¹ Muyiisi cə́mbal Zhətəro, Majã vwĩ̀-zwə́lnə mó, yà ń nyɛ̀ɛ̀ bə̀ n'ê zɔ̀m kɔn rɛ́ tɛ̀bɛ́ Yi y'à wɛ̀rhɛ́ Muyiisi ǹdə́ rə̀ dwí Esərayɛl lyì byǎ bɛ́ yil mú gakó yò: Cinu yà ń ce Esərayɛl lyì byǎ bɛ́ shə́r Ezhibti tənà y wa! ² Muyiisi gə́ ce ń kɛ̃ Səfɔra kwɛ̃̀ kwã nɛ́, ń cə́mbal Zhətəro zwẽ Səfɔra ń sõ ³ ǹdə́ ń byǎ bɛ́ bə̀lyè yə́: mə̀dù y yà ń yíl Gɛrəshɔn, rə̀ kùr wɔ́ «Zhə-bal nyɔ̀nɔ̀»; bə̀ ń yà ń wə̀l ń cìn ni: «À jǐrh zhə-bal tənà dõ wẽ́». ⁴ Ń dõ mó yà ń yíl Elyəzɛɛrɛ, rə̀ kùr wɔ́: «À Yi rí wɔ́ à sɛ̃ɛ̃́.» Ń yà ń nə́ ń wə̀lə̀: «Wɔ́ à nàmbal mɔ́ Yi rí rə̀ tú rə sɛ̃ nɛ rə ce a lú Faraɔ̃ búlə́ shù w yé né.» ⁵ Muyiisi cə́mbal Zhətəro e súlí Muyiisi byǎ bɛ́ ǹdə́ ń kɛ̃ mɔ́ zɛ̃̀ bə vò Muyiisi sõ, gɔ-elũ èpòlò w ń yà ń zul né mó, Yi pyɔ̀ w səta mɔ́ wa. ⁶ N ce bə wɔ̀ Muyiisi ni: «Wɔ́ àmyɛ́ ǹ cə́mbal Zhətəro, à bàn ǹ sono ǹdə́ ǹ kɛ̃ mɔ́ e súlí ń byǎ bɛ́ bə̀lyè y ń kwã nɛ́.» ⁷ Muyiisi du n jəl ń cə́mbal mɔ́, n wùlì tɛ̃́ ń yé né, n zɛ̃̀ n kwə̀ə̀lè mo; bə bwə̀rh dwã jàn bwə̀rhə́, bə zɛ̃̀ bə zə dwã bə zù kòrhó w wə. ⁸ Muyiisi cĩ́ kɔn rɛ́ tɛ̀bɛ́ gakó Cinu yà ń tə̀ Esərayɛl lyì byǎ bɛ́ yil n wɛ̀rhɛ́ Faraɔ̃ ǹdə́ Ezhibti lyì bí ni ń cə́mbal mɔ́ nɛ, e súlí zwini rí tɛ̀bɛ́ gakó Cinu yà ń ce bə lú rə̀ wẽ́ sɔ́má y kǒ yi ní mú. ⁹ Rə̀myɛ́ kwã nɛ́, Zhətəro wu zɔ nyàn cɛ̀nɛ̀ rɛ́ tɛ̀bɛ́ gakó Cinu yà ń wɛ̀rhɛ́ Esərayɛl lyì byǎ bɛ́ nɛ, ń gə́ zwẽ be Ezhibti lyì bí jɔ̃̀ w mɔ́ yilə. ¹⁰ Zhətəro zɛ̃̀ n wɔ̀: «Bə̀ Cinu mɔ̀bɔ́ ń zwẽ ába Ezhibti lyì bí jɔ̃̀ wa, ǹdə́ Faraɔ̃ jɔ̃̀ wa, ńmyɛ̌ mɔ̀bɔ́ ń zwẽ dwí rí Ezhibti lyì bí jɔ̃̀ w mɔ́, yil ré nə còrhó! ¹¹ Èlǎsɛ̃́, à yě bə̀ Cinu já ń búl ń du yə né dwã bɛ́ gakó, má nə̀ lyimə né gə tú nə̀ zɛ̃̀ nə̀ n'ê yì Esərayɛl lyì byǎ bɛ́ yi ní myɛ.» ¹² Muyiisi cə́mbal Zhətəro zwə́l vwĩ̀ námpúm cɛ̃́ɛ̃́ ǹdə́ yə̀-zùlə́ vwə̃̀ n pə Yi ni. Aarɔ̃ ǹdə́ Esərayɛl náncɛsɛ́ bə̀ bə tó Muyiisi cə́mbal mɔ́ nɛ bə jí vwĩ̀ rí kùjú w Yi yé né. ¹³ È zɛ̃̀ nəkɔkɔ́lɛ́ yá, Muyiisi yà ń zhə̀l ń jě ń la dwí rí bùrsí bǔr, dwí rí myɛ mɛ̃ rə dɛ̃̀ Muyiisi yé né, nəkɔkɔ́lɛ́ ga kɔn m'e yí də̀dɛ̀nɛ́. ¹⁴ Muyiisi cə́mbal mɔ́ gə́ nɔ kɔn rɛ́ tɛ̀bɛ́ gakó Muyiisi yà ń nə́ ń wɛ̀rhɛ́ dwí rí yil mú, n bwə̀rh mo n wɔ̀: «Bə̀kɔ́n ǹdə́ tɛ̀bɛ́ ǹ nə́ ǹ wɛ̀rhɛ́ dwí rí yil mú? Byè yil ǹ nə jě bùrsí bǔr jàà w ǹ dúdú dwí rí zɛ̃̀ rə̀ zhǐ dɛ̃̌ ǹ yé né, nəkɔkɔ́lɛ́ kɔn m'e la də̀dɛ̀nɛ́?» ¹⁵ Muyiisi lyár ń cə́mbal mɔ́ n wɔ̀: «Wɔ́ dwí rí gə́ n'ê twí à sõ rə̀ la m'e sú Yi wu mú è ce. ¹⁶ Yò gə ŋwɛ́nɛ́ bə̀ cəcəl wə, bə̀ n'ê twí à sono, a kə́ bùrsí yò w shò kwã nɛ́, a súlí a ce bə lwar Yi pùbùlə̀ né ǹdə́ rə̀ nyə́ né párá.» ¹⁷ Muyiisi cə́mbal mɔ́ wɔ̀ mɔ: «Ǹ gə́ nə́ ǹ wɛ̀rhɛ́ nɛ́ ma mɔ́ bə càn yé. ¹⁸ Ǹ jàn rɛ́ m'a zhɛ̀ rə yẽ̌ mó, dwí rí tɛ̀bɛ́ rə̀ ŋwɛ́nɛ́ ǹdə́ mɔ́ myɛ jàn rɛ́ m'a zhɛ̀ rə yẽ̌ re. Tum rí wɔ́ vwə̀lí ǹ yilə, ǹ wàr rɛ ǹ la tũ̌ ǹ dúdú yé. ¹⁹ Èlǎsɛ̃́, cili ni náàcɛ̀nɛ́! À n'â pɛ mɔ́ cúcú, sə Yi yə̀ nɛ́ ǹdə́ mɔ́! Ǹ m'ǎ vò zhì dwí rí jàà w Yi yé né: ǹmyɛ́ ǹ m'ǎ zə rə̀ ywẽ̀ né ń mə́ vò Yi yé né, ²⁰ ń cèrhè Cinu pùbùlə̀ né ǹdə́ ń nyə́ né lyì bí ni, ń súlí ń byili bi sɔ́má y kɛ̀bɛ́ bə̀ mə̌ sə bə kwè mó ǹdə́ bə̀ gə́ mə̌ sə bə zə bə̀ cìn ní. ²¹ Sə rə̀myɛ́ kwã nɛ́, ǹ m'ǎ cír lyì byɛ̀bɛ́ bə̀ zhe kùr dwí rí wẽ́, bə̀ n'ê nyàm Yi, lyì bí zhe bə̀ zhə̀nà, lyì bí byɛ̀bɛ́ bə̀ wàr bə̀ la bɛ yǒ ǹdə́ pánsɛ mɔ́, ń ce bə yə̀ nunə mɔ̀rhɔ̀ mɔ̀rhɔ̀ ǹdə́ nunə zɔ̌m zɔ̌m ǹdə́ nunə shí-ènu shí-ènu e súlí nunə shí shí kùkùlə̀ né yó-cìnə́. ²² Bə̀ m'à j'â ŋwɛ́nɛ́ twéé twéé bə̀ n'ê bùr dwí rí bùrsí. Bə̀ m'a zə ywẽ̀ nánfwààlɛ́ bùrsí bə b'e pɔ̃́, sə bə̀myɛ́ cìcì mú m'a bùr ywẽ̀ námpɔ́lsɛ́ bùrsí. Wɛ̀rhɛ́ èta ń mə́ bɔ̀ ǹ zhĩĩ rí dùmì rí, sə bə tó mó bə zhĩ ri! ²³ Ǹ gə wɛ̀rhɛ́ rə̀myɛ́ mɔ́, è gə́ wɔ́ kɔn rə̀myɛ́ mɔ́ Yi pɔ mɔ́ rə̀ nyí mú, ǹ m'ǎ ŋwɛ̀nɛ́ ń zhì dɛ̃̌ kẽkẽ. Kɔn súlí myɛ, dwí rí tɛ̀bɛ́ gakó m'a kwɛ̃̀ rə vò rə̀ sõ ǹdə́ yə̀-zùlə́.» ²⁴ Muyiisi cili ń cə́mbal mɔ́ cúcú mú, n zɛ̃̀ n zɛ̃̀ n wɛ̀rhɛ́ kɔn rɛ́ tɛ̀bɛ́ gakó ń yà ń byili mu mú. ²⁵ Muyiisi cír lyì bí byɛ̀bɛ́ bə̀ zhe kùr Esərayɛl tənà y púlə́púlə́ wẽ́, n ce bə yə̀ nunə mɔ̀rhɔ̀ mɔ̀rhɔ̀ ǹdə́ nunə zɔ̌m zɔ̌m ǹdə́ nunə shí-ènu shí-ènu e súlí nunə shí shí kùkùlə̀ né yó-cìnə́. ²⁶ Bə̀ y'à j'â ŋwɛ́nɛ́ twéé twéé bə̀ n'ê bùr dwí rí bùrsí. Yò w kɔ̀bɔ́ ò y'à zum mú, bə̀ y'à n'ê zhə̀l bə̀ pɛ w Muyiisi ni, sə kɔ̀bɔ́ ò y'à mə̌ mɔ́, wɔ́ bə̀myɛ́ cìcì mú bə̀ y'à n'ê bùr ò bùrsí. ²⁷ Sə rə̀myɛ́ kwã nɛ́, Muyiisi yẽ̌ ń cə́mbal mɔ́ nɛ n kwɛ̃̀ n vò ń tənà y wa.