¹ Esərayɛl lyì byǎ bɛ́ gə́ tú bə shə́r Ezhibti tənà y w cànsɛ̀ sə̀tɔ̀ kwã nɛ́, bə̀ yú Sənəyi gɔ-elũ èpòlò w wə. ² Bə̀ zhì Erəfyidim ní bə vò bə yí Sənəyi gɔ-elũ èpòlò w wə, sə bə̀ zul gɔ-elũ èpòlò w wə, pyɔ̀ w yé y wə. ³ Muyiisi jìl pyɔ̀ w yó ń la n vò n jəl Yi. Cinu zhì pyɔ̀ w yə́-pɛ̀lɛ́ y w n byẽ̀ mo, ń mə́ ń wə̀l mo: «Nyǐ kɔn rɛ́ tɛ̀bɛ́ ǹ m'ǎ wɔ̀ Zhakɔɔbɛ byǎ bɛ́ nɛ, nyǐ nyí rí tɛ̀bɛ́ ǹ m'ǎ cĩ́ Esərayɛl lyì byǎ bɛ́ nɛ mɔ́: ⁴ ‹Á cìcì yírhə́ nɔ kɔn rɛ́ tɛ̀bɛ́ à wɛ̀rhɛ́ Ezhibti lyì bí ni mú, ǹd'â gə́ kwè ába ǹdə ényə̀la vɔ̃̀mɛ̀ yó né ta, a m'a zə ába a m'a yí à sõ né. ⁵ Èlǎsɛ̃́, á gə cili ni, á shɛ̀nɛ́ á zwẽ à dɔbrɛ́ nyə́ né, á m'ǎ yə̀ à cəl à cír dwə́ né gakó cəcəl wə, bə̀ lũ w púlə́púlə́ wɔ́ àmyɛ́ à cǐ wə. ⁶ Sə ámyɛ̌ m'ǎ yə̀ vwĩ̀-zwə́lnə dwí à yilə, dwí tɛ̀bɛ́ Cinu dúdú cǐ mú.› Wɔ́ zɔ̀mà nɛ́ nə̀myɛ́ mɔ́ ǹ m'ǎ cĩ́ Esərayɛl lyì byǎ bɛ́ nɛ.» ⁷ Muyiisi kwɛ̃̀ n bə̀ zulə́ jàà y wa, n byẽ̀ dwí rí náncɛsɛ́ dwã yó, n cĩ́ bi zɔ̀mà nɛ́ nə̀myɛ́ gakó, Cinu yà ń pɔ mɔ nyí bə̀ ń cĩ́ mú. ⁸ Dwí rí gakó tó dwã rə lyár rə wɔ̀: «Nə́ m'ǎ wɛ̀rhɛ́ kɔn rɛ́ tɛ̀bɛ́ gakó Cinu wə̀l mó.» Sə Muyiisi zə kɔn rɛ́ tɛ̀bɛ́ dwí rí lyár mɔ́ n vò n cĩ́ Cinu ni. ⁹ Cinu wɔ̀ Muyiisi ni: «Nyǐ à m'a zù ébɔ̃ námbyṹ wẽ́ a só a bə̀ ǹ sõ, mùnì ga dwí rí nyɛ̀ɛ̀ à cəl ré à gə tú à n'â zɔ̀m ǹdə́ mɔ́ yi ní sə rə súlí rə zə ǹmyɛ zhə̀nà, twéé twéé yilə.» Muyiisi cĩ́ Cinu ni n ká n bwérhé dwí rí gə́ lyár nɛ́ mɔ́. ¹⁰ Cinu kə́ n wɔ̀ Muyiisi ni: «Kwɛ̃̀ ń vò dwí rí sõ ń vò ń tɛnɛ rɛ zà ǹdə́ nəkɔla, Cinu yilə; rə súlí rə shɛ̀rh rə̀ gàndɛ́, ¹¹ rə tɛnɛ rə zhì dwã nə̀tɔ̀ dɛ̃ rɛ́ yilə, bə̀ wɔ́ dwã nə̀tɔ̀ dɛ̃ rɛ́ yù w Cinu mà n só Sənəyi pyɔ̀ w yó, dwí rí púlə́púlə́ yírh wə. ¹² Cĩ́ swɛ̃́ ń mə́ kə́kɛ́lɛ́ pyɔ̀ w sə́ wɔ̀ dwí rí ni: ‹Yìlì-nə á bə̀k'á jì pyɔ̀ w yó yé, sə á bə̀k'á twẽ̌ á yí ò kùr nyí ni dɛ̃́dɛ̃́ myɛ yé.› Bə̀ m'a gu lò mɔ̀bɔ́ gakó ń dwə̀rh w mó! ¹³ Jɛ̃̀ t'â la mɔ dwə̌rh yé, sə wɔ́ dúl bə̀ m'a dul mo ǹdə́ nə́kulə ráá bə tə mɔ ǹdə́ cama bə gu. Dóó-cí mú, è wɔ́ vwǎm ráá numbyíní, tá ń la lú yé. Bə̀ gə nyɛ̀ɛ̀ pyì-bya nyu pɔ́lá y cəl ré rə̀ dom, lyì màngɛlɛ́ m'a jì pyɔ̀ w yó.» ¹⁴ Muyiisi kə́ n shí pyɔ̀ w yó n só tɛ̃́ n kwɛ̃̀ n bə̀ dwí rí sono. N ce rə tɛnɛ rə̀ cìn Cinu yilə, rə súlí rə shɛ̀rh rə̀ gàndɛ́, ¹⁵ n zɛ̃̀ n wɔ̀ rɛ: «Tɛnɛ-na á dɛ̃̀, dwã nə̀tɔ̀ zà. Á bə̀k'á zù ǹd'á kana bɛ́ yé.» ¹⁶ Sə dwã nə̀tɔ̀ dɛ̃ rɛ́ nəkɔkɔ́lɛ́ yá, dwà y y'à zɛ̃̀ è n'ê bya, è n'ê lyə́lyɔ̌, ébɔ̃ námbyṹ b'ò zhǐ pyɔ̀ w yə́-pɛ̀lɛ́ wa, pyì-bya nyu pɔ́lá dom cəl nánfɔ̀lɔ̀; dwí rí púlə́púlə́ j'a zɛ̃̀ rə̀ n'ê kəkə zulə́ jàà y wa. ¹⁷ Rə̀myɛ́ yi ní, Muyiisi ce dwí rí shə́r zulə́ jàà y wa, mùnì ga rə vò rə jəl Yi. Rə bə̀ rə̀ zhǐ pyɔ̀ w kùr wə. ¹⁸ Sənəyi pyɔ̀ w y'à sú ǹdə́ nyɛ̀rh dúdú, bə̀ Cinu yà ń só ò yó, myǐn mú wə. Ò nyɛ̀sɛ́ y'à la dɛ̃̌-yi w ǹdə myìn-cɔ̀lɔ̀ nyɛ̀rh ta. Pyɔ̀ w gakó j'a búl o zhízhǐ. ¹⁹ Pɔ́lá y cəl ré y'à j'â n'ê súlí: Muyiisi yà ń nə́ ń zɔ̀mà, sə Yi y'à n'ê tó dwà y byɛɛ́sɛ́ dɛnnɛ rə̀ lyár mɔ. ²⁰ Cinu só n bə̀ Sənəyi pyɔ̀ w yə́-pɛ̀lɛ́ y wa, n zɛ̃̀ n zhì gàà mɔ́ n byẽ̀ Muyiisi, sə Muyiisi jìl n vò gàà. ²¹ Cinu wɔ̀ Muyiisi ni: «Só tɛ̃́ ń cící dwí rí bə̀ rə̀ bə̀k'a dùr rə̀ la vò rə nyǐ Cinu yé, è gə də̀ rə̀myɛ́, rə̀ lyì nánzhəzhɔ̌ m'a cì. ²² Vwĩ̀-zwə́lnə bé bə̀ n'ê bwəlse Cinu yala nɛ mɔ́ cìcì mú mə̌ dwã sə bə ce jàn nɛ́ bə tɛnɛ bə̀ cìn Cinu yilə, mùnì ń bə̀ká n gu bi yé.» ²³ Muyiisi wɔ̀ Cinu ni: «Dwí rí wàr rə̀ m'a jì Sənəyi pyɔ̀ w yó yé, bə̀ ǹ dámǎ ń cící nə́ba, ǹ gə́ wə̀l nə́ba: Cĩ́ swɛ̃́ ń mə́ kə́kɛ́lɛ́ pyɔ̀ w s'o yə̀ Cinu nyɔ̃̌.» ²⁴ Cinu wɔ̀ mɔ: «Kwɛ̃̀ ń só tɛ̃́, sə́ zə Aarɔ̃ ń kwɛ̃̀ ń jì ń bà. È gə wɔ́ vwĩ̀-zwə́lnə bé ǹdə́ dwí rí yilə, bə̀ bə̀k'a dùr bə̀ la jíl bə vò Cinu sõ yé, è gə də̀ rə̀myɛ́ ń mà n gu bi!» ²⁵ Rə̀myɛ́ yó, Muyiisi ká n só tɛ̃́ n vò dwí rí sõ, n vò n zɔ̀m ǹdə́ rɛ.