɛ̀ dɛ̃ rɛ́ yù wə. Wɔ́ rə̀myɛ́ è ce, Cinu cĩ́ bwəl shìrhə́ dɛ̃ rɛ́ yó, n zɛ̃̀ n vùr re rə̀ j'â wɔ́ ńmyɛ̌ nyǎn. ¹² Nyám ǹ da ǹdə́ ǹ ná, mùnì ga ǹ myə̌l zə dwɛ̀lɛ̀ cɛ y kɛ̀bɛ́ Cinu, ǹ Yi rí pɔ mɔ́ mɔ́ wẽ́. ¹³ Ǹ tá ǹ la numbyíní gu yé. ¹⁴ Ǹ tá ǹ la fwə̌l yé. ¹⁵ Ǹ tá ǹ la ŋwɔ́l yé. ¹⁶ Ǹ tá ǹ la kɔn rɛ́ tɛ̀bɛ́ rə̀ də̀ zhə̀n cṹ ǹ jè-dõ shò kwã yé. ¹⁷ Ǹ tá ǹ la ǹ jè-dõ kɛ̀lɛ́ y bwɛ̃̌ dǔr yé. Ǹ tá ǹ la ń kɛ̃ mɔ́ ráá ń tùntùnnə mɔ̀bɔ́ ń wɔ́ bal ráá kɛ̃, ráá ń nɔ̃ w ráá ń bə̀na y ráá ń kɔn dɛ̌ dɛ̌ bwɛ̃̌ dǔr yé.» Yi gwẽ̌ n'ê byili rə̀ cìnə̀ ¹⁸ Dwí rí gakó y'à nyɛ̌ dwà y byɛɛ́sɛ́ rə̀ súlí rə̀ y'à nə è lyə́lyɔ̌ mɔ́; rə̀ y'à nyɛ̌ pyì-bya nyu w cəl ré rə súlí rə̀ nə pyɔ̀ w ò y'à sú ǹdə́ nyɛ̀sɛ́ mɔ́. Rə̀ y'à zɛ̃̀ rə̀ n'ê kəkə, rə j'a mɛ̃ pyépyé rə̀ zhǐ. ¹⁹ Esərayɛl lyì byǎ bɛ́ wɔ̀ Muyiisi ni: «Ǹmyɛ́ cìcì mú zɔ̌m ǹdə́ nə́ba, nə́ m'ǎ cili; sə Yi bə̀k'a zɔ̀m ǹdə́ nə́ba yé, è gə də̀ rə̀myɛ́ nə́ m'ǎ cì!» ²⁰ Muyiisi wɔ̀ dwí rí ni: «È wɔ́ á zhõ̀ yil Yi túwə́, mùnì ga rə ce á nyàm rɛ sə á bə̀k'á wɛ̀rhɛ́ yə̀-bəlwàálɛ yé.» ²¹ Dwí rí j'a mɛ̃ pyépyé rə̀ zhǐ, sə Muyiisi twẽ̌ n bwəlse ébɔ̃ námbyṹ w Yi y'à ŋwɛ́nɛ́ ò wẽ́ mó ne. ²² Cinu wɔ̀ Muyiisi ni: «Nyǐ kɔn rɛ́ tɛ̀bɛ́ ǹ m'ǎ wɔ̀ Esərayɛl lyì byǎ bɛ́ nɛ mɔ́: Á cìcì mú yírhə́ nə bə̀ wɔ́ dɛ̃̌-yi rí w à zhì ní a m'a zɔ̀m ǹd'ába. ²³ Á t'á la yə wɔ̀rhɔ́ á m'á súlí àmyɛ́ nɛ yé. Á t'á la sə̀byì-kùlì ráá sánə́má yə zùrhù á cìn yil yé. ²⁴ Ǹ m'ǎ lù bo vwĩ̀-jùlú ń mə́ zwə́l ǹ və̌-ywàálɛ́ ǹdə́ ǹ vwàmá nánfwààlɛ́ vwə̃̀ námpúmə́ cɛ̃́ɛ̃́ nɛ́ ǹdə́ ǹ yə̀-zùlə́ vwə̃̀ né ò yó, ń pɛ̃. Jàà kɛ̀bɛ́ gakó à m'a ce bə lyǐrh à yil ré yò è wẽ́, à m'a bə̀ gàà mɔ́ a cĩ́ bwəl ǹ yó. ²⁵ Sə è gə wɔ́ nə́kulə vwĩ̀-jùlú ǹ la lú ń pɛ̃, sə ǹ bə̀k'á lù w ǹdə́ nə́kulə nyɛ̀bɛ́ nə̀ sə̀l yé, bə̀ lù ku w m'a ce nə́kulə né jǐrh wẽ̀ nánfwə̀r. ²⁶ Ǹ tá ǹ la nə̀rh-cṹ byílsí yó tó ń mə́ jì ń vò à vwĩ̀-jùlú w yó yé, mùnì ga lò bə̀ká n nə ǹ cə̀-lwè y yéa.»